Ubwandilo 14
14
Abụlamụ ịkumpoka Lotị
1Abanyafyale bana: Amụlafelị, umalafyale gwa kị̄su kya Sịnali, Alyoko umalafyale gwa kị̄su kya Elasa, Kyendolama umalafyale gwa kị̄su kya Elamụ na Tịndali umalafyale gwa kị̄su kya Goịmụ, 2balinkusụmụsya ubwịte ukulwa na banyafyale abāngi bahāno: Bela umalafyale gwa kị̄su kya Sotomụ; Bilisya umalafyale gwa mu Gomola, Sinabu umalafyale gwa kị̄su kya Atịma, Syemebeli umalafyale gwa kị̄su kya Seboịmụ, kangi nu malafyale gwa kị̄su kya Bela, iki kyo kị̄su kya Swali. 3Abanyafyale bahāno bababa balinkwijēnga ukuja mụ̄ndu jumojwene pakulwa ubwịte ndusōko lwa Sịtịmu, ulusōko lwa Nyanja ja Mụ̄nyụ (Nyanja ifwe). 4Bwila bālị pāsi pa ndagilo sya Kyendolama ifyinja kalōngo na fịbili (12) lolị nkyinja kya kalōngo na fịtatu (13), balinkunsāmbukila. 5Po lelo nkyinja kya kalōngo na fịna (14) alinkwịsa Kyendolama na banyafyale abanịne aba āli pamopēne nabo, balinkubakoma Abalefai nkāja ka Asiteloti-kalinaimu, pamopēne na Basusi aba nkị̄su kya mụ Hamụ, na ba Emimu aba nkị̄su kya mụ Syabe-kilyataimu. 6Na banya Holị nkyamba kyabo ikya Seịlị, ukwakufịka mụ Elipalanị, nkāja aka kāli kifụkị nulungalāngala. 7Po lelo balinkugomoka balinkwịsa kubujo ubu bịkuti Enimisipati, nkị̄su kya Kandesị balinkwenda nukukikoma kyosa ikị̄su kya Bamalekị, ni kya ba Amolị aba bājēngịle mụ Hasasonị-tamalị. 8Po papo abanyafyale ba fị̄su ifị: Sotomụ, Gomola, Atịma Seboịmụ na Bela (ikị̄su kya Swali) balinkufịbūngānịa pamopēne ifịlūndilo fyabo ifya bwịte mụ ndusōko lwa Sịtịmu. 9Ukuti balwege na Kyendolama umalafyale gwa kị̄su kya Elamụ, Amụlafelị umalafyale gwa kị̄su kya Sịnali, Alyoko umalafyale gwa Elasalị, na Tịndali umalafyale gwa Goịmụ abanyafyale bana balinkulwa na banyafyale bahāno. 10Ulusōko lwa Sịtịmu lwalịswile imị̄na gya matope ga mfụ ugu gwalīti lāmị. Lelo bo abanyafyale ba kị̄su kya Sotomụ na Gomola bịkubopa bamo balinkwịbụlụkutila mmị̄na gila gila abāngi lolị balinkubopela mfyamba. 11Buno buno abalugu balinkupupa ifyuma fyosa fya nkị̄su kya Sotomụ na Gomola, kangi ni fyakulya fyabo fyosa, po papo balinkubūka. 12Balinkunkola na ju Lotị umwana gwa gwamyabo gwa Abụlamụ uju ājēngịle mụ Sotomụ, pamopēne ni fyuma fyake balinkubūka nagwe.
13Lelo umụ̄ndu jumo uju āponịle, jo alinkwakumpāngila Abụlamụ, Unhịbụlị jula; uju ājēngịle pa mịpịkị gya ịsyeto lya mụ Mamule, ugwa kikolo kya ba Amolị ugwamyabo gwa Esịkolị na Anelị aba bālị bamanyānị ba Abụlamụ. 14Umwene Abụlamụ bo apilị̄ke ukuti umwana gwa gwamyabo bankolịle babūkịle nagwe, alinkubabūngānịa ababōmbị bāke na bankikolo kyake; ubwịngị bwabo bālị bāmịa batatu na bāndu kalōngo ba lwele (318) balinkubakōnga mụnyụma abalugu bala ukwakufịka nkị̄su kya Ndanị. 15Po papo Abụlamụ alinkubajabanịa abāndu bāke mfịbụgụtila mfịbụgụtila alinkubasyungūtila abalugu bala pakilo alinkulwa nabo nukubatola, alinkubakaga, alinkwakufịka nabo nkāja akakulūmba ka Hoba aka kāli kulūlu ku kị̄su kya Ndamasịka. 16Alinkugomosya fyosa ifị bāpupịle pamopēne na ju Lotị ni fyuma fyake na bakị̄kulu na bāndu abāngi.
Melekịsetekị ịkunsaja Abụlamụ
17Bo Abụlamụ ajịlekugomoka kuno ābūkịle ku bwịte, bo antolịle Kyendolama pamopēne na banyafyale aba āli nabo; umalafyale gwa nkị̄su kya Sotomụ alinkwịsa kukwaganịla nagwe Abụlamụ pa lusōko lwa Syabe ulu lo lusōko lwa malafyale. 18Po papo Melekịsetekị umalafyale gwa nkāja ka Salemụ kangi umpụ̄tị gwa Kyala unkulūmba unkīnde alinkuntwalila ikisyesye nu bwalwa bwa māfị̄lu, Abụlamụ. 19Alinkunsaja Abụlamụ alinkuti: Kyala unkīnde, umpelị gwa kumwanya na pāsi, jo akusajege ugwe Abụlamụ. 20Kangi atụfịgwege Kyala unkīnde, Uju akupēle abalugu bāko nkiboko kyako. Po papo Abụlamụ alinkumpa Melekịsetekị ifya pị̄lōngo ukufụma mụli ifị āpokịle mbwịte. 21Umalafyale gwa kị̄su kya Sotomụ alinkujoba kwa Abụlamụ alinkuti une ūmbege abāndu bāngu, lolị ugwe gwegege ifyuma. 22Abụlamụ alinkummwamụla umalafyale gwa kị̄su kya Sotomụ alinkuti: Njīgịle ulujīgo nkyenị mụ NTWA Kyala unkīnde, umpelị gwa kumwanya na pāsi. 23Ndịle ndịsakwegapo nakamo akāndu kāko nalinga bo būsị pamo utukoba twa fịlato; ukuti ugwe ungịsakujobaga ukuti: Numpelị̄le ubukabị Abụlamụ. 24Ndịkwegapo nakamo lolị fyene fịfyo abānāngu bālị̄le ni kijabo kya bāndu aba nāli nabo; Anelị, Esịkolị na Mamule lolị bo bịkwegapo ifịjabo fyabo.
अहिले सेलेक्ट गरिएको:
Ubwandilo 14: NYB96
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Nyakyusa Bible © Bible Society of Tanzania, 1996.