လု 23

ၶဝ်ဢဝ်ၸဝ်ႈယေႇသုၵႂႃႇဢၢပ်ႈတီႈၶုၼ်ပိလတ်ႉ

(တူၺ်း၊ မတ်ႈ 27:1-2၊11-14။ မႃႇ 15:1-5။ ယူဝ်း 18:28-38)

1ၵူၼ်းဢၼ်ၸုဢၼ်တုမ်တင်းသဵင်ႈတင်းလူင်ဢွၼ်ၵၼ်လုၵ်ႉလႄႈဢဝ်ၸဝ်ႈယေႇသု၊ၵႂႃႇၵႃႈတီႈၽၢႆႇၼႃႈၶုၼ်ပိလတ်ႉ၊သေယဝ်ႉ၊- 2တၢင်ႇဢပျတ်ႈလႄႈဝႃႈ၊ “ႁဝ်းၶႃႈတိဢဝ်ၵေႃႉၼႆႉမႃး၊ၵွပ်ႈပိူဝ်ႈမၼ်းႁဵတ်းႁႂ်ႈၵူၼ်းမိူင်းႁဝ်းၽိတ်းၵႂႃႇပိူင်ႈၵႂႃႇယင်းႁၢမ်ႈတၢပ်ႈတၢင်းဢၼ်ထၢမ်းၶွၼ်ႇတီႈၶုၼ်ႁေႃၶမ်းၵေႇသႃႇ၊ဢိၵ်ႇတင်းႁေႃးလၢတ်ႈဝႃႈ၊မၼ်းပဵၼ်ၸဝ်ႈၶရိၸ်ႈ၊ဢၼ်ဝႃႈ၊ၶုၼ်ႁေႃၶမ်းပႃးၼိုင်ႈၼၼ်ႉဢေႃႈ၊” ဝႃႈၼင်ႇၼႆဢေႃႈ။

3ၶုၼ်ပိလတ်ႉ၊ၵေႃႈထၢမ်တီႈမၼ်းၸဝ်ႈလႄႈဝႃႈ၊ “ၸွင်ႇမႂ်းၸႂ်ႈၶုၼ်ႁေႃၶမ်းမဵဝ်းၵျူး၊ႁိုဝ်း၊” ဝႃႈၼင်ႇၼႆလႄႈ “မႅၼ်ႈၵႃႈၼင်ႇဢၼ်ၸဝ်ႈလၢတ်ႈၼႆႉယဝ်ႉ၊” ဝႃႈၼင်ႇၼႆမၼ်းၸဝ်ႈၶိုၼ်းလၢတ်ႈဢေႃႈ။

4မိူဝ်ႈၼၼ်ႉ၊ၶုၼ်ပိလတ်ႉ၊လၢတ်ႈတီႈယဵၸ်ႈပရေႃးႁဵၵ်ႈ#23:4 “ယဵၸ်ႈပရေႃးႁဵၵ်ႈ” - ၽူႈတၢင်တူဝ်ႁဵတ်းဝၢတ်ႈသၢၵ်ႈၵၢပ်ႈတၢင်းလူႇတီႈၽြႃးပဵၼ်ၸဝ်ႈလူင်ၶဝ်တင်းမူႇၵူၼ်းတင်းလၢႆလႄႈဝႃႈ၊ “ၵဝ်ဢမ်ႇႁၼ်ဢပျတ်ႈတီႈၵေႃႉၼႆႉသေၸိူဝ်ႉသေမဵဝ်း၊” ဝႃႈၼင်ႇၼႆဢေႃႈ။

5ၵူၺ်းၵႃႈ၊ၶဝ်ၸိူဝ်းၼၼ်ႉယဵင်ႈၶႅၼ်းႁွင်ႉပၢဝ်ႇတင်းသဵင်ဢၼ်ႁႅင်းၼႃႇလႄႈလၢတ်ႈဝႃႈ၊ “ၵေႃႉၼႆႉသင်ႇသွၼ်ႁႂ်ႈပိူၼ်ႈလုၵ်ႉၽိုၼ်ႉၸွတ်ႇတူဝ်ႈၵႂႃႇၼႂ်းမိူင်းယုတႃႉ၊ၵူႈတီႈၵူႇလႅၼ်ဢေႃႈ။ မၼ်းတႄႇၸႃႉတီႈမိူင်းၵႃႇလိလႄး၊လႄႈမိူဝ်ႈလဵဝ်ႁွတ်ႈမႃးၵႃႈတီႈၼႆႈၶႃႈယဝ်ႉ၊” ဝႃႈၼင်ႇၼႆဢေႃႈ။

