Chɔɔn 7

Jusu de̍di̍i̍ᵻ se̍ ɔ̍ wlùh gbaɛ

1Ɛ̀ la ɛ̍ sì-a i̍-ɛ, nɛ̀ dǒ Kaladii bloa̍ kɛ̍n nɛ due bo Jusu-a ple̍ la̍ i̍ sǔh. Nɛ̀ ɔ̍ se̍ pɔ̀n ɔ̍ iě dě Judia bloa̍ kɛ̍n mu̍, dɛ̍nu̍ɛ, Juu nyɔ̍-a nyɔ̍ klaaᵻ nɛ-a deě-ɛ, u̍h-a pɔ̀n ɔ̍ dbǎ-a i̍. 2Ti̍ kɔǎn-a we̍ wɛ̀ Juu nyɔ̍ iě-a Wɛ̀ɛ̀ Sɔ̍n Wlù-a Peě tù-ɛ, 3wɛ̀ Jusu de̍di̍i̍ᵻ la̍a̍ dě ɔ̍ we̍, “Sɔ da̍a ìè Judia mu̍, wɛ̀ dbo̍ àn nu̍-aɛ àn kòà iě i̍h jě. 4Dɛ̍nu̍ɛ, nyɔ̍ ɔ̀ pɔ̀n-a nyɔ̍ iě-a ɔ̍ juo-ɛ, nɛ̀ ɔ̍-ɔ po̍ ɔ̍ nu̍-dɛ̍ᵻ dě kwile-e. Ka àn nu̍-a ìh la-ɛ, nɛ̀ ìn to i̍h bloa̍ kli̍hgbɛ̍ i̍.” ( 5Ɔ̍ de̍di̍i̍ᵻá chɛ̀ la u̍h se̍ ɔ̍ wlùh gbaɛ.)

6Jusu la̍a̍ dě u̍h we̍, “Ǎn ti̍ se̍-o nyni̍ ke̍. Mɔ̀ɔ̍ nɔ̀ɔ̍, mɔ̀-a blě ti̍ ma̍u̍. 7Mɔ̀ɔ̍ nɔ̀ɔ̍, kmɔ̌ se̍ mɔ̀-ɔ faɛn, jɛ mɔ̍ɔ, ɛ̍ faɛn m. Dɛ̍nu̍ɛ, ǎn sèàɛ̍ ɛ̍ wlùh ma̍u̍ ka ɛ̍ nu̍-a dɛ̍ᵻ sɔ̀nᵻɛ́. 8Mɔ̀ɔ̍ bo ùh iě peě la kɛ̍n mu̍. Mɔ̍ɔ, ǐn se̍ ɛ̍ kɛ̍n mu̍ mu̍, dɛ̍nu̍ɛ, ǎn dɛ̍ nu̍ ti̍ se̍-o nyni̍ ke̍ chɛ̀ka.” 9Ɔ̍ wɔ̀-a ɛ̀ la bla̍-aɛ, iě ɔ̍ sie dě de̍ Kaladii.

Jusu mu̍ dě Wɛ̀ɛ̀ Sɔ̍n Wlù-a Peě kɛ̍n

10Ɔ̍ de̍di̍i̍ᵻ mu̍-a peě laa̍ kɛ̍n wɛ̀-ɛ, wɛ̀ ɔ̍ jlǐ ɔ̍ chɛ̀ soɛɛ iě ɔ̍ mu̍ u̍h kɛ̍n i̍. 11Nɛ̀ Juu nyɔ̍-a nyɔ̍ klaaᵻá pɔ̀n ɔ̍ i̍ dǒ peě laa̍ kɛ̍n. Nɛ̀ u̍h-a nu̍, “Tà ɔ̍ nɛ-ɛ o?”

