१ शमूएल 17:45-51

दाऊदले उत्तर दिए, “तँ मेरो विरुद्धमा तरवार, भाला र बर्छा लिएर आउँदै छस्; तर म तेरो विरुद्धमा सर्वशक्तिमान् परमप्रभु इस्राएली सेनाका परमेश्‍वरको नाममा आउँदै छु, जसलाई तैँले तुच्‍छ ठानेको छस्। आज नै परमप्रभुले तँलाई मेरो अधीनमा दिनुहुनेछ। म तँलाई जितेर तेरो टाउको ठुन्‍क्याउनेछु र पलिश्‍ती सिपाहीहरूका लाश पशु-पंक्षीहरूलाई खान दिनेछु। तब सारा संसारले थाहा पाउनेछ कि इस्राएलसित परमेश्‍वर हुनुहुन्‍छ र यहाँ भएका सबैले देख्‍नेछन् कि आफ्‍ना प्रजालाई बचाउन परमप्रभुलाई तरवार र भालाको जरुरत पर्दैन। उहाँ लडाइँमा विजयी हुनुहुन्‍छ र तिमीहरू सबैलाई हाम्रा अधिकारमा दिनुहुनेछ।” गोल्यत फेरि दाऊदतिर बढ्यो र त्‍योसँग लड्‍ने विचारले दाऊद झटपट गरी पलिश्‍तीहरूले लडाइँको निम्‍ति बाँधेको पङ्क्तितिर दगुरे। तिनले आफ्‍नो थैलीमा हात हालेर एउटा ढुङ्गा निकाले र गोल्यतलाई घुँयेत्रोले हाने। ढुङ्गा त्‍यसको निधारमा गाडियो र खप्‍पर फोरिदियो। गोल्यत भूइँमा घोप्‍टिएर ढल्‍यो। यसरी दाऊद आफ्‍नो घुँयेत्रो र ढुङ्गाले विजयी भए। तरवारबिना तिनले गोल्यतलाई हानेर मारे। तिनी त्‍योतिर दगुरिगए र त्‍यसमाथि उभिए र गोल्यतको तरवार म्‍यानबाट झिकी त्‍यसैले त्‍यसको टाउको ठुन्‍क्‍याएर त्‍यसको प्राण लिए। पलिश्‍तीहरूले आफ्‍नो वीर योद्धा मरेको देखेर भागे।