Matai 3
3
Johani ʉMoosi ikʉtendekesya ʉkwisa kwa Jesu
(Maalɨka 1:1-8; Lʉʉka 3:1-18; Johani 1:19-28)
1Ɨfyɨnja fingi bo fikɨndile, aaliko ʉmundʉ jʉmo ɨngamu jaake Johani ʉMoosi, alɨnkʉboneka ndʉngalangala ʉlwa mu Jutai. Aalʉmbɨlɨlaga aatɨgɨ, 2“Mupɨndʉke, paapo ʉBʉnyafyale bwa kʉmwanya#3:2 ɄBʉnyafyale bwa kʉmwanya Bala iisyʉ ɄBʉnyafyale bwa Kyala kʉ Ɨsyakʉlɨngaania. bʉsegeliile nkiisʉ.” 3Johani jo ʉjʉ aajobiigwe nʉ nkunguluka Jeesaja ʉkʉtɨ,
“Ɨliisyʉ lya mundʉ likʉkoolela ndʉngalangala likʉtɨ,
‘Mutendekesye ʉnsebo ʉgwa kwendamo ʉNtwa!
Mugolosye ɨnjɨla syake!’ ”#3:3 Bala kalata gwa Jeesaja 40:3.
4Johani aafwalaga ʉnselekesye gwa lʉsyoja lwa ngamila nʉ kwipinya ʉmpango ʉgwa lʉkoba mu nsana,#3:4 Johani ɨmyenda ɨgɨ aafwalaga gyafwene nɨ gya nkunguluka Elija. Bala kalata gwa 2 Abanyafyale 1:8. aalyaga amapalaalɨla nʉ lʉʉki. 5Po abandʉ bammwisɨlaga ʉkʉfuma mu Jelusalemu, nkiisʉ kyosa ɨkya Jutai na baa ntwaja toosa ʉtwa mumbalɨ ʉtwa ndwɨsi Jolitani. 6Biilaataga ɨmbiibi syabo, ʉmwene aaboosyaga ndwɨsi Jolitani.
7Looli baaliko abandʉ bamo aba baabatɨgɨ aBafalisai na Basatukai.#3:7 ABafalisai, aBasatukai Bala amasyʉ aga kʉ Ɨsyakʉlɨngaania. Bingi balɨnkwisa ʉkʉtɨ bammbone Johani bo ikʉboosya abandʉ. Johani bo ababwene alɨnkʉbabʉʉla alɨnkʉtɨ, “Ʉmwe mwe baa ndʉjungu lwa njoka! Bʉle, mukʉtɨ mubagiile ʉkʉpona ʉlʉfundo lwa Kyala lɨnga mukʉpɨndʉka kʉ bʉsyobi? 8Po munangɨsye ɨseke ɨsi sikʉnangɨsya ʉkʉtɨ mupɨndwike. 9Muleke ʉkwinogona ʉkʉtɨ, ‘Ʉswe taata jo Abulahamu.’#3:9 Ʉswe taata jo Abulahamu ABajuuta baatɨgɨ batikʉlongigwa paapo baana baa Abulahamu, ʉjʉ aasʉngʉliigwe na Kyala. Bala iisyʉ Abulahamu kʉ Ɨsyakʉlɨngaania. Nikʉbabʉʉla, Kyala abagiile ʉkʉgapela amabwe aga ʉkʉja baana baa Abulahamu! 10Ʉlʉ ʉbʉlongi bwa Kyala bʉfikile, bo ʉlwa mundʉ ʉjʉ akolile ɨndwanga, iitendekiisye ʉkʉtumula ɨmipiki. Po ʉmpiki ʉgʉ gʉtikʉpa ɨseke ɨnunu, gukʉtumuligwaga nʉ kʉsopigwa mmooto.
11“Ʉne ngʉboosya na mɨɨsi ʉkʉnangɨsya ʉkʉtɨ mupɨndwike. Looli kʉnyuma kʉmyangʉ ikwisa ʉjʉ alɨ na maka ʉkʉngɨnda ʉne, ngabagɨsya nʉ kwabʉla ɨfilato fyake.#3:11 Ʉkwabʉla ɨfilato fyake Ɨmbombo ɨjo jaabombigwaga na batʉmwa. Bala iisyʉ Ʉntʉmwa kʉ Ɨsyakʉlɨngaania. Ʉmwene jo ʉjʉ ikʉboosyaga na Mbepo Mwikemo nʉ mooto. 12Afwene nʉ mundʉ ʉjʉ akolile mmaboko ɨkya kʉlʉlʉʉkɨsya, iitendekiisye ʉkʉlʉlʉʉsya. Bo alʉlʉʉsiisye, ikʉbʉngaania mu ndamba, looli ɨmikʉkʉʉjɨlo ikʉgɨkosya nʉ mooto ʉgʉ gʉtikʉsima sikʉ.”
Jesu ikoosigwa
(Maalɨka 1:9-11; Lʉʉka 3:21-22)
13Po nkabalɨlo kala, Jesu aafumile nkiisʉ ɨkya Galilai, alɨnkwisa kwa Johani kʉ lwɨsi Jolitani, ʉkʉtɨ Johani ammoosye. 14Looli Johani aagelile ʉkʉkaana, alɨnkʉmmbʉʉla Jesu alɨnkʉtɨ, “Po silɨ bʉleebʉle ʉkʉtɨ ʉgwe gwise kʉmyangʉ? Ʉne ne ngʉlondigwa ʉkoosigwa na nungwe.” 15Looli Jesu alɨnkʉmmwamula alɨnkʉtɨ, “Bomba ɨsi ʉlʉ, paapo tukʉlondigwa ʉkʉbanangɨsya abandʉ ʉbʉpoki bwa Kyala.” Po Johani aaliitiike, alɨnkʉmmoosya.
16Jesu bo oosiigwe, alɨnkʉfyʉka pi isɨɨlya. Nakalɨnga kʉmwanya kʉlɨnkwigʉka, alɨnkʉmmbona Mbepo gwa Kyala ikʉsuluka pamwanya pamyake, nʉ mbɨlɨ bo ʉgwa ngʉnde. 17Ɨliisyʉ lya Kyala ʉkʉfuma kʉmwanya, lɨlɨnkʉtɨ, “Ʉjʉ jo Mwanangʉ#3:17 Mwanangʉ Bala iisyʉ ɄMwana gwa Kyala kʉ Ɨsyakʉlɨngaania. ʉNkʉndwe, ʉjʉ niikyeliile nagwe.”
अहिले सेलेक्ट गरिएको:
Matai 3: NYAK
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© Wycliffe Bible Translators, Inc. All rights reserved.
