Matìyò 2

1Və mbwi Yesò a ntə̀ʼ Bètelehèm a loʼ Judiyà, a tʉʼʉ fòyn Helòd. A sətsèn viʼi və tofə və vətsen və lù fa loʼ a shə a chʉzhʉ saʼa fa tsu ə vì a Jelusalèm, ə bèm 2La,“Wàyn yì ye a və bwi, a ghə̀ lu ndiʼ fòyn və Jus lì lo? Yès yenli fədzɨ̀ŋ fə wen à yès a loʼ mù sə vì ə gumlə wen,” 3A ndiʼ ando Helòd nzhʉ kənyʉ̀ a kènkə, kə sə̀ ku ngəʼ à wen be ku ngəʼ à viʼi Jelusalèm no vətsèm. 4Ghə̀ dzàŋtə̀ tʉtʉ vəpfèm və ngə̀ŋ Nyìngòŋ və ghoʼkə və bènə̀ ndìʼsə̀sə təsoʼ ə bèm à vəwenə la və tə ndiʼ ne bwi Klistò yi fe lo. 5Vəwenə gàʼ à wen la, “Və tə ndiʼ ne bwi wen a ntə̀ʼ Bètelehèm a loʼ Judiyà”. Nshə̀ʼtə̀ ghoʼo nyòʼ li la, 6“A ghə̀ŋ a viʼi Bètelehèm, a loʼ Judiyà, Ghə̀ŋ kɨ la ntə̀ʼ ghə̀ŋ ko diʼ ntə̀ʼ tyetə no fa mpfen, ntə̀ʼ ghə̀ŋ sə diʼ ntə̀ʼ ghoʼo a Judiyà, byiʼàndo wìʼ a lù fà ghə̀ŋ a ntìntìn a ghə̀ lu tuʼmə nə̀ viʼi Islel no vətsèm nə̀ mò,” 7No a zhʉ kò a Helòd nyoʼtə dzàŋtə̀ viʼi ghayn vyi ə bèm à vəwenə la,“Fədzɨ̀ŋ a fì tə̀ lutə̀ sù fʉ a zhʉ kò?” 8Vəwenə shə̀ʼtə̀ a wen, ghə̀ mù tɨm vəwenə a Bètelehèm gàʼà la,“Ghə̀ŋ tuʼlə̀ kəŋ wàyn ayì ə nè kəŋ ə yen ghə̀ŋ bwènə̀ vì ə shə̀ʼtə̀ à mò ndi no nkàyntə̀ mò boŋ ə dyʉ̀ gumlə wen” 9-10Vəwenə zhʉ ntɨm ayì mù lù fʉ ə zaʼa ji bè yen tò ndə̀ŋndəŋ fədzɨ̀ŋ fìfə a vəwenə n-yenə à vəwenə shə loʼ lì. Ando vəwenə n-yenə alì sə saŋlə no ŋàŋ. Fədzɨ̀ŋ a fìfə dyʉ̀ fà vəwenə ashɨ ə dyʉ̀ tɨmə tò a kətʉ kə kəshi yì a wàyn a ghèn ndiʼi tsu. 11Vəwenə kwen a ngə̀ŋ ə yen wàyn ayì wenə lò wen Mèli, ə gwʉ̀ʼtə alwi vəwenə à wen ashɨ ə kuʼsə wen, ə bòʼtə̀ mbò vəwenə ə shìsə kəku fa tsu a ndiʼi gul, nə̀ silva bènə̀ məzhiʼ mə tsen a və ndzàŋ nə̀ miyif ə ku à wen. 12Vəwenə nè fʉ a məpfwo, pfwo fa jì kədyàŋ ando Nyìngòŋ ntyɨftəli wen a jòm la kə vəwenə be a bwènə̀ dyʉ̀ a Helòd.

