Maqtaeq 23
23
Paqliqsaer Hawr-eu Zanr Maeq-eu Deuq-anr Daeq-eu
Mk 12:38-40; Lk 11:37-52; 20:45-47
1Khoerngae, Yeqsur, tsawrhaq armaf mafma deuq hawr-eu aqyawf-euq zaqlanr deuq-anr heulof-aer aernaeq-euq mae: 2“Zanr maeq-eu deuq hawr-eu Paqliqsaer deuq-aq, Morseq-euq nuirduq-anr nuirluf-eu mae. 3Khoermirnae, aqyawfmaf, nawmaf-anr kharkhaer-eu jeq yawmuiq-aer mrcaw-awq. Aerkhawf, aqyawfmaf mr-eu lof-aer taqmr. Aqjeq mirnae aernar-aq, aqyawfmaf ngaeqnya-eu gar nae maq mrnya-a. 4Aqyawfmaf maq bafcoer-eu khavbaev yawkan kafdzanq-awr, aqcawq-euq bafpu-anr bafdav naeq-eu mae. Aerkhawf, yawqha-aq, cawba-eu laer lafnoer tiq noer taef-aer khawf maq toeqciv-a.
5Aqyawfmaf kharmr kharshar-eu jeq aqcawq bimawr-eu laer taef-aer mr-eu mae. Aqyawf maf-euq narkhawr hawr-eu lafdu-anr paftawf-eu, Yaerbof-euq shaqkhov pawqbaev khoerdeuq ghawqloeni gufhuiq taq-awr, paerkhanq paerdanq-anr dawqsheur ghawqmanrni guftsof taq-euq mae. 6Yawbuibui ngae, khawrmaer paw nuirmawf-awr, zanrdawq khawqnymr-euq lafkhoer khanqsaer jav-eu nuirduq-anr nuirmawf-eu mae. 7Laev-euq lafkhoer, aqcawq, aqyawf maf-anr yawzeu baw-eu lafkhoer dawqcawq bi puqmawf-awr, aqcawq nae aqyawf maf-anr ‘Saqlaq-or! Saqlaq-or’ laer bikur mawf-eu mae.
8Aerkhawf, aqcawq nae nawmaf-anr ‘Saqlaq’ laer taqbi kur. Aqjeq mirnae aernar-aq, nawmaf-euq saqlaq tiq ghaq taef-aer jawr-awr, nawmaf dawqtawvluf aqyuif aqnyir taef mae. 9Mirtsaq-euq khoertav jawr-eu tsawrhaq-anr khawf, aqda laer nawmaf taqkur. Aqjeq mirnae aernar-aq, nawmaf-euq Aqda-aq, tiq ghaq jawr-eu taef mae. Aqyawf-aq, mq-euq khoertav jawr-eu khoerghaq mae. 10Nawmaf-anr dawqmaeq dawqtsov tsov-eu ghaq laer taqbi kur. Aqjeq mirnae aernar-aq, nawmaf-anr dawqmaeq dawqtsov tsov-eu-aq, tiq ghaq jawr-eu taef mae. Aqyawf-aq, Kali mae. 11Nawmaf-euq lafkhoer huiqdzaeq dzaeq-eu ghaq-aq, nawmaf-euq kuirlaf zaqkhav yageuf taef-a. 12Yawqhar yawqha taqhuiq-eu aqsur ghaq maqkaq, taqnyir-eu gar yadaq-awr, yawqhar yawqha taqnyir-eu aqsur ghaq maqkaq, taqhuiq taqmanr-eu jeq za taef-a.
