Yauhaas 7
7
Yexus Hab Nwg Cov Kwv
1Tom qaab ntawd, Yexus moog moog lug lug huv xeev Kalilais; nwg tsi xaav moog nraag lub xeev Yudas, rua qhov cov Yudais tuavhuv yuav muab nwg tua povtseg. 2Thaus yuav txug lub caij kws cov Yudais ua Kevcai nyob Tsev Pheebsuab, #Lek 23.34; 2 Kev 16.13 3Yexus cov kwv has rua Yexus has tas, “Koj ca le moog rua nraag xeev Yudas, kuas cov tuabneeg kws caum koj qaab txhaj le pum tej kws koj ua. 4Tsi muaj leejtwg muab tej kws nwg ua zais, yog has tas nwg xaav kuas luas paub tej kws nwg ua. Tej txujci tseemceeb kws koj ua nuav, ca le ua qha kuas tuabneeg nplajteb paub koj.” 5(Txawm yog Yexus cov kwv los puab tseem tsi ntseeg Yexus hab.)
6Yexus has rua puab tas, “Tseem tsi tau txug kuv lub sijhawm, tabsis mej le lub sijhawm twg los yeej tau. 7Tuabneeg nplajteb tsi ntxub mej, tabsis tuabneeg nplajteb ntxub kuv, rua qhov kuv pheej qha puab tej kev phem kev qas rua puab. 8Mej yuav moog ua kevcai, mej moog mej. Kuv tsi moog,#7.8 Kuv tsi moog; tej phoo qub has tas kuv tsi tau moog. rua qhov tsi tau txug kuv lub sijhawm.” 9Tom qaab kws Yexus has le ntawd rua puab taag lawm, Yexus tseem nyob huv lub xeev Kalilais.
Yexus Moog Ua Kevcai Nyob Tsev Pheebsuab
10Thaus Yexus cov kwv ua ntej moog ua kevcai lawm, tom qaab ntawd Yexus txawm lawv qaab moog hab; tabsis nwg tsi taabmeeg moog, rua qhov nwg tsi xaav kuas leejtwg paub. 11Thaus suavdlawg taabtom ua kevcai, cov Yudais tej numtswv nrhav Yexus ntawm qhov chaw kws suavdlawg tuaj ua kevcai ntawd, puab sis nug has tas, “Nwg nyob qhov twg?”
12Cov tuabneeg coob coob ntawd sis ntxhi zum zawg has txug Yexus, muaj ibtxha has tas, “Nwg yog tuabneeg zoo,” muaj ibtxha has tas, “Tsi yog le ntawd, nwg yog tug kws dlaag ntxag suavdlawg xwb.” 13Tabsis tsi muaj leejtwg muaj cuabkaav pav Yexus zaaj taabmeeg suavdlawg le, rua qhov puab ntshai cov Yudais tej numtswv.
14Thaus suavdlawg ua kevcai txug tog lawm, Yexus txawm moog qhuab qha huv lub Tuamtsev. 15Cov Yudais tej numtswv xaav tsi thoob hab has tas, “Ua le caag tug txivneej nuav yuav paub ua luaj le, nwg tub tsi tau kawm ntawv le los sav?”
16Yexus teb has tas, “Tej lug kws kuv qha nuav tsi yog kuv tej lug, tabsis yog Vaajtswv tug kws khaiv kuv lug tej lug. 17Yog leejtwg txaus sab ua lawv le Vaajtswv lub sab nyam, tug ntawd yuav paub has tas tej lug kws kuv qha nuav yog Vaajtswv kuas kuv has lossis yog kuv has kuv xwb. 18Tug tuabneeg kws xaav kuas lwm tug qhuas nwg, nwg laam tau lawm has. Tabsis tug kws xaav ua kuas luas qhuas tug kws khaiv nwg lug, nwg yeej has lug tseeb xwb, nwg tsi has dlaag. 19Puas yog Mauxes qha Vaajtswv txuj Kevcai rua mej? Tabsis mej tsi muaj ib tug coj lawv le txuj Kevcai ntawd le. Ua le caag mej tseem yuav muab kuv tua povtseg hab?”
