Luu 14

Jusu pǔh-i poa-jɔ̍gbau

1Dǒ wlè-weɛ̍ due di̍i̍ Jusu mu̍-a dɛ̍ di̍ la̍ dě Fɛlesii nyɔ̍-a dlǔtu due blǐ gbò-ɛ, nɛ̀ nyɔ̍gbei-a klǎɛ ɔ̍ jlǐhɛ̍. 2Nɛ̀ jɔ̍gbau due nɛ dǒ ɔ̍ jǔ ɔ̍ bu̍hᵻ ke ɔ̍ sɔ̍nᵻ pùn-i. 3Wɛ̀ Jusu wlu dě telě nǎ poe nyɔ̍ ke Fɛlesii nyɔ̍ we̍. Ɔ̍ la̍a̍, “À telě sà à wlu̍ kɛ̍n à iě nyɔ̍ pǔh-i dǒ wlè-weɛ̍ di̍i̍ ɛɛ, àe̍e̍ ɛ̍ se̍ à wlu̍ kɛ̍n sà ae?”

4Jɛ u̍h nɛ tìi̍n. Wɛ̀ Jusu dǔ jɔ̍gbau laa̍, iě ɔ̍ pǔh-i ɔ̍. Iě ɔ̍ sèàɛ̍ ɔ̍ wlùh ɔ̍ iě gbò we̍ mu̍. 5Wɛ̀ Jusu la̍a̍ dě u̍h we̍, “Pò mɔ̀-a nyɔ̍ blě ɔ̍ jǔ àe̍e̍ bli wɛ̀ ɛ̍ iě dě nǐ biě di̍i̍ gbǎ dǒ wlè-weɛ̍ di̍i̍-ɛ, nɛ̀ ɔ̍ se̍-o nyna mu̍ ɔ̍ iě ɛ̍-e sà ae?”

6Jɛ u̍h se̍ ɔ̍ wlu̍ pɔ̀n we̍ sà-a bɛ̌ɛ.

Nyɔsoa-a mu̍ nyɔ̍ ɔ̀ ja-a ɔ̍ chɛ̀ wlù-ɛ ja̍i̍ dǔ

7Nyɔ̍ u̍h dǎ-a dɛ̍ di̍ la̍-ɛ, ka u̍h-a duuh-a nu̍-a tà chɛ̀ klɛ̀ɛ̀n-ɛ, ɛ̍ bo Jusu jě. Iě ɔ̍ po̍ nɛnǎ dě u̍h we̍. Ɔ̍ la̍a̍, 8“Pò nyɔ̍ dǎ m̀ dǒ nynɔ̌ jla̍ ja peě kɛ̍n-ɛ, bɔ̌ tà chɛ̀ i̍ tè-ɛ. Nyɔ̍-se̍-juo nyɔ̍ ɔ̀ gbǎ-a dɛ̍kɛ̍n ɔ̀ sìì-a m̀-ɛ, u̍h dǎ ɔ̍ ke. 9Nɛ̀ nyɔ̍ ɔ̀ dǎ-a mɔ̀-a gbɔ̍ᵻ nɛ-a sɔɔ̌n-ɛ, pò ɔ̍ ji̍-ɛ, nɛ̀ ɔ̍ mu̍ ka nu̍, ‘Nyǐ jɔ̍gbau la tè la.’ Nɛ̀ pò ìn ja̍ la̍ dǒ plǒai tà i̍ tè la̍ mu̍-ɛ, nɛ̀ tɛ̀n-a mu̍ ìn nu̍. 10Jɛ pò nyɔ̍ dǎ m̀-ɛ, mu̍ ìè dǒ plǒai tà i̍ tè, wɛ̀ pò àn dihwi̍h baa ji̍-ɛ, ɔ̍ iě ka nu̍, ‘Ǐn ba̍, da̍a se̍ ìn i̍ wɔ̀, nɔ̍ɔ̀ bo ɛ̀ wɔ̀ ìn i̍ ìè i̍ tè.’ Nɛ̀ ɛ̍ mu̍ ìn kǔkɛ̍n po̍ dǒ ìn ba̍ᵻ dihwi̍hᵻ kli̍hgbɛ̍ jlǐhwai. 11Dɛ̍nu̍ɛ, nyɔ̍ jɔ dǔ-a ɔ̍ chɛ̀ ja̍i̍-ɛ, nɛ̀ ɔ̍ mu̍ wlù ja-ɛ. Nɛ̀ nyɔ̍ jɔ ja-a ɔ̍ chɛ̀ wlù-ɛ, nɛ̀ ɔ̍ mu̍ ja̍i̍ dǔ-iɛ.”

