न्यायकर्ता 3
3
इस्राएलीहरूको जाँचको निम्ति राखिएका अन्यजातिहरू
1यसरी कनान देशमा लडाइँमा भाग नलिने इस्राएलीहरूको जाँच गर्नलाई परमप्रभुले केही अन्यजातिहरूलाई देशमा राख्नुभयो। 2इस्राएलका प्रत्येक पुस्तालाई, विशेष जसले लडाइँ गर्दैगरेका थिएनन्, तिनीहरूलाई लडाइँ के हो, सिकाउनलाई परमप्रभुले यसो गर्नुभएको थियो। 3पाँच सहरमा बास गर्ने पलिश्तीहरू र लेबनान पहाडमा बाल-हेर्मोन डाँडादेखि लेबो-हमात घाटीसम्म बास गर्ने कनानी, सीदोनी र हिव्वीहरू यसरी देशमा छोडिएका अन्यजातिहरू थिए। 4इस्राएलीहरूको जाँचको निम्ति र तिनीहरूले तिनका पिता-पुर्खाहरूलाई परमप्रभुले आगोद्वारा दिनुभएको आज्ञापालन गर्छन् कि गर्दैनन्, सो जाँच्नलाई ती अन्यजातिहरू राखिएका थिए। 5यसरी कनानी, हित्ती, एमोरी, परिज्जी, हिव्वी र यबूसीहरूका बीचमा इस्राएलीहरू बास गर्न लागे। 6तिनीहरूले आपसमा बिहेबारी गरे र अन्यजातिहरूका देवताहरूको पूजा गर्न थाले।
ओत्निएल
7आफ्ना परमप्रभु परमेश्वरलाई इस्राएलीहरूले बिर्से। तिनीहरूले परमेश्वरका विरुद्धमा पाप गरे अनि बाल-देवता र अशेरा-देवीका मूर्तिहरूलाई पुज्न लागे। 8यसकारण परमप्रभु इस्राएलीहरूसँग रिसाउनुभयो र तिनीहरूलाई अराम-नाहारैमका राजा कूशन-रिशातैमको वशमा पारिदिनुभयो र आठ वर्षसम्म तिनको वशमा इस्राएलीहरू रहे। 9तब इस्राएलीहरूले परमप्रभुलाई पुकारे। उहाँले तिनीहरूलाई छुटकारा दिनलाई एक जना व्यक्ति पठाइदिनुभयो। कालेबका भाइ कनजको छोरा ओत्निएल ती व्यक्ति थिए। 10परमप्रभुको आत्मा उनीमाथि उत्रेर आउनुभयो र उनी इस्राएलका अगुवा भए। उनी युद्ध गर्न गए अनि परमप्रभुले उनलाई आराम-नहारैमका राजामाथि विजय दिनुभयो। 11त्यसपछि चालीस वर्षसम्म देशमा शान्ति रह्यो। तब ओत्निएलको मृत्यु भयो।
एहूद
12इस्राएलका मानिसहरूले फेरि परमप्रभुका विरुद्ध पाप गरे। यसकारण परमप्रभुले मोआबका राजा एग्लोनलाई इस्राएलभन्दा बलियो तुल्याउनुभयो। 13एग्लोनले अम्मोनी र अमालेकीहरूसँग मेल गर्यो र तिनीहरूले मिलेर इस्राएलीहरूलाई हराए र खजूरका रूखका सहर यरीहोलाई आफ्ना कब्जामा पारे। 14अठार वर्षसम्म इस्राएलीहरू एग्लोनका अधीनमा रहे।