12Nɛ̀ nyɔ̍ duuh-a nu̍, “Jɔ̍gbau la nyɔ̍ chɛ̀ bo.” Nɛ̀ duuh la̍a̍, “Iěe, ɔ̍ se̍ nyɔ̍ chɛ̀, ɔ̍ boe nyɔ̍ɔ i̍.” Nɛ̀ ɛ̍ wìi̍nwìi̍n bo ɛ̀ jǐ dǒ peě-a chɛ̀ kɛ̍n. 13Jɛ u̍h-a ple̍ Juu nyɔ̍-a nyɔ̍ klaaᵻ jǔ, sɔ u̍h se̍ ɔ̍ nynɛ̌ wlɔ̀-ɔ po̍.

14Peě-a chɛ̀ u̍h nɛ dě ɛ̍ wèa̍ wɛ̀ sǔh, wɛ̀ Jusu mu̍ dě Nyɔsoa-a slaǎ sà gbò sɔ̀n. Iě ɔ̍ tè nǎ po̍-ɛ gbɔ̀. 15Sɔ ɛ̍ flɔn-ɛ Juu nyɔ̍-a nyɔ̍ klaaᵻ wɔ̍n, iě u̍h la̍a̍, “Jɔ̍gbau la ɔ̀ nyɔ̍-ɔ se̍a telě toe-ɛ, ka ɛ̍ nu̍ wɛ̀ ɔ̍ juo dɛ̍ᵻ dɔu ɛ?”

16Wɛ̀ Jusu la̍a̍, “Nǎ ǎn po̍-aɛ, ǐn se̍ ɛ̍ kɔn. Ɛ̍ sɔ dě nyɔ̍ ɔ̀ dbo̍-a m-ɛ we̍. 17Nyɔ̍-o-nyɔ̍ ɔ̀ pɔ̀n-a Nyɔsoa-a wlùh nu̍-ɛ i̍-ɛ, nɛ̀ pò ǎn nǎ po̍-ɛ sɔ dě Nyɔsoa we̍ o, iě pò ǐn ja nyɔ̍ nǎ po̍ dǒ ǎn chɛ̀-a sɔ̍n kɛ̍n-ɛ, nɛ̀ ɔ̍ mu̍ ɛ̍ juo. 18Nyɔ̍ ɔ̀ wlu-ia dǒ ɔ̍ chɛ̀-a sɔ̍n kɛ̍n-ɛ, nɛ̀ ɔ̍ chɛ̀-a ja̍ tè-ɛ bo ɔ̍ pɔ̀n i̍. Jɛ pò ɔ̍ ja ɛ̍ nu̍ wɛ̀ nyɔ̍ɔ iě nyɔ̍ dbo̍-a ɔ̍-ɛ ja̍ tè-ɛ, nɛ̀ tìh-a taǐn nyɔ̍ bo. Nɛ̀ ɔ̍ dɛ se̍ si̍h i̍ nɛ fu̍u̍. 19Na̍ Mose nyǐ mɔ̀ telě lě. Jɛ mɔ̀-a due-a chɛ̀ bo ɔ̀ se̍ ɛ̍ dɛ̍ɛ̍ jě. Dɛ̍nu̍ mɔ̀-a pɔ̀n ǐn dbǎ-a i̍ ɛ?”

20Nyɔ̍ tlùgbei̍ laa̍ u̍h la̍a̍, “Àn chɛ̀ la jeědih nɛ ìn de̍e̍ o. Nyɔ̍ bo ɔ̍ pɔ̀n ìn dbǎ-a i̍ ɛ?”