Ghawqshar Shaq-aer Ya Ghaesaef Taef-a
Mk 12:40; Lk 11:39-52; 20:47
13“Yawmuiq janrgeuf-eu zanr maeq-eu deuq hawr-eu Paqliqsaer deuq-or! Nawmaf ghawqshar shaq-aer ya ghaesaef taef-a. Aqjeq mirnae aernar-aq, aqcawq-euq maeqshi nawmaf, mqtav mirkhanq-euq larghov piqtaeq-eu mae. Yawqha maq urler-eu uqtaf, urler-eu laer ghae-eu tsawrhaq-anr khawf nawmaf, aqyawf maf-anr maqbi urler-a. 14Yawmuiq janrgeuf-eu zanr maeq-eu deuq hawr-eu Paqliqsaer deuq-or! Nawmaf ghawqshar shaq-aer ya ghaesaef taef-a. Aqjeq mirnae aernar-aq, nawmaf, miqcoeq miqma-euq nymr-anr khaeqdzaq khavdzaq-eu mae. Dirdaq-aer guiqlanq ghawqmyanrni shar-eu mae. Khoermirnae, aqcawq navmaqtser darnaeq-eu gar yadaq taef-a.
15“Yawmuiq janrgeuf-eu zanr maeq-eu deuq hawr-eu Paqliqsaer deuq-or! Nawmaf ghawqshar shaq-aer ya ghaesaef taef-a. Aqjeq mirnae aernar-aq, nawmaf, mirtsaq-euq khoertav hawr-eu ircuf-euq khoertav doeni can-awr, tsawrhaq tiq ghaq, nawmaf-euq zanr tawqlarni laejae-awr, tawqlar-euq nar-aq, aqyawf-anr nawmaf navmaqtser nyiq bymr shiqbuir lanma-euq zaq bi pyeuflar-eu mae.
16“Aqcawq-anr garma sheuqmaeq-eu myavbaef deuq-or! Nawmaf heulof-aer aer-eu tsawrhaq-aq, ghawqshar shaq-aer ya ghaesaef taef-a. ‘Tsawrhaq tiqghaqnav uqduq tanqnymr nymrma-anr ghoe-awr kamq-euq nar-aq, aqyawf nae kamqtaq-euq lof-aer maqmr khawf tiqjeq-iq maqngeur-ar. Aerkhawf, uqduq tanqnymr nymrma-euq#23:16 Uqduq tanqnymr nymrma Heugar-aq, uqduq tanqnymr nymrma-euq lafkhoer jav-eu shawr duidui-eu lawv-anr aermawf-eu mae. lafkhoer jav-eu shuir-anr ghoe-awr kamq-euq nar-aq, aqyawf nae kamqtaq-euq lof-aer ya’mr-eu mae.’ 17Myavbaef baef-eu aqdzawq argan deuq-or! Aqgeu jeq huiqdzaeq-eu la? Shuir huiqdzaeq-eu la lor? Maqngeur nar-aq, shuir-anr bimuiq bi shawrlar-eu uqduq tanqnymr nymrma huiqdzaeq-eu la laq? 18Nawmaf paraer-eu, ‘Tsawrhaq tiqghaqnav lawrduq-anr ghoe-awr kamq-euq nar-aq, aqyawf nae kamqtaq-euq lof-aer maqmr khawf tiqjeq-iq maqngeur-ar. Aerkhawf, lawrduq-euq khoertav lawrnaeq-euq jeq-anr ghoe-awr kamq-euq nar-aq, aqyawf nae kamqtaq-euq lof-aer ya’mr-eu mae.’ 19Myavbaef baef-eu aqdzawq argan deuq-or! Aqgeu jeq huiqdzaeq-eu la? Lawrnaeq-eu jeq huiqdzaeq-eu la lor? Maqngeur nar-aq, lawrnaeq-eu jeq-anr bimuiq bi shawrlar-eu lawrduq huiqdzaeq-eu la laq? 20Khoermirnae, tsawrhaq tiqghaqnav, lawrduq-anr ghoe-awr kamq-euq nar-aq, aqyawf-aq, lawrduq-anr khawf, lawrduq-euq khoertav kharlawr-euq dawqtawv luf-anr khawf ghoe-awr kamq-eu mae. 21Tsawrhaq tiqghaqnav, uqduq tanqnymr nymrma-anr ghoe-awr kamq-euq nar-aq, aqyawf-aq, uqduq tanqnymr nymrma-anr hawr-eu uqduq tanqnymr nymrma-euq lafkhoer jawr-eu ghaq-anr ghoe-awr kamq-eu mae. 22Tsawrhaq tiqghaqnav, mq-anr ghoe-awr kamq-euq nar-aq, Miqyaer-euq nuirmanq-anr khawf, khoergar nuir-eu ghaq-anr khawf ghoe-awr kamq-eu mae.
