Maʼtɛ́as 10
10
Pɔɔ́n pá maʼtom pá Yə́sus aa póonɛ lɛ́
(Mə́l 3.16-19; Lóʼk 6.14-16)
1Yə́sus yɛɛ́dɔ́ŋɔn paaʼkan pə́ə́ŋ pá pówád na pábaan, aáság koboyɛ́ʼkɛn toɛn tó koŋɛŋ məŋun má mabɛ́, na tóonɛ lɛ́ mɔɔd alɛ abany páyɛmoyóómɛ. Nyɔ́ alɛɛ́ na kɛnɛ́m, páyɛɛlɛ lɛ́ kɛ́man.
2Táá əngiŋ á pɔɔ́n pá maʼtom págo pá pówád na pábaan aa yɛ́ɛnɛ lɛ́: O na oʼto na oʼto ayɛ́ɛ niiŋ lɛ́ Simɔ́ɔŋ nyɔ́ páyɛ́ɛ agodɔ́ŋɔn tɛn lɛ́ Píɛ na móŋŋí Əndələ́ə, na pa Sɛ́ag pɔ́lɛ́ na móŋŋí Sɛ́aŋ, pɔɔ́n pá Səbədə́ə; 3na Filíib, na Pəʼtələmíi, na Tómas, na Maʼtɛ́as, ɔʼkɔ́mmanɛʼ mag, na Sɛ́ag mɔɔ́n wo Əlifə́ə, na Tadə́ə; 4na Simɔ́ɔŋ tɛn nyummú, ɔnnɔnaʼ pɛbán pɛ́ nigúu, na Siudáa Ɛsɛʼkalɛyóod nyɔ́ yɛɛ́lɛ́g Yə́sus.
Oʼtom wó Yə́sus ayɛ́ʼkɛn na pɔɔ́n pə́ə́ŋ pá maʼtom
(Mə́l 6.7-13; Lóʼk 9.1-6)
5Nto yɛ́ɛy yówád na ɛ́baan, Yə́sus ayɛ́boyɛ́ʼkɛn oʼtom. Agɛɛn koɔ́bɔn, ayɛ́boyáágánan a ntóɛŋ ɔnɔ́: «Ná poándagɛɛnɛɛ́, podɛnjɛ́ɛ́nan a pɛnɔ pɛ́ pɔɔd pá pándɛŋɛnɛɛ́ Táán pálɛɛ́. Podɛsɔ́d a pálɛ́ɛg ɛ Pasamalɛʼtɛ́ɛŋ ɔmbɔ́ mmuʼ. 6Póɛn agá a pɛnɔ pɛ́ pɔɔ́n pá Yúdɛn pálɛɛ́. Pálɛ wɔnɔ́ todóm tó tuíním. 7Púim pólɔɛgɛ na ngə́ na ngə́ lɛ́ Nɛlaamɛʼ nɛ́ a mɔɛn nɛándɛ ndúmiʼ. 8Mɔɔd alɛ abany, póomoyóómɛ. Puóndɛganɛ pɛlóŋ. Mɔɔd alɛ abany nkún póomoósɔgɛn yɛ́lɛ́, poáŋɛ́ŋŋaŋ məŋun má mabɛ́. Mɛ, mbáboyɛ́ʼkɛn pəŋi a náan iyó, pəŋi tɛn poɛ́ʼkɛnan na pɔsɔ́g náan iyó.»
