Yuána 5
5
Yíésu máádhat naˈbúál álle gaa bisie
1Hééllá lulle el ˈdaal ˈjila gál Yuuˈdi ali kí ˈdiiyye, Yíésu đo kie, Yerúsalem mé nie. 2Yerúsalem állé kinaallá hé kár gaalí Kár Wala, yeget-, laanyle naˈbual giri af Heberewka gaalí Beđisádha yegetká hé hí gaa tiel. Naˈbual kinaallá gaasam chenno gaalí ˈdinnam ˈdisse. 3Gaasam kinaallá gál burnay-, alb hí gáá okoˈde-, in maaman-, ˈgas ˈdeđew-, tá hélchoká hí gaa sannime. [Gaal bie đaam hí gaa mamadoká he egesse. 4Naˈbualééllá máá ˈgasso-, urru-, Waaˈgietká aadh ka yimetká đo đaam haí gaa made. Máá erkob naˈbúál ki leedhoká đo hai midhandhe.] #5:4 He veerit hele-, kissoká hé gár seđééllá ˈdéé hótlé biiy el ˈdaˈdká ubaa gár afurallá alulle hé hí gaa mannayye. 5Ál kinaallá hé máá warram tomonaam seđe tá a síet les gáá ˈdoy mare hé hí gaa ije.
6Aalé Yíésu mu les gaa iifa arge-, mú hát kúllaʼ hí chuoyyeká ógká, mú yiete, kieye, Kúún miidhanatoká féˈde? yie. 7Máá giri kulnayká kieye, Máá Guđo, naˈbúál bíélle đaam hí gaa madeka, yáá máá níínní ye naˈbúál ki lelesuoká mán. Naˈbúál hátlé yú ˈdú seseenká máá eiy đo met hai ye leedhe, yie. 8Aalé Yíésu mú geey, kieye, Les gaa keʼ, lokoˈdkú éew, ˈgaskú ki sí, mú yie. 9Tíkíˈdé kinaal máá giriká đo midhandhe, lokoˈdle eedhdhe, ˈgasle ki sedhe. Kúlích kinaallá he Kúlích Hef ˈGisanká.#5:9 Kúlích Hef ˈGisanká he kúlích Waag hí taak koyye-, gálaat hí héf gaa ˈgiˈgisatká.
10Aalé gál guguđo-, Yuuˈdiká máá giri midhandheká geey, kieye, Hééllá Kúlích Hef ˈGisan. Nyátálkúnnoka, kúlíchallá hé kúlích kuun hí kulidh hol gaa sisitoká muuniny, yie. 11Aalé máá giri midhandheká kieye, Yú máá ye bisieká ye geey, kieye, kulidhkú éew, ˈgaskú ki sí, ye yie, muí gáál yie. 12Aalé gaal mú yiete, kieye, Máá ko geey-, kieye, kulidhkú éew, ˈgaskú ki sí, ko yíéllá, mááya? yie. 13Máá giri midhandheká hé úba máá hí bisieká moonnoy, ˈdaa giri Yíésu ál mú gaa midhansie kinaal nyésébích hí gaa ijeká hurt hileká.
14Aalé waaséél máá midhandheká ˈBíl Waaˈgietká álle mé nieká Yíésu mú ˈdú sedhe, mú geey, kieye, Bá dháash, kó midhante, ha geđi ađááb hol ˈdú náan, hé súm ˈdeewká ko mé gáá ˈjíiny, mú yie. 15Máá midhandheká đo ali gaa sedhe, gál Yuuˈdiká geey, kieye, Máá ye bisieká he Yíésu, yie.
Luolmit ki Íny gaa aargiroká
16Aalé ˈdaa giri Yíésu hé hatallóól Kúlích Hef ˈGisanká gaa eekemeyká, in gál guguđo-, Yuuˈdiká Yíésu ˈdéé ki saasale. 17Aalé Yíésu gáál geey, kieye, ˈJaachú hé hujich nannuo, ˈjíig káána đig, tá yú úba yáá hujich nannuo, gáál yie. 18Aalé ˈdéé hótéél ˈdugaka, gál guguđo-, Yuuˈdiká súm geđi hát lulle laađame, giri mú yegeská. He hé kieye, mu Kúlích Hef ˈGisanká tákáma hé hatallóóllá gaa ekey muuniny, he ˈdaa giri mu úba Waag ˈJaalle yie-, Waag hol tikiˈd hoyká.
19Aalé Yíésu gáál ˈdéé hótal geey, kieye, Yú hí hé ˈdúwaká geeye, Iny hé níínní tákámle ekemeyoká mán, hé ˈJaalle hí ekemeyo-, argoká in ekemeye. Iny he lullé ˈJaalle hí ekemeyoká in úba ekemeye, 20ˈdaa giri Íny ˈJaalle hí giel-, ˈJaalle héllé ekemeyoká lulle hí aargisuoká. Tá mu úba hé hééllá súm ˈdú guđo-, ekemeyoká Inyle hai aargisia, giri itín súm hí he af ˈdaˈdabiyyaká. 21Hát Íny ˈJaalle gál kufeká uushim yiem gáá ˈdeđuo-, gáál logolnoyóóllá, hát tikiˈde kinaallá in Iny gál he fedoká logolnoyo. 22Tá Íny ˈJaalle hé máá níínní ˈdéé ki iđimuoká mán, hé gálaat ˈdéé ki iđinyle lulle Íny gíl fie, 23giri gálaat lulle hát tikiˈde Íny ˈJaalle kikiatallá, úba Íny kikiatká. Máá Íny ma kikianká hé Íny ˈJaallé hí ali gáá kaayká úba ma kikian.
