Luka 12

1Mu kiakia kihindji habadi bekoñene kibumbu kia bantu be bungi bwi moo, biabia abeashishenanga; e babangile kwakula kwi bana-be-ba-bukishi kwibedi’shi: Dimukai kitatusho kia Bafadiseo, nyi mbusesa. 2Mwanda takwi kintu kibwikilwe kishyakikabulwa; sunga kifibwe kishyakikaukibwa. 3Binyibiabia kioso kianubakwile ’mufito, akikahushwa mwitata; na kiakia kianubākwile mu matwi mu nshibo, akikalungulwa ha misaka. 4Nenulungula namu bakūku bande’shi: Tanutshinanga’bo abēha mbidi, na ku mongo tabe na kia beuku kukita dimo. 5Anka nankenudimuna anudia kutshina. Nutshinei yawa e bahu kwihā, e na matalwa kwela mu Ngehena; ee! nenulungula’shi: Numutshinei ank’e. 6Misodya yitano tayiulwa ku masēnki abidi su? anka takwi umune auilwa ku mpala kw’Efile Mukulu. 7Anka sunga nyene ya ku mitwe yenu, ayo yoso ngiibadikwe. Binyibiabia tanutshinanga: mūlo wenu ngukile wa misodya yi bungi kinemo. 8Nenulungula namu’shi: Ese muntu akantemuna ku mpala kwa bantu, Mwan’a Muntu namu akamutemuna ku mpala kwa bamwikeilu b’Efile Mukulu. 9Anka yawa antunu ku mpaka kwa bantu, akatunwa namu ku mpala kwa bamwikeilu b’Efile Mukulu. 10Ese muntu namu akesamba Mwan’a Muntu mwanda wibubi, aukamulekyelwa: anka kwi yawa asabula Kikudi-E-Selelee takale-kyelwa. 11Biabia habakenufisha ku mpala kwa bitumbwilo, na kwi bansushi, na kwi basha matalwa, tanukalakashanga ’mashimba’shi: Atukālula na minyi? atukākula kinyi? 12Mwanda Kikudi-E-Selelee akenulambukisha ha yawa nguba bianudia kwakula.

13Biabia umune a mu kibumbu bamwambile’shi: A Mulambukishi, akula na mukwetu angabile namu bia buhyanyi. 14E bamulungwile’shi: Obe muntu, a nanyi bantulu’mi bu nsushi, su bu mwabanyi enu? 15Biabia e bebālulwile’shi: Dimukai, nwilame ku malaka: mwanda muwa wa muntu tawi mu bungi bwa bintu biadi n’abio, ooo. 16Henyihaha bebēle mwele’shi: Nsenga ya muntu mpeta yibatushishe bibungi. 17E batentekyeshe munda mwe’shi: Nkite na minyi? mwanda nki na mbalo ya kutula bikuba biande. 18Biabia bākwile’shi: Nankakitshi bino; nankahongola bisasa bianda, nkebakishe bikile bukata; nyi mwa nkabikye bidibwa biande bioso na bintu biande namu. 19Nankalungula eshimba diande’shi: Obe eshimba, we na bintu bibungi bibikwe ku bihwa bibungi; ikishanga, odie, otome, osehele. 20Ank’Efile Mukulu bamwambile’shi: Obe mulotakane, mu buno bufuku muwa wobe wakyebibwa, biabia bintu biolumbulwile, abikekala bi’anyi? 21Anka biabia yawa ēbikila bie bineme, shī na buheta namu kw’Efile Mukulu e anka biabia.

22Balungwile bana-be-ba-bukishi’shi: Binyibiabia nenulungula’shi: Tanukalakashanga mashimb’enu ha mwanda wa muwa wenushi; atukadi kinyi? sunga ha mwanda wa mbidi’shi: Atukafwala kinyi? 23Muwa ngukile bidibwa, na mbidi ngikile bifwalwa. 24Tentekyeshai bidilanana, mwanda tabikufia sunga nkuumbulā; tabi na bisasa sunga mutala: nyi Efile Mukulu ebidishā: anwe tanwi bakile tonyi buwa bukata naminyi? 25Nanyi hanudiha, ha kukalakasha mitentekyesho ye, euku kukisha kishisa kie bu centimetre makumi atano su? 26Binyibiabia su tanwiuku kukita sunga kiakia kikile buhela, a nkinyi kianukalakasha mashimba enu hamwanda w’abishala? 27Tentekyeshai bilongo bia bilawelawe mwabimenā: tabituhutā, tabiluku; anka nenulungula’shi: Sunga Solomone mu ntombo ye yoso, tabadi mufwadikwe bu kimune kia’bio. 28Binvibiabia su Efile Mukulu afwadika lubishi biabia, alo lwi mu mahia lelo, na maloba alwedibwa mwidingidingi dia kālo: a biabia kwanudi’nwe naminyi? anwe ba lukuluhilo luhela. 29Tanukimbanga bianudia kudia sunga mbianudia kutoma, sunga nkwikala na katshima munda. 30Mwanda bino bintu bioso mīlo yahanohansenga eyibikimbā: anka nshyenu euku nwi na lukalo lwa bino bintu. 31Anka nkukile kukimba bufumu bw’Efile Mukulu, biabia bino bintu bioso abikenutentekyelwa. 32Tanutshinanga’nwe lombe luhela, mwanda Nshyenu nyi mutokye mwishimba die kwinuha bufumu. 33Nuhanei bia nudi n’abio, nuhane bia-buntu; nwifishishe kwi’ nwe bana bene madimba ashyakakulu, kintu kineme mwiilu kishī na nfudilo, amo (namu) sunga ngifi takefubula hehi, sunga nkēshi kakulwisha kianka. 34Mwanda ahakekala kineme kienu, nyi ahakekala mashimb’enu. 35Nuanye nshibo mbifuka bienu, na matata enu ekale atembe. 36N’anwe bana mwinyi nwikale bu bantu abatengyela nfumwabo hakāluka ku bidibwa bia kubamba’shi: hakafiki, atutule bakamushitwile anka hanka. 37Mwabi kwi’ba bahika abakasañanwa na nfumwabo bakwete kumutengyela ha kufika: binyibinyi nenulungula’shi: akānya nshiho ē na mwinyi, akebashadishe ha bidibwa, akatuku kwibābila. 38Su akafiki ha nsamu ya kabidi sunga ha nsamu ya kasatu, na kwibasañana biabia, mwabi kwi baba ba bahika. 39Anka nwiukye kino’shi: Su sha nshibo badia kwiuka nguba akafiki ngifi badia kutengyela, tabadia kukumina nshibo ye kutubulwa. 40Binyibiabia nwikale bemane namu, mwanda Mwan’a Muntu akafiki ha nsa yanushyanumutentekyela.