21Wɛ̀ Jusu la̍a̍ dě u̍h we̍, “Jbaɛdih-a due bo ǐn po̍, wɛ̀ ɛ̍ flɔn-ɛ mɔ̀ kli̍hgbɛ̍ wɔ̍n. 22Mose nyǐ mɔ̀ telě mɔ̀ iě mɔ̀-a jɔ̍gbauᵻ nynuu̍ plɔ̀n po̍. Ɛ̍ se̍ Mose ɔ̀ se̍ ɛ̍ wlɔ̀ ja, mɔ̀ baaᵻá baaᵻ bo, iě mɔ̀-a po̍ jɔ̍gbauᵻ plɔ̀n dǒ wlè-weɛ̍ di̍i̍. 23Nɛ̀ pò mɔ̀ ja la̍ jɔ̍gbauᵻ plɔ̀n po̍ dǒ wlè-weɛ̍ di̍i̍ Mose-a telě je̍e wa̍-ɛ, nɛ̀ dɛ̍nu̍ pò ǐn pǔh-i nyi̍ɔ̍ buǒ dǒ wlè-weɛ̍ di̍i̍-ɛ, wɛ̀ mɔ̀-a gbǎ-ɛ ǐn jlu̍h ɛ? 24Mɔ̀ bɔ̌ dǒ dɛ̍ kɛ̍n jě-ɛ wɛ̀ mɔ̀ bɔ̌ tìh i̍ chɛ̍n-ɛ, jɛ mɔ̀ chɛ̍n tìh i̍ i̍ slɛ̌-ɛ ka.”

Nyɔ̍ duuh la̍ Jusu nu̍ Chèɛ̀ Tba̍ju

25Wɛ̀ Juluslɛn nyɔ̍ duuh la̍a̍, “Jɔ̍gbau u̍h-a pɔ̀n-a dbǎ-a i̍-ɛ, ɛ̍ se̍ ɔ̀ la ae? 26Ɔ̍-ɔ la ɔ̀ wlu-ia wlɔ̀gbàɛ̀ da̍a, wɛ̀ nyɔ̍ klaaᵻ se̍ nɛ u̍h iě ɔ̍ we̍ wlu wa. Nɛ̀ nyɔ̍ klaaᵻ wɔ̌n-ɛ ɔ̍ iě Nyɔsoa-a Chèɛ̀ Tba̍ju nu̍ ɛɛ? 27Jɛ ti̍ Chèɛ̀ Tba̍ju-a mu̍-a ji̍-ɛ, nyɔ̍ se̍ ɔ̍ sɔ la̍ juo mu̍. Iě à juo jɔ la nɔ̀ɔ̍ ɔ̍ sɔ la̍.”

28Nɛ̀ kǎ Jusu-a po̍ nǎ dě Nyɔsoa-a slaǎ sà gbò sɔ̀n. Wɛ̀ ɔ̍ wǐ, ɔ̍ la̍a̍, “Mɔ̀ jajeɛ̍ mɔ̀ juo m, iě mɔ̀ juo ǎn sɔ la̍ ae? Jɛ ǐn se̍ ǎn chɛ̀-a ka̍ ji̍. Nyɔ̍ ɔ̀ dbo̍-a m-ɛ, tìh-a taǐn nyɔ̍ bo. Mɔ̀ se̍ ɔ̍ juo. 29Jɛ mɔ̍ bo ɔ̀ juo ɔ̍, dɛ̍nu̍ɛ, ǐn sɔ dě ɔ̍ we̍. Ɔ̍ bo ɔ̀ dbo̍ m.”

30Sɔ u̍h-a fɔ̀n la̍ dɛ̍ we̍ sǔh u̍h iě ɔ̍ gbɛ̍n, jɛ nyɔ̍ se̍ ɔ̍ sɔ̍n ja̍ po̍. Dɛ̍nu̍ɛ, nɛ̀ ɛ̍ ti̍ se̍-o nyni̍ ke̍. 31Jɛ nɛ̀ nyɔ̍ dɔu duuh gbaɛ ɔ̍ wlùh dě nyɔ̍ tlùgbei̍ laa̍ nynɛ̌. Iě u̍h la̍a̍, “Pò Chèɛ̀ Tba̍ju ji̍-ɛ, nɛ̀ ɔ̍ naɛ jbaɛdih-a mu̍ i̍ tìè i̍h iě jih jɔ̍gbau la ɔ̍ po̍-aɛ sìì ae?”

