Luke 24

Sa Tinuru Pule te Zisu pa Minate

(Matiu 28:1-10; Maka 16:1-8; Zone 20:1-10)

1Meke pana vaqavaqasana sa rane Sade, si la koasa lovu sari kasa barikaleqe, paleke la ni rini sari na oela humaṉa lea, saripu ele va nama vekoi rini. 2Doṉo la dia gua, si dogoria rini sapu ele ta topili palae tu sa patu, sapu tukuna sa sasadana sa lovu. 3Ke nuquru la si arini pa korapana sa lovu, ba lopu dogoria rini sa tinina e Zisu. 4Ke sipu korapa turu nunala dia vasina si arini, si vura va hodaka la si karua tie sapu pokopoko keoro ṉedala, meke turu kapae dia koa rini. 5Matagutu sisigiti sari kasa barikaleqe, ke todoṉo gore pa pepeso si arini. Meke zama la koa rini sari karua tie, “Na vegua ke hata ia gamu sa tie toana koari pu matedi? 6Lopu koa tani si Asa, ba ele turu pule tu pa minate. Balabala ia gua sapu ele tozini gamu Sa, sipu korapa koa pa Qaleli si Asa, sapu guahe:#Mt 16:21, 17:22-23, 20:18-19; Mk 8:31, 9:31, 10:33-34; Lk 9:22, 18:31-33 7‘Sa Tuna na Tie si kaqu ta vala pa limadi rina tie kaleadi, meke kaqu tava mate pa korosi, ba pa rane vina ṉeta si kaqu tava turu pule si Asa,’ gua,” gua sari karua.

8Ke tiqe balabala pulei rini sari Nana zinama arini. 9Ke taluarae pule pa lovu si arini, meke la vivinei ni rini koari ka manege eke disaepeli, meke koari kaiqa pule, sari doduru tiṉitoṉa gua pu ta evaṉa. 10Sari kasa barikaleqe arini, si ari Mere pa vasileana Magidala, e Zoana, meke e Mere tinana e Zemisi. Arini hire, meke kaiqa pule barikaleqe saripu lulidi koa rini, si la vivinei ni koari na apositolo saripu gua ta evaṉa hire. 11Ba lopu va hinokari rini sari na barikaleqe, guana lopu vivinei hinokara guni rini. 12Ba e Pita si turu, meke topue haqala la koa sa lovu. Kokopo nuquru si asa, meke dogoria mo sa sa poko keoro sapu ta hade nia Zisu. Ke kekere pule si asa, magasa hola nia sa sapu gua ta evaṉa.

Karua Tie pu Ene La pa Emeasi

(Maka 16:12-13)

13Meke pa ranena tugo asa si ene la pa Emeasi sari karua disaepeli te Zisu. Emeasi si manege eke kilomita d seu gua pa Zerusalema. 14Korapa vivinei ni ri kara sari doduru ginugua pu ta evaṉa. 15Meke sipu korapa vari vivinei sari kara, si vura tata la se Zisu, meke ene somanae koari kara. 16Dogoria ri kara si Asa, ba lopu tava malumu nia pude doṉo gilania. 17Meke nanasi Zisu, “Na sa si korapa vivinei nia gamu kara pa mia inene?” gua si Asa. Ke turu noso sari kara, meke guana doṉo talotaṉa sari isumatadia.

18Meke keke ari kara, pozana si e Kiliopasi, si nanasa la koa Sa, “Vegua? Agoi mo telemu si kekeke tie karovomu mae pa Zerusalema, si lopu gilani sari doduru ginugua saripu ta evaṉa vasina, koari ka visavisa rane la hire?” gua si asa.

19“Sari ginugua savadi?” gua se Zisu.

Meke olaṉa sari kara, “Sari doduru ginugua pu ta evaṉa koe Zisu sa tie Nazareti. Na keke poropita ṉiṉirana pa Nana zinama na tinavete si Asa, pa kenudi rina tie, meke sa Tamasa. 20Sari na nada ṉati hiama, na koimata, si luara vala nia si Asa koasa qavuna Roma, meke pitua meke va matea si Asa pa korosi. 21Meke pa mami dinoṉodoṉo gami, si hokara Asa sa tie sapu kote vata rupahia sa butubutu Izireli, gua. Ego, meke hie sa vina ṉeta rane podalae gua ta evaṉa si hire. 22Kaiqa rina barikaleqe pu somanadi koa gami, si va magasa gami. La munumunu hokara si arini koa sa lovu, 23ba lopu dogoria rini sa tinina Zisu. Meke pule mae tozini gami rini sapu dogori rini si kaiqa mateana, meke tozi ni rina mateana sapu ele turu pule se Zisu, gua. 24Ke kaiqa koa gami kasa si la koasa lovu, meke dogoria sapu gua tozia ri kasa barikaleqe, meke hinokara tugo, ba lopu dogoria rini sa tiena,” gua sari kara.

25Meke zama la koari kara se Zisu, “Duvili si gamu, meke lopu boka tuturei va hinokari gamu sari doduru tiṉitoṉa, gua pu tozi rina poropita. 26Vegua, lopu kaqu koa ta sigiti ni tugo sa Karisito sari doduru ginugua sara, meke tiqe la vagia sa vina lavatana pa Maṉauru?” gua si Asa. 27Meke va bakali Zisu koari kara sari doduru ginugua pu soto la gua koa Sa, saripu ta tozi koari na Kinubekubere Hope; podalae koari na buka te Mosese, meke kamo koari na poropita.