23“Yawmuiq janrgeuf-eu zanr maeq-eu deuq hawr-eu Paqliqsaer deuq-or! Nawmaf ghawqshar shaq-aer ya ghaesaef taef-a. Aqjeq mirnae aernar-aq, nawmaf-aq, arjirpafdaw, jaqgulumyanq hawr-eu yasawr, heudeuq tserbymr tiqbymr damq-eu mae. Aerkhawf, zanrdawq-euq lafkhoer nae huiqdzaeq-eu jeq pyeuf-eu, dawr-awr tsaq-eu jeq, ghawqshaq gaq-eu jeq hawr-eu jan-eu jeq, heudeuq-anr nawmaf maqmr-a. Nawmaf heudeuq mr paq-aer ghae-eu uqtaf, nuideuq-anr khawf byaerdzae paq-aer maqghae-a. 24Garma maeq-eu myavbaef deuq-or! Nawmaf, cargawq-anr dzerdzae-awr, lawtaw-anr-aq, myeufanr-eu mae.
25“Yawmuiq janrgeuf-eu zanr maeq-eu deuq hawr-eu Paqliqsaer deuq-or! Nawmaf ghawqshar shaq-aer ya ghaesaef taef-a. Aqjeq mirnae aernar-aq, nawmaf, khmqmaq hawr-eu saerbyaer-euq lafnyir paw yawmuiq-aer jovshawr-eu mae. Aerkhawf, lafkhoer paw-aq, maerjuir juir-eu jeq hawr-eu yawqha-euq nuinoeq nuilov geuf-eu jeq tiqbyanni anr-eu mae. 26Myavbaef baef-eu Paqliqsaer deuq-or! Khmqmaq hawr-eu saerbyaer-euq lafnyir paw khawf shawrlarni, lafkhoer paw jeqhu jovshawr-awq.
27“Yawmuiq janrgeuf-eu zanr maeq-eu deuq hawr-eu Paqliqsaer deuq-or! Nawmaf ghawqshar shaq-aer ya ghaesaef taef-a. Aqjeq mirnae aernar-aq, nawmaf-aq, laefpyur taq-euq lmqbymr-anr dur-eu mae. Lafnyir paw hawmuiq-eu khawf, lafkhoer paw-aq, shir-euq tsawrhaq-euq shaqyoeq shaqlaf hawr-eu jawflafni ghae-eu yawqjeq navluf tiqbyanni anr-eu mae. 28Nawmaf khawf, khoerlof-aer dur-eu mae. Lafnyir paw, aqcawq-euq maeqshi tsaq-awr dawr-eu tsawrhaq lof-aer dur-eu gar nae, lafkhoer paw-aq, yawmuiq janrgeuf mawf-eu jeq hawr-eu zanrdawq-anr leur-eu jeq tiqbyanni anr-eu mae.
Aqyawfmaf Khaeq-awr Khav-eu Gar Yadaq Taef-a
29“Yawmuiq janrgeuf-eu zanr maeq-eu deuq hawr-eu paqliqsaer deuq-or! Nawmaf ghawqshar shaq-aer ya ghaesaef taef-a. Aqjeq mirnae aernar-aq, nawmaf, Miqyaer gharduq ngaeqdan-eu tsawrhaq deuq-euq lmqbymr-anr gawqmuiq-awr, tsaq-awr dawr-eu tsawrhaq deuq-euq lmqbymr hawmuiqni lavsav-eu mae. 30‘Nga’maf-aq, aqpoeq deuq-euq zir-anr yajawr-euq lawnmr-aq, aqyawfmaf naeq-aer gmler-awr Miqyaer gharduq ngaeqdan-eu tsawrhaq deuq-anr maqsaef’ laer nawmaf aer-eu mae.
