Yuána 17
17
Yíésu ˈJaalle vite
1Aalé Yíésu ˈdeeny kinaal beeteká đo úr gaa dhaay, kieye, Baabá, aadh ˈgas hé ali kí ˈdiiyye. Inykú ˈduwásish, Iny íín hí ko ˈduwayo. 2Kuun kó kansim yáá Iny kuallá hí gálaat lulle he ki mumuroká ye shiiche, giri gál ye ka shiicheká lulle yú luolmit biiyoká shiguoká. 3Luolmit biiyoká hatallá gaalí aargira, giri kúúni Waag tikiˈde-, ˈdúwáállá gaal ko óg-, yáá Yiesu Kirísto-, kuun ye ali gáá kaayyééllá úba gaal ye ógká. 4ˈDaa giri hújích ye ka shiicheká yú beeteká, yáá ko lésallá gaa ˈduway. 5Aalé, Baabá, ye ˈduuw héle les hátle biiy gaa mannayyeká yú ubaa kuun ke hol ka ˈgieká, ye káánallá ki ˈdúwash.
Yíésu lalille Waag ki ruogone
6Yáá gál ye lésallá gáá shiicheká húgúmkú argisie. Gaal he gálkú, kúúni hí ye ká shiiche, gaal hé ˈdeenykú el gaa veere. 7Aalé káána, gaal he lullé ye ka shiicheká hát ko yé gáá ˈdieká hé kimite. 8Fayam ye ka shiicheká yáá gáál shie, hé gaalí iiy yie. Gaal hát yú ko yé gáá ˈdieká hé eiy naate, tá kuun hát ye ali gáá kaayyeká úba hé iiy yie. 9Yú ˈdaa galallá ko kí rogonmo, yáá ko les gálle ˈdaalle ma kí rogonminy. Tá gál ye ka shiichééllá he gál yú ko kí rogononká, ˈdaa giri gaal he gálkúká. 10He lullé yú ˈguoká hékú, tá he lullé kuun hí ˈgayyoká héchú. Tá gáál ˈdaalleka, ˈduuwchú hé gálaat hí arge. 11Yú yáá lésallá ma gaa iđiny, yú bííy kua mé ká nannaa, gaal íín lésallá he kí ˈgiita. ˈJaa chia saas mánnallo, meeny kua ye ká shiichééllá ˈdaalleka, gáál in ki ˈdé. Hát muun ke tikiˈdééllá, gaal íín úba hí tikiˈd yeet. 12Af giri gáál nyí hol ˈgayyeká meeny ye ká shiichééllá yú gáál in ki yiel, in gaal naanná ije. Gaal hé máá níínní muun gáál gaa ˈgiteká mán. Gálallá máállé tikiˈde-, muun gáál gaa ˈgiteká he iny baađawká tákáma,#17:12 Iny baađaw-, Yíésu hí hogodhóóllá he Yúúˈdas Iskáryot. giri ˈdeeny kua warˈgát hí hoteká ˈduuwawká.
13Yú káána bííy kua mé ká nannaa. Hééllá lésallá yú gaa hogodho, giri geyyinychú gálallá koch chegetká. 14Yáá gáál fayamkú shie. Tá ˈdaa giri gaal íín hát yúka, gál lesallo-, muuninyká, gáál hé les gálle hí nebedhe. 15Yáá ko ma rogonminy, kieye, Gáál lésallá gaa éeb, ma yegen, he gáál ˈdaa Sátanáka in ki ˈdé, yú yegedhe. 16Hát tikiˈde yú máá lesallo-, muuninyallá, gaal íín úba hé gál lesallá muuniny. 17Gáál hol taak ki kúo, gáál ˈduuwkú ki dhíir. ˈDuuw kinaallá he ˈdeenykú. 18Hát ye les ali ˈdu gáá kaayyééllá, yú úba yáá gáál alb fie. 19Gaal íín ˈdaalle ˈdugaka in yú dhúrchú ko hol taak kí koy, giri gaal íín úba ˈdeeny kua ˈdúwaká hí ko taak kí kokuoká.
Yíésu gálle lullé Waag ki rogonmo
20Yáá gálallá tákámle ko ma kí rogonminy, yú gál fayam chia gálallá hí hogodhoká maalo-, ye iiy yegetká úba ko kí rogonmo, 21giri gaal lulle tikiˈd yegetká. Baabá, hát kuun ye gaa iđo-, yú ko gaa ijóóllá, gaal íín úba hí muun gáál gaa yíéđuo, giri les gálle hát kuun ye ali gáá kaayyeká iiy yegetká. 22Yáá gáál ˈduuw kuun hí ye ka shiicheká shie, giri gaal íín hát muun ke tikiˈdééllá íín úba tikiˈd yegetká. 23Hát yú gáál gaa ijo-, kuun ye gaa iđóóllá, gaal hí hát ˈdabaanká tikiˈd yeet, giri les gálle hát kúún ye ali gáá kaayye-, gielmit kuun hí ye gielká, úba kuun hí gáál gielká kiimisatká.
24Baabá, gál ye ka shiichééllá, ál yú gaa ijoká úba yíéđian-, guch chia ye ka shiichééllá úba aargiroká yú fede. Kuun les hátle biiy gaa mán, in ye giel, ye guchééllá ká shiiche. 25ˈJaa chia saas mánnallo, har úba les gálle ko móíytaka, yú yáá ko óg, tá hát ye ali gáá kaayyeká hé gál chiallá úba hí óg. 26Yáá gáál ˈduuwkú onisie, gaal ko onnodhe, tá gáál taalle ha yú ko oonisia, giri gielmit ye gielká úba gáál gaa iđo-, yú úba gáál gaa ijoká, Yíésu hí ˈJaalle yie.
अहिले सेलेक्ट गरिएको:
Yuána 17: dsh
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Bible Translation and Literacy