12Wɛ̀ Jusu wlu dě dihwi̍h baa we̍ ke. Ɔ̍ la̍a̍, “Pò ìn dǎ peě-ɛ, bɔ̌ ìn ba̍ᵻ o, ìn de̍di̍i̍ᵻ o, àn wloa̍ nyɔ̍ o, pàn-nyɔ̍ ùh ke ìn tǐn-a dǒ gbòᵻ nynɛ̌-ɛ o, bɔ̌ u̍h-a nyɔ̍ dǎ-a. Dɛ̍nu̍ɛ, u̍h-a mu̍ ìn peě kɛ̍n dǎ ke u̍h iě àn gba̍ sà. 13Jɛ pò ìn dǎ peě-ɛ, nɛ̀ ìn dǎ nyɔ̍gbà nyɔ̍ ke, i̍ kɔ̌-nyɔ̍ ke, klɔ-nyɔ̍ ke dɔ̌-nyɔ̍. 14Nɛ̀ àn mu̍ i̍ nmɔ, dɛ̍nu̍ɛ, u̍h nɔ̀ɔ̍, u̍h se̍ àn gba̍ sà-a bɛ̌ɛ. Jɛ ti̍ i̍ slɛ̌-nyɔ̍-a mu̍-ae wlǔh-ɛ, dǒ Nyɔsoa-a mu̍ ìn pɛ̌ɛ.”

Jusu po̍ peě klaa-a nɛnǎ

(Matio 22.1-10)

15Jɔ̍gbau due ɔ̀ ke Jusu bei tè-a i̍ dǒ teble̍ gbɔ̀-ɛ wɔ̌n-a wlu̍ la-ɛ, iě ɔ̍ la̍a̍ dě Jusu we̍. “Nyɔ̍ ùh-a mu̍-a dɛ̍ di̍ dě Nyɔsoa-a kmɔ̌ wlu̍ i̍ kɔn-ɛ di̍i̍-ɛ, nɛ̀ u̍h nmɔ i̍ gbɛɛ̍.”

16Wɛ̀ Jusu la̍a̍ dě ɔ̍ we̍, “Jɔ̍gbau due bo ɔ̀ dǎ peě klaa, iě ɔ̍ dǎ nyɔ̍ dɔu. 17Peě tù ti̍ nyni̍-aɛ, wɛ̀ ɔ̍ dbo̍ ɔ̍ pòi̍ju ɔ̍ iě nyɔ̍ ɔ̍ dbo̍-a wlu̍ we̍ i̍-ɛ dǎ. Ɔ̍ iě ka nu̍, ‘Mɔ̀ ji̍, dɛ̍ᵻ kli̍hgbɛ̍ gbǎ gba̍a̍ wɛ̀.’ 18Jɛ u̍h kli̍hgbɛ̍ po̍ kafinǎ. Sàǐtòò nyɔ̍ la̍a̍ dě pòi̍ju we̍, ‘Ǐn tɛ̀n blǔh, wɛ̀ ǐn kɔn iě ɛ̍ jě la̍-a mu̍. Ìn gba̍ kɛ̀n sèàɛ̍ àn dlǔtu wlùh ǐn se̍ ji̍-ɛ bɛ̌ɛ.’ 19Wɛ̀ dɔɔ la̍a̍, ‘Ǐn tɛ̀n bliᵻ pùè, ǎn mu̍ i̍h jě la̍-a, pò i̍h nmɔ jii̍ kɔ̌ɔ. Ìn gba̍ kɛ̀n sèàɛ̍ àn dlǔtu wlùh ǐn se̍ ji̍-ɛ bɛ̌ɛ.’ 20Dɔɔ la̍a̍, ‘Kaka bo ǐn ple̍-e nynɔ̌. Ɛ̍ tìh-ɛ, ǐn se̍ ji̍-ɛ bɛ̌ɛ.’ 21Wɛ̀ pòi̍ju laa̍ ɔ̍ mu̍ de̍. Iě ɔ̍ sèàɛ̍ ɔ̍ dlǔtu ìh kli̍hgbɛ̍ la wlùh. Iě ɔ̍ dlǔtu gbǎ jlu̍h-u, wɛ̀ ɔ̍ la̍a̍ dě ɔ̍ pòi̍ju we̍, ‘Mu̍ dě wlɔ̀gbàɛ̀ ke gbòᵻ nynɛ̌ i̍ suei̍ ìè nyɔ̍gbà nyɔ̍ ke, i̍ kɔ̌-nyɔ̍ ke, dɔ̌-nyɔ̍ ke klɔ-nyɔ̍ ja.’ 22Pòi̍ju ji̍-a de̍-ɛ, wɛ̀ ɔ̍ la̍a̍, ‘Nyɔ̍ klaa, dɛ̍ ìn sèàɛ̍ ǐn wlùh-ɛ, ǐn wɔ̀ ɛ̍ nu̍-ɛ wɛ̀. Jɛ tèla̍ sie i̍ ke̍.’ 23Wɛ̀ ɔ̍ dlǔtu la̍a̍ dě ɔ̍ we̍ dɛ, ‘Gba̍ wìèᵻ klaaᵻ ke kɛ̌n wìèᵻ ìè nyɔ̍ kɛ̍ɛ̍n nɛ̌ ìè u̍h ja, wɛ̀ ǎn gbò iě jǐ. 24Ǎn sèàɛ̍ mɔ̀ wlùh, jɔ̍gbauᵻ ǐn dǎ-a sàì-ɛ, u̍h-a nyɔ̍ se̍ ǎn peě la ɛ̍ di̍-dɛ̍ wɔ̍n tɛ̀n mu̍.’ ”

Dɛ̍ nyɔ̍-a ple̍ iě àn nu̍ Jusu-a kòà ɛ?