31“Nawmaf khoerlof-aer aer-eu-aq, nawmaf, Miqyaer gharduq ngaeqdan-eu tsawrhaq-anr saef-euq tsawrhaq deuq-euq zaqdeuq ma laer yawqha-anr muir-eu sarkir kamq-eu gar dur-eu mae. 32Nawmaf-euq aqpoeq deuq nae mrbanq yaf-euq jeq-anr nawmaf mrsaq mrli li-awq.
33Arlawr-euq baqmaf-or! Dof khav-eu arlawr-euq zaqdeuq-or! Yarkhaqdar ngae nan, nawmaf shiqbuir lanma yarkhaq dar-eu jeq-anr nae aqjox-aer dzeur-ir nya-eu? 34Khoermirnae, Miqyaer gharduq ngaeqdan-eu tsawrhaq deuq, siqzaq ganryo deuq hawr-eu zanr maeq-eu deuq-anr, ngar, nawmaf jawr-eu gar bi’oe ma. Nawmaf tiqpavnav deuq-anr saef-awr, lafyaq-euq khoertav taftaeq taef-a. Tiqpavnav deuq-anr zanrdawq khawqnymr-euq lafkhoer juif-awr, tiqmeuq sair tiqmeuq doeni, nawmaf ir-awr, aqyawf maf-anr khaeqnaeq khavnaeq taef-a. 35Khoermirnae, tsaq-awr dawr-eu Aqbeqlav-euq shiq-anr nae, muiqdui shawr duidui-eu lawvkaq hawr-eu lawrduq-euq yawkaq-anr, nawmaf nae saef-euq Beqleqgir-euq zaqyo Zeqkaqlir-euq shiq-anr keuvni, mirtsaq-euq khoertav khar yoerle-euq tsaq-awr dawr-eu tsawrhaq-euq shiq dawqtawvluf, nawmaf-euq khoertav keuvle taef-a. 36Ngar, nawmaf-anr aqdirma-aer aernaeq nyar, heudeuq dawqtawvluf heuzir-euq khoertav keuvle taef-a.
Yeqlursaqlaeq-euq Gharduq Noeqshaq-eu
Lk 13:34-35
37“Yeqlursaqlaeq-or! Or, Yeqlursaqlaeq, nawr, Miqyaer gharduq ngaeqdan-eu tsawrhaq deuq-anr saef-awr, nawr jawr-eu gar bi’oe-euq deuq-anr khawf khaqlo nae biqsaef-eu mae. Yaciv ya’ma, yazaq deuq-anr danrkhawv khawvuiq-eu lof-aer, ngar, nawq-euq zaqdeuq-anr armyav pov khawvuiq mawf-eu khawf, nawmaf maqbi khawvuiq naeqlaf-eu beu. 38Hawtaq de-eq, nawmaf-euq nymr-aq, yabi byaerdzae-awr, nymrtsoeq tsoeq-ir taef-a. 39Ngar, nawmaf-anr aernaeq nyar,
‘Sanqpaq Miqyaer-euq tsawrmyanr-euq uqmov oeluf-eu ghaq-aq, guiqlanqhui luf-ur!’ (Jc 118:26)
laer nawmaf maqaer-eu khoerkeuvni, aqkar nar-aq, nawmaf, ngaq-anr maqpar ya’mawr-ar.”
अहिले सेलेक्ट गरिएको:
Maqtaeq 23: AKA
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
2018 ©
Bibles International ®
The Bible Society of Baptist Mid-Missions
