Luu 21

Tèwànynɔ̌-a nyǐ-dɛ̍

(Maɛ 12.41-44)

1Jusu gbɛ̀n-aeɛ, iě ɔ̍ jě pàn-nyɔ̍ nɛ̀ u̍h-a po̍ u̍h-a nyǐ-dɛ̍ᵻ dě wlǐ di̍i̍ sà-ɛ gblòùn di̍i̍ dě slaǎ sà gbò sɔ̀n. 2Dǒ ɔ̍ jě-e tèwànynɔ̌ due ke, ɔ̍ pa̍ nyɔ̍gbà. Wɛ̀ ɔ̍ po̍-e falǐ jɔ̌ sɔɔ̌n. 3Iě Jusu la̍a̍, “Bɔ̌ ǐn sèàɛ̍ mɔ̀ gblangbai̍ wlùh, nyɔ̍gbà tèwànynɔ̌ la ɔ̍ po̍ dɛ̍ dɔu dě gblòùn la di̍i̍ ɛ̍ sìì nyɔ̍ kli̍hgbɛ̍. 4Dɛ̍nu̍ɛ, nyɔ̍ duuh nɔ̀ɔ̍, dǒ u̍h-a wlǐ dɔu kɛ̍n bo u̍h gba̍ sɔ̍n wɛ̀ u̍h po̍ gblòùn la wlǐ di̍i̍. Jɛ nynɔ̌ la ɔ̍ nyɔ̍gbà wliɛ̍ ɔ̍ blě-a ɔ̍ iě-a wlì tè-ɛ, ɛ̍ bo ɔ̍ po̍-e kli̍hgbɛ̍.”

Nyɔsoa-a slaǎ sà gbò-a mu̍-u gbɔ̀lɔ

(Matio 24.1-2; Maɛ 13.1-2)

5Sɔɔ̌ᵻ chɛ̀ chɛ̀ bo u̍h poe Nyɔsoa-a slaǎ sà gbò. Sɔ ɛ̍ nmɔ jii̍, ɛ̍ ke nyǐ-dɛ̍ᵻ ìh kɔn-a dǒ Nyɔsoa we̍-ɛ ke. I̍h kɔn we̍ sɔ̀ìn bo kòà duuh-a chɛ̍n, iě Jusu la̍a̍ dě u̍h we̍, 6“Sɔɔ̌ᵻ kli̍hgbɛ̍ la mɔ̀-a jě-aɛ, ɛ̍ mu̍ ti̍ kɔn i̍h iě wlǎ. I̍h-a dɛ̍ se̍ dǒ i̍h ba̍ kɛ̍n sie mu̍.”

Wě ke klě jě-ɛ

(Matio 24.3-14; Maɛ 13.3-13)

7Wɛ̀ Jusu-a kòà tèle ɔ̍ i̍, u̍h la̍a̍, “Dlǔtu, ti̍we̍ ìh la i̍h-a mu̍ nɛ ɛ? Nɛ̀ pò i̍h ja la̍ nɛ mu̍-ɛ, nɛ̀ dɛ̍ bo ɛ̀ mu̍ juola nu̍ à iě i̍ juo ɛ?”

8Iě Jusu la̍a̍, “Mɔ̀ nu̍ mɔ̀-a chɛ̀-a nɛnɛ̌ wɛ̀ nyɔ̍-ɔ je̍e mɔ̀ i̍ boe. Dɛ̍nu̍ɛ, nyɔ̍ dɔu-a mu̍ dǒ ǎn nynɛ̌ kɛ̍n jii, u̍h iě ka nu̍, ‘Mɔ̍ bo ɔ̀ nu̍ Chèɛ̀ Tba̍ju. Bɔ̌ɛ-o ti̍ kɔǎn we̍ wɛ̀.’ Jɛ mɔ̀ bɔ̌ dǒ u̍h de̍e̍ gbǎ-a. 9Mɔ̀-a mu̍ tu̍h-a fɔ̀n-ɛ ke klě jě-ɛa pɔ̀n wɔ̌n, jɛ faɔn bɔ̌ mɔ̀ nu̍-ɛ. Dɛ̍nu̍ɛ, ìh la i̍h kɔn i̍h iě nɛ sàǐtòò. Jɛ nɛ̀ ti̍-a dlǔ i̍ chlà-a se̍ i̍ kɔǎɛn ke̍.”