Josèf nyɨŋ dyʉ̀ nə̀ Yesò a Ijìb

13A ndiʼ ando viʼi və tofə və nbwenə li vì ntsɨ̀ŋ Bobo vì à Josèf a jòm ə gàʼà wen la,“Lu ə lyɨ̀ wàyn ghèn wenə lì wen fa shə̀ ə nyɨ̀ŋ dyʉ̀ a Ijìb byiʼàndo Helòd kəŋə wàyn a ghèn əzhwi. Ghə̀ŋ dyʉ̀ ghə̀ŋ fàŋ tò tsu əzaʼa fa a zhʉ a ma a gàʼ la ghə̀ŋ bwènə̀ ə vì.” 14No a zhʉ̀ kò Josèf lù ə lyɨ̀ wàyn wenə lì wen fa tsu vəwenə nyɨ̀ŋ dyʉ̀ a Ijìb tò nəntʉʼʉ ayì, 15ə dyʉ̀ fàŋ tò tsu əzaʼa fa tʉʼ a Helòd mpfʉ. Nyʉ̀ venə nlyɨ̀ kəshi ndi lwinsə kənyʉ̀ kì a Nyìngòŋ nlù gàʼ ə chòsə̀ fà nshə̀ʼtə̀ ghoʼo wen “Ma dzàŋli wyè ghom fa Ijìb la ghə̀ vì.”

Fòyn Helòd zhwilə vunə lyʉmə

16Helòd nè yen la viʼi və tofə və vyi lobtə̀li yì, kənyʉ̀ a kèn kə zaf wen no nə̀ ŋàŋ. Ghə̀ chòsə̀ soʼ la və zhwilə vunə lyʉmə a Bètelehèm nə̀ vunə a və sə̀ diʼ ngwʉ̀ʼsə bò byìʼì zhʉ a viʼi və tofəvə vyì nshə̀ʼtə̀ la fədzɨ̀ŋ fìfə nfʉ tsu. 17A lè ncho tò kənyʉ̀ kì a Jèlimayà a ndiʼi nshə̀ʼtə̀ ghoʼo nlu gàʼ la, 18“Və lù li zhʉ ando wì dìʼ fa ntə̀ʼ Lamà, no nə̀ ŋàŋ, kò ghə̀ lə̀ kòŋ la wìʼ chɨmsə wen, a diʼ alì à dì Lachèl dì vunə wen ando və zhwilə.”

Josèf bwènə̀ pfwo a loʼ Islel wenə Mèli nə̀ Yesò

19Helòd lù pfʉ ntsɨ̀ŋ Bobo fʉ a kə̀, Josèf a jòm a loʼ Ijìb ə gàʼ la, 20“Lù li lyɨ̀ wàyn wenə lì wen ghə̀ŋ vəwenə bwènə̀ pfwo a loʼ Islel byìʼì ando viʼi vyì a və nkəŋ zhwi wen pfʉkə li.” 21No a zhʉ kò Josèf lù ə lyɨ̀ wàyn wenə lì wen, vəwenə bwènə̀ pfwo a loʼ Islel. 22A ndiʼ ando Josèf nzhʉ la à sə soʼo Akelùs a kəshi tìʼ wen a Judiyà, ghə̀ sə̀ fàynə̀ no ŋàŋ əŋwʉʼə tsu. Ntsɨŋ Nyìngòŋ be vì ə tyɨftə wen a jòm la ghə̀ nyɨŋ ə dyʉ̀ a shə loʼ Galìlì. 23Ghə̀ lù ə dyʉ̀ a shə loʼ sə̀ tsi a ntə̀ʼ tsen a və ndzàŋ nə̀ Nazalèt. Ghə̀ ne alì ndi lwinsə kənyʉ̀ kì a nshə̀ʼtə̀ sə ghoʼkə sə ngàʼa. Sə nlù gàʼ la,“Və lu dzàŋ wen nə̀ wyè wù Nazalèt”.

अहिले सेलेक्ट गरिएको:

Matìyò 2: bbkDBLnt

हाइलाइट

शेयर गर्नुहोस्

कपी गर्नुहोस्