ဢဝ်ၸဝ်ႈယေႇသုၵႂႃႇၵႃႈတီႈၸဝ်ႈၽႃႉႁေႇရူတ်ႈ

6ၶုၼ်ပိလတ်ႉ၊ငိၼ်းၵႂၢမ်းၼၼ်ႉသေယဝ်ႉ၊ထၢမ်လႄႈဝႃႈ၊ “ၵေႃႉၼႆႉပဵၼ်ၵူၼ်းမိူင်းၵႃႇလိလႄး၊ႁိုဝ်း၊” ဝႃႈၼင်ႇၼႆလႄႈ၊- 7မိူဝ်ႈဢၼ်ႁုဝႃႈပဵၼ်ၵူၼ်းဢိူင်ႇဢၼ်ၸဝ်ႈၽႃႉႁေႇရူတ်ႈ၊ဢုပ်ႉပိူင်ႇၼၼ်ႉၸိုင်၊ႁႂ်ႈဢဝ်ၸဝ်ႈယေႇသု၊ၵႂႃႇသူင်ႇၵႃႈတီႈၸဝ်ႈၽႃႉႁေႇရူတ်ႈ၊ဢၼ်မႃးမီးယူႇၵႃႈၼႂ်းဝဵင်းယေႇရုသလႅမ်ႇ၊ၶိင်ႇယၢမ်းၼၼ်ႉဢေႃႈ။- 8ၸဝ်ႈၽႃႉႁေႇရူတ်ႈ၊ႁၼ်ၸဝ်ႈယေႇသု၊လႄႈၸူမ်းၼႃႇလူင်လၢင်ၵွပ်ႈပိူဝ်ႈငိၼ်းၶၢဝ်ႇငၢဝ်းလွင်ႈမၼ်းၸဝ်ႈလႄႈၶႂ်ႈထူပ်းၶႂ်ႈၺႃးမၼ်းၸဝ်ႈႁိုင်ၼႃႇယဝ်ႉၸင်ႇ၊မုင်ႈမွင်းႁႂ်ႈလႆႈႁၼ်မၼ်းၸဝ်ႈႁဵတ်းၼႄဢၼ်လၢၵ်ႇလၢႆးလီဢၢမ်းသေၸိူဝ်ႉသေပိူင်ယူႇဢေႃႈ။- 9ပိူဝ်ႈၼႆလႄႈၸဝ်ႈၽႃႉႁေႇရူတ်ႈ၊ထၢမ်မၼ်းၸဝ်ႈၼမ်ၼႃႇဢေႃႈ။ ၵူၺ်းၵႃႈ၊မၼ်းၸဝ်ႈဢမ်ႇၶိုၼ်းတွပ်ႇၶိုၼ်းလၢတ်ႈသေၶေႃႈသေၵမ်း။- 10ယဵၸ်ႈပရေႃးႁဵၵ်ႈလူင်ၶဝ်တင်းသြႃႇမေႃၵျၢမ်းထမ်ႇမႃႉတင်းလၢႆလုၵ်ႉၸုၵ်းသေယဝ်ႉ၊တၢင်ႇဢပျတ်ႈႁႅင်းၼႃႇတီႈမၼ်းၸဝ်ႈဢေႃႈ။- 11ၵမ်းၼၼ်ႉ၊ၸဝ်ႈၽႃႉႁေႇရူတ်ႈ၊တင်းၵူၼ်းသိုၵ်းမၼ်းတင်းလၢႆ၊ယင်းဢမ်ႇၼပ်ႉဢမ်ႇၶၢၼ်းလႄႈႁဵတ်းပျၢၵ်ႈသႄႉသွမ်းမၼ်းၸဝ်ႈသေယဝ်ႉ၊ဢဝ်ၶူဝ်းၽႄးဢၼ်ႁၢင်ႈလီၼၼ်ႉၼုင်ႈပၼ်မၼ်းၸဝ်ႈသေလႄႈဢဝ်သူင်ႇၵႂႃႇပၼ်ၶိုၼ်းတီႈၶုၼ်ပိလတ်ႉ၊သေဢေႃႈ။- 12ၼႂ်းဝၼ်းၼၼ်ႉ၊ၸဝ်ႈၽႃႉႁေႇရူတ်ႈ၊တင်းၶုၼ်ပိလတ်ႉ၊ႁဵတ်းၵေႃႉႁဵတ်းသႄႈလူၺ်ႈၵၼ်ဢေႃႈ။ မိူဝ်ႈဢွၼ်တၢင်းၼၼ်ႉၶဝ်ဢမ်ႇထုၵ်ႇဢမ်ႇမႅၼ်ႈၵၼ်။