10Wɛ̀ ɔ̍ la̍a̍ dě u̍h we̍, “Bloa̍ ke bloa̍-a mu̍ fɔ̀n, wɛ̀ kɔ̀mla̍ ke kɔ̀mla̍ iě fɔ̀n. 11Wlù poɔ ɛ̀ ku̍-a wɔ̍n-ɛ ke, mɔ̌ ke wɛ̌ᵻá mu̍ tà kli̍hgbɛ̍ gbǎ, wɛ̀ slènai dɛ̍ᵻ ke wɔ̍n ku̍ jbaɛdih iě dě ja̍u̍n wlì sɔ. 12Jɛ pò ìh kli̍hgbɛ̍ la i̍h iě nɛ-ɛ, mɔ̀-a mu̍ gbɛ̍n-ɛ, u̍h iě mɔ̀ klě jě-e. Nɛ̀ u̍h-a mu̍ mɔ̀ sàwi̍h sì la̍ gba̍ dě wɛɛ sà gbòᵻ sɔ̀n i̍, wɛ̀ u̍h iě mɔ̀ kasooᵻ i̍ po̍. Ǎn tìh-ɛ, u̍h-a mu̍ mɔ̀ dǒ blǔh baaᵻ ke kɔ̀mla̍ᵻ jǔ gba̍. 13Dǒ mɔ̀-a mu̍ flɔn la̍ jě-e, wɛ̀ mɔ̀ iě pɔ̀n chɛ̀-a tìh we̍i̍ bla̍. 14Dɛ̍ mɔ̀ iě-a wlùh kɛ̍n tè-ɛ, ɛ̍ nu̍ dɛ̍ mɔ̀-a mu̍-a bla̍ dǒ ti̍ laa̍ di̍i̍-ɛ, ɛ̍ sèò bɔ̌ mɔ̀ nu̍-ɛ. 15Dɛ̍nu̍ɛ, ǎn mu̍ mɔ̀ wlu̍ wɔ̍ɔ̍n po̍, wɛ̀ iě mɔ̀ flɔ̍nwlùh nyǐ. Nɛ̀ mɔ̀-a nyɛ̌-nyɔ̍ se̍ ɛ̍ i̍ nyna-a bɛ̌ɛ mu̍ u̍h iě ɛ̍ dǒ wìè-i sà. 16Mɔ̀-a de̍ᵻ ke, de̍di̍i̍ᵻ ke, wloa̍ nyɔ̍ ke ba̍ᵻá mu̍ mɔ̀ kwlǎ sà. Nɛ̀ mɔ̀-a duuh-a mu̍ dbǎ-ɛ. 17Nyɔ̍ kli̍hgbɛ̍-a mu̍ mɔ̀ faɛn ǎn tìh. 18Jɛ mɔ̀-a mǐ-ɛ jɔɛ̍ due-a chɛ̀ bo ɛ̀ se̍ mǎ mu̍ dǒ mɔ̀ dlǔ. 19Mɔ̀-a dě klì i̍ ku̍-ɛ bo ɛ̀ mu̍ mɔ̀-a chɛ̀ sèìe.

