Kuyamba 7
7
Chigumula
1Chawuta adati kwa Nowa, “Pita mubote nabanja lako, pakuti ndawona kuti ndiwe wekha wakulungama pam'badwe wentse uli padziko. 2Panyama zakuchena utakule mikono minomwe nazikazi zinomwe. Koma panyama zakupsipa utakule ziwili, ikono nayikazi. 3Utakule mbalami zamishowo yentse, zikazi zinomwe nazimuna zinomwe, kuchitila kuti zikhale zamoyo padziko lentse lapantsi. 4Kupita kwantsiku zinomwe kuchoka lelo, nin'zabvumbisa mvula padziko kwantsiku makumi manayi (40) usiku namasikati. Bzentse bzamoyo bzandidalenga, nin'zabzicheneka padziko.” 5Nakutenepo Nowa adachita bzentse bzaadawuziwa na Chawuta kuti achite.
6Nowa akhana magole mazana matanthatu (600), padachitika chigumula padziko. 7#Mat 24:38,39; Luk 17:27Nowa nankazi wake nawana wake naaloola wake adapita mubote kuti aleke kufa namadzi yachigumula. 8Bzinyama bzakuchena nabzakupsipa nambalami nabzentse bzinkwawa namimba, 9bzili bziwili-bziwili, chimuna nachikazi, ninga kuwuziwa kukhadachitiwa Nowa na Mulungu. 10Kudapita ntsiku zinomwe madzi yachigumula nkubwela padziko.
11 #
2 Pit 3:6
Nowa paakhana magole mazana matanthatu (600), mumwezi wachiwili, ntsiku yakhumi nanomwe, ndiyo ntsiku idafunguka ntsantsa zentse zamaboo, namazhenela yentse yakudzulu yadafunguka. 12Mvula idabvumba padziko kwantsiku makumi manayi usiku namasikati. 13Ntsiku imweyo Nowa nankazi wake nawana wake wachimuna atatu, Shemu na Hamu na Jafeti naaziloola wake adapita m'bote, 14pabodzi nanyama kuteyeza mishowo yazene, bzifuwo kuteyeza mishowo yabzene, nabzentze bzinkwawa namimba kuteyeza mishowo yabzene, nambalami zentse kuteyeza mishowo yazene, mbalami zanshowo nanshowo. 15Bzakulengewa bzamoyo bzakusiyana-siyana bzidapita mubote na Nowa bzili bziwili-bziwili, 16kuteyeza kuwuziwa kwaakhadachitiwa Nowa na Mulungu. Pamwepo Chawuta adafunga nsuwo.
17Madzi yachigumula yadapitiliza kubvumba padziko kwantsiku makumi manayi. Madzi yadawanda, bzidazachitisa kuti botelo liyangamale padzulu pamadzi. 18Madzi yadapitiliza kuwanda padziko, bote nkuyangamala padzulu. 19Madzi yadadzala nkunyuza maphili yentse matali yapadziko, 20yadanyuza mapili kufika mamita manomwe. 21Bzinyama bzentse bzamoyo bzikhali padziko, mbalami nabzifuwo nabzinkwawa namimba pabodzi nawanthu nkufa. 22Bzinthu bzentse bzamoyo bzikhali pabziko bzidafa. 23Chawuta adapha bzentse bzamoyo padziko, wanthu nabzinyama nambalami. Kudasala Nowa nabzentse bzaakhanabzo m'bote. 24Madzi yadadzala padziko lapantsi kwantsiku dzana namakumi mashanu.
अहिले सेलेक्ट गरिएको:
Kuyamba 7: KUNDA
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Bhaibheri reChikunda © Bible Society of Zimbabwe