Luka 18
18
1Henyihaha belele lukindji kwabadi kwibalesha’shi: mbilombane bantu anka kuteka mafuku oso, kushī kuhungila. 2Eshi: Kubadi nsushi mu kibalo ki kampanda, shī badi atshinyi Efile Mukulu sunga nkunemeka muntu. 3Kubadi namu mukashi-a-mufwe mu kiakia kibalo; e bafikile kwadi’shi: Ngobwele kwi yawa muntu mwimane n’ami. 4N’e batune kihindji, anka kunyima bakwile munda mwe’shi: Sunga tantshinyi Efile Mukulu sunga kunemeka muntu; 5anka ha mwanda uno mukashi-a-mufwe ankalakasha, nankamuobwela, tala akampungisha’nyi, na kuyeya kwe. 6Biabia nfumwetu bakwile’shi: Hushai bibakwile yawa nsushi shīmululame’shi: 7Efile Mukulu takōbwela namu basangudibwe b’e na mwinyi abadidi kanya na bufuku kwadi, sunga ahuñanya kihindji kila n’abo. 8Nenulungula’shi: akebōbwela bukidi. Sunga mbiabia, ahakafiki Mwan’a muntu, akasañana lukuluhilo hano-ha nsenga su?
9Balungwile luno lukindji namu kwi bangi bakwikuluhila’bo bana bene’shi: Twi balulame, na kubenda bakwabo: 10Bana balume babidi abakamine ku ntempelo mu kuteka; umune Mufadiseo, na mungi mulambushi-a-mulambu. 11Mufadiseo bemene etekyela na mwinyi’shi, Obe Efile Mukulu, nakutumbula mwanda nki bu bangi bantu, bash’efīnyi, bashī-balulame, ba mabasa, sunga bu uno mulambushi-amulambu, ooo. 12Ami nashila biakudia misusa yibidi ku lubingu, nalambula ki’ekumi kia bioso biandji nabio. 13Winyi mulambushi namu bebwele, aimana kula, tamubushe sunga meso’e kwiilu, anka bekuhile ha kiadi kie ’shi: Efile Mukulu onsambe lusa, ami mulwishi. 14Nenulungula’shi, uno muntu bende ku nshibo ye mukilekile kubingishwa he mungi, mwanda muntu ese e nemeka na mwinyi akaheleshwa; awa akehelesha na mwinyi, akanemekwa.
15Abafishishe namu bana batoka kwadi’shi, akebakume: anka habamwene bana be-ba-bukishi biabia, abebasashila. 16Anka Yesu bebaitanyine, bakula’shi, nukumine bana batoka bafikye kwandji, tanwibalekeshanga, mwanda bufumu bw’-Efile Mukulu mbwa baba be biabia. 17Binyi binyi nenulungula’shi: Muntu ese shī mutambule bufumu bw’Efile Mukulu bu mwana mukinga takatwele mwanka sunga mpahelahela. 18Biabia mutontshi kampanda bamwihwishe’shi, Obe mulambukishi ebuwa, nkite naminyi kuhyana muwa wa ikala-ika? 19Yesu bamwalulwile’shi: Ankinyi kiontemwina bu’ebuwa? Takwi ebuwa’nka umune (nyi) Efile Mukulu. 20Weuku bishila’shi: Tosolanga mabasa; Twehanga (muntu), Toibanga, Todimbanga madimi, Nemeka shobe na nyin’obe. 21E bakwile’shi: Bino bioso nebilame mpaa na ku bakinga bwande. 22Binyibiabia hahushishe Yesu yino myanda, bamulungwile’shi: Bolobesha kintu kimune: hana biodi nabio bioso, webiabile balanda, n’obe okekala na bineme mwiilu, biabia ofikye, ondonde. 23Anka habahushishe biabia, eshimba die dibenyengele bikata, mwanda badi na buheta bwimoo. 24Yesu hakumona eshimba die dibenyengye: bakwile’shi: A na minyi bampeta kutwela ’mbufumu bu ’Efile Mukulu? 25Mwanda nkukile kubofula ngamedia kutwela mwiiso dia lushingye, he mpeta kutwela mbufumu bw’Efile Mukulu. 26N’abo abahushishe (biabia) abakwile’shi: A henyihaha nanyi akahanda. 27Anka E bakwile’shi: Bintu abikambila bantu (kukita) abiukibwa n’Efile Mukulu.
28Henyihaha Petelo bakwile’shi: Talanga! Atwe tubalekyele bioso, twakulonda. 29N’e bebalungwile’shi: Binyibinyi, nenulungula’shi: Takwi muntu akuleka nshibo ye, sunga nshye na nyin’e, su bakwabo balume, sunga mpian’e, su bana be, ha mwanda wa bufumu bw’Efile Mukulu. 30Akakutwa kutambula bikile misusa yi-bungi mu kino kihindji, na mu kihindji kia kufika muwa-wa-ikala ika.
31Henyihaha E bātshile b’ekumi na babidi, bebalungwile’shi: Talangai, bia tukamina ku Yelusalema, myanda yoso yibafundjilwe na batemuki ha mwanda wa Mwan’a muntu ayikakumbashwa. 32Mwanda akahebwa kwi badjentaila, akadidikwa, akamweshibwa malwa a lufu, akafidibwa mata. 33Abakamukuhila na kumwiha! h’efuku dia kasatu akasanguka. 34Anka’bo tambashingule yino myanda sunga ngumune; uno mwanda namu badi ufībwe kwabadi, sunga nkwiuka yaya myanda yibakwilwe.
35Bitabibakitshine habefubwile hehi na Yediko, kubadi muntu mpofu badi mushale kubukunkula kw’eshinda, badi atekye. 36Biabia ha kuhusha kibumbu kia bantu abakidi, behwishe’shi, A nkinyi’ki? 37Abamulungwile’shi, Yesu a ku Nasaleta akidi. 38Belele musase’shi: Yesu (obe) Mwan’a Dafidi onsambe lusa. 39Abo abadi ababadila ku meso abamutosheshe’shi, a umine: ank’e banyishishe musase bikata’shi: (Obe) Mwan’a Dafidi mfwile namu lusa. 40Biabia Yesu bemene, bebakayikile’shi, mufishe kwandji. Habafishishwe hehi, bamwihwishe’shi: 41Okyebe nkukitshine kinyi? E bakwile’shi: A Nfumuwami nankyebe biandjia kubūla meso. 42Biabia Yesu bamulungwile’shi: Tambula kutala kwa meso’be: lukuluhilo lobe lubakuhasha. 43Na kahindji n’āka batambwile kutala kwa meso e, amulonda, na kutumbisha Efile Mukulu, biabia bantu boso habamwene, abalangwile Efile Mukulu.
अहिले सेलेक्ट गरिएको:
Luka 18: NTLK52
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 1952 Alliance Biblique de la République Démocratique du Congo