Slaǎ sà gbò kɛ̍ɛ̍n fuo nyɔ̍ mu̍ Jusu gbɛ̍n la̍-a

32Wɛ̀ Fɛlesii nyɔ̍-a nyɔ̍ duuh wɔ̌n dɛ̍ nyɔ̍gbei-a bla̍-a dǒ Jusu pùn-ɛ. Ɛ̍ kɔn u̍h ke Nyɔsoa-a slaǎ sà nyɔ̍ klaaᵻ dbo̍ slaǎ sà gbò kɛ̍ɛ̍n fuo nyɔ̍ u̍h iě ɔ̍ gbɛ̍n. 33Wɛ̀ Jusu la̍a̍, “Ǎn mu̍ da̍a mɔ̀ we̍ nɛ dǒ ti̍ gbɔ̍ di̍i̍ sǔh, wɛ̀ iě nyɔ̍ dbo̍-a m-ɛ we̍ mu̍. 34Mɔ̀-a mu̍ ǐn i̍ pɔ̀n, nɛ̀ mɔ̀ se̍ ǐn jě mu̍. Tà ǎn mu̍-a nɛ-ɛ, mɔ̀ se̍-e ji̍-ɛ bɛ̌ɛ mu̍.”

35Iě Juu nyɔ̍-a nyɔ̍ klaaᵻá sǔh-a pu̍e̍e ɛ̍ wɔ̍ɔ̍n i̍, u̍h la̍a̍, “Nɛ̀ tà jɔ̍gbau la ɔ̍ pɔ̀n mu̍-ɛ i̍ iě à se̍ ɔ̍ jě-ɛ bɛ̌ɛ mu̍ ɛ? Dě Klii bloa̍ kɛ̍n tà Juu nyɔ̍ nɛ-aɛ, dě ɔ̍ pɔ̀n mu̍-ɛ i̍ wɛ̀ ɔ̍ iě Klii nyɔ̍ nǎ po̍ ae? 36Ɛ̀ ɔ̍ la̍a̍, ‘Mɔ̀-a mu̍ ǐn i̍ pɔ̀n, nɛ̀ mɔ̀ se̍ ǐn jě mu̍, nɛ̀ tà ǎn mu̍-a nɛ-ɛ, mɔ̀ se̍-e ji̍-ɛ bɛ̌ɛ mu̍-ɛ,’ nɛ̀ ɛ̍ naɛ gbɔ̀-a nynɛ̌ ɛ?”

Jusu blě kao̍dlu ɛ̀ nyǐ-a nyɔ̍ feɛ-ɛ

37Peě-a bɔ̌ɛ-o weɛ̍ ɛ̀ ku̍-a wɔ̍n-ɛ, dǒ ɛ̍ di̍i̍ bo Jusu nyna-ɛ i̍ iě ɔ̍ wǐ, ɔ̍ la̍a̍, “Nyɔ̍-o-nyɔ̍ ɔ̀ kɔn wlì-a bǔ-aɛ, nɛ̀ ɔ̍ ji̍ nɔ̌ ǐn we̍ ɔ̍ iě nǐ nǎ. 38Ɛ̍ kɔn Nyɔsoa-a wlu̍ la̍a̍, ‘Nyɔ̍ ɔ̀ gbaɛ-a ǐn wlùh-ɛ, nɛ̀ nǐ ɛ̀ nyǐ-a nyɔ̍ feɛ-ɛ ɛ̍ kao̍dlu-a mu̍ wlù wlǔh dě ɔ̍ wlùh di̍i̍.’ ” 39Dɛ̍ ɔ̍ bla̍-aɛ, nɛ̀ Nyɔsoa-a Sùù ɛ̀ wlùh gbaɛ blě nyɔ̍-a mu̍-a jě dě nya̍-ɛ bo ɔ̍ dǎ. Nɛ̀ Nyɔsoa-a se̍a nyɔ̍ ɔ̍ Sùù nyǐ ke̍, dɛ̍nu̍ɛ, nɛ̀ Jusu se̍-e wlǔh ke̍ dě tìh-a i̍ bɛ̌-ɛ di̍i̍.

