Joannostir 12
12
Džeļ, 12.
1Šov dīvesenge angil Patradžin javdža Iisusos ane Vifaņija, kai isis Lazaros, mēno, sajes Jov džangadža opre mūlendir.
2Doi gotovidle Leske beļveļakīro, te Marfa angil lenge saro so kērdža, te Lazaros isis jek dolendir kon Lesa ko skamin bešča.
3Marija, lel hadipen fardes kuč čista nardakīre miri, maksa Iisuskīre pīre, te khošča peskīre balensa Leskīre pīre; te khēr pherdandija lače khaņasa mirendir.
4Togi jek Leskīre sikļaibnangīrendir, Jūda Simonosko čhāvo Iskariotos, savo kamdža Les pšedel, phendža:
5Te soske nabiknen da mīri vašo trin šel dinarije te narozden bogenge?
6Phendža jov dava na vašo dova, sobi rikirelpes vaše bogenge, ne vašo dova so isis čhor. Leske isis te ke pe lovengīri tiknori te lidžalas so doi andre mukhenas.
7Iisusos phendža: den la pokoino; joi dava garudža po Mīro mohilkengo dīves.
8Hai bogi isi sajek tumensa, ne Me na sajek.
9Būt Judendir dolīne džinen, so Jov doi: te javdle na feņu vaše Iisuske, ne sobi dikhen Lazaros nin, sajes Jov džangadža opre mūlendir.
10Rašangīre bāredīra nokērdle Lazaros nin domāren;
11Vašodova so vaš leske būt Judendir javdle te pačandīne an Iisuske.
12An var dīves būt mānuša, saj javdle po svenki, dolīne šunen, so Iisusos javela ane Ijerusaļima,
13Līne palmake kašteskīre zari, vijavdle angil Leske, te dīne goli: Osianna! švenčume javibnaskīro ano Rasko lav, Kraļis Izraiļengīro!
14Iisusos, lača tarne oslos, bešča pe leske, sir isi čhindlo:
15Nastrahadžu, Sionnakīri čhai! da, Kraļis tīro javela, bešindoi pe tarne osloske (Zaharija 9, 9).
16Sikļaibnangīre Leskīre vago nahalīne dava; ne, kedi proslavindžapes Iisusos, togi lipirdle, so jake isis vaš Leske čhindlo, te dava kērdle Leske.
17Mānuša, sai isis vago Lesa, švatkindle, so Jov vidija goli grobostir Lazaros te džangadža les opre mūlendīr.
18Vašo dova gīne angil Leske mānuša; hai šundle, so Jov kērdža da dživos.
19Fariseji rakirdle maškir penge: dikhena tume, so tume našti niso? sāro svetos džala pal Leske,
20Javibnangīrendir po poklonuma saje javdle po svenkos isis saje Jeļini#12, 20 Grieķi..
21Jone gīne ko Fiļipos, savo isis Galileiskakīri Vifsaidatir, te mangle les, rakirindoi: Raija! menge kamelapes dikhas Iisusos.
22Filipos jāvela te phenela dolestir Andrejoske; te togi Andrejos te Filipos phenena dolestir Iisusoske.
23Iisusos phenela lenge otpheniben: jāvdža štunda teslavinelpes ane laska mānušeskīre Čhāveske.
24Lašņes, lašņes rakirava tumenge: keļi pšeņicako graudos, sav peija ane phu, namerla, togi jačela jedženo; ne keļi merla, togi janela būt bārino.
25Kon pesko džiben miļini zginakirla les; ne kon naiedikhela, an da svetos pesko džīben dova gāruvela les ano džīben bekoncoskīro.
26Kon Mange slugini, mejavel pal Mange: te kai Me, doi Mīro slugos jāla. Te kon Mange slugini, doles Mīro Dād rožini.
27Kana Mīro duhos isi nognečume; te so mange phenav? Dād! vile Man da štundatir! ne pe da štunda Me nin jāvdžom.
28Dād! proslavini lav Tīro. Togi jāvdža bolibnastir glos: te proslavidžom, te oščo proslavinava.
29Mānuša, tardindoi te šunindoi dova, rakirdle: dava grumos. Ne vār rakirdle: Iaņolos rakirdža Leske.
30Iisusos pe dava phendža: na vaš Mange isis da glos, ne vaš mānušenge.
31Kana isi da svetosko sendos; kana da svetosko kraļis jāla avri trādīno.
32Te kedi Me oprejāndlo javava phujatir, sāren tirdava ke Me.
33Dava rakirdža Jov, haļakirindoi, sai šmerčasa Jov merla.
34Mānuša otphendle Leske: me šundžam dophenibnastir, so Hristos jačela, sajek#12, 34 mužiges.: sir Tu rakiresa so čhebi, jāl opre jandlo mānušeskīre Čhāveske? kon dava mānušesko čhāvo?
35Togi Iisusos phendža lenge: oščo pe tikni brīža švatluma isi tumensa; džan, poskil isi švatluma, sobi naoblel tumen čemnuma: ne kon džāla ano čemnuma dova nadžinel, kai džala.
36Poskil švatluma isi tumensa, pačan anda švatluma, švatlumaske čhāve mejān tume. Kedi phendža dava, Iisusos otgija te garūdžapes lendir.
37Te jake būt džīvi kērdža Iov angil lenge; te jone napačandīne an Leske,
38Mejāl pšečkirdo prorokosko Isaijakīro lav: Raija! kon pačandija šunibnaske mendir? te koneske sikadžapes Raskīri moca? (Isaija 53, 1.)
39Wašodova naštandīne jone pačan, so oščo sir phendža Isaija.
40Da mānuša kērde pengīre jakha korore, te pengīre džija barune, jakhensa menadikhen, te džesa menahaļon, te naotrišona, sobi Me sačkirav len (Isaija 6, 10).
41Dava phendža Isaija, kedi dikša slava Leskīri te rakirdža Lestir.
42Ne nin anglatunengīrendir būt pačandīne an Leske; ne vaše farisejenge naisphendlepen, sobi najān otčhudle sinogogatir.
43Hai zakamdle miles slava mānušengīri būtir, nasir slava Davleskīri.
44Iisusos zadija goli te phendža: pačaibnaskīro an Mange na an Mange pačala, ne an Doleske Kon Man bičadža.
45Te kon Man dikhela dikhela Mīre Bičaibnaskīres.
46Me švatluma jāvdžom ano svetos, sobi svako pačaibnaskīro an Mange najačeļ ando čemnuma.
47Te keļi kon šunela Mīre lava te napačala, Me nasendina les; hai Me jāvdžom te nasendinav svetos, ne vilav svetos hindipnastir.
48Kon Man otčuvela te nadolela Mīre lava doleske isi sendipnaskīro: lav savo Me rakirdžom, jov les sendini ano statno dīves.
49Me rakirdžom na Mandir; ne Dād Sav Man bičadža, Jov Mange dophendža, so phenav te so rakirav.
50Te Me džināv, so dopheniben Leskīro isi džīben sajek. Te jake, so Me rakirava, rakirava sir phendža Mange Dād.
अहिले सेलेक्ट गरिएको:
Joannostir 12: LET1933
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© British and Foreign Bible Society 1933, 2016
