Yuána 6
6
Yíésu nyésébích ilishká gololie
1Hé kinaal el ˈdaal Yíésu Bás Galilaaya-, Tiberiados léká ílung ˈdaatí yé ki ˈdie. 2ˈDaa giri gálaat hé gaalí af ˈdaˈdabo-, muí gál fursam ˈgieká ki ekeyká argeká, nyésébích guđoká mú el gaa veere. 3Aalé Yíésu ubaa lalille gurmit feˈjie, gurmit ˈdú yíéđie. 4Af kinaallá ˈjila gál Yuuˈdi-, máá ˈgasso-, urru-, Waaˈgietká hí gáál ˈdug gaa nadheká hé ká ˈjobonte.
5Aalé Yíésu nyésébích guđoká hí ˈdú gáá yiimie-, argeká, đo Fílib yiete, kieye, Balasha gáláátallá hí kokuoká in ále ke gáá higidhdha? yie. 6Yíésu mú hatallá yietééllá taalle mú ˈdéé afo he kí dhaay, íín dhúrle hé hát he ˈdeˈdeenká ˈguo. 7Aalé Fílib mú ˈdéé hol ˈdú nie, kieye, Bíre hújíchle ram hí kúˈd naamaká ki ˈguom ka higían-, ˈguomle úba ki gál ˈdááballóóllá ke ki ˈjiingʼírinyka, hé gáál ma gaa ˈdony, yie.
8Aalé mú lalille máá gaalí Ánˈduru yeget-, giri nyárle Símon Bétiro léká Yíésu geey, kieye, 9Máá nyigeeny balashá chen#6:9 Balasháállá ˈguom sííndí ki ég-, him hí hawul mán mare gaalí gaa ˈdoy. Balasháállá he gáál ˈguomlé aađaká. ubaa béé naam ˈguoká hállá, tá héél hé gál burnay-, ˈdááballóóllá gaa ˈdúo? yie. 10Aalé Yíésu kieye, Gálaat geeyyíe, gálaat hí les yíéđuo, yie. Ál kinaallá meka hé tág iish hí ˈdie. Gaal lullé les yíéđieká gál yaab tákámle hé shíí chen nyuoro. 11Aaléka, Yíésu balashá eedhdhe, Waag ˈgielmít hol ˈdú nieká, balashá gaalí gál ál kinaal ijeká eiy gise. Hát tikiˈdéél gaal béé úba gálaat eiy gise. Gálaat lulle balashá ubaa béé ˈdaˈdab fedeká arge.
12Aalé gálaat gololte-, heyieká Yíésu lalille geey, kieye, ˈGuom ka ˈgisateká hol ˈdú shuunáa, haí okoˈdîny, yie. 13Aaléka balasha giri gaalí ˈdú heyie-, ka ˈgisateká gaal hí hol ˈdu gáá shuune, illam tomon a naama kochkoch.#6:13 Illamééllá amú kulidh nee gaalí gaa yuˈge.
14Aalé nyesebich hé Yíésu hí ekey kinaal arge-, he af ˈdabeká kieye, Hééllá gon Máá Waag hí ˈdéé ká shigicho-, Warˈgat Waaˈgiet hí hote-, lésallá ka yiimetká. 15Aalé Yíésu hát gaalí ˈdú kekeen-, gaalí kansím mé ki tatuo-, gaalí kánsíchle hođisatká kimiteká, đo gáál af ˈgite, tákámle geđi gúm bííyle mé nie.
