Yuána 1
1
ˈDee máádhat yie
1Erkob-, Waag hátlé hé níínní ka kuonne mánká ˈDee hé biiy gaa ije. Máá gaalí ˈDéé yegetallá Waago hol af ije, ˈDee íínííllá he Waag. 2Máállá in erkob Waag hátlé hé níínní ka kuonne mánká Waag hol af ije. 3He met lullé Waag hí ká kuonnééllá mú ˈdaallé he ká nadhe, ki ija. Máállá muuninyka, he met lullé úr ubaa les gaa ijóóllá hé onnônyka mán. 4Mu íínííllá in luolmít hí yé gáá ˈdeˈdeenne. Luolmit kinaallá he édhúm gálaat gaa verenoká. 5Édhúmallá he édhúm bííy gaa ongʼoˈdeká gaa eedhdhesuo-, bííy gaa ongʼoˈdeká hí ma ˈdiđisinyká.
6Aalé máá gaalí Yuána yegieká Waag hí ali gáá kaayye. 7Mu ka yimíéllá he giri mu édhúm kinaallá ˈduuwle gálaat geđuo-, gálaat lulle édhum iiy yegetká. 8Mu íín dhúrle hé édhúm kinaallá muuniny. Mu ka yimíéllá édhum ˈduuwlé he ká sidhe. 9Édhúmallá he édhúm ˈdúwa-, lésallá ká yimie-, máádhat lulle édhum ˈdú kokuoká.
10Édhúmallá hé lésallá gaa ije. Mu íínííllá har úba les hí ˈdaalle ká naate-, les hí ki iđoka, les gálle hé mú ali gaa moonnodhe. 11Mu hé lésle ká yimie, kor mú gálle hé mú điidhe. 12Tá gál mú ma đíin-, mú iiy yieká lulle íín hé muí ˈduuw gálle um Waaˈgiet yegetká shie. 13Gál mú iiy yíéllá ˈdalmaat káána-, he kí ˈdalidhééllá hé ˈdalmaat aađa-, fás gonniet-, gálaat hí hol kí hođuoká muuniny, hééllá he ˈdalmaat Waag yé gáá ˈdiiyyeká.
14Aaléka, Máá gaalí ˈDéé yegetallá máádhat yie,#1:14 Yuána Erká 4:2 múún gáál hurt gáá yíéđie. Mú guchlé ˈdúˈjím ubaa ˈduuw guđoká ˈgayyóóllá íl kínyaa nyí ki argiyye. Guch muí ˈgúóllá he ˈdaa giri mu íín he Iny ali ka takach-, ˈJaalle Waagká.
15Aalé Yuána mú fayamle ˈdiiyime, af úr ki eey, kieye, Máá yú hí geđie-, yú kieye, Máá yú met ká nadhe-, ka yiimet-, yú hátlé ma ka ˈdaláanká kíssóótí ali ije-, hé ye ˈdú ˈdúwa-, yú hí yegieká hállá! yie. 16Mú ˈdúˈjímlé-, ˈdúˈjím ke hemuumurít gaa argeká a mé iđóóllá hé muun lulkúnno gáál ˈdú ookoˈdmoote. 17Hemuumurít íín Móshe hí gáál ká hilsie. ˈDúˈjím ubaa ˈgíérích ˈdúwáállá íín Yiesu Kirísto hí gáál ká hilie. 18Waag hé kálta máá hí argeká mán. Máá ke Waag gaa onnodheká, he Iny ali ka takach-, Waaˈgiet-, ˈJaalle túmus ki koyká.
Yuána hát Messíya muuninyká gálaat geey
19Aaléka, gál guguđo-, Yuuˈdi-, Yerusalemká gállé suoryoká ubaa gállé Leviká#1:19 Gál Levi he gál ˈBíl Waaˈgietká hujich gaa nannie-, gál suoryoká hujich ki chichiˈdeká. ˈbaal Yuána gáál ali ˈdú fie, giri gaal Yuána ka hegeset-, Kúún mááya? mú yegetká. Aalé gaal mú heeteká Yuána ˈdeenylé gáál hol ˈdú nieká kieye, 20Yú yáá Messíya muuniny,#1:20 Af Heberewka Kirísto he Messíya. Messíya hélle kieye, Máá Waag hí salab mé ki liiyye-, Waag hí kansím koyyeká. muí gáál yie. Mu hatallá yíéllá, hé hé níínní gáál af ki mannisieká mán. Mu hé ˈdúwaká he gáál geey.
