आमोस 5:18-27

हाय! हाय तिमीहरू, जो परमप्रभुको दिन पर्खिरहन्‍छौ। त्‍यस दिनमा तिमीहरूलाई के लाभ हुन्‍छ? तिमीहरूको लागि त्‍यो दिन अँध्‍यारो हुनेछ, उज्‍यालो होइन। त्‍यो दिन त कुनै मानिस सिंहबाट भाग्‍दा भालुको मुखमा परेको जस्‍तो पो हुनेछ। अथवा कुनै मानिस घर आएर भित्तामा हात राख्‍दा साँपले डसेको जस्‍तो हुनेछ! परमप्रभुको दिन उज्‍यालो होइन, अँध्‍यारो हुनेछ। त्‍यो त पटक्‍कै घाम नलागेको उराठलाग्‍दो दिन हुनेछ। परमप्रभु भन्‍नुहुन्‍छ, “म तिमीहरूका धार्मिक चाड-बाडलाई घृणा गर्दछु। म ती हेर्नै सक्‍दिनँ। तिमीहरूले मलाई होमबलि र अन्‍नबलि चढाउँदा म ती ग्रहण गर्नेछैनँ। तिमीहरूले मलाई बलि चढाउन ल्‍याएका पोसेर मोटाएका पशुहरू म ग्रहण गर्नेछैनँ। गीत गाएर हल्‍ला गर्न बन्‍द गर। म तिम्रो वीणाको सोर सुन्‍न चाहन्‍नँ। बरु त्‍यसको सट्टा न्‍याय खोलाझैँ र धार्मिकता कहिल्यै नसुक्‍ने नदीझैँ बगून्। “हे इस्राएलका मानिसहरू हो, मैले तिमीहरूलाई चालीस वर्ष उजाड-भूमिबाट डोर्‍याएर ल्‍याउँदा के तिमीहरूले बलिदान र भेटी चढायौ? तर अब तिमीहरूले पुजेका मूर्तिहरू अर्थात् तिमीहरूका राज-देव सिक्‍कूत र तिमीहरूका तारा-देव कीयूनलाई उठाएर तिमीहरू हिँड्‍नुपर्नेछ। यसकारण म तिमीहरूलाई दमस्‍कसभन्दा पनि टाढा देशमा बन्‍दी बनाएर लैजानेछु।” यसरी परमप्रभु भन्‍नुहुन्‍छ, जसको नाम सर्वशक्तिमान् परमेश्‍वर हो।