MATTHAI 24
24
Biekin siet ding a hrillâwk
(Mk 13.1-2; Lk 21.5-6)
1Chun, Isu Pathien biekina inthawk chun a suok a, a fe ding a na.
2Chun, a inchûktirhai chu Pathien biekinhai inentir dingin a kuomah an hung a. Ama ruok chun, an kuomah, “Hieng po po hi in hmu maw? Titakzetin ka hril cheu hi, sukchim loa lung inthuo hrim hrim hitaka hin um naw ni,” a ta, a dawn a.
Rinum hung tlung ding
(Mk 13.3-15; Lk 21.5-6)
3Chun, Oliv tlânga a ṭhung laiin inchûktirhai chu anni khâtin a kuomah an hung a. “Chuong chu iengtik am hung um a ta? I hung nâwkna le khawvêl tâwpna inchikna chu ieng am nîng a ta? mi hril rawh,” an ta.
4Chun, Isûn a dawn a, an kuomah, “Tukhawmin an hlêm nawna ding cheuin fîmkhur ro.
5Mi tamtakin, ‘Krista chu ka nih,’ tiin keia hming sâlin hung an ta, mi tamtak an hlêm ding a ni sih a.
6Chun, indo thu le indo thuthang la hrieng in ta; in lunginzîng nawna dingin fîmkhur ro; chuong chu a hung tlung ding hrim a nih; nisien- lakhawm, tâwpna chu la ni hri naw nih.
7Hnam tum le hnam tum indo an ta, ram tum le ram tum indo an ta; hmun tum tumah ṭâmhai tlâng a ta, simkhawleihnuoihai inhnîng a tih.
8Chuong po po chu nauhase phutna a nih.
9 #
Mt 10.22
“Chu phâ chun rinum tuor dingin inmantir an ti cheu a, sukhlum an ti cheu a; ka hming leiin hnam po po theida nîng in tih.
10Chu phâ chun mi tamtak tlûng an ta, inmantir tuo tâwl an ta; intheida tuo tâwl an tih.
11Zâwlnei tehlêm tamtak khawm hung suok an ta, mi tamtak hlêm an tih.
12Chun, suol a la pung ding a ni leiin mi tam lem hmangaina chu la dei a tih.
13 #
Mt 10.22
Nisienlakhawm, a tâwpna chena tuor pei taphawt chu, chu ngei chu sandamin um a tih.
14“Chun, hi Ram Chanchin Ṭha hi hnam po poin an hrietna dingin khawvêl po poah hrilin um a tih; chu zoa chun tâwpna chu la tlung a tih.
Rinumna râpthlâk
(Mk 13.14-23; Lk 21.20-24)
15 #
Dan 9.27; 11.31; 12.11 “Chuongchun, sukrêmtu tirdak- um, zâwlnei Daniel ihril kha hmun inthienga ngîra in hmu phâ chun (a tiem taphawt chun a umzie hre raw se),
16Juda rama umhai chu tlânga dâm tlân hmang raw hai se;
17 #
Lk 17.31
in chunga um chu a ina thilhai inchû dingin ṭum naw raw se;
18chun, loa um chu a puon inchû dingin kîr nâwk naw raw se;
19Chuong nia chun inrâihai le nautesen pawmhai chung chu rik a tih!
20Chun, in tlân hmang ding hun chu thlasik amanih, châwlni amania a hung tlung nawna dingin ṭawngṭai ro;
21 #
Dan 12.1; Tp 7.14 chu phâ chun rinumna nasatak a um ding a ni sih a; chuong ang hrim hrima nasa chu leihnuoi insieng tira inthawkin tu chen hin a la um ngai nawh a, um khawm iengtika khawm um nâwk ta bawk naw ni.
22Chun, chuong nihai chu suk- tâwi ni naw sien chu mihriem hrim hrim damin suok naw ni hai; nisienlakhawm, thlanghai lei chun chuong nihai chu suktâwi nîng a tih.
23“Chu phâ chun, tukhawmin in kuomah, ‘En ta, Krista chu hitaka hi a um,’ amanih, ‘Hiva hi,’ amanih an ti chun awi naw ro;
24Krista tehlêm le zâwlnei te- hlêmhai an hung suok ding a ni sih a; thei hai sien la chu, thlanghai rau khawm an hlêm theina dingin inchik- na le thilmak ropuitakhai thâwng an tih.
25Ngai ta u, ka hril lâwk ta cheu hi.
26 #
Lk 17.23-24
Chuongchun, in kuomah, ‘Ngai ta u, thlalêrah a um,’ an ti cheu chun fe suok naw ro, ‘Pindan sûngrilah a um,’ an ti cheu chun awi nuom naw ro.