21Aaléka, gaal mú yiete, kieye, Tá kuun mááya? Kuun he Elíya?#1:21 Elíya he máá héle Waag hí ˈdeem ká shigicheká. Gál Yuána hegete-, kieye, Kuun he Elíya? yegíéllá tawunyleka kieye, Elíya amú uushicho yé gáá ˈdie, yegie. gaalí yie. Yuána kieye, Yú yáá máá kinaallá muuniny. Gaal geđi mú yiete, kieye, Kuun he Máá giri Waag hí ˈdeem ka shigichoká? yie.#1:21 Hemuumurít ˈDéé Hótlé 18:15, 18 Mu gáál ˈdéé hol ˈdú nie, Híʼi, yie. 22Aalé gaal mú yiete, kieye, Tá kuun mááya? Ebá hol ka ˈdáákash! Gál nyí ali ká fieká nyí fayám ˈdú sita, gaalí mú yie. 23Aalé Yuána kieye, Yú he ˈdéé hót ˈbakat gáá ˈgiˈgite-, kieye, ˈGíérích Máá Guđoká lođuđugul kóo,#1:23 Yisááya 40:3 chegie-, Waag máállé ˈdéé ka shigiche-, Yisááya hí ˈdeenyle hodheká, yie.
24Aalé gál gál Farisaay hí ali ka fíéllá, 25mú yiete, kieye, Kuun in Messíya máámaʼ, Elíya máámaʼ, Máá giri Waag hí ˈdéé ka shigichoká in úba muuniny háluke, tá háteka gálaat bie gim nanniyyóol? mú yie. 26Yuána gáál ˈdéé hol ˈdú nie, kieye, Yú bie gálaat gim nannaa, tá máá hí muogká hé hurt kíchiallá gaa ijo. 27Máá kinaallá he máá yú met ká nadhe-, ka yiimetká. Tá yú yáá ˈduuw ˈguo-, mú koiyle saawle fuuroká mán, yie. 28Hééllá lulle Bédhene giri wár Yorˈdan-, ílung ˈdaati-, álle Yuána hí gálaat bie gim gaa nannieká, he yiem gáá ˈdie.
Yíésu he Élíny Waaˈgiet
29Bííy éíy taaka ka biˈdeká Yuána Yíésu hí ˈdu gáá yiimie-, argeká, đo kieye, Dhaayyíe, Élíny Waaˈgiet nyuogim ubaa ađaabano lésallá gaa egewká háluká! 30Máá ˈdeenyle yú hogodhe-, yú kieye, Máá yú met ká nadhe-, ka yiimet-, yú hátlé ma ka ˈdaláanká íín kíssóótí ali ije-, hé ye ˈdú ˈdúwa-, yú hí yegieká, hállá! 31Yú dhúrchú érléká yáá mú moonnoy, tá yú ka yimie-, gálaat bie gim nannúóllá he giri gál Yisirayel mu hát mááyaká kiimisatká, yie.
32Aaléka, Yuána hé argeká huogodhe, kieye, Yáá Hím Naasan Waaˈgiet hát hóleka úr gáá lelete-, mú ˈdú yíéđiyyeká arge. 33Yú yáá onnônyka mú ma kiimísan, tá Máá ye ali gáá kaay-, kieye, Gálaat bie gim náánnaʼ, ye yieká, ye geey, kieye, Máá Hím Naasan Waaˈgiet úr gáá leletoká hí ˈdú yíéđiyyo-, argiyyoká, máá kinaallá he máá gálaat Hím Naasan Waaˈgiet gim nannuoká, hí ye yie. 34Hé kinaallá yáá arge, tá yú hí mú ˈduuwle geeye, Máállá gon Iny Waaˈgiet, Yuána hí gáál yie.
