San Mateo 10
10
Icupi̱p doce pʉctampajyat
1Mit Jesús iya̱s̈cʉs̈ ma minga mam je' ayé doce ipʉctampajyat, mit imoygʉs̈ poder pa igui-acpichingawa'n demo̱nyujat mit pa igui-ac-oytangawa'n nu'pʉjʉn tu'nijatway.
2Mit yename inʉ'jyat ayé doce apóstojlat: Primeru Simón jeme inʉ'jywayey Pedro, mit i-ajch Andrés, Jacobo mit imajtsʉc Juan, ayé Zebedeo iwajyat. 3Mit Felipe, Bartolomé, Tomás, Mateo jeme ique'chumway impuestu, Jacobo Alfeo iway, mit Lebeo inʉ'jywayey Tadeo. 4Simón inʉmgajapay cananista, mit Judas Iscariote jeme ito'ctʉgʉyway Jesús.
Lo que iwatcámpay ayé docejatway
5Jesús i-ajyu'tcʉs̈ ayé doce apóstojlat mit imanda̱tcʉs̈, inʉm:
—Camnʉs̈ca nejʉm mam itsʉ̱nga caje'jatway judíujat, ne camtutʉgʉyga netu'c nʉ'jcopac mam itsʉ̱nga Samariajatway, 6po nʉ́s̈ca mam itsʉ̱nga Israelway jayajwat ni'c je'jat yo'ygap as̈am borregujat togoyijcatway. 7Mit inyʉmdacyo'ygáj ni'c tomo'ganu pa imanda̱twa'n Dios. 8Ac-oytánga tu'nijatway mit jeme itcʉjʉpay lla̱gas. Acjutuctá̱jca nam-o'guijcatway mit acpíchinga demo̱nyujat. Impʉctsougau ayʉ̱́j poder we'nu, we'ney camque'chumga neti.
9’Cammunʉs̈ca nejʉmay tumi̱n inbolsani'jcat, ne oro, ne plata, ne cobre. 10Ne cammunʉs̈ca morral to̱uni'c, ne cammunʉs̈ca mechc chec, ne mechc par cʉ'ac, ne porto̱n, ni'c tu'c yos̈watpay merecia̱tp iguimoygawa'n ma cay.
11’Mit jʉmaygapa'tu nʉ'jcopac intutʉgʉygámpay, che'nga pʉn is̈pʉctsougámpay oy, mit tánga jem hasta inyʉs̈canuwa'n. 12Intʉgʉygawa'n en ayé tʉjc, saludá̱tca jeme tsʉ̱ngapay jem. 13Mit te jeme tsʉ̱ngapay jem is̈pʉctsougap oy, inyo'tcajáj Dios ma bendiciona̱tcʉs̈, po te is̈capʉctsougap oy, ingayo'tcajáj Dios neti pa je'jat. 14Mit te tambʉn is̈capʉctsougap ne igamaraugap lo que inyʉmgapay, píchinga en ayé tʉjc o en ayé nʉ'jcopac mit cus̈ícs̈ca pu's̈na' jeme itpay inta'ni'jcat pa ma jawiga ni'c je'jat ma̱lo'jcat. 15Iyacs̈ta'cway tʉnʉmgʉs̈ap ni'c ayé nʉ'jcopac jayajwat itunas̈cáj más mʉgʉc que ayé maljayajwat Sodomajatway mit Gomorrajatway en ayé s̈ʉjw ijuzga̱twa'n Dios.
Nat is̈po'ctangáj
16’Márauga. Tʉ-ajyu'tcʉs̈áj as̈am borregujat pa̱ju-awa'tsam. Tsʉ̱́nga listu as̈am tsanajyat, po camwatcaja mal nepʉn, niwátcʉjʉ as̈am palomajat. 17Nicuidá̱tcʉjʉ mit jayajwat ni'c is̈-entrega̱tcáj icʉ'jugujmat judíujat ijefejat, mit is̈raunipʉ'ngáj mam i-adora̱tca judíujat. 18Mit is̈munʉs̈cáj mam itsʉ̱nga gobernadojrat mit rejyat. Is̈munʉs̈cáj ni'c ʉ̱ is̈wangap, mit we'n inactujawigáj je'jat mit jeme caje'jatway judíujat ni'c ʉ̱ is̈cupʉjcap. 19Cuandu is̈-entrega̱tcáj, campensa̱tca nat inyicowangʉjʉwa'n o ti inyʉmgámpay. Ni'c en ayé hora Dios is̈actujawigáj ti inyʉmgámpay. 20Ni'c caje' mijchat micotscáj, po is̈ajcotscáj ayé Espíritu Santu i-ajyu'tway Dios Nate̱jat.
21’Tu'c jayau i-ac-ago'jcʉ̱́j i-ajch, mit jatu'c jayau i-ac-ago'jcʉ̱́j iway, mit jayajwat tsuguinwatcáj mit ite̱jtat, mit i-ac-ago'jcʉjʉ̱́j. 22Mit nu'pʉjʉn jayajwat is̈-angáj ni'c ʉ̱ is̈cupʉjcap. Po jeme imajmo'ámpay hasta icʉs̈pʉ'nwa'n ayʉ̱́j cosajat, ayé jayau nisalva̱jtʉ̱́j. 23Cuandu is̈po'ctangáj en tu'c nʉ'jcopac, po'jca pa jatu'c. Iyacs̈ta'cway tʉnʉmgʉs̈ap ni'c ingatuyo'ybʉ'ngáj nu'pʉjʉn nʉ'jcopajcat Israejlatway antes tʉmi'nwa'n ʉ̱ jeme tʉjatway jayau.