20Suavdlawg teb has tas, “Koj raug dlaab vwm lawm! Leejtwg yuav muab koj tua povtseg nua?”
21Yexus teb has tas, “Kuv ua txujci tseemceeb ib zag xwb, mej tub xaav tsi thoob le. 22Mauxes kuas mej muab mej tej mivnyuas ua kevcai txav hab mej tub muab ib tug mivnyuas tub ua kevcai txav nub Xanpataus (Mauxes tsi yog tug qha kuas mej ua kevcai txav, tabsis yog mej cov yawmkoob qha mej ua).#Lek 12.3; Chk 17.10 23Yog mej tub muab ib tug mivnyuas tub ua kevcai txav nub Xanpataus kuas mej tsi xob ua txhum Mauxes txuj Kevcai, ua caag kuv khu ib tug txivneej zoo mob nub Xanpataus mej tseem yuav npautawg rua kuv hab?”#Yhs 5.9 24Tsi xob txav txim lawv le mej qhovmuag pum xwb, tabsis yuavtsum txav txim lawv le txujkev ncaaj nceeg.
Yexus Puas Yog tug Mexiyas?
25Cov tuabneeg kws nyob huv lub nroog Yeluxalees muaj qee leej has tas, “Tug txivneej nuav tsi yog tug kws cov numtswv nrhav yuav muab tua povtseg los? 26Mej saib! Nwg taabmeeg qha suavdlawg, tabsis tsi muaj leejtwg muaj cuabkaav has dlaabtsi rua nwg le! Ntshai puab paub has tas nwg yog tug Mexiyas tag! 27Tabsis thaus tug Mexiyas lug, tsi muaj leejtwg paub has tas nwg lug qhov twg lug, tabsis peb puavleej paub has tas tug txivneej nuav lug qhov twg lug.”
28Thaus Yexus taabtom qha huv lub Tuamtsev, Yexus has nrov nrov rua suavdlawg tas, “Mej yeej paub has tas kuv lug qhov twg lug lawm tag los? Tsi yog kuv laam lug kuv. Tabsis tug kws khaiv kuv lug, nwg yog tug ncaaj nceeg. Mej tsi paub nwg, 29tabsis kuv paub nwg, rua qhov kuv lug ntawm nwg lug, hab nwg yog tug khaiv kuv lug.”
30Puab txawm yuav nteg Yexus, tabsis tsi muaj leejtwg nqeg teg nteg nwg le, rua qhov tsi tau txug nwg lub sijhawm. 31Tabsis cov tuabneeg coob coob ntawd muaj ntau leej ntseeg Yexus, hab puab has tas, “Thaus tug Mexiyas lug, nwg tseem yuav ua tau ntau yaam txujci tseemceeb dlua tug txivneej nuav ua hab los?”
Cov Tubrog Kws Moog Nteg Yexus
32Thaus cov Falixais nov cov tuabneeg coob coob ntawd sis caav zum zawg txug Yexus, ces cov Falixais hab cov thawj ntawm cov povthawj txawm khaiv ib co tubrog moog nteg Yexus. 33Yexus has tas, “Kuv yuav tsi nrug mej nyob ntev lawm, kuv yuav rov moog cuag tug kws khaiv kuv lug. 34Mej yuav nrhav kuv, tabsis mej yuav nrhav tsi tau kuv, rua qhov qhov chaw kws kuv yuav moog ntawd, mej moog tsi tau.”
35Cov Yudais tej numtswv sis nug zum zawg has tas, “Nwg yuav moog qhov twg kuas peb nrhav tsi tau nwg nua? Ntshai nwg yuav moog rua peg cov tuabneeg Kilis tej nroog kws peb cov tuabneeg nyob, hab qha cov tuabneeg Kilis los? 36Nwg has tas peb yuav nrhav nwg, tabsis peb yuav nrhav tsi tau nwg, hab qhov kws nwg yuav moog ntawd, peb moog tsi tau. Nwg has le ntawd, yog nwg has le caag?”
