YouVersion लोगो
खोज आइकन

Markus 12

12
Banndol dow remooɓe bonɓe
1Nder *Ursaliima Iisa tinni no haalda *aahiiɓe mum he hooreeɓe *Yahudankooɓe nder kippol haala, omo wi'a :
—Neɗɗo gom waɗi ngesa *cabiije. O waɗi koogol o fiiltini nga. O wasi luggere ɓoosirde, o nyiɓi suudu toownu ngam doomooɓe magga. Nden o wuƴi nga remooɓe gom, o waɗi jahaangal. 2Wakkati teɓol cabiije ɗeen yottinoo, o lili golloowo makko gom jaɓowa mbaka makko to remooɓe ɓeen. 3Remooɓe ɓeen nanngi lilaaɗo oon, piyi mo, njoofi mo juuɗe ɓole. 4Jom ngesa kaan liliti golloowo mum gom kaden to maɓɓe. Ɓe eli mo, ɓe njenni mo. 5Jom ngesa oon lili faa hannden golloowo mum gom kaden, ɓe mbari lilaaɗo oon.
O lili gollooɓe makko re'ataa he maɓɓe. Ɓe piyi woɓɓe, ɓe mbari woɓɓe duu. 6Neɗɗo gooto koraniiɗo mo oon, woni ɓiyiiko korsuɗo. Kanko duu o lili mo he maɓɓe, o wi'i hoore makko : « Ɓe teddinan mo ngam o ɓiyam. » 7Amma remooɓe ɓeen mbi'odiri hakkune mum'en : « Ma'adalla. Oo nii woni donoowo oon. Ngaree mbaren mo, heɓa ndonen ngesa ngaa ! » 8Sey ɓe nanngi mo, ɓe mburtini mo nder ngesa ngaan, ɓe mbari mo.
9Gaɗa pillaaki kippol haala ngool, Iisa ƴami, wi'i :
—Too ! Joonin, noy jom ngesa ngaan waɗata ? O waran kanko he hoore makko, o wara remooɓe ɓeen, o halfina ngesa ngaan woɓɓe, naa noy ?
10On njanngaay ko winndaa nder dewte ɗeen, wi'aa :
Hayre nde nyiɓooɓe ɓeen mboppi ndeen,
kayre laatii hoore nyibdi ndiin.
11 Ɗum golle Joomiraawo,
haayne non duu he giiɗe meeɗen ! # 12.10-11 Jabuura 118.22-23
12Hooreeɓe *Yahudankooɓe tefi no nanngirta Iisa, ngam ɓe paamii ko kippol haala ngool, kamɓe ngol sappii. Amma ɓe cuusaay jama'aare ndeen, ngam majjum waɗi ɓe acci mo, ɓe ndilli.
Joɓol janngal
13Balɗe no njaha balɗe no ngarta sey nyannde gom *Fariisa'en he himɓe *Hirudus lili *lilaaɓe he Iisa ngam tunna mo nder haalaaji makko. 14Ɓe ngari, ɓe mbi'i mo :
—Moodibbo, miɗen anndi ko goonga tan kaalataa. A hulataa neɗɗo fuu, a ɓurdinaay himɓe, aɗa janngina laawol Alla goonga e goonga. No hegii min kokka laamiiɗo *Rooma mawɗo janngal naa hegaaki ? 15Min kokka mo naa to min kokku mo ?
Iisa faamani munafikaare maɓɓe, nden wi'i ɓe :
—Ɗume waɗi ko oɗon tunna kam ? Ngaddanee kam tammal cardi, mi hi'a.
16Ɓe ngaddani mo. O ƴami ɓe o wi'i :
—Foto moy he innde moy woni ɗo ?
Ɓe mbi'i mo :
—Laamiiɗo *Rooma.
17Nden o jaabii ɓe, o wi'i :
—Ndenne kokkee laamiiɗo *Rooma ko jeyi, kokkon Alla duu ko jeyi.
Ko Iisa jaabii ɗum haaynii ɓe sanne.
Filla ummitaaki he maayde
18*Sadduki'en, kam'en ngoni yeddooɓe no mbi'a ko maayɗo fuu ummitittaako. Nyannde gom, ɓe ummii ɓe ngari to Iisa. 19Ɓe ƴami mo, ɓe mbi'i :
—Moodibbo, *Muusa tilsinii enen *Yahudankooɓe, nde gorko dewli, dey maayi rimaay, minyum naa mawnum dewla deekiiko ngam heɓana mo jippotooɓe.#12.19 Wi'itaade Tawreeta 25.5 20Waɗiino rimdaaɓe jeɗɗo gom. Arano oon dewli debbo mum, dey maayi, rimaay. 21Ɗiɗaɓo oon dewli debbo oon, kam duu maayi rimaay. Tataɓo oon duu waɗi hano non. 22Rimdaaɓe jeɗɗo ɓeen fuu tokki ndewli debbo oon, baa gooto maɓɓe rimaay. Gaɗa maayde maɓɓe, ɓe fuu, debbo oon duu maayi. 23Too, nyannde darŋal, moy nder maɓɓe laatoto goro debbo oo ? Ngam ɓe fuu jeɗɗo kaɓɓani mo.
24Iisa jaabii ɓe, wi'i :