28Totoso tata kamoa rini sa vasileana vasina korapa la ia rini, si doṉodoṉo guana hiva ene hola si Asa, 29ba ososo nia ri kara si Asa, meke zama, “Mae mamu koa paki koa gami tani; ele veluvelu sa popoa, meke ele tata boṉi mo,” gua sari kara. Ke luli la koa rini si Asa. 30Totoso habotu henahena Sa koa rini, si vagia Sa sa bereti, meke mana nia Sa, meke videa, meke vala Sa koa rini. 31Pa totoso asa si tiqe guana ta tukele sari na matadi, ke tiqe doṉo gilania rini si Asa, ba murimuri taloa Nana si Asa pa dia dinoṉo. 32Meke vari zamai sari karua, “Hinokara sapu totoso va bakali Sa koa gita pa nada inene mae sari na Kinubekubere Hope, si maṉini sari na buloda,” gua si arini.

33Beto asa si hinoqa gasa turu mo sari karua, meke taluarae pule la mo pa Zerusalema, meke la tutuvi rini sari ka manege eke disaepeli, meke sari kaiqa pule, korapa koa varigara dia. 34Meke tozi ni rina disaepeli, meke sari kaiqa pule pu varigara vasina sari karua, “Sa Baṉara si hinokara ele turu pule! Ele vata dogoro pule nia si Asa koe Saimone Pita!” gua si arini.

35Meke tiqe tozia pule ri kara pu mae guadi pa Emeasi, sapu gua ta evaṉa pa siraṉa, meke sapu gua meke doṉo gilania ri kara se Zisu, totoso videa Sa sa bereti.

Vata Dogoro Koari na Disaepeli se Zisu

(Matiu 28:16-20; Maka 16:14-18; Zone 20:19-23; Tinavete 1:6-8)

36Meke sipu korapa vivinei nia ri kara sapu gua asa, si la turu vura Nana mo pa varikorapadi rini sa Baṉara Zisu, meke zama, “Mani koa koa gamu sa binule,” gua si Asa.

37Ke hodahodaki, na matagutu si arini; hokara keke tomate si dogoria rini, gua. 38Ba zama la koa rini si Asa, “Na vegua ke nunala, na matagutu si gamu? 39Doṉo maei sari na limaqu na nenequ, mamu va sosodea sapu Arau mo si hie. Taṉinau, mamu gilanau, ura na tomate si loke masana na susurina gua Arau he,” gua si Asa.

40Totoso zama gua Sa, si va dogoro ni Sa koa rini sari limana na nenena. 41Meke sipu korapa lopu boka va hinokaria rini, sina qetu meke magasa dia, si zama la koa rini si Asa, “Koa dia gemi vasi ginani si gamu?” gua si Asa. 42Ke vala nia rini si keke igana kinana. 43Vagia Sa sa igana, meke hena ia Sa pa kenudia rini.

44Beto asa, si zama la koa rini si Asa, “Hire sari na tiṉitoṉa pu ele tozini gamu Rau, totoso koa somana koa gamu si Rau. Doduru ginuguaqu Rau sapu ta kubere pa Tinarae te Mosese, meke sari na kinubekubere tadi na poropita, meke koari na Sam, si kaqu tava gorevura beto,” gua si Asa.

45Meke tukeli Sa monanadi, pude madi tumae ni sari na Kinubekubere Hope. 46Meke zama la koa rini si Asa, “Hie gua sapu ta kubere: Sa Karisito si kaqu koa ta sigiti na tava mate, meke pa rane vina ṉeta si kaqu turu pule pa minate. 47Meke pa korapa pozana Sa, si kaqu ta tarae sa inavosona sa kinekere meke sa tinaleosae pa sinea koari doduru butubutu, podalae pa Zerusalema. 48Meke gamu si na tie va sosode koari na ginugua hire. 49Kaqu garunu atu nia Rau koa gamu sa Maqomaqo Hope, sapu ele va tatara nia sa Tamaqu. Ba mi la koa aqa pa Zerusalema, osolae kaqu ta gorei nia gamu sa ṉiniraṉira Maṉauru,” gua si Asa.#TTA 1:4

Ta Hena Sage La pa Maṉauru se Zisu

(Maka 16:19-20; Tinavete 1:9-11)

50Beto saripu gua hire si turaṉa lani Sa pa Betani sari kasa Nana disaepeli, meke ovulu sage ni Sa sari limana, meke mana ni Sa si arini.#TTA 1:9-11 51Sipu korapa mana ni Sa sarini, si taluarae koa rini si Asa, meke ta hena sage pa Maṉauru. 52Meke vahesia rini si Asa. Qetuqetu hola dia meke pule la pa Zerusalema, 53meke lopu makudo vahesia rini sa Tamasa pa korapa Zelepade.

अहिले सेलेक्ट गरिएको:

Luke 24: ROV

हाइलाइट

शेयर गर्नुहोस्

कपी गर्नुहोस्