Lúka 24
24
Yíésu uushich yé gaa ˈdie
1Rám tiiyaká kúlíchlé erká bur af midhab ˈdég sáláblé usiyyo-, he tág koyyeká eete, uushich bííyle mé niiyye. 2ˈDég ali kí ˈdiiyyeká nyátáábá uushich af gaa tielká gaalí uushich af gaa gaalgalsíe! 3Aalé ˈdég he liish hilleká Máá Guđo Yíésu gónle liish gaa laʼ! 4Aalé ˈdég hátlé hé kinaal a ˈdaˈdabiyyeká gál yááb naama đafaraam édh ˈjiimidatká fadhdhe mare gáál láá kí ˈdie. 5ˈDég đo sierm hí faanne, met les ki ˈdoyye. Gál yaab kinaal ˈdég geey, kieye, Háteka it máá luolká álb gál kufeká gaa ˈgeˈgetéel? 6Mu hé állá gaa láʼ, mu hé uushich yé gaa ˈdie. Hé mu Galilááya gaa ijeká muí geeyká táb ˈdodhdhíe, 7giri mu kieye, Iny Máádhat gál nyuogim ˈguoká gíl ha gaalí gaa kakaa, ˈgór đarám yaalká ha gaalí ˈdú ˈdiisa, hai kufuma, tá kúlích ki seđeká uushich yé hai gáá ˈdeeme, muí yieká, gaalí ˈdég yie. 8ˈDég ˈdeeny kinaal hát Yíésu hí geeyká hí táb ká ˈjie.
9Aalé ˈdég uushich álle hol gaa naateká, Yíésu gállé alb fimi-, tomon a takachká ubaa mú lalilléétí fayaméél shiiche. 10ˈDeg gál alb fimiká fayám shiicheká he mú María Magaˈdalaká, Iwánna, ubaa María giri Yákob ˈjielléká, tá héétí ˈdeg éíy taaka gáál hol ˈgieká. 11Gál alb fimi kinaal ˈdég ˈdéé af ki điidhe, ˈdéé ˈdeeny um niginiká hí ˈgieká ká dhaay. 12Kor Bétiro íín kiite, uushich bííyle ˈdú ˈdodhdhe. Mu ali ki ˈdieká liish ki ˈdolite, liish geer tág gaa dhaayká đafaraam gaalí Yíésu ki maamareká tákámle ali ija. Mu hé kinaal a ˈdabe, é hol ˈdú nadhe.
Gál láli naama Emáaw sesemeká Yíésu hí el gáá hile
13Kúlích tikiˈde kinaallá mú lalille naam hí kie, ény Emaaw he mé nannie. (Yerúsalem ke gaa kekeen-, ke Emáaw mé nannuoká sienyle aadh ˈgas naama he egedhe.) 14Gaal ˈgíéríchlé gaa igireká, hé argeká ubaa hé maaleká lullé hol geđie. 15Gaal hátlé hol hegete-, ˈdeenyéél hol geđieká, Yíésu tuuˈdle gáál el gáá hile, gáál hol eedhdhe, 16kor gaal hé mú ma kimísan.
17Aalé Yíésu gáál heete, kieye, Hé hí ˈgierich gaa igiˈdaká hí hol geđicháállá meete? yie. Aalé gaal ali ki ˈdie, innum hol ˈdú shuune. 18Aalé gaal ííni kinaal máá gaalí Kiléyoba yegie mare mú ˈdéé hol ˈdú nie, kieye, Kúún káánallo Yerúsalem ki ˈjííyye? Hé gálaat lulle hí arge-, ubaa hí maaléél, kó nétle mân? muí mú yie.
19Aalé Yíésu gáál heete, kieye, Hé kinaallá hé máre? yie. Gaal kieye, Fayam Yiesu Nasaret-, máállé Waag hí ˈdéé ka shigiche-, héllé ekemeyká ubaa héllé hogodheká innum gálaat lulle ubaa innum Waaˈgiet gaa ˈdúwa-, fargogonoyká, 20giri gál guguđo-, suoryoká ubaa gál kúnnaa gáál met ki ˈgieká hí mú mangis gíl gaa kaay-, Mú yiesíe, yie-, mú gaalí ˈgór đarám yaalká ˈdú ˈdisseká. 21Nyíín tawunykínyoka mu he máá gál Yisirayel kidh gíl geer yé gaa ˈdeđisatká. Aalé káána a meeny mú gaalí yieská kúlíchalláka seđe. 22Kor káána gál kínyia ˈdége mare úba geđi nyí birgisie. ˈDég bur a midhab uushich álle mé niiyyeká, 23gaal hé mú gónle liish ma gaa árginy. Gaal đo hol ká nadhe, gaal fayam gálle ˈgasso-, urruká hí yé ˈdú gáá ˈdiiyye-, hí geeyche-, máálle luolká nyí shie. 24Aalé gálkínyo ˈbaal hí liish álle mé nie, giri hé ˈdég hí ka siteká ˈdúúw ˈdú ˈdeˈdeenká. Tá mu íín hé gaalí ma árginy, gaalí yie.
25Aalé Yíésu gál kinaal geey, kieye, Itín ebá hí đées-, it gál Waag hí ˈdéé ka shigicheká ˈdeemle lulle đo hí ál ˈjob ger ma ki chichiranal! 26Messíya hé hééllá il hí ma aargíriny? Tá hé kinaal el ˈdaal hé guchle ma higíliny? Yíésu hí gáál yie. 27Aalé Yíésu ˈdeenylé he veerit Waaˈgiet gaa iđe-, a meeny warˈgasam Móshe hí veereká, tá ˈjíig warˈgasam gál Waag hí ˈdéé ka shigicheká hí veereká đigká fayamle gáál af gaa koy.