—On mboofii, oɗon anndi ngam ɗume ? Ngam on paamaay ko dewte ɗeen mbi'i, on anndaa duu baawɗe Alla. 25Ngam nyannde maayɓe ummitii, worɓe ndewlataa, rewɓe duu ndewlataake. Himɓe fuu no mbuuran hano no maleykaaɓe mbuurdiri nder kammu. 26Har ko daarata ummitaaki maayɓe, on njanngaay ɗum jaa nder dewtere *Muusa, nder taariihi wuumoore huɓɓoore. Hano no Alla haaldiri he *Muusa nii, wi'i : Miin woni Alla *Ibrahim, Alla Isiyaaku, Alla Yakuuba.#12.26 Burtaaki 3.6, 15-16
27Nden Iisa ɓeydi wi'ude ɓe :
—O Alla wuurɓe, o hanaa Alla maayɓe. Ndenne, on mboofii sanne sanne.#12.27 Ko jamaanu Muusa wara tawi Ibrahim, Isiyaaku e Yakuuba maayi illa ko ɓooyi.
Tilsinoore ɓurne semmbe
28Nyannde gom jannginoowo *Tawreeta gom nani yewtere Iisa he *Sadduki'en. O nani duu ko Iisa jaabake ɓe faa wooɗi. Jannginoowo *Tawreeta oo ɓadii Iisa, ƴami mo wi'i :
—Nder tilsinooje ɗee fuu, ndeye ɓuri semmbe ?
29Nden Iisa jaabii mo, wi'i :
—Ɓurne ɗe fuu semmbe woni wi'ude : Hettina *Isra'el ! Alla Joomiraawo meeɗen tan woni Joomiraawo. 30Hiɗir Alla Joomiraawo maa he ɓerne maa fuu he yonki maa fuu he hakkillo maa fuu he semmbe maa fuu.#12.29-30 Wi'itaade Tawreeta 6.4-5 31Tilsinoore ɗiɗaɓere ndeen woni : Ngiɗaa gondo maa no ngiɗirɗaa hoore maa.#12.31 Lewinkooɓe 19.18 Walaa fuu tilsinooje ɓurɗe tilsinooje ɗiɗi ɗee semmbe.
32Nden jannginoowo *Tawreeta oon wi'i mo :
—Moodibbo ! A haalii goonga, ko mbi'uɗaa Alla tan woni Joomiraawo, kaden duu Alla gom fuu walaa se hanaa kanko. 33Hiɗirde Alla he ɓerne mum fuu he hakkillo mum fuu he semmbe mum fuu, he hiɗirde gondo mum hano neɗɗo hiɗiri hoore mum, no ɓuri sadakaaji buleteeɗi he sadakaaji fuu !
34Wakkati Iisa hi'unoo ko jannginoowo *Tawreeta oo jaaborake ɗum he hakkillo, nden o wi'i mo :
—A woɗɗaa Laamu Alla.
Gaɗa jannginoowo *Tawreeta oo, neɗɗo fuu suusaay ƴamude Iisa goɗɗum kaden.
Almasiihu e Daawda
35Nyannde gom Iisa no waajoo nder *Juulirde *Ursaliima mawne, sey o ƴami, o wi'i :
—Noy waɗi jannginooɓe *Tawreeta no mbi'a ko *Almasiihu taan Daawda non ? 36Ngam Daawda he hoore mum haali nder baawɗe *Ruuhu Ceniiɗo wi'i :
Alla Joomiraawo wi'i Joomiraawo am :
War, njooɗaa nyaamo am,
faa mi sorna wayɓe maa ley teppere maa. # 12.36 Jabuura 110.1
37Daawda he hoore mum inndiri *Almasiihu Joomiraawo mum. Ndenne, noy o laatortoo taaniiko tan ?
Pelol jannginooɓe Tawreeta
Jama'aare e jama'aare woni no hettinanii Iisa nder welwelo. 38Nder waaju makko, o wi'i ɓe :
—Tinnee, kakkilee he jannginooɓe *Tawreeta. Iɓe ngiɗi ɓornaade kolte mawɗe. Iɓe ngiɗi sanneede cannooje tedduɗe nder luuɓe. 39Iɓe ngiɗi jooɗorɗe ɓurɗe teddude nder *baajorɗi. Iɓe ngiɗi jooɗorɗe ɓurɗe teddude nde nii ɓe noddaama batu. 40Iɓe eyta rewɓe ɓe goriraaɓe mum'en maayi ngam teetude njawdi maɓɓe. Iɓe njunna du'aa'uuji maɓɓe ngam ɓe limtee nder lobbuɓe. Kiite naawɗe ɓe ngaɗantee.
Sadaka debbo gom mo gorum maayi
41Iisa no jooɗii nder *waajordu, omo hucciti he keesuwal mayru. Omo daara no himɓe ngattirta hadiyaaji mum'en nder maggal. Riikuɓe heewɓe ngatti ceede ɗuɗɗe nder maggal. 42Fotodiri nyannde mum debbo gom mo gorum maayi, mo walaa fuy, wari, watti buuɗoy ɗiɗoy nder maggal. 43Sey Iisa noddi *aahiiɓe mum, wi'i ɓe :
—Goonga kaalananmi on : Debbo oo, ko o watti nder keesuwal ngaal no ɓuri ko ɓeeto fuu ngatti. 44Ngam ko ɓe ngatti nder keesuwal ngaal ɓuytataa fuy nder njawdi maɓɓe. Amma debbo oo, ko o joginoo ngam o wuurda, ɗum o watti nder maggal.

अहिले सेलेक्ट गरिएको:

Markus 12: FUH

हाइलाइट

शेयर गर्नुहोस्

कपी गर्नुहोस्

None

तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्