ၸီႇယၢင်ႇဢဝ်တၢႆၸဝ်ႈယေႇသု

(တူၺ်း၊ မတ်ႈ 27:15-26။ မႃႇ 15:6-15။ ယူဝ်း 18:39-19:16)

13မိူဝ်ႈၼၼ်ႉ၊ၶုၼ်ပိလတ်ႉ၊ႁွင်ႉဢဝ်ယဵၸ်ႈပရေႃးႁဵၵ်ႈလူင်လႂ်၊ၶုၼ်တီႈလုမ်းလႂ်၊ဢိၵ်ႇတင်းၵူၼ်းတင်းလၢႆၸုတုမ်ၵၼ်လႄႈ၊- 14လၢတ်ႈဝႃႈ၊ “သူဢဝ်ၵေႃႉၼႆႉမႃးၸွႆးတၢင်ႇဢပျတ်ႈလႄႈဝႃႈ၊ ‘မၼ်းဢွၼ်ႁူဝ်ပိူၼ်ႈလုၵ်ႉၽိုၼ်ႉဢေႃႈ’ ဝႃႈၼႆယဝ်ႉ။ တေႃႈလဵဝ်ၼႆႉ၊ၵဝ်ၸႅတ်ႈထၢမ်မၼ်းၽၢႆႇၼႃႈသူတင်းသဵင်ႈတင်းလူင်သေၵေႃႈ၊ၵဝ်ဢမ်ႇထူပ်းဢမ်ႇႁၼ်ဢပျတ်ႈဢၼ်သူၸွႆးတၢင်ႇသႂ်ႇၵႃႈၼိူဝ်မၼ်းၼၼ်ႉသေမဵဝ်း။- 15ၸဝ်ႈၽႃႉႁေႇရူတ်ႈ၊ၵေႃႈဢမ်ႇထူပ်းလႄႈၸင်ႇဢဝ်သူင်ႇမၼ်းမႃးၵႃႈတီႈၵဝ်ၶိုၼ်းယဝ်ႉ။ မၼ်းဢမ်ႇလႆႈႁဵတ်းၽိတ်းမဵဝ်းဢၼ်ထိူၵ်ႈတေလႆႈဢဝ်တၢႆ။- 16ပိူဝ်ႈၼႆလႄႈ ၵဝ်တၵ်းသုင်းမႃႉပၼ်တၢမ်ႇမၼ်းသေလႄႈပွႆႇလွတ်ႈဢေႃႈ၊” ဝႃႈၼင်ႇၼႆဢေႃႈ။ 17ၼႂ်းပွႆးပသၶႃႇ၊ၼၼ်ႉ ၶုၼ်ပိလတ်ႉ၊လႆႈပွႆႇၵူၼ်းထွင်ႇသေၵေႃႉၵေႃႉပၼ်တီႈၶဝ်ၵူႈပီဢေႃႈ။ #23:17 ၼႆႉၵႃႈၼႂ်းၽိုၼ်မူႇၵျၢမ်းလိၵ်ႈၵဝ်ႇၵဝ်ႇၵမ်ႈၼမ်ဢမ်ႇပႃး။