Juluslɛn wlɔ̀-a mu̍-u gbɔ̀lɔ

(Matio 24.15-21; Maɛ 13.14-19)

20“Jɛ pò mɔ̀ jě Juluslɛn wlɔ̀ wɛ̀ fledlǔ iě ɛ̍ dlɛ̌-ɛ, nɛ̀ mɔ̀ juo-o dɛ̍ i̍ ka ɛ̍ wa̍-a ti̍ se̍-a we̍ tɛn dɛ-ɛ. 21Nɛ̀ nyɔ̍ ùh nɛ-a dě Judia fɔɔ-ɛ, u̍h ple̍ u̍h iě dě tlu̍hᵻ kɛ̍n i̍ mu̍. Nɛ̀ nyɔ̍ ùh nɛ-a dǒ Juluslɛn wlɔ̀-a chɛ̀ di̍i̍-ɛ, u̍h sɔ-o. Nyɔ̍ ùh se̍-a doǒ nɛ-ɛ, nɛ̀ u̍h bɔ̌-o mu̍-ɛ dɛ. 22Dɛ̍nu̍ɛ, wǐh laa̍ i̍h nu̍ nyɔ̍ kàn gbɛ̍n wǐh, wɛ̀ ɛ̍ iě Nyɔsoa-a chlǐh-wlu̍ kli̍hgbɛ̍ kɛ̀ǐn po̍. 23Dǒ wǐh laa̍ di̍i̍, nɛ̀ ɛ̍ mu̍ wɔ̍n kma-dɛ̍ nu̍ dǒ kwlǐᵻ nynɔ̌gbaɔᵻ we̍, ɛ̍ ke juh-a nyǎ-ɛa nynuu̍-ɛ ke. Dɛ̍nu̍ɛ, dǒ tìh jě-ɛ klaa-a mu̍ da̍a blǔh la kɛ̍n ji̍-i, wɛ̀ Nyɔsoa iě nyɔ̍ la kàn gbɛ̍n. 24U̍h-a duuh-a mu̍ plàn chlɛ̀n i̍ mɛ̌-ɛ, wɛ̀ duuh iě gbɛ̍n-ɛɛ, u̍h iě bloa̍ kli̍hgbɛ̍ kɛ̍n i̍ gba̍-ɛ. Iě ùh se̍-a Juu nyɔ̍-ɛ u̍h iě Juluslɛn wlɔ̀ wlu̍ i̍ kɔn te̍e̍ wɛ̀ u̍h-a ti̍ iě-o i̍ wɛ̀.

Nyi̍ɔ̍-a Jǔ-a ji̍-ɛ

(Matio 24.29-31; Maɛ 13.24-27)

25“Nɛ̀ jlǔh ke chǔh ke chǔhtlɛ̀n-a mu̍ jbaɛdih po̍, wɛ̀ tìh jě-ɛ iě bloa̍ kli̍hgbɛ̍ kɛ̍n i̍ nɛ nɔ̌ kmɔ̌ la̍ we̍. Nɛ̀ nyɔ̍ kli̍hgbɛ̍-a mu̍ jbǒ-a klu̍-ɛ ke ɛ̍ dǒ po̍ wlu̍ jǔ ple̍. 26Nyɔ̍gbei-a mu̍ wlùh i̍ gboǎɛ dǒ faɔn ple̍-ɛ ke dɛ̍ ɛ̀ mu̍-a bloa̍ jii̍ nɛ-ɛ dǒ ɛ̍ kɛ̍ɛ̍n fuo-ɛ we̍. Dɛ̍nu̍ɛ, gbǐh nɛ-a dě ja̍u̍n wlì-ɛ, i̍h-a mu̍ tèla̍ wlǔh. 27Nɛ̀ u̍h-a mu̍ Nyi̍ɔ̍-a Jǔ jě ɔ̍ iě dě nǐgban kɛ̍n naɛ dě ja̍u̍n wlì dǒ gbǐh ke tìh-a i̍ bɛ̌-ɛ ɛ̀ ku̍-a wɔ̍n-ɛ we̍. 28Pò dɛ̍ᵻ la i̍h ja la̍ nɛ-ɛ, nɛ̀ mɔ̀ nyna i̍ mɔ̀ iě ku̍ dbǎ la̍ sǔh. Dɛ̍nu̍ɛ, nɛ̀ ti̍ Nyɔsoa-a mu̍-a mɔ̀ sèìe-ɛ kɔǎn we̍ wɛ̀.”

