Matay 21
21
No kazway na mangay do Yelosaleng
(Make 11:1-11; Locya 19:28-40; Yowani 12:12-19)
1Masngen rana sira do Yelosaleng am mangay sira do Peyvake a ili do asa ka tokon a meyngaran so Kanlan. Nimanovoy si Yeso so rarwa ka macinanao jya manma mangay do ili. 2Maniring jira am, “Angay kamo do ili eyto. Si makacita kamo so meyina baka makedked do dang am ovain nyo sira yai do jya. 3No si amyan so macisirsiring jinyo am ipanci nyo o, ‘Yamyan so na patakan nya no Panirsirngen.’ No si mamizing na o ciring nyo am cyaha, ta itoro na jinyo.” 4O icyakman na so sang am yatodey mangononong o ciring no panoyonoywan na so ciring ni Ama ta do to. Ta maniring am,
5“Si maniring kamo do tao do Yelosaleng am, Cita kamo o Panirsirngen nyo a mai. Iya rana am na ji pakaranga o kataotao na a omavang do anak no baka.”#21:5 Sacyadiya 9:9.
6So to da mangozai do ciring ni Yeso no rarwa ka macinanao jya. 7So nyalakan da so meyina baka yai a kaparasay da so ayob da do likod no baka a kapanci da rana ni Yeso a omapon do baka. 8Aro tao a tomeytay so ayob da do rarahan. O karwan da am mangap sira so yangaw no nitba da kayo a teytain da do rarahan. 9O omanop sya aro a tao am amlololos rana sira a manci no, “Inaoy si omaing o admadmay do sivovoong ni Tawey! Inaoy si ipanlanlag na ni Ama ta do to o nitovoy na a yarana nimai do teyrahem!#21:9 Anwanood 118:26. Inaoy si mangay ji Ama ta do to o azwazway na!”
10Mangay si Yeso do Yelosaleng am mina todagnoz o tao do ili ang. Maniring rana sira o tao am, “Sino o tao ang.” 11Maniring sira o aro a tao a macihza ji Yeso am, “Iya rana am yapo do Cyadidi a yameyvahay do Nasale a panoyonoywan na so ciring ni Ama ta do to a meyngaran so Yeso.”
Nipangzan na o rako a panaralayan
(Make 11:15-19; Locya 19:45-48; Yowani 2:13-22)
12Somdep si Yeso do rako a panaralayan am powboten na sira o tao a manazang no makakaday a warawara do dang a kapasakeb na sya ibokbok so peypalipalitan da so nizpi a kavangan a kano lilisnan da no manazang no hato a tao. 13Maniring jira am, “O domket do Seysyo a ciring na ni Ama ta do to am, ‘O raralayan nyo nyaken a vahay am peyneynozyan ori no aro a tao.’#21:13 Isayya 56:7. Am nyo to peyvaliw a da peyvahayan no manakaw a tao.”#21:13 Yedimi 7:11.
14Amyan so mavota kano makasapa tao a nimangay do tangain ni Yeso. Ori o niwakwakan na jira. 15Macita da si Yeso no panipanirsirngen no mapatanatanang so nakem da si Ama ta do to a kano mangnanao no iwawalam ni Ama ta do to a nimapeyvazay so aro a mapeyzokab a vazay a kapakamizing da pa so aro a kanakan a amlololos do rako a panaralayan a manci no, “Inaoy si omaing o admadmay do sivovoong ni Tawey!” Mamizing da ori am ori o nipeyoyaoya da. 16Maniring sira ji Yeso am, “Mo mamizing sira yamlololos a yameyzezyak ang?” Maniring si Yeso am, “Noon, ko mamizing. Ta maniring do Seysyo am, ‘Ninanao mo o kanakan a kano si Kekey pa so ngaran a mapatwaw so ney yapya na yadmadmay da si Ama ta do to.’#21:16 Anwanood 8:2. Manngwa, ji nyo pa nivilangan o akman sang a ciring?” 17Karahan am karwan na rana sira ni Yeso a meypangay do Potani a keysan na do dang.
Nipanircirngan na o kayo a meyngaran so ovako
(Make 11:12-14,20-24)
18Apnezak do ikadwa na araw am mangonong sira meysinaoli do ili. No kanang am makcin si Yeso. 19Macita na o meyngaran so ovako a kayo amyan do siri no rarahan am mangay a meykala so asi na. Am aboo, ta voong na o macita na. Karahan am to na rana manircirngi o kayo ang. Maniring am, “To ka rana meyyonong a ji rana malasi.” Meyratateng am jya nimeyyahahay o kayo a nimaoto. 20Macita da no macinanao jya am isavasavak da. Maniring sira am, “Asyo o kayo eya yaji ngahay a yamaoto.” 21Maniring si Yeso am, “To ko na macitangayan jinyo am no manoyong kamo a meyhanhan ni Ama ta do to a ji meykarwa so nakem am akman kamo sang a makapeyvazay so yako mina vazay ang. Am beken a ori an. Ta tana to nyo nirsirnga o tokon a mangay do awa am mangay ori an. 22No makdeng kamo so nakem ji Ama ta do to am o amin nyo do inozi nyo am mahap nyo.”
