YAPHANG 7
7
Twi torma
1Subraiyung Noano hai hwnwi sa kha, “Nwng tei nini nokni borokrok rungtoro hap si di, tamni hwn ba ang o bosongrokni bisingo nono borok sói nuk kha. 2Nwng kwthar mal-matarokno jorsni na di, chwla tei bwrwi khe na di tei kwthar ya mal-matabo jorsa na di, chwla tei bwrwi khe na di. 3Tei jorsni tokrokno o ha saka-o kwthang narwkna bagwi chwla tei bwrwi khe narwk di. 4O salsnini bisingo’-no ang ha saka-o sal brwichi tei horbrwichi uatwi ua rwnai, o ha sakani ang snamma bebak langma gwnangrokno hu-ui pái sinai.” 5Noa Subraiyung dagima tẃi’-no bebakno khlai bai kha.
6Ha saka-o twi kotor sók phai phuru Noani umor nokha bisi dok-ra wng kha. 7#Mat 24.38-39; Luk 17.27.Noa bihik tei bwsajlasongno tei bini hamjwksongrokno tẃiwi twi kotorni yókna bagwi rungtoro hap lai kha. 8Kwthar mal-matarok tei kwthar yarok, tokrok tei ha saka-o malnai bebakno 9maknwi-maknwi chwla bwrwi khe Kaitor Noano dagima tẃi’-no rungtoro hap lai kha. 10Salsni ulo khe ha saka-o twi torsaui phai kha.
11 #
2Pi 3.6. Noani umor nokha bisi dok-ra phuru, talnwini talni tal chisnini salo khe, bebak kuthukni twimukrok pekhogwi nongkhor kha tei nokhani tailamrokbo kiyok kha. 12Ha saka-o sal brwichi horbrwichi uatwi ua kha. 13A salo’-no Noa tei bini bwsarok Sem, Ham, Japhet tei Noani bihik, bahamjwksong rungtoro habo, 14bórok mung thwgwi tongma mal-matarok tei bebak musuk-misiprok, bebak ha-o malnairok tei bebak tokrokbo 15bórok Noa bai baksa khe rungtoro hap bai kha, langma gwnangrok bebak’-no bojoro-bojoro khe hap kha. 16Kaitor bono dagima hai khe’-no bebak langma gwnangrokno chwla bwrwi khe hap kha, hakhe Subraiyung phatar tẃi khe dugar berebwi rw kha.
17Nokha sal brwichi jora twi torsa kha, twi kwbángma wng khe rungtor kuphungsa kha, abo ha bai kak kha. 18Twi belai khe thuk kha, hakhe twi saka-o rungtor kuphungsaui tong kha. 19Ha saka-o twi aswk khe torsa kha, nokha tolani bebak hathái kuchukrok lomsa bai kha. 20Hathái kuchukrok lom súgwi twi teibo mitar kaichi chuksa kha. 21Ha saka-o tongma bebak langma gwnangrok thwi bai kha, tokrok musuk-misiprok, mal-matarok, malnairok tei bebak borokrok thwi bai kha. 22Hakungo tongnai bebak langma gwnangrok thwi bai kha. 23Ha saka-o tongnai bebak langma gwnangrok, borokrok, mal-mata tei ha-o malnai tei toksa-toktẃirok páiwi tháng kha, bórok hani sokomorwi páijak kha. Noa tei bo bai baksa rungtoro tongnairok simi se tong rwk si-o. 24Ha saka-o nokha sal sara-bachi jora twi tong kha.
अहिले सेलेक्ट गरिएको:
YAPHANG 7: KOKBSI
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.