27Kâwl saktieng a hung inlep a, thlangtieng chen khawmin ân lang hlak. Mihriem Naupa hung nâwkna chu chuong ang chu a ni ding a ni sih a.
28 #
Lk 17.37
Khâwlaia khawm saruong umna taphawta chun mulukawlhai khawm um khâwm an tih.
Mihriem Naupa hung nâwkna
(Mk 13.24-27; Lk 21.20-24)
29 #
Is 13.10; 34.4; Ezek 32.7; Joel 2.10,31; 3.15; Tp 6.13 “Nisienlakhawm, chuong ni rinum zo phingle chun, nisa inthimin um a ta, thla var ta naw nih a, vâna arasihai hung tlâng an ta, vân thilthawtheinahai chu sukhnîngin um a tih.
30 #
Dan 7.13; Tp 1.7 Chu phâ chun Mihriem Naupa inchikna chu vânah inlang a ta, chun, hnuoia um chi tinin an âwmhai chum an ta, Mihriem Naupa hi thil- thawtheina le ropuina nasatak leh vân sûm chunga hung hmûng an tih.
31Chun, a vântirkohai chu taw- tawrâwt ri nasatak leh tir suok a tih. Anni chun a ithlanghai chu kâwl kil lia inthawkin, vân tâwpa inthawka a tâwp khing tieng chenin lâwr khâwm an tih.
Theichang kûnga tekhithu
(Mk 13.28-31; Lk 21.29-31)
32“Chuongchun, theichang kûnga hin chu tekhithu chu inchûk ro. A kâu a hung indâwn a, a hna a hung inder chun, nipui a ni ding a nih ti in hriet.
33Chuong ang bawkin nangni khawmin chuong po po chu in hmu phâ chun, ama chu a hung hnai tah a, kawtkhâr bulah a um ti hre ro.
34Titakzetin ka hril cheu hi, chuong po po chu a tlung kim hmakhat chu tulai ruoltharhai hi bo naw ni hai.
35Hnuoi le vân bo a ta, ka thu ruok chu bo naw ni.
Inring zinga um a ṭûlzie
(Mk 13.32-37; Lk 17.26-30,34-36)
36“Nisienlakhawm, chu ni le a phâ thu chu Pa chau naw chun, tukhawmin, vâna vântirkohai khawmin, Naupa khawmin an hriet nawh.
37Chun, Noa damlai ang bawk khan Mihriem Naupa hung nâwkna chu nîng a tih.
38Chuong ni tuilêt hmahai chun, Noa lawnga a lût ni chenin an fâkin an dâwn a, nuhmei pasal an innei hlak;
39tui a hung lêt a, an rênga a lâk hmang vawng hmakhat chu ieng- khawm an hriet nawh a; Mihriem Naupa hung nâwkna chu chuong ang bawk chu nîng a tih.
40Chu phâ chun, loah mi pahni um an ta, pakhat chu fe hmangpuiin um a ta; pakhat chu mâksanin um a tih.
41Nuhmei pahni bu râwtnawina chun bu râwtnawiin um an ta, pakhat chu fe hmangpuiin um a ta; pakhat chu mâksanin um a tih.
42Chuongchun, ngaiven ro, ieng ni am in Lalpa a hung ding in hriet si nawh a.
43Nisienlakhawm, hi hi hre ro, inru a hung ding pha in neituin hre sienla vêng a ta, a in inverpawptir naw ni.
44Chuleiin, nangni khawm inring zingin um ro, in ring naw hunah Mihriem Naupa a hung din g a ni sih a.
Suok ṭha le suok ṭha naw tekhithu
(Lk 12.41-48)
45“Suok ringum vartak, a puin a hun po leh an bu chan ding sem pêk dinga a sûnghai chunga hotua a siem chu tu tak am nîng a ta le?
46A pu a hung phâleh suok chuong anga thawa a hung hmu ding chu a hamṭha.
47Titakzetin ka hril cheu hi, a inei po po chungah hotûn siem a tih.
48Amiruokchu, suok suol chun a lungrilin, ‘Ka pu a hung vak naw ding a nih,’ tiin,
49a suok chanpuihai lo vaw ta sienla, mi inruihai kuomah fain dâwn sienla,
50chu suok pu chu a ring naw niah, a hriet naw laiin hung a ta,
51tum hni hung insuong a ta, mi vervêkhai chan ang hung inchangtir a tih; chutaka chun ṭap le harâwt chu um a tih.
अहिले सेलेक्ट गरिएको:
MATTHAI 24: HMARCLBSI
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