9«Poándagɛɛn, pudisiə́d ɔmbɔ́ kóol, ɔmbɔ́ mɔɔnɛ́, ɔmbɔ́ əgín ndólaʼ podɛnjáyáágɛ́ɛ́ a pɛbalɛ́. 10Podɛnjábóŋɛ́náá moom wɔnɔ́ pɛbalɛ́ pɛ́ ongɛn, pilə́ə́ pɛ́baan pɛ́baan, pabalábá a ambaan. Ɔmbɔ́ oʼtɔ́ŋ pudisíəd lɛ́ ungim nyɔ́ alɛɛ́ agɛɛlɛ pigólí, ogóódi lɛ́ yɔ́sɔ́sɛd ombɔg a pɛ́lɛ́. 11A pálɛ́ɛg ngim na moyaa mó əʼkúu muim mó puə́giig kɔ, Uunə́ən kolɛŋ mɔɔd nyɔ́ alɛɛ́ ugubuúsiəd kɔŋɛʼ. Púləndin kɔ súʼtə́ə́ a wɔɔ́s wó poádɛ́ɛmɛn áay agosan. 12Yoog yɛ́ poɔ́sɔd a yɛ́lɛ́, púsoyidi pɔɔd pá pálɛɛ́ kɔ poɔʼkɔ́: “Uŋóón wɛ́ɛn na pəŋi aá#10.12 Náan aa Yúdɛn ɛyɛ́ɛ isoyidənəni pɔ́nɔ́: «Uŋóón wɛ́ɛn na pəŋi aá!»!” 13Pɔɔd pá a yoog yɛ́ɛy pə́məʼkəə́liʼtini kubuúsiəd, uŋóón wááŋan wáagɛɛn na pɔ́lɛ́. Náa, pámaʼkosáŋɛnɛ kubuúsiəd, póyɛɛn na pisoyidiʼ pɛáŋan pɛ́ uŋóón. 14Puməʼkiig a yoog yimmú, oó lɛ́ pálɛ́ɛg yimmú náa pə́dibuúsiədinií kɔ kɔŋɛʼ, pánnyɔ́ŋɛn tɛn ɔmbɔ́ lɛ́ póob nkə kɛ́ poálɔɛgɛ, lónáan, pósan. Poándaasan, puə́gidə ummúndúŋ wó a ambaan yááŋan. 15Ndabodɛ́anɛ a fɔ́lɔ́b lɛ́, a wɔɔ́s ó pɛyɔm, Táán adɛndɛ́ɛ́ kolaŋ konyɛ́nɛn pɔɔd pá a Sodóom#10.15 Pódála a kálaʼtaʼ ɛ Siɛ 18—19 na Kɔmɔ́ɔl wɔnɔ́ ná alɛ́ɛ́ konyɛ́nɛnɛɛ́ pɔsɔ́g pá a pálɛ́ɛg yɛ́ɛy.»
Yə́sus alɛ əgusəə kɛbán kɛ́ ntɔ́b yɛ́ ɛlɛ́ɛ́ kiimií
(Mə́l 13.9-13; Lóʼk 12.11-12; Lóʼk 21.12-19)
16«Taa, mɛ mbáboodóm wɔnɔ́ todóm a kɛgaágadɛ kɛ́ pəŋəŋúug; álɛ́ndɛ́ŋɛ́an wɔnɔ́ nkud aá! Ɛgom fiɛ́d wɔnɔ́ piɛm áaá!»
17«Lóʼkɔ́dɔɔn oó! Pálɛ́ɛ́ kɛɛn na pəŋi a puog pó pɛyɔm. Pálɛ́ɛ́ kobobáam a puog poɔ́bɔn pó pɛɔ́sɔ́gɔ́lɔ́n. 18Pálɛ́ɛ́ kubudə́nigi a pɛyɔm a udi ó pongɔ́mɛnaʼ na a oó puʼkúm a kidíídí kɛ́am. Polɛ́ɛ́ kɛʼtɛ́lɛmɛn mbaasɔ́ a udi wɔ́ɔ́bɔn na a oó pandɛŋ Táán. 19Ná pálɛ́ɛ́ kɛɛnɛɛ́ na pəŋi a puog pó pɛyɔm, podɛyáságɛ́máá nkə kɛ́ puə́səə kɔ na tuə́ áa poágaánɔna, ndóo. Tɔgɛ́ɛ́ tuim tó tólɛ́ɛ́ kubuyíminií lɛ́ púsəə a kɛnɛŋ kɛ́go kɛ́ɛg 20Uŋun ó Sɛ waaŋan aa ólɛ́ɛ́ koboyɛ́ʼkɛnɛɛ́ tólɛ́ lɛ́ púsəə. Tódɛndɛ́ɛ́ kɛɛn tɔgɛ́ɛ́ tó pomáyɛ́ɛ́ŋɛ́nɛ́ɛ́ pəŋibáamɔɛ́d lɛ́ pósɔyɔ. 