Ikazyak da o nikapwan no oyowyat ni Yeso
(Make 11:27-33; Locya 20:1-8)
23Somdep do rako a panaralayan si Yeso am mangnanao so tao do dang. O panipanirsirngen no mapatanatanang so nakem da si Ama ta do to a kano kamanrarakehan da no tao do Yotay am mai sira ji Yeso. Maniring sira am, “Asyo oyowyat mo a yamapeyvazay so aro a vazay eya. Sino o yanitomoro nya jimo so sang.” 24Maniring si Yeso jira am, “Ko inyo pacicin no asa ka ciring. No si katenngan nyo yaken a tovisan am ori o pancyan ko no na nikapwan no oyowyat ko a yamapeyvazay so aro a vazay. 25Wanjin o nikapwan no oyowyat no nimanaktak a si Yowani. Yapo ji Ama ta do to an? No yapo do tao.”
Makarahan am meykalakalavaten rana sira. Maniring sira am, “Ikongo o itovis ta dang. No si ipanci ta o kapo na ji Ama ta do to am ji na panenesha yaten ni Yeso a ji nganoyong ni Yowani a. 26No si kwan ta o kapo na do tao am jyabo kaji da oyyan nyaten no aro a tao a, do da kanoyong ji Yowani a panoyonoywan na so ciring ni Ama ta do to a.” 27Karahan am maniring rana sira ji Yeso am, “Namen jyatenngi.” Maniring si Yeso jira am, “No ori vata nyo am ji ko mancyan jinyo o na nikapwan no oyowyat ko a yameyvazay so aro a vazay.”
Pehngehngain na o ciring na do rarwa ka meyketeh
28Maniring si Yeso am, “Naknakmen nyo pala o ko pehngehngain a ciring. Ikongo ahahapan nyo sya. Amyan so asa ka tao a rarwa so anak. Maniring do rakerakeh am, ‘Mangay ka, manganako, do nihakawan ta an.’ 29Maniring ori am, ‘Sino mangay.’ Manakenakem am, ‘Jyabo kaji ko angayan a.’ Karahan am mangay ori. 30Akman sang o ciring no ama na do ananak. Maniring o ananak am, ‘Noon. Mangay ko,’ am jya nimangay. 31Manngwa, sino jira ang o nimahap so ciring no ama da.” Maniring sira am, “O rakerakeh ang.” Maniring si Yeso am, “To ko na macitangayan jinyo am manmanma pa sira ka ninyo o mapeyvazay so deyking a tao a kano somagpyan a mavakes a macikaop do italamozong ni Ama ta do to. 32Ta yarana nimai o nimanaktak a si Yowani. Na rana nipanci jinyo o manoyong a rarahan nyo. Am nyo ji nganoyngi. Am sira rana mapeyvazay so deyking a tao a kano somagpyan a mavakes am da nyanoyngan. Tana nimacita nyo o mapeyvazay so deyking a tao a kano somagpyan a mavakes a yarana nimamlis am kamo ji mamlis a yaji nganoyong jya.”
Pehngehngain na o ciring na do marahet so nakem a tao a nimvood so nihakawan
(Make 12:1-2; Locya 20:9-18)
33Maniring pa si Yeso am, “Amizngey nyo pala o pehngehngayan ko so ciring ko. Amyan so asa ka tao a nimeymowa so asa lan a potaw. Karahan am zazacitan na a kapamaring na do sahad na no nihakawan na so pangangatesan na so potaw a kapatnek na so makarang a tagakal a pamozimozyan na. Karahan am itoro na do tao a vooden da a kangay na rana do marai a ili. 34Mazako o asi na no mowamowa na am manovoy so lamlamsoy na omami so akma ney vonong. 35Karahan am vitkehen da o zagaw no nitovoy na lamlamsoy no nimvood so nihakawan na tao a kapakakasi da so asa, kazakat da so asa a kacikcik da do asa. 36Karahan am manovoy pa o mapeynihakawan sya so arwaro pa lamlamsoy na a kano nimanmanma mangay ang. Am akman sang o vazay da sira no nimvood so nihakawan na. 37Manowji rana am to na rana novoya o anak na. Manakenakem am, ‘Jyabo kaji dasnekan no minapodpod jyaken a.’ 38Am macita da o anak na no nimvood so nihakawan na am maniring sira do kadwan jira am, ‘Iya ya o omamoon so nihakawan na. To ta na wakwaka kamoon ta so nihakawan na.’ 39Karahan am vitkehen da a yangay do asked no nihakawan da a kawakwak da sya.
40“No mai o meyngongyod a mapeynihakawan sya am kongwen na paro sira o nimvood so nihakawan na tao.” 41Maniring sira am, “Jyabo o kaji na wakwakan sira a katoro na no peymowamowan na do apiya so nakenakem a tao a omvood sya.” 42Maniring si Yeso jira am, “Ji nyo nivilangan pa o ciring do Seysyo? Maniring am,
‘O Vato a niwalit da no mapatnek so vahay am yarana nimeyvaliw a ney makdeng na aslet no ai no vahay. So ikanoyong no vazay ni Ama ta do to a mapeyzokab.’#21:42 Anwanood 118:22-23.
43“Am ori o ko pancyan nya jinyo so kaji na rana nalamozongan ninyo ni Ama ta do to, ta italamozong na o mangononong do ciring na a tao. 44O meyhabak rana do Vato ori am to rana zemek o tototowang na. O kakasan no Vato a tao am akman sang, ta to meyramis o kataotao na.”
45Mamizing da o ciring ni Yeso no panipanirsirngen no mapatanatanang so nakem da si Ama ta do to a kano tao a macyagom do Vadisay am makazazap da rana o kapakaciring na sya jira ni Yeso so ciring ang. 46Am ori o naknakman da rana so karakep da sya. Am kanyahey da no aro a tao. Ta anoyngan da no aro a tao si Yeso a panoyonoywan na so ciring ni Ama ta do to.
अहिले सेलेक्ट गरिएको:
Matay 21: snt
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
The Bible Society in Taiwan