Jusu po̍ fei-tu̍-a nɛnǎ

(Matio 24.32-35; Maɛ 13.28-31)

29Wɛ̀ Jusu po̍ nɛnǎ dě u̍h we̍, ɔ̍ la̍a̍, “Mɔ̀ gbɛ̀n fei-tu̍ ke tu̍ᵻ kli̍hgbɛ̍ ja̍. 30Pò i̍h ja la̍ wlɔ̍nᵻ plɔ̀ᵻ po̍-ɛ, nɛ̀ mɔ̀ juo-o dɛ̍ i̍ ka klǎᵻ wlè nɔɔ kɔǎn-a we̍ wɛ̀-ɛ. 31Kǎ ɛ̍ nɛ ke, pò mɔ̀ jě ìh la i̍h ja la̍ nɛ-ɛ, nɛ̀ mɔ̀ juo-o dɛ̍ i̍ ka Nyɔsoa-a kmɔ̌ wlu̍ i̍ kɔn-ɛ kɔǎn-a we̍ wɛ̀-ɛ.

32“Bɔ̌ ǐn sèàɛ̍ mɔ̀ tìh-a taǐn wlùh, nyɔ̍ la ùh nɛ-a ka kmɔ̌-ɛ, u̍h se̍ mɛ̌ mu̍ te̍e̍ wɛ̀ ìh kli̍hgbɛ̍ la i̍h iě gbǎ. 33Blǔh ke ja̍u̍n-a tìh-a mu̍ i̍ sì, jɛ ǎn wlu̍ nɔ̀ɔ̍, ɛ̍ se̍ i̍ sì mu̍.

34“Mɔ̀ nu̍ mɔ̀-a chɛ̀-a nɛnɛ̌, wɛ̀ peě kɛ̍n i̍ mu̍-ɛ dɔu ke, mɔ̀-a chɛ̀ nmɔ̍ wlì sìèè-ɛ ke, kmɔ̌-a sèò la mɔ̀-ɔ je̍e i̍h we̍ maɛ wɛ̀ weɛ̍ Nyi̍ɔ̍-a Jǔ-a mu̍-a ja-ɛ, ɛ̍-ɛ je̍e mɔ̀ kɛ̍n kèè, wɛ̀ ɛ̍-ɛ je̍e mɔ̀ gbɛ̍n. 35Dɛ̍nu̍ɛ, nyɔ̍ kli̍hgbɛ̍ nɛ-a nɔ̌ kmɔ̌-ɛ bo weɛ̍ laa̍ ɛ̍ ji̍ we̍. 36Mɔ̀ nu̍ nɛnɛ̌ ti̍ kli̍hgbɛ̍ we̍. Mɔ̀ ba̍le wɛ̀ mɔ̀ iě gbǐh blě, nɛ̀ mɔ̀-a mu̍ ìh kli̍hgbɛ̍ la ìh-a mu̍-a nɛ-ɛ wɔ̍i̍n wa̍n. Wɛ̀ mɔ̀ iě dǒ Nyi̍ɔ̍-a Jǔ jǔ i̍ nyna-a bɛ̌ɛ.”

37Ka sɔ̀n-a sɛ̀n-aɛ, kǎ Jusu-a po̍ nyɔ̍ nǎ dě Nyɔsoa-a slaǎ sà gbò sɔ̀n. Jɛ pò wlù wɔ̀-ɛ, nɛ̀ ɔ̍ mu̍ pɛ̌na̍ we̍ dě Ɔle-Tu̍ᵻá Tlu̍h kɛ̍n. 38Klàɛ̍we̍ gbàìn-ɛ, nɛ̀ nyɔ̍ kli̍hgbɛ̍-a mu̍ dě ɔ̍ we̍ dě slaǎ sà gbò sɔ̀n u̍h iě ɔ̍ wlu̍ wɔ̌n.

अहिले सेलेक्ट गरिएको:

Luu 21: KDNT

हाइलाइट

शेयर गर्नुहोस्

कपी गर्नुहोस्