18ၵူၼ်းတင်းလၢႆၽွမ်ႉၵၼ်ပၢဝ်ႇသႅၼ်ႇလႄႈဝႃႈ၊ “ဢဝ်ၵေႃႉၼႆႉတၢႆပႅတ်ႈသေၵမ်း။ ပွႆႇပႃႇရပ်ႉပႃႉ၊ပၼ်ႁဝ်းၶႃႈသေၵမ်း၊” ဝႃႈၼင်ႇၼႆဢေႃႈ။- 19ပႃႇရပ်ႉပႃႉ၊ဢၼ်ဝႃႈၼၼ်ႉ၊ၵွပ်ႈပိူဝ်ႈပဵၼ်ၵူၼ်းဢၼ်လုၵ်ႉၽိုၼ်ႉဝၢၼ်ႈမိူင်းသေယဝ်ႉ၊လႆႈဢဝ်ၵူၼ်းတၢႆလႄႈတူၵ်းထွင်ႇယူႇဢေႃႈ။

20ၶုၼ်ပိလတ်ႉ၊ၸမ်ႉ၊ၶႂ်ႈပွႆႇၸဝ်ႈယေႇသု၊လွတ်ႈလႄႈသမ်ႉၶိုၼ်းလၢတ်ႈတီႈၵူၼ်းဢၼ်ၸုဢၼ်တုမ်ၸိူဝ်းၼၼ်ႉထႅင်ႈဢေႃႈ။- 21ၵူၺ်းၵႃႈ၊ၶဝ်ၶိုၼ်းႁွင်ႉပၢဝ်ႇလႄႈလၢတ်ႈဝႃႈ၊ “ဢဝ်ၵေႃႉၼႆႉတွၵ်ႇဝႆႉၵႃႈၼိူဝ်သဝ်မႆႉဝႃးမိုဝ်းသေၵမ်း။ ဢဝ်တွၵ်ႇတၢႆပႅတ်ႈသေၵမ်း၊” ဝႃႈၼင်ႇၼႆဢေႃႈ။

22ၶုၼ်ပိလတ်ႉ၊သမ်ႉၶိုၼ်းလၢတ်ႈတီႈၶဝ်ပွၵ်ႈထူၼ်ႈသၢမ်လႄႈဝႃႈ၊ “ၵွပ်ႈလွင်ႈသင်လႄႈတၵ်းဢဝ်မၼ်းတွၵ်ႇတၢႆပႅတ်ႈ။ မၼ်းလႆႈႁဵတ်းၽိတ်းဢပျတ်ႈဢၼ်လႂ်ယဝ်ႉ။ ၵဝ်ဢမ်ႇထူပ်းဢမ်ႇႁၼ်ဢပျတ်ႈဢၼ်ၵိုင်ႇဢဝ်မၼ်းတၢႆ။ ၵဝ်တၵ်းသုင်းမႃႉပၼ်တၢမ်ႇမၼ်းသေလႄႈပွႆႇလွတ်ႈဢေႃႈ၊” ဝႃႈၼင်ႇၼႆဢေႃႈ။

23ၶဝ်ယဵင်ႈၶႅၼ်းၵိဝ်သဵင်ဢၼ်ယႂ်ႇၼႃႇလႄႈပၢဝ်ႇသႅၼ်ႇႁႂ်ႈဢဝ်မၼ်းၸဝ်ႈတွၵ်ႇတၢႆၵႃႈၼိူဝ်သဝ်မႆႉဝႃးမိုဝ်းသေလႄႈသဵင်ၶဝ်ၼၼ်ႉပႄႉၼႅင်ႇၵႂႃႇသေဢေႃႈ။- 24ပိူဝ်ႈၼႆၸင်ႇ၊ၶုၼ်ပိလတ်ႉ၊ၸီႇယၢင်ႇတြႃးတီႈၸဝ်ႈယေႇသု၊ႁႂ်ႈပဵၼ်ၸိူဝ်ႉၼင်ႇဢၼ်ၶဝ်ယွၼ်းၼၼ်ႉလႄႈ၊- 25ပွႆႇလွတ်ႈၵေႃႉဢၼ်ၶဝ်ယွၼ်းဢဝ်ဢၼ်ပဵၼ်ၵူၼ်းတူၵ်းထွင်ႇဢၼ်လုၵ်ႉၽိုၼ်ႉဝၢၼ်ႈမိူင်းလႄႈဢဝ်ၵူၼ်းတၢႆၼၼ်ႉသေယဝ်ႉ၊ဢဝ်ၸဝ်ႈယေႇသု၊ဢၢပ်ႈပၼ်တီႈၶဝ်၊ႁႂ်ႈၶဝ်လႆႈႁဵတ်းၸွမ်းၵႃႈၼင်ႇဢၼ်ၶဝ်မီးဢလူဝ်ႇၼၼ်ႉသေဢေႃႈ။

