Maqtaeq 19
19
Miqzaq Khof-eu Garkawv
Mk 10:2-12; Lk 16:18
1Khoerngae, heulof-aer pyeuflar-euq mae. Yeqsur garkawv khoerdeuq maeqghaq-euq nar-aq, Gaqliqlaer mirkhanq-anr nae dov-ir-awr, Yawrdaq lawrbaq-euq nanrma dovkhaeq paw jav-eu Yurdav mirkhanq-anr irkeuv-euq mae. 2Tsawrhaq armaf ghawqmya’ni, aqyawf-euq maeqnan cantae-awr, khoergar aqyawf, aqyawf maf-anr lavtaq naeq-euq mae.
3Khoerngae, Yeqsur-anr tsermr haw-eu laer Paqliqsaer tiqpavnav deuq, aqyawf jawr-eu gar lar-awr narhaq-eu, “Aqjeq-euq garkawv-anr nae maqkaq, miqzaq khof-eu-aq, zanrdawq khofdawq-anr tsaq mae lor?”
4Khoerngae, Yeqsur, aqyawf maf-anr heulof-aer aerkhof naeq-euq mae:
“ ‘Ardanqbae ngae, tsawrhaqzaq-anr bae-euq ghaq, zaqyo aqli hawr-eu zaqmiq aqbur-anr bae-euq mae.’ (Adb 1:27; 5:2)
5 ‘Khoermirnae, zaqyo aqli-aq, yawqha-euq aqma aqda-anr nae yaghawq-awr, yawqha-euq miqzaq naeq-aer gawf-ir-eu lafkhoer, nyiq ghaq khawf tiq ghaq taef-aer pyeuflar-eu mae’ (Adb 2:24)
laer boftaq-euq Yaerbof khoerdeuv, nawmaf maq guihaw-aq lor? 6Tox-aer mar-iq, aqnyaf dzerzaq-aq, nyiq ghaq maqpar ngeur-aer, tiq ghaq taef mae. Khoermirnae, Miqyaer nae yurgawf-euq gar tsawrhaqzaq maq lavghawq khmq-a.”
7Paqliqsaer deuq, aqyawf-anr narhaq-eu,
“Tox-aer mar-iq, aqjeq mirnae Morseq, miqzaq ghaq-anr khof-eu sanqbof tiq jae bifnaeq nar-aq, khofnya taef-a laer dawq biftaq-euq la?” (Dm 24:1)
8Khoerngae, Yeqsur, aqyawf maf-anr heulof-aer aernaeq-euq mae: “Nawmaf nuima ghanr-eu mirnae, Morseq, miqzaq khofnya taef-a laer pyaeqtaq-euq mae. Aerkhawf, ardanqbae ngae-aq, khoerlof-aer maqngeur-a. 9Ngar, nawmaf-anr aernaeq nyar, banq-awr khaqmiq sheu-euq maqngeur-eu gar nae yawqha-euq miqzaq-anr khof-awr, yawqghaq yawq-anr sheuq-eu tsawrhaq aqgeu ghaq maqkaq, zaqmiq aqbur khoerghaq-anr banq-awr joe-euq mae.”
10Khoerngae, zaqlanr deuq, Yeqsur-anr aernaeq-eu, “Miqzaq yozaq-euq yawkaq khoerlof-aer ghae-eu ngeur nar-aq, maq sheuqdanq dzaqni jawr-eu-aq, muiqdzaeq-eu jeq ngar-a.”
11Khoerngae, Yeqsur heulof-aer aernaeq-euq mae: “Dawq teudawq-aq, yawqghaq navluf hageuf coer-eu maqngeur-a. Miqyaer nae biftaq-euq deuq taef-aer hageuf coer-eu mae. 12Aqjeq mirnae aernar-aq, tsawrhaqzaq-aq, daefle ngae nae miqtsuif pyeuf-eu tsawrhaq khawf jawr-awr, tsawrhaq nae shawf-euq khawf jawr-eu uqtaf, mqtav mirkhanq-euq gharduq maqsheuq-eu khawf jawr-eu mae. Dawq heudawq-anr aqsur ghaq hageufcoer nya laer hageuf-awq.”
Yeqsur, Zaqdeuq-anr Dawq Ngaeqghae Naeq-euq
Mk 10:13-16; Lk 18:15-17
13Khoernar-aq, Yeqsur nae aqlaf bafdav-awr guiqlanq bi sharnaeq-eu laer aqcawq, zaqdeuq-anr sheuq-awr Yeqsur jawr-eu gar lar ngae, zaqlanr deuq, tsawrhaq khoerdeuq-anr daeqnaeq-euq mae.
14Khoerngae, Yeqsur aer-eu, “Zaqdeuq-anr taq lavtsoeq, ngar jawr-eu gar bilar-awq. Aqjeq mirnae aernar-aq, mqtav mirkhanq-euq lafkhoer-aq, heulof-aer ghae-eu deuq yajawr-eu mae.”
15Khoernar-aq, Yeqsur, zaq khoerdeuq-euq khoertav aqlaf bafdav naeq-awr, khoergar nae dov-ir-euq mae.
Smrmuiq Smrbaw Hawr-eu Miqyaer-euq Mirkhanq
Mk 10:17-31; Lk 18:18-30
16Khoerngae, tsawrhaq tiq ghaq, Yeqsur jawr-eu gar lar-awr narhaq-eu, “Muiq-eu Saqlaq-or! Ngar mqmaq maqbyav yarzir daef-eu jeq za’ni, gar yawmuiq aqgeu jeq ya’mr-eu la?”
