BINZEN 11
11
Babilon Tsokhwe Gü
1A-keri ka kazü temi aphu khwe me lo jo me sen hü. 2Anyugun le npho zin ho tseo Babilon ketejon nme nyu ryüo tsüka bin lo. 3Anyugun le khinyunyu ka, “Ryülo! ngun itatso thyü pe ro nko salo tinu.” Tson-o anyugun le itatso lo kükhin pe tsü tün kesülo nrün thyülo. 4Anyugun le, “Ntsoka we ngun tsokhwe khwe pe tsang tun kethyü le kebin nyida nme thyü pe ngun zan thyü tile lo kazü aphu nyu nrenru tinla loha,” tse zoshü.
5Tsüselo Npugü le temi dan le thyükelo nyida gü lo tsokhwe gü nrishü titse tsenryü-o, 6“Ntsoka temi hidan aphu khwen me; lo hile anyugun le nyuthyü tiyo binzen gü gwenzin. Whütse anyugun le nyuthyü nyü yo thyülo lati! 7Tsügenyu ngun tsen gü anyugun khwejo thyü kevü lao anyugun no kekhwe shamvula tile nu.” 8Tson-o Npugü le anyugun no kazü aphu so nrenru tinlao, nyida gü thyülo mvula. 9Nyida gü pe Babilon tse kola, kechamvu le tsünyu Npugü le temi aphu khwen no kerhünkerhü la; lo tsünyu temi no kazü aphu nyu nrenru tin kela genyu.
Shem Tsipwen
10Hile Shem tsipwen dan. Zükemihen siki chenhvu ka Shem le a-keyhun chen tsime ka Arpachshad tse kethyü peche nme nnyulo. 11Tsüsiki a-le chen tsi pvün yhun-o a-nyenyu kecha dan nnyulo.
12Arpachshad le chen shenryü pvün ka a-nyu Shelah tse kethyü peche nme nnyulo; 13tsüsiki a-le chen tsizio kenshen yhun-o a-nyenyu kecha dan nnyulo.
14Shelah le chen shenryü ka a-nyu peche Eber tse kethyü nme nnyulo; 15tsüsiki a-le chen tsizi-o kenshen yhun-o a-nyenyu kecha dan nnyulo.
16Eber le chen shenryü pezi ka a-nyu peche Peleg tse kethyü nme nnyulo; 17tsüsiki a-le chen tsizio shenryü yhun-o a-nyenyu kecha dan nnyulo.
18Peleg le chen shenryü ka a-nyu peche Reu tse kethyü nme nnyulo; 19tsüsiki a-le chen tsihvuo tekü yhun-o a-nyenyu kecha dan nnyulo.
20Reu le chen shenryü kenyhun ka a-nyu peche Serug tse kethyü nme nnyulo; 21tsüsiki a-le chen tsihvuo tsenyü yhun-o a-nyenyu kecha dan nnyulo.
22Serug le chen shenryü ka a-nyu Nahor tse kethyü peche nme nnyulo; 23tsüsiki a-le chen tsihvu yhun-o a-nyenyu kecha dan nnyulo.
24Nahor le chen nkio tekü ka a-nyu peche Terah tse kethyü nme nnyulo; 25tsüsiki a-le chen tsio tseryü tekü yhun-o a-nyenyu kecha dan nnyulo.
26Terah le chen hentsenyü siki, a-le Abram, Nahor lo Haran hidan pvü thyülo.
Terah Tsipwen
27Hile Abram, Nahor lo Haran dan pvü Terah tsipwen. Haran le Lot a-pvü, 28lo Haran le a-pvü le rhün kebin ka Babilon nyu a-nyugun nyida Ur nyu sila. 29Abram le Haran nyugi Sarai, lolo, Nohor le Milkah lo, tsügü nyugi le Iskah kobin. 30Sarai le nyu zenmvu.
31Terah le Kanan kazü ki gü titseo a-nyu gü Abram, a-nyugü nyu Lot, tsüle Haran nyu gü, lo a-mogi Sarai Abram nu tse zen-o Babilon nyu Ur nyida gü nken chwila. Anyugun le gü Haran tilo-o tsünyu binlo. 32Terah le a-keyhun chen tsihvuo pvün ka tsünyu sila.
अहिले सेलेक्ट गरिएको:
BINZEN 11: REGSBSI
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.