एज्रा 6:13-22

त्‍यसपछि बडा-हाकिम तत्तनै, शत्तर-बोज्‍नै र उनका सहकर्मीहरूले राजाका आज्ञाअनुसार ठीक-ठीक काम गरे। यहूदी अगुवाहरूले अगमवक्ता हाग्‍गै र जकरियाबाट उत्‍साह पाई मन्‍दिर बनाउने काम राम्ररी अघि बढाए। इस्राएलका परमेश्‍वर र फारसका महाराजाहरू कोरेस, दारा र अर्तासास्‍तका आज्ञाअनुसार तिनीहरूले मन्‍दिर बनाइसिध्‍याए। महाराजा दाराका शासनकालको छैटौँ वर्ष अदार महिनाको तेस्रो दिन तिनीहरूले मन्‍दिर बनाइसके। त्‍यसपछि इस्राएलका मानिसहरूले पूजाहारीहरू, लेवीहरू र कैदबाट फर्किआएका अरू सबैले आनन्‍दसाथ मन्‍दिर अर्पण गरे। अर्पण गर्दा तिनीहरूले एक सय साँढे, दुई सय भेडा र चार सय थुमाहरू होमबलि गरे अनि इस्राएलको प्रत्‍येक कुलको निम्‍ति एउटाका हिसाबले बाह्र वटा बोका पापबलि चढाए। तिनीहरूले यरूशलेम मन्‍दिरमा सेवा गर्नलाई मोशाको पुस्‍तकमा भएका आदेशअनुसार पूजाहारी र लेवीहरूले काम गर्ने नियम र बन्‍दोबस्‍त गरिदिए। त्‍यसपछिको वर्ष पहिलो महिनाको चौधौँ दिनमा कैदबाट फर्किआएका मानिसहरूले निस्‍तार-चाड मनाए। सबै पूजाहारीहरू र लेवीहरूले आफैंलाई चोख्‍याएका थिए र विधिअनुसार शुद्ध भएका थिए। लेवीहरूले फर्किआएका सबै मानिसहरू, पूजाहारीहरू र आफ्‍नै निम्‍ति निस्‍तार-चाडका पशुहरू मारे। कैदबाट फर्किआएका सबै इस्राएलीहरू र परमप्रभु इस्राएलका परमेश्‍वरलाई पुज्‍न आउने त्‍यस देशमा बास गरिबसेका अरू मूर्तिपूजकहरू, जसले आफ्‍नो रीतिथिति छोडेका थिए, तिनीहरू सबैले बलि चढाएका पशुका मासु खाए। सात दिनसम्‍म तिनीहरूले आनन्‍दसाथ अखमिरी रोटीको चाड मनाए। तिनीहरू आनन्‍दले भरिएका थिए किनभने अश्‍शूरका महाराजालाई तिनीहरूप्रति कृपालु बनाउनुभएको थियो र तिनले इस्राएलका परमेश्‍वरको मन्‍दिर बनाउन तिनीहरूलाई सहारा दिएका थिए।