(Matio 10.37-38)

25Nyɔ̍ tlùgbei̍ ke Jusu-a na, iě ɔ̍ bǐi dě u̍h we̍, wɛ̀ ɔ̍ la̍a̍, 26“Pò nyɔ̍-o-nyɔ̍ gbǎ dǒ ǐn de̍e̍ wɛ̀ ɔ̍ iě ɔ̍ de̍ ke, ɔ̍ baa ke, ɔ̍ nynɔ̌ ke, ɔ̍ nynuu̍ ke, ɔ̍ de̍di̍i̍ᵻ jɔ̍gbauᵻ ke, de̍di̍i̍ᵻ nynɔ̌gbaɔᵻ ke ɔ̍ chɛ̀-a feɛ-a tìh kma ɛ̍ iě-a ǐn sìì-ɛ, nɛ̀ ɔ̍ se̍ ǎn kòà nu̍-ɛ bɛ̌ɛ. 27Nyɔ̍ jɔ se̍-a ɔ̍ naɛ gbàɛ̍ kɛ̍n i̍ tu̍-u dǔ mu̍ wɛ̀ ɔ̀ iě-a dǒ ǐn de̍e̍ gbǎ-a dǔ-ɛ, nɛ̀ ɔ̍ se̍ ǎn kòà nu̍-ɛ bɛ̌ɛ. 28Pò mɔ̀-a nyɔ̍ ja pɔ̀n ɔ̍ iě gbàsla klaa po̍-ɛ, nɛ̀ ɔ̍ tè i̍ ke̍ sàǐtòò ɔ̍ iě dɛ̍ tìèwe̍ ɛ̍ mu̍-a po̍-ɛ slè pò ɔ̍ blě ɛ̍ wlǐ ɔ̍ iě ɛ̍ i̍ wɔ̀-ɛ. 29Pò ɔ̍ se̍ la̍a̍n nu̍ wɛ̀ ɔ̍ iě ɛ̍ wlù i̍ po̍, iě ɔ̍ se̍ ɛ̍ i̍ wɔ̀-ɛ, nɛ̀ nyɔ̍ kli̍hgbɛ̍ ùh-a mu̍-a ɛ̍ jě-ɛ, u̍h-a mu̍ ɔ̍ kǐhlɛ. 30Nɛ̀ u̍h-a mu̍ ka dǎ, ‘Jɔ̍gbau la ɔ̍ tè ɔ̍ gbàsla po̍-ɛ gbɔ̀, jɛ ɔ̍ se̍ ɛ̍ i̍ wɔ̀-ɛ bɛ̌ɛ.’ 31Pò blǔh baa ja ɔ̍ ba̍ dɔɔ tu̍h we̍ pa̍-ɛ i̍ pɔ̀n-ɛ, nɛ̀ ɔ̍ tè i̍ ke̍ sàǐtòò ɔ̍ iě ɛ̍ pu̍e̍e pò ɔ̍ nyɔ̍-a wlǔ pùè (10,000) bɛ̌ɛ ɔ̍ ba̍-a nyɔ̍-a wlǔ-a kwela sɔɔ̌n (20,000) we̍ fɔ̀n-ɛɛ. 32Pò ɔ̍ se̍ ɛ̍ bɛ̌ɛ-ɛ, nɛ̀ ɔ̍ dbo̍ nyɔ̍ dě blǔh baa jɔ laa̍ we̍ ɔ̍ iě tòɛ̀ i̍ po̍ ka ɔ̍ tɛn-a we̍ ke̍-ɛ. 33Kǎ ɛ̍ nɛ ke, pò mɔ̀-a nyɔ̍ se̍ ɔ̍ blě-dɛ̍ᵻ kli̍hgbɛ̍ i̍ tǎli-ɛ, nɛ̀ ɔ̍ se̍ ǎn kòà nu̍-ɛ bɛ̌ɛ.

Tɔ̌n ɛ̀ se̍-a dɛ̍kɛ̍n gbǎ-ɛ

(Matio 5.13; Maɛ 9.50)

34“Tɔ̌n nmɔ jii̍, jɛ pò ɛ̍ wɛ̀ wɔ̍n-ɛ, nɛ̀ nyɔ̍ se̍ ɛ̍ wɔ̍n nmɔ-ɛ bɛ̌ɛ dɛ. 35Nɛ̀ ɛ̍ se̍ jii̍ nmɔ dɛ dǒ blǔh ke tù-dɛ̍ᵻ nmɔ-ɛ dɛ̍ᵻ we̍. Nɛ̀ nyɔ̍-a po̍ la̍ ɛ̍ de̍ sǔh. Nyɔ̍ flɔn-a dounᵻɛ́, nɛ̀ ɔ̍ po̍-e dounᵻ.”

अहिले सेलेक्ट गरिएको:

Luu 14: KDNT

हाइलाइट

शेयर गर्नुहोस्

कपी गर्नुहोस्