Chɔɔn 16

1“Ǎn sèàɛ̍ mɔ̀ ìh kli̍hgbɛ̍ la wlùh wɛ̀ mɔ̀-ɔ je̍e mɔ̀-a wlùh gbaɛ kɛ̍n i̍ poe. 2U̍h-a mu̍ mɔ̀ sɔ̀n i̍ po̍ wɛɛ sà gbòᵻ sɔ̀n i̍. Ɛ̍ mu̍ ti̍ kɔn wɛ̀ nyɔ̍ ɔ̀ mu̍-a mɔ̀ dbǎ-ɛ ɔ̍ iě ɛ̍ Nyɔsoa wɛɛ sà-a dǎɛ. 3U̍h-a mu̍ mɔ̀ ìh la pùn i̍ nu̍, dɛ̍nu̍ɛ, u̍h se̍ ǐn ke Baa juo. 4Ǎn sèàɛ̍ mɔ̀ ìh la wlùh duedɛ, wɛ̀ pò i̍h-a ti̍ nyni̍-ɛ, wɛ̀ i̍h iě dǒ mɔ̀ wlì i̍ sǐ ka ǐn sà-a i̍h-i dě mɔ̀ we̍-ɛ.

Nyɔsoa-a Sùù-a dbo̍ la

“Ǐn se̍ mɔ̀ ìh la wlùh sèàɛ̍ dě bloɔ̍ i̍ sà, dɛ̍nu̍ɛ, nɛ̀ mɔ̀ ke ǐn ke à na. 5Jɛ kaka la̍ nyɔ̍ ɔ̀ dbo̍-a m-ɛ, dě ɔ̍ we̍ bo ǎn mu̍ la̍. Jɛ mɔ̀-a nyɔ̍ se̍ ǐn i̍ tèle tà ǎn mu̍-aɛ tìh. 6Jɛ ìh la ǐn sà-a dě mɔ̀ we̍-ɛ, ɛ̍ bo ɛ̀ po̍ mɔ̀-a wlùh seɔn kaa̍. 7Tìh-a taǐn ǎn sèàɛ̍ mɔ̀ wlùh, ɛ̍ nmɔ jii̍ dǒ mɔ̀ we̍ iě ǎn mu̍. Dɛ̍nu̍ɛ, pò ǐn se̍ mu̍-ɛ, nɛ̀ Sùù ɛ̀ naɛ-a nyɔ̍ sɔ̍nᵻ we̍ i̍-ɛ ɛ̍ se̍ mɔ̀ we̍ ji̍ mu̍. Jɛ pò ǐn mu̍-ɛ, nɛ̀ ǎn mu̍ ɛ̍ nɔ̌ mɔ̀ we̍ dbo̍. 8Pò ɛ̍ ji̍-ɛ, nɛ̀ ɛ̍ mu̍ ɛ̍ we̍i̍ flɔn-ɛ dě kmɔ̌ nyɔ̍ we̍ ka u̍h klǐ-a dǒ gblɛ̍n sɔ̀ɛ̀n ke, i̍ slɛ̌-ɛ ke, tìh-a gbɛ̍n-ɛ we̍-ɛ. 9U̍h klǐ-i dǒ gblɛ̍n sɔ̀ɛ̀n we̍, dɛ̍nu̍ɛ, u̍h se̍ ǐn wlùh gbaɛ. 10U̍h klǐ-i dǒ i̍ slɛ̌-ɛ dɛ we̍, dɛ̍nu̍ɛ, ǎn mu̍ la̍ ǐn baa we̍. Mɔ̀ se̍ ǐn jě mu̍ dɛ. 11U̍h klǐ-i dǒ tìh-a gbɛ̍n-ɛ dɛ we̍, dɛ̍nu̍ɛ, Nyɔsoa sà ɛ̀ blě-a kmɔ̌ la ɛ̍ wlu̍ kwa̍-ɛ kɛ̀n wɛ̀.