17Khoerngae, Yeqsur, aqyawf-anr heulof-aer aerkhof naeq-euq mae, “Nawr aqjeq mirnae ngaq-anr muiq-eu ghaq laer kur-eu le? Miqyaer maqngeur nar-aq, yawmuiq tiqghaq-iq maqjawr-a. Miqyaer taef-aer muiq-eu mae. Aerkhawf, nawr daef-eu jeq-euq lafkhoer urlermawf nar-aq, zanrdawq khofdawq-anr mrcaw-awq.”
18Aqyawf narhaq-eu, “Zanrdawq khofdawq aqgeu deuq?” Khoerngae, Yeqsur heulof-aer aernaeq-euq mae,
“ ‘Tsawrhaq-anr taqsaef,’ ‘Aqcawq-euq miqzaq yozaq-anr taqbanq taqjoe,’ ‘Smrkhoeq taqkhoeq,’ ‘Maqtsaq maqdawr-eu sarkir taqkamq,’ 19‘Nawqma nawqda-anr yawzeu baw-awq,’ (Di 20:12-16; Dm 5:16-20)
‘Yawqha-euq mawrdo-anr gaq-eu lof-aer, yawqha-euq dawqpae jawr-eu tsawrhaq-anr gaq-awq.’ ” (Lb 19:18)
20Khoerngae, zaqguq khoerghaq aer-eu, “Ngar yawnyir ngae nae heudeuq dawqtawv luf-anr yawmuiq-aer mrcaw laf-euq ma. Aqjeq parya mr-eu la siq?”
21Yeqsur, aqyawf-anr aernaeq-eu, “Nawr byan-eu tsawrhaq pyeufmawf nar-aq, ghof-ir-awr, nawr kharjav-eu jeq dawqtawvluf anqdzae-awr nae, shaq-awr zanq-eu deuq-anr birnaeq-ir-awq. Khoerlof-aer janr nar-aq, mq-euq khoertav pyurshuir myawqganq javlar taef-a. Khoernar-aq, ngaq-euq maeqnan cantae lar-awq.”
22Khoerngae, zaqguq khoerghaq dawq khoerdawq-anr yagaq ngae, noeqshaq duidui-eu lafkhoer candov ghae-euq mae. Aqjeq mirnae aernar-aq, aqyawf myawqganq ghawqmya’ni jav-eu mae.
23Khoerngae, Yeqsur, aqyawf-euq zaqlanr deuq-anr heulof-aer aernaeq-euq mae, “Ngar, nawmaf-anr aqdirma-aer aernaeq nyar, smrmuiq smrbaw deuq, mqtav mirkhanq-anr urler-eu-aq shaq duidui-eu mae. 24Ngar, nawmaf-anr par aernaeq nyar, lawtaw, aqghawf-euq lafnaq-anr urler-eu-aq, smrmuiq smrbaw deuq, Miqyaer uvlanr-eu jeq-euq lafkhoer urler-eu navmaqtser awq-eu mae.”
25Zaqlanr deuq dawq khoerdawq-anr yagaq ngae, zanq duidui ler-awr aer-eu, “Tox-aer mar-iq, aqsur ghaq kakhof-eu jeq za’nya-eu?”
26Yeqsur, aqyawf maf-anr haw-awr nae aernaeq-eu, “Heu-aq, tsawrhaqzaq janrnya-eu jeq maqngeur-a. Aerkhawf, Miqyaer-aq, yawqjeq navluf janrnya-eu mae.”
27Khoerngae, Beqtuvluv, aqyawf-anr narhaq-eu, “Hawsher-eq, nga’maf yawqjeq navluf byaerdzae yaf-awr, nawq-euq maeqnan cantae luf-eu ma. Khoer-euq gharduq, nga’maf aqjeq za-eu la?”
28Khoerngae, Yeqsur, aqyawf maf-anr heulof-aer aernaeq-euq mae, “Ngar, nawmaf-anr aqdirma-aer aernaeq nyar, yawqjeq navluf yawshuif parlar-awr, Tsawrhaq-euq Zaqyo, aqyawf-euq yawshaef khanqsaer huiq-eu nuirmanq-anr nuir ngae, ngaq-euq maeqnan cantae-eu nawmaf khawf, nuirmanq 12 manq-anr nuir-awr, Irsaqleqlav tsawrjeuq 12 jeuq-anr yarkhaq yadar taef-a. 29Ngaq-euq tsawrmyanr-euq gharduq, yawqha-euq nymr, maqngeur nar-aq, maernmr, dmrma, aqma aqda, zaqmiq zaqyo, daeyar, heudeuq byaerdzae yaf-euq tsawrhaq yawqghaq navluf, khoermyav maqtser 100 bymr za-eu uqtaf, mqmaq maqbyav yarzir daef-eu jeq za taef-a. 30Aerkhawf, aqcawq-euq maeqhu jawr-eu tsawrhaq ghawqmya’ni, aqcawq-euq maeqnan yajawr-ir taef-a. Aqcawq-euq maeqnan jawr-eu tsawrhaq ghawqmya’ni, aqcawq-euq maeqhu yajawr taef-a.
अहिले सेलेक्ट गरिएको:
Maqtaeq 19: AKA
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
2018 ©
Bibles International ®
The Bible Society of Baptist Mid-Missions