28Aalé gaal ény he sesemeká kí ˈjobondheká, Yíésu kerka é láa he nanadhe. 29Gál mú hol ˈgieká mú af ki mote, kieye, Aadh hé gaanate, biiy hé ká chuurayye, ényallá ál nyí ˈdú gagalaká kí ˈdú galo, gaalí mú yie. Aalé mu gáál hol eedhdhe, é ˈdú gale. 30Aalé af giri gaal gólol gaa yíéđieká, mu balashá eedhdhe, Waag gielmít hol ˈdú nie, balashá eiy ˈgey, gáál shie. 31Aalé gál giriká Waag hí in eiy ˈdeeyche, gaal đo mú kimite, Yíésu đo gáál in ki bađay. 32Gaal hol heegete, kieye, Mú ki hol ˈgie-, ki ˈgierich gaa igire-, mu gáál Warˈgat Waaˈgiet ˈdeenyle eiy kí nannieká, ger urgía hé gáál gaa meedheká muunîny? gaalí hol yie.
33-34Aalé tíkíˈdé kinaallá gaal kie, Yerúsalem hol ˈdú nadhe. Gaal gál alb fimi-, tomon a takachká ubaa gállé hol ˈgie-, ali tikiˈd hol ˈdú ije-, hol geđie-, kieye, Hé ˈduwa, Máá kúnnaa Guđoká hé uushich yé gáá ˈdie, hé Símon yé ˈdu gáá ˈdie, hol yegetká, af kí ˈdie. 35Aalé gál giri naama hol nadheká hát Yíésu hol ˈgíérích ény Emaaw hol ˈdu gáá fame-, ubaa af giri mu balashá eiy ˈgieˈgie-, mú kimiteká fayamle gáál shie.
Yíésu gál alb fimiká yé ˈdu gáá ˈdie
36Gál naama kinaal hátle gáál fayám shigia, Yíésu gáál hurt yé gáá ˈdie, kieye, Naanná gaa yíéđía, yie. 37Gaal birge, sierm hí faanne, mú gaaramo he yie. 38Tá Yíésu gáál geey, kieye, Háteka bineneny hí faanne-, me hí guđandhéel? 39Gilchú ubaa ˈgaschú dhaayyíe. He yú. Ye chiichiˈdíe, hát he yúká kimitíe. Gaaram hé gón ubaa laf yú ˈguo-, itín hí ye gaa argiyyáállá hé mán, muí gáál yie. 40Mu héél hodheká gille ubaa ˈgasle gáál argisie.
41Gaal hátlé ger hí gaa meedhe-, he af hiibidhme-, ger totom gaa ˈgiˈgiteká, Yíésu gáál heete, kieye, It hé geere kare-, hí ˈgayya-, állá ijoká mân? gáál yie. 42Gaal béch gaalí narieká ká eey, mú ki helie. 43Aalé mu beech eedhdhe, beech gáál metle gaa koey. 44Aalé mu gáál geey, kieye, ˈDeenyééllá ˈdeeny giri muun ke hol af ijeká yú hí geeyká, giri yú hí geey-, hé ˈdaachúka Móshe hí warˈgasamlé hemuumuritiká gaa veereká ubaa ˈdeeny chia gál Waag hí ˈdéé ka shigicheká hí warˈgasamle gaa veereká, héétí ubaa ˈdeeny chia gaalí warˈgat Arramká gaa veereká lulle hai ˈduuwaa, yú hí yieká, Yíésu hí gáál yie.
45Aalé mu gáál met eiy ˈdeey, giri gaal Warˈgat Waaˈgiet ˈdeenyle hélle kiimisatká. 46Mu gáál geey, kieye, Warˈgat Waaˈgiet hatallá gaalí gaa veere: Messíya ha gaalí yeese, tá kúlích ki seđeká sídhle hollo hí hol ˈdú naata, uushich yé hai gaa ˈdeeme. 47Fayam rubachietallá mú meenyle ˈdugaka erkob Yerúsalemo gaalí gaa ˈdiyime, tá gaalí kidh lulle ki ˈdiyime, giri gálaat héllé ˈdeđewká haađuo-, Waag makan fafaan-, Waag hí ađaabano ubaa nyuogim gaa egeyyoká. 48It giri hí hééllá argiyyeká in hí gálaat ki ˈdiyeenne. 49Bá dhaayyíe, hé ˈJaachú hí af iđieká ali ha yú hí ˈdu gáá kakaa. ˈDaab fargogint Waag hí úr gáá shigichoká hí ma árginyká ˈjienééllá gaa yíéđía! Yíésu hí gáál yie.
Yíésu úr mé nie
50Aalé Yíésu gáál ˈjien gaa eedhdhe. Bédhene álleka mu gil úr ki shuunne, gáál ˈdú ˈguunume. 51Mu hátlé gáál ˈdú ˈgunumeká đo úr ki kie, Waag hí úr ˈdú eete. 52Gál giriká mú vite, súm ger hí gaa meedhe. Gaal aalé Yerúsalem hol ˈdú nadhe. 53Aalé gaal aadh lulle ˈBíl Waaˈgiet seeseme, ál kinaal Waag gaa meemey.
अहिले सेलेक्ट गरिएको:
Lúka 24: dsh
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Bible Translation and Literacy