Yíésu bás ˈdug gaa sedhe
16Aalé aadh gaanateká Yíésu lalille bás mé nie, 17ál kinaal kadich gaa hile, giri ílung ˈdaatí yé ki ˈdeˈdeen-, Kafarnáum seseenká. Aalé gaal kadich kudhdheká Yíésu hátlé gáál ma hílinyká biiy đo chuurayye. 18Af kinaallá wááních fargogoká hé ˈdarame, baran đo les gaa kiiyye. 19Aalé gaal bás hurtéétí ˈdoyká,#6:19 Bás hurt gaalí ˈdoy kinaallá sienyle amú aadh ˈgas tikiˈde egedhdhe, tá ˈdaa giri baran les gaa kiiyyeká gaal aadh ˈgas guđoká gaa kudhdhe. gaal máádhat bás ˈdug see, kadich kí ˈjobóndhe argeká, đo seerey. 20Yíésu đo gáál geey, kieye, He yú, haí seerêny! gáál yie. 21Aalé gaal đo mú kadich gaa kaadhdhe, kadich tíkíˈdé kinaallá ál gaalí sesemeká malgle af ki ˈdie.
22Bííy ka biˈdeká nyésébích ílung ˈdaatí ki ˈgiteká hát kadich tikiˈd tákámle gefere ílung yiel-, gál láliká tákámle hí ˈdeete-, Yíésu hí ma hílinyká, kimite. 23Aalé kadis ény Tiberiados gáá chimie-, ál Yíésu hí Waag gielmít hol ˈdú nie-, gálaat hí balashá gaa koeyká malgle ˈjobínt ki ˈdiiyye. 24Nyésébích giri ílung kinaal ki ˈgiteká gíl les kí ˈdoyká Yíésu hát láʼ-, lalille íín hol ma ka náanká kimite. Gaal đo kadís hile, Kafarnáum mé nie, bííy kinaal Yíésu ˈdú ˈgeˈgedhe.
Yíésu he ˈguom luolmiti
25Aalé gaal Yíésu bás ílung ˈdaatí gaa argeká mú yiete, kieye, Máá gáál he oonisúóllo, amáre ál kí ˈjiiyye? mú yie. 26Yíésu gáál ˈdéé hol ˈdú nie, kieye, Yú hí hé ˈdúwaká geeye, itín hí ye hol gaa ˈgeˈgetééllá, hé kieye, hé gáál af ˈdaˈdabsuo-, yú ekeyká hí argiyye, muuniny, he ˈdaa giri hí balashá konye-, hí heyiyyeká in hí héy hol gaa ˈgeˈgete, muí gáál yie. 27ˈGuom geere-, ˈdeđenetoká haí ˈdú aayáˈginy, ˈguom ma ˈdeđenen-, Iny Máádhat hí ka shiguo-, hí luolmit biiyoká yé ˈdú ˈdeđichoká ˈdú aayaˈgáa. Iny Máádhat íín he Máá ˈJaallé Waag hí ˈduuwle gálaat ki edhesieká, Yíésu hí gáál yie. 28Aalé gaal kieye, Háte nyí ˈdeenne, hújích Waag hí nyí gaa feˈdoká nyí nanniyya? gaalí mú yie. 29Yíésu gáál ˈdéé hol ˈdú nie, kieye, Hújích Waag hí gaa feˈdoká hééllá: Máá Waag hí ali gáá kaayyééllá iiy yiedhíe, muí gáál yie.
30Aalé gaal kieye, Hé gáál af ˈdaˈdabsuo-, kuun hí ekemeycho-, nyí aargiˈda-, nyí ko iiy chegetoká meete? Kuun hé yé ká ˈdeđichoká hát káána meete? 31Héle eshim eshimkúnno ˈbakat állé he mánna gaa kokoey,#6:31 Yíéˈdími 16:1-18 hát Warˈgat Waaˈgiet hí hote-, kieye, Gáál muí ˈguom úr gáá shie, gaal ˈguom koey,#6:31 Warˈgat Arram 78:24; 105:40 chieká, gaalí Yíésu yie. 32Aalé Yíésu kieye, Yú hí hé ˈdúwaká geeye, ˈguom úr gáá chimíéllá máá hí ka shieká hé Móshe muuniny. ˈGuom ˈdúwaká ˈJaa chia hí úr gáá shigia. 33ˈGuom Waag hí ká shigichóóllá he Máá úr gáá yimie-, gálaat luolmit ˈdúwaká shigúóllá, Yíésu hí gáál yie. 34Aalé gaal kieye, Máá Guđo, taalle nyí ˈguomééllá ka shíígish, gaalí mú yie.
