Joannostir 7
7
Džeļ, 7.
1Pašļi dava Iisusos gija pire Galilejakīri phu; pire Judengīri phu nakamdža džal, vašo dova so Judi rodīne domāren Les.
2Judengo svenkos isi paše: opre kēriben kuščei.
3Togi pšala Leskīre phendle Leske: vidža darig te dža ane Judengīri phu, sobi sikļaibnangīre Tīre dikhen buča, saje Tu kēresa.
4Hai nikon nakērla biļiso čorahanes, te rodela kokoro jāl džindlo. Keļi Tu kēresa dasaj buča, togi sikav Tut svetoske.
5Hai pšala nin Leskīre napačandīne an Leske.
6Pe dava Iisusos phendža lenge: Mīri brīža oščo najavdža; ne vaš trunegne isi sajek brīža.
7Tumen svetos našti naiedikhel, ne Man naiedikhela; vašo dova so Me švatkinava lestir, so buča leskīre hinde.
8Tume džan pe da svenkos; ne Me oščo nadžava pe da svenkos; vašo dova so Mīri brīža oščo navijavdžapes.
9Dava pheni lenge, jača ane Galileja.
10Ne kedi javdle pšala Leskīre, togi Jov nin javdža po svenkos, na jake sir dikhen, ne sir čorahanes.
11Judi rodīne Les po svenkos te rakirdle: kai Jov?
12Te būt rakirbena isis vaš Leske maškir mānušenge; saje rakirdle, so Jov lačo; ne vāvir rakirdle: na, Jov dohohavela mānušen.
13Ne šmales nikon narakirdža agilo jakha, strahandoi Judendir.
14Ne uže ano pāš svenkos Iisusos zagija ane khangīri, te sikļakirdža.
15Te dživindepen Judi, rakirindoi: sir Jov džinel čhinibena, na sikļakirindopes?
16Iisusos, otphenindoi lenge, phendža: Mīro sikļakirben — nāni Mīro, ne doleskīro Sav Man bičadža.
17Kon kamela kērel voļa Leskīri, dova dodžinela da sikļakirbnastir, Davlestir jov, vai Me Kokoro Mandir rakirava.
18Rakirbnaskīro kokoro pestir rodela slava peske; ne Kon rodela slava Bičaibnaskīreske Les, Dova isi lašņo, te nāni načačipen an Leske.
19Hobi nadija Moisejos tumenge dophenibena? te nikon tumendir po dopheniben nakērla. Vasoske rodena domāren Man?
20Mānuša phendle ano otpheniben: nāni feņu beng an Tuke? kon rodela domārel Tut?
21Iisusos, rakīben rikirindoi, duredīr phendža lenge: jek kēriben kērdžom Me, te tume sāre dživinenatumen.
22Moisejos dija tumenge občhiniben (jov nāni Moisejostir, ne, dīno dādendir); te ano kurko Tume občhinena mānušes.
23Keļi ano kurko mānuš dolela občhiniben, sobi najāl obšeļipume Moisejosko dopheniben: pe Mange hobi tume nahoļinena vašo dova, so Me sāre mānušes visačkirdžom ano kurko?
24Nasendinen avratunestir, ne sendinen čačune sendosa.
25Doi saje Ijerusaļimakirendir rakirdle: nāni Dava, feņu Dova, Sajes rodena domāren?
26Dik, Jov rakirla angilo jakha, te niso naphenena Leske: nadojavdle feņu anglatune, so Jov lašņes Hristos?
27Ne me džinas Les, kārig Jov; kedi Hristos javela, nikon nadžinela, kārig Jov.
28Iisusos dija goli ane khangīri, sikļakirindoi te rakirindoi: džinen Man, te džinen, kārig Me; te Me javdžom na Kokoro Mandir, ne lašņo Dova Kon Man bičadža, Sajes tume nadžinen.
29Me džinav Les, vašo dova so Me Lestir, te Jov bičadža Man.
30Te rodīne Les den capla; ne nikon načhudža pe Leske vasta, vašo dova so oščo najavdža Leskīri štunda.
31Būt mānušendir pačandīne an Leske, te rakirdle: kedi javela Hristos, hobi butir dživitka znaki kērla, būt Dava kērdža?
32Šundle fariseji dasaje rakirbena Lestir maškir mānušenge, te fariseji te rašange bāredīra bičadle slugen meden caplam Les.
33Iisusos phendža lenge: oščo na hāra jāvav Mange tumensa, togi džava ke Dova Kon. Man bičadža.
34Tume Man rodena, te nalathena; te kai Me jāvava, doi tume naštuvena jāven.
35Ke dava Judi rakirde maškir penge: kai Jov kamela džal, jake šo me Les nalathasa? nakamela feņu Jov džal ke dola, saje isi rozthurdīne maškir Grieķenge te sikļakirel Grieķen?
36So značinena da lava, saje Jov phendža: tume Man rodena, te nalathena; te kai Me java, doi tume naštuvena javen?
37Te an do statno bāro svenkosko dīves Iisusos tardija, te goli dija, rakirindoi: koneske fardes kamelapes pjel, jov ke Me te pi.
38Kon pačala an Mange, doleske, jake isi phendlo ano čhinibena, masendir thadena reki paņinga džīde (Iisaija 12, 3. Ioiļ 3, 18).
39Dava Jov phendža do Duhostir, Savo lenge jāla dolenge saje pačana an Leske: hai oščo pe lenge naisis Svencono Duhos, vašo dova so Iisusos oščo naisis obšvatlume.
40Būt mānušendir, saje šundle da lava, rakirde: Jov čačo prorokos.
41Vār rakirde: dava Hristos. Ne vār rakirde: hobi Galilejatir jāvela Hristos?
42Hobi nāni phendlo ano čhinibena, so Hristos javela Dāvidoskīre koroņostir, te Vifļijematir, do štetostir, kārig isis Dāvidos?
43Te jake hadijapes gola vaš Leske maškīr mānušenge.
44Vār lendir kamdle den capla Les; ne nikon pe Leske vasta načhudža.
45Te jake slugi rišine pālē ko rašange bāredīra te ko fariseji, te dala phendle lenge: vasoske tume najandle Les?
46Slugi otphendle: ņigdi mānuš narakirdža jake, sir da mānuš.
47Fariseji phendle lenge: hobi te tume nin isan pšelīne Lestir?
48Hobi pačandīne an Leske kon bāredīrendir te farisejendir.
49Ne da mānuša kon dopheniben nadžinen, jone isi kērde armaņi.
50Nikodīmos, kon rati javdža ke Jov, jek jedženo lendir, phenela lenge:
51Sendini hobi māro dopheniben mānušes, keli vāgo navišunena les te nauzdžinena, so jov kērla?
52Pe dava phendle leske: te i tu nasan feņu Gaļilejatir? rozdik, togi dikhesa, so Galilejatir najāvēla prorokos.
53Te rozgīne sāre khēre.
अहिले सेलेक्ट गरिएको:
Joannostir 7: LET1933
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© British and Foreign Bible Society 1933, 2016