ၸဝ်ႈယေႇသုလႆႈၶၢမ်ႇတွၵ်ႇဝႆႉၼိူဝ်သဝ်မႆႉ

(တူၺ်း၊ မတ်ႈ 27:32-44။ မႃႇ 15:21-32။ ယူဝ်း 19:17-27)

26ၵူၼ်းသိုၵ်းၶဝ်ဢဝ်ၸဝ်ႈယေႇသု၊ဢွၵ်ႇၵႂႃႇလႄႈၵႃႈတီႈၵၢင်တၢင်းၶဝ်ထူပ်းၺႃးၵူၼ်းမိူင်းၵုရေႇၼေႇ၊ၵေႃႉၼိုင်ႈ၊ဢၼ်လႆႈၸိုဝ်ႈသိမုၼ်ႇ၊လုၵ်ႉသေၵႃႈတီႈဝၢၼ်ႈၼွၵ်ႈၶဝ်ႈဝဵင်းမႃးၼၼ်ႉလႄႈၶဝ်တိဢဝ်မၼ်းသေယဝ်ႉ၊ဢဝ်သဝ်မႆႉဝႃးမိုဝ်းတၢင်ႇသႂ်ႇၵႃႈၼိူဝ်မၼ်းႁႂ်ႈမၼ်းမႅၵ်ႇၸွမ်းၽၢႆႇလင်ၸဝ်ႈယေႇသု၊ၵႂႃႇဢေႃႈ။

27မူႇၵူၼ်းၼမ်ၼႃႇၸွမ်းလင်မၼ်းၸဝ်ႈၵႂႃႇလႄႈၵႃႈၼႂ်းမူႇၵူၼ်းၼၼ်ႉ မီးမႄႈယိင်းၵမ်ႈၽွင်ႈဢၼ်ႁွင်ႉႁႆႈလႄႈၸႂ်လဵၵ်ႉပုၼ်ႈမၼ်းၸဝ်ႈၼၼ်ႉဢေႃႈ။- 28ၸဝ်ႈယေႇသု၊ဝၢႆႇတူၺ်းၶဝ်လႄႈလၢတ်ႈဝႃႈ၊ “မႄႈယိင်းဝဵင်းယေႇရုသလႅမ်ႇ၊တင်းလၢႆၶဝ်႟။ ယႃႇပေႁွင်ႉႁႆႈပုၼ်ႈၵဝ်။ ဢွၼ်ၵၼ်ႁွင်ႉႁႆႈပုၼ်ႈတူဝ်ၸဝ်ႈၵဝ်ႇ၊ဢိၵ်ႇတင်းပုၼ်ႈလုၵ်ႈသူလၢင်းသူတႃႉ။- 29လွင်ႈမၼ်းၸမ်ႉ၊ဝၼ်းၶိင်ႇၵႃႇလႃႉဝၼ်းၵူၼ်းတင်းလၢႆတၵ်းဝႃႈ၊ ‘မႄႈယိင်းမၼ်လႄႈဢမ်ႇမီးလုၵ်ႈၼၼ်ႉမီးမၢင်ႇၵလႃႇဢေႃႈ။ တွင်ႉဢၼ်ဢမ်ႇတွၼ်ႉပႃးပတိၵ်ႈသၼ်ႇထေႇ၊ဢိၵ်ႇတင်းတဝ်ႈၼူမ်းဢၼ်ဢမ်ႇပႆႇတွၼ်ႉလႆႈၶၢမ်ႇၸုပ်ႇၵိၼ်သေပွၵ်ႈၼၼ်ႉ၊မီးမၢင်ႇၵလႃႇဢေႃႈ၊’ ဝႃႈၼင်ႇၼႆၼၼ်ႉတၵ်းႁွတ်ႈမႃးဢေႃႈ။- 30မိူဝ်ႈၼၼ်ႉ၊ၶဝ်တၵ်းလၢတ်ႈတီႈလွႆတင်းလၢႆလႄႈဝႃႈ၊ ‘ၵၢၼ်ႉတဵင်ႁဝ်းတႃႉ၊’ သမ်ႉလၢတ်ႈတီႈၵွင်းလွႆလႄႈဝႃႈ၊ ‘ႁူမ်ႇတဵင်ႁဝ်းတႃႉ၊’ ဝႃႈၼင်ႇၼႆဢေႃႈ။- 31လွင်ႈမၼ်းၸမ်ႉ၊ပေႃးႁဵတ်းၸိူဝ်ႉၼင်ႇၼႆ၊မႆႉလိပ်းၼၼ်ႉမိူဝ်ႈဢၼ်ႁႅင်ႈၼၼ်ႉၸိုင်၊သမ်ႉတၵ်းပဵၼ်ၸိူဝ်ႉၼင်ႇႁိုဝ်ၼေႃ၊” ဝႃႈၼင်ႇၼႆဢေႃႈ။