12“Ǐn blě dɛ̍ᵻ dɔu iě-e sà dě mɔ̀ we̍, jɛ nɛ̀ i̍h-a mu̍ mɔ̀ wɔ̍ɔ̍n sìì kaka. 13Jɛ ti̍ Sùù ɛ̀ sèàɛ̍-a nyɔ̍ Nyɔsoa-a tìh-a taǐn wlùh-ɛ ɛ̍ mu̍-a ji̍-ɛ, nɛ̀ ɛ̍ mu̍ ɛ̍ nu̍ mɔ̀ iě tìh-a taǐn kli̍hgbɛ̍ juo. Ɛ̍ se̍ dǒ ɛ̍ chɛ̀-ɛ sɔ̍n kɛ̍n wlu-i mu̍. Jɛ dɛ̍ ɛ̍ wɔ̌n-aɛ bo ɛ̍ mu̍ wlu, wɛ̀ ɛ̍ iě mɔ̀ dɛ̍ᵻ ìh-a mu̍-a nɛ dě nya̍-ɛ wlùh sèàɛ̍. 14Ɛ̍ mu̍ ǎn nynɛ̌ i̍ bɛ̌-ɛ, dɛ̍nu̍ɛ, dɛ̍ ǐn blě-a iě-a sà-a bo ɛ̍ mu̍-u dǔ ɛ̍ iě mɔ̀ wlùh sèàɛ̍. 15Dɛ̍ᵻ kli̍hgbɛ̍ ǐn Baa blě-aɛ, mɔ̍ kɔn i̍h. Ɛ̍ kɔn na̍ Sùù-a mu̍ dɛ̍ ǐn blě-a iě-a sà-ɛ dǔ, wɛ̀ ɛ̍ iě ɛ̍ mɔ̀ wlùh sèàɛ̍.

Kòà-a jua̍i̍ sàɛ̀-a mu̍ mɔna̍ sàɛ̀

16“Ɛ̍ mu̍-o wlè wɛɛ nɛ̀ mɔ̀ se̍ ǐn jě mu̍ dɛ. Nɛ̀ pò ɛ̍ wlè-o dɛ wɛɛ-ɛ, nɛ̀ mɔ̀-a mu̍ ǐn jě dɛ dode̍.”

17Wɛ̀ Jusu-a kòà duuh-a tèle-e we̍ i̍, u̍h la̍a̍, “Jɛ ɔ̍ bla̍-a ka nɔ̌ à we̍ ɔ̍ la̍ ɛ̍ mu̍-o wlè wɛɛ nɛ̀ à se̍ ɔ̍ jě mu̍ dɛ-ɛ, nɛ̀ pò ɛ̍ wlè-o dɛ wɛɛ-ɛ, nɛ̀ à mu̍-a ɔ̍ jě dɛ-ɛ, ɛ̍ gbɔ̀-a nynɛ̌ ɛ? Ɔ̍ mu̍ la̍ dě ɔ̍ Baa we̍ nɔ̀ɔ̍-ɛ, ɛ̍ gbɔ̀-a nynɛ̌ ɛ? 18Ɛ̍ mu̍-o wlè wɛɛ nɔ̀ɔ̍, ɛ̍ gbɔ̀-a nynɛ̌ ɛ? À-a wɔ̌n ɛ̍ we̍i̍.”

19Sɔ Jusu juo-o dɛ̍ i̍ ka u̍h-a pɔ̀n-a ɔ̍ i̍ tèle-ɛ i̍-ɛ, iě ɔ̍ la̍a̍ dě u̍h we̍, “Na̍a̍, ‘Ɛ̍ mu̍-o wlè wɛɛ nɛ̀ mɔ̀ se̍ ǐn jě mu̍ dɛ. Nɛ̀ pò ɛ̍ wlè-o dɛ wɛɛ-ɛ, nɛ̀ mɔ̀-a mu̍ ǐn jě dɛ dode̍-ɛ,’ ɛ̍ kɔn tìh mɔ̀-a tèle-e we̍ i̍ ae? 20Tìh-a taǐn ǎn sèàɛ̍ mɔ̀ wlùh, mɔ̀-a mu̍ fìn mɔ̀ iě sùàɛ̀n pa̍, wɛ̀ kmɔ̌ nyɔ̍ iě nmɔ. Mɔ̀-a wlùh-a mu̍ seɔn gbǎ. Jɛ mɔ̀-a wlùh-a seɔn gbǎ-a mu̍ nmɔ-ɛ sàɛ̀. 21Pò nynɔ̌ ja la̍ gbàɔ̀n sà mu̍-ɛ, nɛ̀ ɔ̍ ku̍-a kma wɔ̍n, dɛ̍nu̍ɛ, nɛ̀ ti̍ nyni̍ wɛ̀ ɔ̍ iě jua̍i̍ sàɛ̀. Jɛ pò ɔ̍ sà ɔ̍ gbàɔ̀n-ɛ, nɛ̀ ɔ̍ mǎle ku̍-a wɔ̍n kma tìh we̍. Jɛ nɛ̀ ɔ̍ nmɔ-ɛ, dɛ̍nu̍ɛ, jǔ wlǔh wɛ̀ da̍a kmɔ̌ we̍. 22Kǎ ɛ̍ nɛ ke dǒ mɔ̀ we̍, mɔ̀-a wlùh gbǎ seɔn kaka, jɛ ǎn mu̍ mɔ̀ jě dode̍. Nɛ̀ mɔ̀-a mu̍ nmɔ. Jɛ ɛ̍ nɔ̀ɔ̍, nyɔ̍-o-nyɔ̍ se̍ ɛ̍ mɔ̀ kwa̍a̍ sà mu̍.

