Yauhaas 15
15
Yexus Yog Tsob Tseem Txiv Maab
1“Kuv yog tsob tseem txiv maab, hab kuv Txiv yog tug kws tu. 2Nwg muab txhua ceg maab kws tsi txi txiv txav tawm ntawm kuv moog povtseg. Txhua ceg maab kws txi txiv nwg muab taav kuas hajyam txi txiv ncw. 3Tej lug kws kuv qha mej, tub yog kuv ntxuav kuas mej huv ntaag. 4Mej ca le txuas rua ntawm kuv hab kuv yuav txuas rua ntawm mej. Tug ceg maab kws tsi txuas rua ntawm txuj maab yeej txi tsi taug txiv. Ib yaam le ntawd, yog mej tsi txuas rua ntawm kuv, mej yeej txi tsi taug txiv.
5“Kuv yog tsob maab, mej yog cov ceg. Tug kws txuas rua ntawm kuv hab kuv txuas rua ntawm nwg, tug ntawd yuav txi txiv ncw; yog mej tsi txuas rua ntawm kuv, mej yeej ua tsi tau ib yaam dlaabtsi le. 6Tug kws tsi txuas rua ntawm kuv, tug ntawd zoo ib yaam le tug ceg maab kws luas muab txav povtseg; thaus qhuav lawm, luas yuav muab sua moog pov hlawv kuas kub nyab taag huv tuabsi. 7Yog mej txuas rua ntawm kuv hab mej khaws kuv tej lug ca rua nruab sab lawm, mej xaav yuav yaam twg, mej ca le thov mej yuav tau yaam ntawd. 8Yog mej txi txiv ncw, kuv Txiv yuav tau ntsejmuag, hab yog mej ua le ntawd, mej yuav tau ua kuv cov thwjtim. 9Kuv hlub mej ib yaam le kuv Txiv hlub kuv; mej yuavtsum muaj lub sab hlub ib yaam le kuv. 10Yog mej ua lawv le kuv tej lug, mej yuav muaj lub sab hlub ib yaam le kuv ua lawv le kuv Txiv tej lug hab kuv muaj lub sab hlub ib yaam le nwg.
11“Kuv has tej nuav rua mej kuas mej zoo sab ib yaam le kuv zoo sab, mej yuav zoo sab kawg nkaus le. 12Kuv lu lug saamfwm yog le nuav: mej ib leeg yuavtsum hlub ib leeg, ib yaam le kuv hlub mej.#Yhs 13.34; 15.17; 1 Yhs 3.23; 2 Yhs 5 13Tug kws muaj kev hlub luj tshaaj plawg, yog tug kws zoo sab tuag theej nwg cov phoojywg. 14Yog mej ua lawv le kuv has, mej txhaj yog kuv cov phoojywg. 15Nwgnuav kuv tsi hu mej ua tubkhai lawm, rua qhov tug tubkhai tsi paub sov nwg tug tswv ua dlaabtsi. Tabsis kuv hu mej ua phoojywg, rua qhov kuv tub qha txhua yaam kws kuv Txiv qha rua kuv rua mej lawm. 16Tsi yog mej xaiv kuv, tabsis yog kuv xaiv mej hab tsaa mej kuas moog txi cov txiv kws nyob moog ibtxhis. Yog mej tuav kuv lub npe thov yaam twg, leej Txiv yuav pub yaam ntawd rua mej. 17Tej lug kws kuv saamfwm rua mej yog le nuav: mej ib leeg yuavtsum hlub ib leeg.
Tuabneeg Nplajteb Yuav Ntxub Mej
18“Yog tuabneeg nplajteb ntxub mej, mej yuavtsum ncu ntsoov has tas, puab tub xub ntxub kuv ua ntej lawm. 19Yog mej nyam ua lawv le tuabneeg nplajteb ua, ces tuabneeg nplajteb yuav hlub mej. Tabsis mej tsi nyam ua lawv tuabneeg nplajteb ua, rua qhov kuv tub xaiv mej tawm huv nplajteb nuav lawm; yog le ntawd tuabneeg nplajteb txhaj le ntxub mej. 20Mej yuavtsum ncu ntsoov tej lug kws kuv qha rua mej has tas, ‘Tug tubqhe yeej tsi muaj fwjchim luj dlua nwg tug tswv.’ Yog puab tsimtxom kuv, puab yuav tsimtxom mej hab; yog puab ua lawv le kuv tej lug qha, puab yuav ua lawv le mej tej lug qha hab.#Mat 10.24; Luk 6.40; Yhs 13.16 21Puab yuav ua tej nuav rua mej, vim mej yog kuv le, rua qhov puab tsi paub tug kws khaiv kuv lug. 22Yog kuv tsi tau lug qha puab, puab yeej yuav tsi muaj txim; tabsis nwgnuav puab has tsi tau has tas puab tsi muaj txim. 23Tug kws ntxub kuv, tug ntawd yeej ntxub kuv Txiv hab. 24Yog kuv tsi tau lug ua tej num kws tsi tau muaj tuabneeg ua dlua rua puab pum, ces puab yeej tsi muaj txim; tabsis puab tub pum tej kws kuv ua lawm, puab txhaj ntxub kuv hab kuv Txiv. 25Yeej yuav muaj le nuav txhaj lawv le tej lug kws sau tseg rua huv puab txuj kevcai has tas, ‘Kuv tub tsi tau ua txhum los puab ca le ntxub kuv.’ #Pnk 35.19; 69.4
26“Tug Paab yog Vaaj Ntsujplig, nwg lug qha Vaajtswv zaaj kws yog qhov tseeb hab yog leej Txiv khaiv lug. Kuv yuav kuas leej Txiv khaiv nwg lug, hab nwg yuav qha kuv zaaj rua mej. 27Hab mej yuav qha kuv zaaj, rua qhov mej yeej nrug kuv nyob thaus chivthawj lug lawm.
अहिले सेलेक्ट गरिएको:
Yauhaas 15: HNJ2000
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2000 United Bible Societies. All rights reserved.