Ánˈduru ubaa Bétiro Yíésu hol arge
35Bííy éíy taaka ka biˈdeká Yuána ubaa lalille naam sedhe, geđi ál kinaal ki ˈdie. 36Yuána Yíésu sienylé gaa igireká mú gaa dhaay, đo ˈdéé hodhe, kieye, Bá dhaayyíe, Élíny Waaˈgiet háluká! yie. 37Gál giri naama-, láliká ˈdeeny Yuána hí hodhéél maaleká đo Yíésu el gaa veere. 38Yíésu hol gáá madeká gál naama-, hí el gaa igireká arge, đo gáál yiete, kieye, Meete hí feˈde? yie. Gaal mú yiete, kieye, Rábi, kuun in el mé ko ále? yie. (Rábi hélle kieye, Máá gáál he oonisúóllo.) 39Yíésu gáál ˈdéé hol ˈdú nie, kieye, Ka yimedhíe, el meenychú argáa, yie. Hé kinaallá aadh ˈgas afur ˈjobínti.#1:39 Álláka Yuána aadh ˈgas tomonno he yie. Yaalmit gál Rooma ubaa ˈDaasanach hí aadh ˈgas ki totoyoká hol ká eiyye. Aadh ˈgas gál Rooma hí tomon yegetallá ˈDaasanachka he aadh ˈgas afur. Aalé gaal mú hol eedhdhe, mu el meenylé ijoká arge, gaal mú hol af saanie.
40Gál giri naama-, Yuána ˈdéé hogodheká maale-, Yíésu el gaa veereká mú tikiˈd hí Ánˈduru giri Símon Bétiro nyárléká. 41Ánˈduru đo kie, erkob nyárlé Símon af kí ˈdie, mú geey, kieye, Nyáá nyí Máá Messíya léká argiyye, yie. (Messíya he af Heberew. Af Hellenka he Kirísto.)#1:41 Messíya he Máá Waag hí gál Yisirayel af iđicheká. Meet Messíya ubaa Kirísto lééllá hullaalle hélle kieye, Máá Waag hí salab mé ki liiyye-, Waag hí kansím koyyeká. 42Mu đo Símon Yíésu ˈdú eey. Yíésu Símon ki fuˈjie, kieye, Kúún he Símon, iny Yuanaká. Kúún aaléka Kéfasso gaalí ko yegedhe, muí mú yie. (Meeny Kéfaslééllá hélle kieye, Nyátáábá, af Hellenka Bétiro.)
Yíésu Fílib ubaa Nadhániel ká vie
43Aaléka, bííy éíy taaka ka biˈdeká Yíésu sieny Galilááya seseenká hí ká hileká, Fílib ˈdú sedhe, mú geey, kieye, Ye el gáá véer, yie. 44Fílib úba he máá Beđesaida, ény giri Ánˈduru ubaa Bétiro égetléká. 45Aalé Fílib Nadhániel ˈdú sedhe, mú geey, kieye, Máá héle Móshe hí warˈgasam hemuumurit Waaˈgiet gaa veere-, gál Waag hí ˈdeem ka shigicheká úba hí ˈdeenyle warˈgasam gaa veereká nyáá nyí argiyye. Máá kinaallá he Yíésu Nasaret-, iny Yuosefká, yie. 46Nadhániel mú ˈdéé hol ˈdú nie, kieye, Hoo! Násaret kín hé midhabká hé hí yé gáá ˈdeˈdeen? yie. Aalé Fílib mú geey, kieye, Káde, ílkú hí ko geeycho, mú yie.
47Aalé Yíésu Nadhániel hí ˈdu gáá yiimie-, argeká, ˈdéé hodhe, kieye, Máá Yisirayel-, honyir-, af ka hódho mánká, háluká! yie. 48Nadhániel Yíésu yiete, Háte ye og? yie. Yíésu kieye, Fílib hátlé ko ma ka víiny-, kúún kinnach gaach gaa iđeká in yú ko arge, yie. 49Aalé Nadhániel mú geey, kieye, Máá gáál he oonisúóllo! Kúún gon Iny Waago! Kúún he Kánsích Yisirayel! muí yie. 50Yíésu mú geey, kieye, Af giri yú ko geey-, yú kieye, Kuun hátlé kinnach gaach gaa iđeká in yú ko arge, yú ko yieká, in iiy chie? Kuun aaléka, hé éíy taaka hééllá af ˈdú gíriká il ha ki aargiˈda, mú yie. 51Yíésu geđi mú geey, kieye, Yú hí hé ˈdúwaká geeye, ur af hí furme-, gál ˈgasso-, urru-, Waaˈgietká úr mé nannuo-, tá Iny Máádhat ˈdu gáá leledhoká haí aargiˈda, Yíésu hí gáál yie.
अहिले सेलेक्ट गरिएको:
Yuána 1: dsh
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Bible Translation and Literacy