23“Dǒ weɛ̍ laa̍ di̍i̍-ɛ, nɛ̀ mɔ̀ se̍ ǐn dɛ̍-o-dɛ̍-a tìh i̍ tèle mu̍ dɛ. Tìh-a taǐn ǎn sèàɛ̍ mɔ̀ wlùh, dɛ̍ jɛ mɔ̀-a mu̍-a jbǎ dě ǐn Baa we̍-ɛ, ɔ̍ mu̍ ɛ̍ mɔ̀ nyǐ dǒ ǎn nynɛ̌ kɛ̍n. 24Sɔ dě ti̍-a ti̍ we̍-ɛ, mɔ̀-ɔ se̍a dɛ̍ jbǎ dǒ ǎn nynɛ̌ kɛ̍n. Mɔ̀ jbǎ dɛ̍, nɛ̀ mɔ̀-a mu̍ ɛ̍ jě, wɛ̀ mɔ̀-a nmɔ-ɛ iě kwlǎ wɛ̀.

Jusu sà kmɔ̌ klà

25“Nɛnǎᵻ bo ǎn po̍ wɛ̀ ǎn sà tìh i̍ dě mɔ̀ we̍. Jɛ ti̍ ǐn se̍-a nɛnǎᵻ po̍ mu̍-ɛ, ɛ̍ mu̍ ji̍, wɛ̀ iě ǐn Baa-a tìh i̍ sà te̍gbe̍i̍n dě mɔ̀ we̍. 26Dǒ weɛ̍ laa̍ di̍i̍-ɛ, nɛ̀ mɔ̀-a mu̍ dɛ̍ jbǎ dǒ ǎn nynɛ̌ kɛ̍n. Jɛ ǐn se̍ la̍ mɔ̍ bo ɔ̀ mu̍ ǐn Baa dɛ̍ jbǎ-ɛ dǒ mɔ̀ we̍ o. 27Baa-a chɛ̀ jbɛɛ mɔ̀ɔ̍ se̍e̍, dɛ̍nu̍ɛ, mɔ̀ jbɛɛ m, iě mɔ̀ po̍ ɛ̍ tìh chɛ̀ ka ǐn sɔ-a dě ɔ̍ we̍-ɛ. 28Ǐn sɔ dě ǐn Baa we̍ wɛ̀ ǐn ji̍ nɔ̌ kmɔ̌ we̍. Wɛ̀ ǎn sɔ la̍ da̍a kmɔ̌ we̍, iě ǎn mu̍ la̍ dě de̍ ǐn Baa we̍.”

29Wɛ̀ ɔ̍ kòà la̍a̍, “Jɛwɛ̀ àn wlu te̍gbe̍i̍n nɛ̀ po̍ nɛnǎᵻ dɛ. 30Ka ìn juo-a dɛ̍ᵻ kli̍hgbɛ̍-ɛ, jɛwɛ̀ à jě ɛ̍. Nyɔ̍ se̍ ìn dɛ̍ i̍ tèle mu̍ dɛ. Ka ɛ̍ nɛ-a ka-ɛ, nɛ̀ à po̍ ɛ̍ tìh chɛ̀ ka ìn sɔ-a dě Nyɔsoa we̍-ɛ.”

31Jusu la̍a̍, “Mɔ̀ gbaɛ ǐn wlùh wɛ̀ ae? 32Ti̍-a nyni̍ la̍-ɛ o, ɛ̍ chɛ̀ nyni̍ wɛ̀ o. Dǒ mɔ̀-a mu̍ ja̍i̍ gbà-ɛ, wɛ̀ mɔ̀ iě ǐn gbo̍ka̍a̍ sie mɔ̀ iě mɔ̀ blǐ gbòᵻ i̍ mu̍. Jɛ nɛ̀ ǐn se̍ gbo̍ka̍a̍ sie, dɛ̍nu̍ɛ, ǐn Baa nɛ dǒ ǐn we̍. 33Ǐn sèàɛ̍ mɔ̀ ìh la wlùh wɛ̀ mɔ̀ iě wlùh-a i̍ tè-ɛ blě dě ǐn ja̍a̍. Mɔ̀-a mu̍ tìh jě da̍a kmɔ̌ la we̍, jɛ mɔ̀ ku̍ wlùh o, dɛ̍nu̍ɛ, ǐn sà kmɔ̌ la klà wɛ̀.”

अहिले सेलेक्ट गरिएको:

Chɔɔn 16: KDNT

हाइलाइट

शेयर गर्नुहोस्

कपी गर्नुहोस्