41Henyihaha Petelo bamwihwishe’shi: A Nfumwetu wakula luno lukindji kwatudi ank’atwe’nyi, su kwi boso? 42Biabia Nfumwetu bambile’shi: Henyihaha nanyi mendaku a kishima na binangu, nfumwe amutulu bu mumunyi a mu nshibo mwe, kwabila bidibwa bilombane ha kihindji kiabo. 43Mwabi kwi yawa mpika akasañanwa na nfumwe hakafiki akitshi anka bino. 44Mbia binyibinyi nenulungula’shi: Akamutulu bu mumunyi a bintu bie bioso. 45Anka su yawa mpika akākula mwishimba die’shi: Nfumwami bakisha ha kufikila; biabia akabanga kukuhila bahika n’e, balume na bakashi, na kudia, na kutoma, na kukolwa: 46Biabia nfumu a yawa mpika akafiki h’efuku diashyamutengyela, na ha nsa yiashyeuku, biabia akamulamuna, akamuha kihindji kie na bashī bakumine. 47Na yawa mpika mwiukye amukyebela eshimba dia nfumwe, tamwilumbule, sunga nkukita mwiyile eshimba die, e akakuhilwa bikata. 48Anka yawa shī mwiukye, akitshi (bintu) bilombane na ku kuhilwa, akakuhilwa bihela. Mwanda kwi ese muhebwe bibungi, kwadi akukakyebibwa bi bungi: na kwi yawa mutudiiwe bibungi, kwadi akukatekwa bikile bungi.

49Nyi mufikye kwela kālo hanohansenga, nankyebe’shi, kekale hwile kutemba? 50Ank’ami nyi na lubatshisho lwa kubatshisha n’alo; ai ai! nemukalakashwe mpaa n’ahalukahwila 51Anutentekyesha’shi, nyi mufwile kuha kufukama, hanohansenga? Nenulungula’shi: Ayoyo, anka kukalanana. 52Mwanda mpaa na binobino, akukekala batano mu nshibo yimune, abakakalanana; basatu abaketuhishena na babidi, babidi namu abaketuhishena na basatu. 53Nshye mwana mulume aketuhishena na mwan’e, na mwan’e mulume namu aketuhishena na nshye; nyin’a mwana aketuhishena na mwan’e mukashi, na mwan’e mukashi aketuhishena na nyin’e; na nyina-mweno aketuhishena na mukashi a mwana, na mukashi a mwana aketuhishena na nyinamweno.

54Balungwile bantu namu’shi: Hanumono ekumbi adiyingidika kwa kuhona nguba, anwakula hanka’shi: Mpeshi a kifunko afiki, nyi anka biabia. 55Hanumono luhahi lwa ku Sude taluhuku anwakula’shi: Akafiki kanya kebukoho, akafikyi namu anka biabia. 56(Anwe) bansesa, anwiuku kutundula mpala yeilu na ya nsenga, anka a nkinyi tanushingula bia kino kihindji? 57Mwanda kinyi namu tanwitshibila’nwe bana bene mu lulamine mwanda wibuwa?

58Hoende na mwituhishyanyi n’obe ku mpala kwa mulumbudi, biabia otē ’shimba diobe mwishinda biodia kulekyelwa kwadi, tala akakukakila kwi nsushi, n’e namu akakutula ku masa a musalai, na musalai akwela mu nshibo ya lukano. 59Nakulungula’shi: tokakatuka mwanka, mpā na hokahu kufuta ekuta dia kunfudilo.

अहिले सेलेक्ट गरिएको:

Luka 12: NTLK52

हाइलाइट

शेयर गर्नुहोस्

कपी गर्नुहोस्