35Yíésu kieye, ˈGuom luolmitiká he yú. Máá ye ˈdú gáá yimetká hé gon geer hí ma gaa bolominy. Máá ye iiy yeetká hé geđi báre hí ma chegesiny. 36Hát hí ye argiyye-, kor hí ye iiy ma chéenká, yáá hí geey. 37Gál ˈJaachú hí ye ká shiguoká lulle ha ye ˈdú gáá yiimedhe, tá máá ye ˈdú gáá yimetká yáá ma aruminy. 38Yú úr gáá yimíéllá yáá hé meenychú ma ekemeny, Máá ye ali gáá kaayká hát he fedoká el gaa igira, ekemeye. 39Máá ye ali gáá kaayká hát he fedoká he gál muí ye gíl geer ká fieká mú tikiˈd úba hí ma gaa baađany-, kúlích biiy el ˈdaˈdká gáál lulle yú uushim yiem gáá ˈdeđuoká. 40Hé ˈJaachú hí fedoká hééllá: Máá yáá Ínyííllá ye bala ˈdu gáá nuo-, ye iiy yeetká, luolmit biiyoká hai gaa yíéđima, tá kúlích biiy el ˈdaˈdká úba uushich yé ha yú gáá ˈdeđia, Yíésu hí gáál yie.
41Aalé ˈdaa giri Yíésu kieye, Yú he balasha úr gáá chimieká, yieká, gál guguđo-, Yuuˈdiká đo yiirsam fadhdhe. 42Gaal kieye, Hééllá hé Yíésu giri iny Yuosef ˈjaalle ubaa ˈjielle ki ógká muunîny? Tá háteeye, káána kieye, Yú úrro gáá yimie, yegedhe? gaalí yie. 43Yíésu gáál ˈdéé hol ˈdú nie, kieye, Haí yiirsam fafáan. 44Máádhat ˈdaab ˈJaa chia ye ali gáá kaayká hí ye ma ˈdu gáá éenyká, hé ye ma ˈdu gáá yiimen. Máá ˈJaachú hí ye ˈdu gáá eewká in yú kúlích biiy el ˈdaˈdká uushich yé gáá ˈdeđia. 45Warˈgasam gál Waag hí ˈdeem ká shigicheká ali tikiˈd kieye, Gálaat lulle Waag he haí oonisicha, he chie.#6:45 Yisááya 54:13 Máá ˈJaachú af maale-, mú he gaa onnodheká hai ye ˈdú gáá yiimedhe. 46ˈJaa kúnnaa Waag hé máá níínní hí argeká mán, Máá mú af gáá kieká tákáma hí arge. 47Yú hí hé ˈdúwaká geeye, máá ye iiy yieká hé luolmit biiyoká ˈguo. 48Yú he ˈguom luolmitiká. 49Eshim eshimkícho har káána úba mánna ˈbakat álle gaa kokoeyka, hé guraam hí guure. 50Tá ˈguom úr gáá chimíéllá, máá hí kuoká hé ma kufuminy. 51Yú he ˈguom luolmiti-, úr gáá chimieká. Máá ˈguomééllá kuoká taalle bííyyo ali he ija. ˈGuomééllá he gón chia yú suor hođuo-, les gálle hí luolmít ki aargiroká, Yíésu hí gáál yie.