24Yú hí hé ˈdúwaká geeye, máá ˈdeenychú maalo-, Máá ye ali gáá kaayká iiy yeetká, hé luolmit biiyoká ˈguo, mú álle hé ˈdéé ki iđiny mán. Máá kinaallá kisso kúfach yé gaa ˈdie, luolmít hile. 25Yú geđi hí ˈdúúw geeye, bar ali hai kí ˈdeenne, tá káána hé úba ali kí ˈdiiyye, giri gál kúfach gaa ijoká Waag Inyle af maalo-, tá gaal Íny af maaleka loogolnotká. 26Íny ˈJaalle dhúrle hát fargogint gálaat luolmít ki shiguoká ˈgúóllá, in Inyle fargogint he gálaat luolmít ki shiguoká shie. 27Hé úba Íny hemurit máálle gálaat ˈdéé ki iđimuoká shie, ˈdaa giri Iny he Iny Máádhatká.
28Haí hééllá af ˈdábiny, bar ali hai kí ˈdeenne, giri gál kufeká lulle mú af maalo-, 29yiem ká ˈdeˈdeen-, gál hé ˈdabaanká eekemeyká rubach aargiro-, gál hé ˈdeđewká eekemeyká íín ˈdéé ki iđiny il hí aargiˈdoká, Yíésu hí gáál yie.
Yíésu ˈduuwlé
30Yíésu kieye, Yú tákámchú yáá hé ekemeyoká mán, yú hé maaloká in ˈgásle gaa igira, gálaat ˈdéé ki iđimia. Yú ˈdéé ki iđiny ˈdúwaká gálaat ki iđimia. Yú yáá hát fedoká ma ekemeny, yú Máá ye ali gáá kaayká hát he fedoká ekemeye. 31Har yú dhúrchú ˈduuwchú gálaat geđuoka, hé kinaallá hé tagle muuniny. 32Máá ˈduuwchú hogodhoká hé biiy gaa ijo.#5:32 Máá biiy gaa ijo-, Yíésu hí ˈduuwle hogodhóóllá he mú ˈJaallé Waag. Máá kinaallá ˈduuw chia hogodhoká hát ˈdúwaká yáá óg. 33It gálaat Yuána ali ˈdú fiiyye, tá mu hé gálaat ˈduuw chiallá geey. 34Tá yú íín yáá ˈduuw chia máádhat hí hogodhoká ma ki iđiny. Hééllá yú hí geđúóllá, he giri hí rubach aargiˈdoká. 35Yuána he nyátáá boloonne-, biiy gaa eedhesicheká. Itín ramanóótíá it mú édhúmlé kinaallá ki geyeenne.
36Yú yáá hé ˈduuwchú hogodho-, fayam Yuána hí ˈdu gáá sidheká af mé ˈdú gíriká ˈguo. Hújích ˈJaachú hí ye ká shie-, bééso muí yie-, káána hátle yú nannúóllá hát ˈJaachú ye ali gáá kaayká ˈduuwlé he hogodho. 37Tá ˈJaa chia ye ali gáá kaayallá ííni ˈduuwchú hogodho. Itín it kálta mú afle ma mááliny, ubaa mu yaalmitlé yaalká ma árginy. 38Mú ˈdeenyle úba hé hí ger gaa mán, ˈdaa giri Máá muí ali gáá kaayká hí iiy ma chéenká. 39Itín it tág Warˈgat Waaˈgiet totoycho. Tawunykíchoka, he veerít luolmit biiyoká ha nyí gaa aargiˈda, hí chegedhe, kor he veerít íín ˈduuw chia he hogoto. 40He veerít har úba ˈduuwchú hogotoka, it hí ye ˈdu gáá chiimeto-, hí luolmit biiyoká aargiˈdoká ma fediny.
41Yú yáá meeny gálaat hí ye memeyoká ma ki iđiny. 42Yú yáá hí tág óg, gielmit Waaˈgiet hát hí ger ka mánká yáá óg. 43Yú meeny ˈJaa chia kí yimie, kor itín it ye điite. Tá máá éíy taaka meenyle kí yimieka, đo iiyyo hí chie. 44Itín hí hol eiy memeychoká hí feˈde, tá Waag ali ka takachká hí itín memeychoká in hí mé ká man háluke, tá háteeye hí ye iiy chegedhe?
45Tá haí taawûny, hí kieye, mu ˈJaalle metle hai nyí gaa kaatasia, hí chéen. Móshe giri hí taawuyya-, hai nyí riima, hí chegetoká ííni hí kaatasia. 46Móshe ˈdeenyle hí iiy chéenka, af kinaalka iiy haí ye chegie, ˈdaa giri ˈdeeny muí veereká héchú hogodhoká. 47Aaléka, ˈdeeny muí veereká in hí iiy má chegeto háluke, tá hé yú hogodhoká háteeye hí iiy chegedhe? Yíésu hí gáál yie.
अहिले सेलेक्ट गरिएको:
Yuána 5: dsh
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Bible Translation and Literacy