21Kɛ́lɛ́ɛ́ kɛɛn a kɛnɛŋ kɛ́ɛg lɛ́: Móŋŋí wo nsun mmuʼ aalɛg móŋŋí wəəŋ wo nsun mmuʼ lɛ́ pámoyóon. Sɛ a mɔɔ́n áyɛɛlɛ tɛn náan yoom ímuʼ na pɔɔ́n, pɔɔ́n páyaágasɛnɛ tɛn pasɛ pɔ́ɔ́bɔn lɛ́ ná páboyóóna. 22Ungim alɛ́ɛ́ koboóbɛnɛn a kidíídí kɛ́am. Náa, wɛ nyɔ́ olɛ́ɛ́ kubisií ongoo súʼtə́ə́ a nɛman, wɛ nyóon aa Táán alɛ́ɛ́ kogoyɔ́yɛɛ́. 23Pálɛ́ɛg yɛ́ pálɛ́ɛ́ koboónɔɛyɛɛ́ a yɛ́lɛ́, pósan, póɛn a yɛndɛ́ŋ. Ndabodɛ́anɛ a fɔ́lɔ́b lɛ́ podɛndɛ́ɛ́ kodáŋana, póyaálaʼtɛ pálɛ́ɛg ngim ɛ nigúu nɛ́ Ɛ́sɛlayɛl ná mɛ Mɔɔ́n o mɔɔd ntínjíim. 24Ongaaʼkan ɔmbɔ́ úmmuʼ ɔdɛɔ́gɔ ogobáʼkanan kɛlág kiə́ŋ. Uʼkudin tɛn ɔmbɔ́ úmmuʼ, ambáʼkánan sə́dúg wəəŋ. 25A ongaaʼkan, kíəguunə əgín agá lɛ́ yɛ́ɛn wɔnɔ́ kɛlág kiə́ŋ, uʼkudin áyɛɛn wɔnɔ́ sə́dúg wəəŋ. Págálɛ agodɔ́ŋɔn mɔɔd ɔmmɔɛ́d nyɔ́ alɛɛ́ lɛ́ alɛ mɔɔd o noádɛʼ pɔ́nɔ́ “Pə́lə́səbul”, pɛnɛŋ pɛ́sɛ́g anɛ́ɛ́n na pá pálɛɛ́ agá lɛ́ pálɛ yoog yəəŋ ɛ pɔɔd!»
Podɛʼtámmána yoom na yoom
(Mə́l 8.38; Lóʼk 9.26; Lóʼk 12.2-9)
26«Podɛʼtámmána yoom na yoom lɛ́, yiim yɛ́ ɛ́yɛ́ɛ a nuníb ɛ́lɛ́ɛ́ kolon táán. Yɛ́ ɛ́lɛɛ́ agaáyɛ́ɛlɛ a pɛɔsɛ́g, pálɛ́ɛ́ kolɛŋ. 27Nkə kɛ́ ndɛɛ́ agobodɛ́anɛ a mbin a kaadɛ, todáan əsəə kɛ́lɛ́ a táyááŋ. Nkə kɛ́ pámábodɛánɛ a ɛdɔɔgɛ, póbag a kɛbon a mɔɛn, pólɔɛgɛ kɛ́lɛ́.»
28«Podɛʼtámmána pá pálɛɛ́ lɛ́, páagoon mɔɔd, náa pádɛáʼkɛ koon ɛdáányɛ́ yɛ́ ɛ́lɛɛ́ na nyɔ́lɛ́. Tammánáan agá Táán nyɔ́ alɛɛ́ lɛ́, aagoyóon wɛ mɔɔd, áyoon tɛn uŋun wááŋ, áadagɛdɛ wólɛ́ a yug yɛ́ ɛgóón. 29Adɛ́ pálɛ agolɛg múlundúún móbaan a síísi mmuʼ əə? Kɔmɔɛ́d lɛ́ ílundúún əgín ɔmbɔ́ ímuʼ, ɛ́dɛɔ́gɔ ígunim, Táán andɛŋ. 30Pɛnɛŋ pɛ́sɛ́g anɛ́ɛ́n na pəŋi pá aálɛŋ ɔmbɔ́ na tuyə́ən toáŋan kɛ́ tósɛ́g áa pugódíí oʼto. 31Podɛʼtámmána anɛ́ɛ́n yoom na yoom. A əngis á Táán, pəŋi pomááyɛn múlundúún muim.»
32«Nyɔ́ alɛ́ɛ́ kinjəə́gidənií a udi ó pɔɔd, ɔɔ́sɔyɔ lɛ́ nyɔ́lɛ́ alɛ waam, mɛ tɛn ndɛ́ɛ́ kodɛ́lɛm a udi ó Paabá nyɔ́ alɛɛ́ a mɔɛn, əgusəə lɛ́ alɛ waam. 33Náa, nyɔ́ alɛ́ɛ́ kiʼtəmií a əngis á pɔɔd, mɛ ndɛ́ɛ́ kumuúʼtəm tɛn nyɔ́lɛ́ a udi ó Sɛ waam nyɔ́ alɛɛ́ a mɔɛn.»