24’Tu'c pʉctampay catsʉ̱náj más oyninʉmic as̈am i-amayipay, mit tu'c yos̈watpay catsʉ̱námpey más oyninʉmic as̈am ijayc. 25Oy te tu'c pʉctampay jajtʉpey as̈am i-amayipay. Mit oy te tu'c yos̈watpay iwatp nu'pʉjʉn as̈am ijayc. Te tu'c tʉjcajway inʉmgajau ni'c imuyos̈watp mʉjway demo̱nyu, más imalninʉmgáj jeme itʉcm tsʉ̱ngapay.
Pʉn ayé napʉ̱támpay
26’Jemni'c campʉ̱tca jayajwat. Ca-itáj nejʉmay cosa naga-e'pcámpay, mit najawigáj nu'pʉjʉn cosa iwatcapay cuyu'tsic. 27Lo que tʉnʉmgʉs̈apay anu'mu, nʉmga jayau-awa'tsam. Mit lo que inmaraugapay anu'mu, nʉmdacyo'yga mam iguimárauga nu'pʉjʉn jayajwat. 28Mit campʉ̱tca jeme i-ago'gámpay incuerpujat ni'c je' iga-ago'gáj in-espíritu. Más oy pi pʉ̱tca ayé jeme oyámpay igui-actogoy in-espíritu mit incuerpujat jʉngʉtʉm.
29’Najawigap ni'c oyap nas̈to'c mechc jonwájat por tu'c centavu, po te Dios igawamp, igamo'áj laj ne tu'c jojn ma ca'u na̱s̈ni'c, ni'c je' icuida̱tcʉs̈pey jonwájat. 30Mit Dios ijawip pʉjʉn cuaypʉjc is̈aguepca incopacni'jcat. 31Jemni'c campʉ̱tca ni'c más mivalia̱tcap que jonwájat.
Jeme inʉmgámpay ni'c i-is̈capcap Jesucristu
32’Pʉmba'tu cawinchu̱gámpay iguinʉmwa'n ni'c tʉs̈-is̈cap, ʉ̱ we'ney tʉnyʉmáj ni'c tʉnis̈cap je' mam iguimarawa'n tʉnte̱t Dios jeme tsʉ̱napay tsajpni'c. 33Po jeme winchu̱gámpay iguinʉmwa'n ni'c tʉs̈-is̈cap, ʉ̱ tʉnyʉmámpey ni'c tʉnga-is̈cap je' mam iguimarawa'n tʉnte̱t Dios jeme tsʉ̱napay tsajpni'c.
Jesús caminu solo pa ma it paz
34Inʉm Jesús:
—Campensa̱tca ni'c tʉmín solo pa tʉs̈yacwa'n paz na̱s̈ni'c. Po como tʉmín, itáj lucha ni'c catsʉ̱ngáj de acuerdu jeme tʉs̈cupʉjcapay mit jeme tʉs̈cacupʉjcapay. 35Jemni'c tu'c jayau imutsuguinwatáj ite̱t, mit tu'c to's̈ay imutsuguinwatáj ima̱m, mit tu'c jays̈e'p imutsuguinwatáj is̈ac. 36Mit jayajwat tsuguintsʉ̱ngáj mit ifamiliajat.
37’Jeme iwampay ite̱t mit ima̱m más que ʉ̱, ayé tʉnga-e'páj as̈am tʉnjayau. Mit jeme iwampay iwajyat más que ʉ̱, ayé tʉnga-e'pámpey as̈am tʉnjayau. 38Mit jeme catsʉ̱námpay dispuestu iguitunas̈wa'n, ayé tʉnga-e'páj as̈am tʉnjayau. 39Jeme icuida̱támpay ivida pa je'yu, i-actogoyáj. Mit jeme i-actsʉ̱námpay ivida por togoyic ni'c tʉs̈wamp ʉ̱, iguarda̱táj pa tu'c vida cacʉs̈ámpay.
Jeme ipʉctsougámpay premiujat
40Inʉm Jesús:
—Jeme is̈pʉctsougapay mijchat, casi ʉ̱ tʉs̈pʉctso̱p. Mit jeme tʉs̈pʉctso̱pay ʉ̱, ipʉctso̱pey Dios Nate̱jat jeme tʉs̈ajyu'tway. 41Jeme ipʉctso̱pay tu'c profeta ni'c je' Dios igui-ajyu't, je' ipʉctsowámpey nije'yu premiu ipʉctso̱pay tu'c profeta. Mit jeme ipʉctso̱pay tu'c jayau oyway ni'c je' iwatp puru cosa oyway, je' ipʉctsowámpey nije'yu premiu ipʉctso̱pay tu'c jayau oyway. 42Mit jeme imo'ámpay tu'c taza maja-oynʉ'aj tu'c tʉmpʉctampay, iyacs̈ta'cway je' ipʉctsowámpey ipremiu.
अहिले सेलेक्ट गरिएको:
San Mateo 10: PSNT
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Nuevo Testamento en Popoluca de Sayula © Sociedad Bíblica de México, [1969].
