Genesis 7
7
Tsa' tili but'ja'
1Lac Yum tsi' sube Noé: Ochen ti barco, yic'ot pejtel año' bʌ ti a wotot, come tsaj q'uele tojet tic tojlel yic'ot ti' tojlel pejtel winicob x'ixicob ti pañimil. 2Otsan ti barco wuccojt i tat yic'ot wuccojt i ña'al pejtelel sʌc bʌ bʌte'el ti jujunchajp. Otsan ja'el jini mach bʌ sʌquic, juncojt i tat yic'ot juncojt i ña'al pejtel bʌte'el ti jujunchajp. 3Otsan ja'el wuccojt i tat yic'ot wuccojt i ña'al mut ti chajp ti chajp cha'an cuxul mi' yajñel ti pañimil. 4Che' ñumeñix wucp'ejl q'uin mi caj c choc tilel ja'al ti pañimil. Mi' cajel ja'al cha'c'al q'uin yic'ot cha'c'al ac'ʌlel. Mi caj c jisan ti pañimil pejtelel cuxul tac bʌ tsa' bʌ c mele. Che' tsi' yʌlʌ lac Yum. 5Noé tsi' mele pejtelel chuqui tsi' yʌlʌ lac Yum.
6An lujunc'al i cha'bajc' (600) i jabilel Noé che' bʌ tsa' tili jini but'ja' ti pañimil. 7Noé yic'ot i yalobilob yic'ot i yijñam yic'ot i yijñamob i yalobilob tsa' ochiyob ti barco cha'an but'ja'. 8Jini sʌc bʌ bʌte'el yic'ot mach bʌ sʌquic bʌte'el, yic'ot te'lemut, yic'ot pejtelel jʌlʌcña bʌ mi' majlel ti lum 9ti cha'cha'cojt i tat yic'ot i ña'al ti jujunchajp tsa' ochiyob ti barco yic'ot Noé che' bajche' Dios tsi' yʌq'ue mandar Noé.
10-12Che' ñumeñix wucp'ejl q'uin tsa' tili but'ja'. Tsa' tejchi che' lujunc'alix i cha'bajc' i jabilel Noé, ti cha'p'ejlel uw yic'ot ti wuclujump'ejl q'uin. Ti jini jach bʌ q'uin tsa' tojmi pejtel i yajñib jini cuxul tac bʌ ja' am bʌ ti tam bʌ i yajñib. Ma'anic i p'isol ja'al. Cha'c'al q'uin yic'ot cha'c'al ac'ʌlel tsi' cha'le ja'al. 13Ti jini jach bʌ q'uin che' bʌ tsa' caji ja'al tsa' ochiyob ti barco Noé yic'ot i yalobilob Noé, Sem yic'ot Cam yic'ot Jafet, yic'ot i yijñam Noé yic'ot i yijñamob i yalobilob. 14-15Tsa' ochi ja'el ti chajp ti chajp pejtel bʌte'el, yic'ot pejtel alʌc'ʌl, yic'ot pejtel jʌlʌcña bʌ mi' majlel, yic'ot pejtel mut ti jujunchajp. Tsa' ochiyob ti barco ba'an Noé ti ñujp ti ñujp. 16Ti pejtelel cuxul tac bʌ tsa' ochiyob i tat yic'ot i ña'al che' bajche' Dios tsi' yʌq'ue mandar Noé. Lac Yum tsi' ñup'uyob.
17Cha'c'al q'uin tsa' bujt'i pañimil. Jini ja' tsa' tam'a. Tsi' ch'uyu letsel jini barco. Chan tsa' c'ʌjqui barco ti pam ja'. 18Jini ja' tsa' letsi. Tsa' wen p'ojli ti lum. C'ʌcʌcña ti pam ja' tsa' majli jini barco. 19Tsa' wen bujt'i ja' ti pañimil. Tsa' c'ʌjqui letsel ja' c'ʌlʌl tsa' ñumi ti pejtelel jini chan tac bʌ wits am bʌ ti yebal panchan. 20Tsa' c'axi jini ja' ya' ti pam wits ojlil i waxʌcp'ejl metro. 21Tsa' chʌmi pejtelel cuxul tac bʌ tsa' bʌ ajni ti pañimil, mut, alʌc'ʌl, bʌte'el, pejtel jʌlʌcña bʌ mi' majlel ti lum, yic'ot pejtelel winicob x'ixicob. 22Tsa' chʌmi pejtel año' bʌ ti pañimil mu' bʌ i japob ic'. 23Dios tsi' jisa pejtel cuxul tac bʌ am bʌ ti pañimil, winicob yic'ot bʌte'el, yic'ot jini jʌlʌcña bʌ mi' majlel, yic'ot mut. Tsa' laj jiliyob. Cojach Noé tsa' cʌle yic'ot jini año' bʌ ti barco. 24Jini ja' tsa' ajni ti lum lujump'ejl i waxʌcc'al (150) q'uin.
अहिले सेलेक्ट गरिएको:
Genesis 7: CTU77
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Chol de Tumbalá Bible © Bible Society of Mexico, 1977. Active Translation in Process