Adɛ́njaŋ uŋóón áa mbíim agaag a nsí, pɛdá aa mbíim ədə́əŋi
(Lóʼk 12.51-53)
34«Podɛfɛ́g lɛ́ kiwiiyiʼ aa mbíim agaag a nsí, ndóo. Ntiimin na kiwiiyiʼ, pɛdá aa mbíim na pɛ́lɛ́ 35lɛ́ mbíim agɛɛlɛ lɛ́ sɛ a mɔɔ́n ásaalɛg na mɔɔ́n wəəŋ, ŋŋí a mɔɔ́n áasaalɛg tɛn na mɔɔ́n nyɔ́ ɔʼkɛ́ɛd, ɔmbɔ́ tɛn ŋŋíin áasaalɛg na oʼkán ó mɔɔ́n. 36Pɔɔd pá a yoog yaaŋ ɛ pɔɔd aa pálɛ́ɛ́ kogoónɔɛyɛɛ́ pɛdá#10.36 Nkə kɛ́ kɛ́lɛɛ́ áanɛ a angɛŋ 35 na 36, kɛ́lɛ náan a kálaʼtaʼ ɛ Mis 7.6 »
A kóonɛ lɛ́ úyə́ən Yə́sus, ugóódi lɛ́ wásáŋɛnɛ wɛɛ́nyɔ́amɔɛ́d
(Mə́l 8.34-35; Lóʼk 14.26-27; Lóʼk 9.23-24)
37«Nyɔ́ aányɔ́ŋɛn sɛ wəəŋ, ɔmbɔ́ lɛ́ ŋŋí wəəŋ agosan wɔnɔ́ ná ogódíí lɛ́ yɛ́nnyɔ́ŋɛn mɛ, nyóon ɔdɛɔ́gɔ nyóonɛ lɛ́ mmoyáág a ondáŋ wáam. Nyɔ́ aányɔ́ŋɛn tɛn mɔɔ́n agosan wɔnɔ́ ná ogódíí lɛ́ yɛ́nnyɔ́ŋɛn mɛ, nyóon tɛn ɔdɛɔ́gɔ waam. 38Nyɔ́ ədiə́lúlinií ɔmbásá wə́ə́ŋ əgiim yínjə́ən, nyóon ɔdɛɔ́gɔ waam. 39Nyɔ́ alɛ́ɛ́ kuunə lɛ́ yə́gəʼkəəŋəni ɔlaa wə́ə́ŋ, nyóon alɛ́ɛ́ koʼtaŋ wólɛ́. Nyɔ́ alɛ́ɛ́ koʼtaŋɛɛ́ ɔlaa wə́ə́ŋ a kidíídí kɛ́am, nyóon aa alɛ́ɛ́ kɛɛnɛɛ́ na ɔlaa ó pɛnɛŋ piim.»
40«Nyɔ́ əmə́busiə́d pəŋi kɔŋɛʼ, mɛ aa əmísiə́d náan kɔŋɛʼ. Nyɔ́ əmísiə́d mɛ kɔŋɛʼ, əə́siəd tɛn anyóon nyɔ́ əyíím yɛ́ʼtom. 41Nyɔ́ əə́siəd ɔndɔɛgɛʼ pɛbán o Táán kɔŋɛʼ lɛ́ alɛ ɔndɔɛgɛʼ pɛbán o Táán, nyóon alɛ́ɛ́ kɛɛn na pɛsáábɔ́n pɛ́ pɛ́lɛɛ́ pɛ́ palɔɛgɛʼ pɛbán pá Táán. Nyɔ́ əə́siəd mɔɔd o sáád kɔŋɛʼ lɛ́ alɛ mɔɔd o sáád, nyóon alɛ́ɛ́ kɔɔŋ pɛsáábɔ́n pɛ́ pɛ́lɛɛ́ pɛ́ pɔɔd pá pálɛɛ́ sáád. A fɔ́lɔ́b, ndabodɛ́anɛ lɛ́ 42nyɔ́ alɛ́ɛ́ kɛɛ́ʼkɛnɛɛ́ ɔmbɔ́ əgín mayaa má məní má koŋo náanɛ sɔɔŋ na ɛyaa ɛ́ moóngaa wɔnɔ́ yɛ́ɛnɛ a oʼto wóonɛ lɛ́ ɛ́lɛ ongaaʼkan waam, nyóon adɛndɛ́ɛ́ koʼtaŋ pɛsáábɔ́n piə́ŋ.»
अहिले सेलेक्ट गरिएको:
Maʼtɛ́as 10: yatDBL
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© Wycliffe Bible Translators Inc, 2015