Tug Dlej Kws Cawm Tuabneeg Txujsa
37Nub ua kevcai xaus yog nub tseemceeb kawg nkaus, Yexus sawv ntsug has nrov nrov rua suavdlawg has tas, “Tug kws nqhes dlej ca le lug cuag kuv, kuv yuav muab dlej rua nwg haus, #Lek 23.36 38lawv le Vaajtswv Txujlug has tas, ‘Yog leejtwg ntseeg kuv, tug dlej kws cawm tuabneeg txujsa yuav txhawv huv tug ntawd lub sab lug.’ ”#7.38 Yexus cov lug kws nyob huv nqai 37-38 yog has tas, “Yog leejtwg nqhes dlej ca le lug cuag kuv, hab leejtwg ntseeg kuv, nwg yuav tau cov dlej ntawd haus.”#Exk 47.1; Xak 14.8 39Yexus has le nuav, yog has txug Vaaj Ntsujplig, yog leejtwg ntseeg Yexus, tug ntawd yuav tau txais. Thaus lub sijhawm ntawd Vaajtswv tseem tsi tau khaiv Vaaj Ntsujplig lug, rua qhov Vaajtswv tseem tsi tau tsaa Yexus ua tug muaj tshwjchim ci ntsaa ab.
Cov Tuabneeg tsi sis Hum
40Thaus cov tuabneeg coob coob ntawd nov Yexus has le ntawd, muaj qee leej has tas, “Tug txivneej nuav yog tug cev Vaajtswv#7.40 tug cev Vaajtswv lug: saib 1.21. lug tag!”
41Muaj qee leej has tas, “Nwg yog tug Mexiyas ntaag!”
Tabsis muaj qee leej has tas, “Tug Mexiyas yuav tsi tuaj peg Kalilais tuaj ib zag le. 42Vaajtswv Txujlug has tas, tug Mexiyas yuav yog Daviv ib tug xeebntxwv, hab nwg yuav lug yug huv lub nroog Npelehees kws thaus u Daviv nyob.”#2 Xam 7.21; Mik 5.2 43Yog le ntawd, cov pejxeem txhaj tsi sis hum, vim qhov kws puab sis caav has txug Yexus ntawd. 44Muaj qee leej xaav nteg Yexus, tabsis tsi muaj leejtwg kaam nqeg teg nteg le.
Cov Yudais tej Numtswv tsi Ntseeg Yexus
45Thaus cov tubrog rov lug txug, cov thawj ntawm cov povthawj hab cov Falixais nug puab has tas, “Ua le caag mej tsi coj Yexus lug?”
46Cov tubrog teb has tas, “Yeej tsi muaj ib tug txawj has le tug txivneej nuav has le!”
47Cov Falixais nug has tas, “Tsi yog nwg ntxag tau mej lawm hab los? 48Mej yeej ibtxwm tsi tau nov has tas cov numtswv lossis cov Falixais ib tug ntseeg tug ntawd le los sav? 49Cov tuabneeg coob coob kws tsi paub Mauxes txuj Kevcai ntawd, Vaajtswv tub foom tsi zoo rua puab lawm!”
50Cov Falixais ntawd muaj ib tug yog Nikaudemaus, nwg yog tug kws tub moog nrug Yexus thaam ib zag lawm. Nwg has rua puab tas, #Yhs 3.1-2 51“Lawv le peb txuj Kevcai, peb txav txim tsi tau rua ib tug twg ua ntej kws peb tsi tau nov nwg peev lug hab taug nwg zaaj.”
52Puab teb has tas, “Tsi yog koj tuaj peg Kalilais tuaj hab los? Koj ca le nyeem Vaajtswv txujlug, koj txhaj yuav paub has tas yeej tsi muaj ib tug cev Vaajtswv lug tuaj#7.52 Tsi muaj ib tug cev Vaatjswv lug tuaj; tej phoo qub has tas tug cev Vaajtswv lug yuav tuaj. peg Kalilais tuaj le.”
Tug Quaspuj Kws Ntxag Hluas Nraug
53[Ces puab nyag txawm rov moog nyag tsev lawm,
अहिले सेलेक्ट गरिएको:
Yauhaas 7: HNJ2000
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2000 United Bible Societies. All rights reserved.