32ၶဝ်ဢဝ်ၵူၼ်းႁၢႆႉသွင်ၵေႃႉၵႂႃႇႁႂ်ႈလႆႈတွၵ်ႇတၢႆလူၺ်ႈၵၼ်တင်းၸဝ်ႈယေႇသု၊ဢေႃႈ။- 33မိူဝ်ႈဢၼ်ၶဝ်ႁွတ်ႈထိုင်ၵႃႈတီႈဢၼ်ႁွင်ႉဝႃႈ၊ၵွင်းၵွၵ်းႁူဝ်ၼၼ်ႉၸိုင်၊ၶဝ်ဢဝ်ၸဝ်ႈယေႇသု၊တွၵ်ႇၵႃႈၼိူဝ်သဝ်မႆႉဝႃးမိုဝ်းလႄႈ ၵူၼ်းႁၢႆႉသွင်ၵေႃႉၼၼ်ႉၵေႃႈ၊တွၵ်ႇဝႆႉၵေႃႉၼိုင်ႈၽၢႆႇၶႂႃၸဝ်ႈ၊ၵေႃႉၼိုင်ႈၽၢႆႇသၢႆႉၸဝ်ႈလူၺ်ႈၵၼ်တင်းမၼ်းၸဝ်ႈဢေႃႈ။- 34ၸဝ်ႈယေႇသု၊ၵေႃႈလၢတ်ႈလႄႈဝႃႈ၊ “ဢူဝ်းပေႃႈ။ ပွႆႇလွတ်ႈဢပျတ်ႈၶဝ်ၸိူဝ်းၼႆႉသေၵမ်းတီႈၶႃႈ။ ၶဝ်ဢမ်ႇႁုလွင်ႈဢၼ်ၶဝ်ႁဵတ်းၼၼ်ႉတီႈၶႃႈ၊” ဝႃႈၼင်ႇၼႆဢေႃႈ။

ၶဝ်ၽႄမႅင်ႇဢဝ်ၶူဝ်းၼုင်ႈမၼ်းၸဝ်ႈလူၺ်ႈတၢင်းဢၼ်တူၵ်းၸႃႇၵွၵ်ႈဢေႃႈ။- 35ၵူၼ်းၼမ်ၼႃႇၸုၵ်းပႂ်ႉထႃႈတူၺ်းယူႇလႄႈၶုၼ်လုမ်းၶဝ်ၵေႃႈ၊ႁဵတ်းပျၢၵ်ႈႁဵတ်းၶူဝ်တီႈမၼ်းၸဝ်ႈလႄႈဝႃႈ၊ “မၼ်းၸၢင်ႈၶျွတ်ႈပိူၼ်ႈဝႃႈၼႆယဝ်ႉ။ သင်ဝႃႈမၼ်းပဵၼ်ၸဝ်ႈၶရိၸ်ႈ၊ၵေႃႉဢၼ်ၽြႃးပဵၼ်ၸဝ်ႈလိူၵ်ႈၵဵပ်းဢဝ်တႄႉၸိုင်၊ႁႂ်ႈမၼ်းၶျွတ်ႈဢဝ်တူဝ်ၸဝ်ႈၵဝ်ႇတႃႉ၊” ဝႃႈၼင်ႇၼႆဢေႃႈ။