15तब इस्राएलीहरूले परमप्रभुलाई पुकारे अनि तिनीहरूलाई छुटाउनलाई उहाँले एक जना व्यक्ति पठाइदिनुभयो। ती व्यक्ति बेन्यामीन कुलका गेराको छोरा एहूद थिए। एहूदले देब्रे हात चलाउँथे। इस्राएलीहरूले उनलाई कोसेली लिएर मोआबका राजा एग्लोनकहाँ पठाए। 16एहूदले आफ्ना निम्ति एक हात लामो एउटा तरवार बनाएका थिए। उनले त्यो तरवार दाहिनेपट्टि आफूले लाएको लुगामुनि बाँधेर भिरेका थिए। 17एग्लोनलाई उनले कोसेली टक्र्याए। एग्लोन साह्रै मोटा थिए। 18कोसेली टक्र्याएपछि ती बोकी आउने मानिसहरूलाई एहूदले घर फर्काइदिए। 19तर आफैंचाहिँ गिलगालछेउ, मूर्ति भएका ठाउँदेखि फर्केर एग्लोनकहाँ गएर भने, “महाराज, तपाईंलाई गुप्तमा मेरो केही कुरा भन्नु छ।” राजाले चाकरहरूलाई बाहिर जान आज्ञा दिए र तिनीहरू बाहिर निस्के।
20तब राजा एक्लै महलको छानाको शीतल-कोठामा बसेका बेलामा एहूदले छेउमा गएर भने, “तपाईंलाई परमेश्वरबाट एउटा खबर छ।” त्यो सुनेर राजा उभिए। 21एहूदले देब्रे हातले दाहिनेतिरबाट तरवार झिकेर राजाको पेटमा रोपिदिए। 22बिँडसमेत पूरा तरवार पेटभित्र पस्यो र बोसोमा पुरियो। तरवार वारपार भएर राजाको पछिल्लोपट्टि निस्क्यो र त्यो ननिकाली एहूदले त्यत्तिकै छोडिदिए। 23उनी बाहिर निस्के, ढोकाहरू बन्द गरे र ताल्चा लगाइदिए 24र त्यहाँबाट हिंडे। राजाका चाकरहरू आए र ढोकाहरू ताल्चा लाएका र बन्द देखेर राजा भित्रै दिसा गर्न बसेका होलान् भन्ठाने। 25धेरै बेर पर्खेपछि पनि जब राजा ढोका खोलेर बाहिर निस्केनन्, तिनीहरूले साँचो लिएर ढोका खोले। तिनीहरूले आफ्नो मालिकलाई भूइँमा मरेर लडिरहेको भेट्टाए।
26तिनीहरूले पर्खिरहेका बेलामा एहूद भागिसकेका थिए। उनी मूर्तिहरूको छेउ भएर सीरा भन्ने ठाउँमा भागेर गए। 27त्यहाँ एफ्राइमको पहाडमा पुगेपछि इस्राएलीहरूलाई लडाइँ गर्न उनले तुरही फुकेर बोलाए। तिनीहरूका अघि-अघि उनी पहाडदेखि ओह्रालो झरे। 28उनले तिनीहरूलाई भने, “मेरो पछि आओ। परमप्रभुले तिमीहरूलाई आफ्ना शत्रु मोआबमाथि विजय दिनुभएको छ।” तिनीहरू एहूदको पछिपछि लागे र मोआबीहरूले यर्दन नदी पार गर्न लागेका ठाउँ आफ्ना हात पारे। तिनीहरूले कुनै पनि मोआबीलाई नदी पार गर्न दिएनन्। 29त्यो दिन तिनीहरूले प्राय: सबैभन्दा शूरवीर दश हजार मोआबी सैनिकहरूलाई मारे। कोही पनि उम्कन पाएनन्। 30त्यो दिन इस्राएलीहरूले मोआबीहरूलाई हराएपछि देशमा असी वर्षसम्म शान्ति कायम रह्यो।
शमगर
31त्यसपछि अनातका छोरा शमगर अगुवा भए। गोरु धपाउने लौरोले छ सय पलिश्तीहरूलाई मारेर उनले इस्राएलीहरूलाई बचाए।
अहिले सेलेक्ट गरिएको:
न्यायकर्ता 3: सरल नेपाली
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Simple Nepali Holy Bible © Nepal Bible Society, 2008.