Wlu̍-a se̍ due nɛ ji̍ wlɔ̀ wɛ̀

40U̍h wɔ̌n-a ɔ̍ wlu̍ la-ɛ, iě nyɔ̍ duuh la̍a̍, “Ɔ̀ la̍ la, Nyɔsoa-a tu̍owli po̍ nyɔ̍ ɔ̀ kɔn tìh à gbaɛ-a bo.”

41Duuh la̍a̍, “Ɔ̀ la Nyɔsoa-a Chèɛ̀ Tba̍ju bo.”

Iě duuh la̍a̍, “Nɛ̀ dě Kaladii bloa̍ kɛ̍n bo Chèɛ̀ Tba̍ju-a mu̍-u sɔ ae? 42Nyɔsoa-a wlu̍ se̍ la̍ Chèɛ̀ Tba̍ju ɔ̀ mu̍-a Depe-a tloemlai nu̍-ɛ, Bɛfleɛɛn ɛ̀ nu̍-a Depe-a wlɔ̀-ɛ, dǒ ɛ̍ di̍i̍ ɔ̍ se̍-e sɔ mu̍ ae?” 43Sɔ wlu̍-a se̍ due nɛ ji̍ wlɔ̀ dě nyɔ̍ tlùgbei̍ laa̍ nynɛ̌ Jusu tìh. 44Duuh-a pɔ̀n ɔ̍ gbɛ̍n-ɛ i̍ de, jɛ u̍h-a nyɔ̍ se̍ ɔ̍ sɔ̍n ja̍ po̍.

Nyɔ̍ klaaᵻ se̍ Jusu wlùh gbaɛ

45Wɛ̀ Nyɔsoa-a slaǎ sà gbò kɛ̍ɛ̍n fuo nyɔ̍ mu̍ dě de̍ slaǎ sà nyɔ̍ klaaᵻ ke Fɛlesii nyɔ̍ we̍. Iě u̍h tèle u̍h i̍, u̍h la̍a̍, “Dɛ̍nu̍ mɔ̀ se̍ ɔ̍ ja ɛ?”

46Gbò kɛ̍ɛ̍n fuo nyɔ̍ la̍a̍, “Ɛ̀ jɔ̍gbau la ɔ̍ nu̍-a wlu-ɛɛ, à-a se̍a ɛ̍ we̍ nyɔ̍ jě sàì.”

47Wɛ̀ Fɛlesii nyɔ̍ la̍a̍, “Iě nɛ̀ ɔ̍ boe mɔ̀ i̍ wɛ̀ ke lě. 48Mɔ̀ jě Juu nyɔ̍-a nyɔ̍ klaaᵻ ke Fɛlesii-a nyɔ̍ gbaɛ jǔ la wlùh wɛ̀ sàì ae? 49Jɛ nyɔ̍ tlùgbei̍ la ùh se̍-a Mose-a telě juo-ɛ, u̍h bo Nyɔsoa po̍ wlu̍we̍i̍.”

50Wɛ̀ Nikodima ɔ̀ nu̍-a Fɛlesii jǔ ɔ̀ mu̍-a dě Jusu we̍ wɛ̀ sàì-ɛ, iě ɔ̍ la̍a̍ dě u̍h we̍, 51“À telě la̍ pò mɔ̀ iě nyɔ̍ kɛ̀n sà-ɛ, nɛ̀ mɔ̀ wɔ̌n ɔ̍ wlu̍ mɔ̀ iě dɛ̍ ɔ̍ nu̍-aɛ juo sasǎ.”

52Iě u̍h la̍a̍ dě ɔ̍ we̍, “Àn chɛ̀ la, Kaladii bo ìn sɔ ke ae? Gbɛ̀n dě Nyɔsoa-a wlu̍ di̍i̍ ìè jě ka Nyɔsoa-a tu̍owli po̍ nyɔ̍ se̍-a dě Kaladii sɔ mu̍-ɛ.”

अहिले सेलेक्ट गरिएको:

Chɔɔn 7: KDNT

हाइलाइट

शेयर गर्नुहोस्

कपी गर्नुहोस्