52Aalé gál guguđo-, Yuuˈdiká hol ki falme, lole, kieye, Máállá háteeye gáál gónle ká shigia, gon ki kokoo? yie. 53Yíésu gáál geey, kieye, Yú hí hé ˈdúwaká geeye, ˈdaab itín hí gón Iny Máádhat ma kôny-, ubaa hí mú fásle ma înyká, it luolmit hí gaa iđoká mán. 54Máá gónchú kuo-, fáschú ˈjioká hé luolmit biiyoká ˈguo, tá kúlích biiy el ˈdaˈdká úba uushich yé ha yú gáá ˈdeđia. 55Gónchú he ˈguom ˈdúwaká, fáschú he hé imi-, ˈdúwaká. 56Máá gónchú kuo-, fáschú ˈjioká taalle hai ye gaa ija, yú úba taalle mú ha gaa ija. 57Hát káána ˈJaa chia luolallá ye ali gáá kaay-, tá yú ˈJaachú ˈdaalle ki luolallá, in máá gónchú kuoká úba ˈdaachú ki luol. 58Yú he ˈguom úr gáá chimieká. Eshim eshimkícho hé mánna koey, kor úba hé guraam hí guure, tá máá ˈguomééllá kuoká taalle bííyyo ali he ija, Yíésu hí gáál yie. 59Hééllá af giri mu ˈbíl ˈdiiyiminy-, Kafarnaumká gáál he gaa oonisieká muí huogodhe.
Lali burnayká Yíésu el hol gaa nadhe
60Aalé lali ilish Yíésu el gaa veereká mú he onisinyléél maaleká gál gúúđo kieye, He onisiny fargogiyyóól, mááya hí iiy yeedhe? gaalí yie. 61Aalé Yíésu hát lalille hí he onisinyléél yiirsam gaa fafaatóól ógká, đo gáál geey, kieye, Hééllo hí birgisie? 62Tá itín Iny Máádhat hátlé úr mé nannuo-, állé er he gáá yimieká hol ˈdú nannaatká hí aargírinyka, háte hí chíe? 63Hím Naasan Waaˈgieto gálaat luolmít shigicha. Gon hé uˈdoká mán. ˈDeeny yú hí geeyallá he Hím Naasan Waaˈgiet sidhamkícho luolmít shigichoká. 64Tá itín ˈbaal it hátle iiy ma chéen, Yíésu hí gáál yie. Yíésu hatallá yíéllá, he ˈdaa giri mu íín kis gál hí iiy ma yéenká ubaa máá gál mú oosle ˈguoká mú ˈdu gáá egewká onnoyká. 65Aalé mu geđi gáál geey, kieye, ˈDaa kinaallá ˈdugaka in yú hí geey, yú kieye, Máádhat ˈdaab ˈJaachú hí ye ma ˈdu gáá éenyká, hé ye ma ˈdu gáá yiimen, yú hí yie.
66Ameeny kinaallá in lali ilishká Yíésu el hol gaa nadhe, mú hol ˈgar seseenká điidhe. 67Aalé Yíésu lalillé tomon a naamaká yiete, kieye, Itín úba hí ye el hol gaa nannaataká hí má feˈde? gáál yie. 68Aalé Símon Bétiro mú ˈdéé hol ˈdú nie, kieye, Máá Guđo, mááya nyí ˈdú seenne? Kúún in luolmit biiyoká ˈdeenyle ˈgayya háluke! 69Kuun hát Waag Máállé saas mánká nyáá nyí kimisate, nyáá nyí ko iiy chie, Bétiro hí Yíésu yie. 70Aalé Yíésu gáál ˈdéé hol ˈdú nie, kieye, It tomon a naamáállá, máá hí waaˈdeká hé yú muunîny? Tá itín mú tikiˈd har hí máá Satanaa! Yíésu hí gáál yie. 71Yíésu máá ˈdeenyle hogodhóóllá he Yúúˈdas giri Iskáryot-, iny Simon-, gál láli tomon a naamaká máállé giri Yíésu gál hí oosle ˈgieká Yíésu ˈdu gáá egewká.
अहिले सेलेक्ट गरिएको:
Yuána 6: dsh
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Bible Translation and Literacy