36ၵူၼ်းသိုၵ်းတင်းလၢႆၵေႃႈမႃးတီႈမၼ်းၸဝ်ႈလႄႈႁဵတ်းပျၢၵ်ႈႁဵတ်းၶူဝ်တီႈမၼ်းၸဝ်ႈယူႇ၊ဢဝ်ၼမ်ႉမၢၵ်ႇၸပိတ်ႉသူမ်ႈယိုၼ်ႈပၼ်မၼ်းၸဝ်ႈသေလႄႈဢွၼ်ၵၼ်ဝႃႈ၊- 37“ပေႃးမႂ်းၸႂ်ႈၶုၼ်ႁေႃၶမ်းၵူၼ်းမဵဝ်းၵျူး၊ၸိုင်၊ၶျွတ်ႈဢဝ်တူဝ်ၸဝ်ႈၵဝ်ႇတႃႉ၊” ဝႃႈၼင်ႇၼႆဢေႃႈ။

38လိၵ်ႈဢၼ်ၽုၺ်ႇၼႄဢပျတ်ႈမၼ်းၸဝ်ႈၼၼ်ႉ [တႅမ်ႈတင်းၵႂၢမ်းႁေႇပြႄး၊ၵႂၢမ်းၵရိၵ်ႉ၊တင်းၵႂၢမ်းရူဝ်းမႃႉ၊]#23:38 […] ၼႂ်းၽိုၼ်မူႇၵျၢမ်းလိၵ်ႈၵဝ်ႇၵဝ်ႇၵမ်ႈၽွင်ႈဢမ်ႇပႃး ဢၼ်ဝႃႈ၊ “ၵေႃႉၼႆႉပဵၼ်ၶုၼ်ႁေႃၶမ်းၵူၼ်းမဵဝ်းၵျူး၊ဢေႃႈ၊” ဝႃႈၼင်ႇၼႆၼၼ်ႉတွၵ်ႇၸပ်းဝႆႉၵႃႈတီႈႁူဝ်သဝ်ဢေႃႈ။

39ၵူၼ်းႁၢႆႉဢၼ်လႆႈၶၢမ်ႇတၢင်းဢၼ်ပိူၼ်ႈတွၵ်ႇဝႆႉတီႈႁိမ်းမၼ်းၸဝ်ႈၼၼ်ႉၵေႃႉၼိုင်ႈသႄႉသွမ်းမၼ်းၸဝ်ႈလႄႈဝႃႈ၊ “မႂ်းပဵၼ်ၸဝ်ႈၶရိၸ်ႈ၊ဢမ်ႇၸႂ်ႈႁိုဝ်း။ ၶျွတ်ႈဢဝ်တူဝ်ၸဝ်ႈၵဝ်ႇဢိၵ်ႇတင်းႁဝ်းသွင်ၵေႃႉၼႆႉတႃႉ၊” ဝႃႈၼင်ႇၼႆဢေႃႈ။

40ၵူၼ်းႁၢႆႉထႅင်ႈၵေႃႉၼိုင်ႈၼၼ်ႉၸမ်ႉ၊ႁိုတ်းႁၢတ်ႇတီႈမၼ်းလႄႈဝႃႈ၊ “မႂ်းဢမ်ႇၵူဝ်ၽြႃးပဵၼ်ၸဝ်ႈႁိုဝ်း။ မႂ်းလႆႈၶၢမ်ႇတၢမ်ႇတၢႆမိူၼ်မိူၼ်ၵၼ်တင်းမၼ်းသေၵေႃႈ၊- 41ႁဝ်းသွင်ၵေႃႉၸမ်ႉ၊ပိူဝ်ႈဢၼ်လႆႈၶၢမ်ႇတၢမ်ႇတၢႆဢၼ်ထိူၵ်ႈတၢၼ်ႇၵၼ်တင်းဢပျတ်ႈဢၼ်ႁဝ်းႁဵတ်းမႅၼ်ႈၼၼ်ႉလႄႈလႆႈၶၢမ်ႇၸွမ်းၼင်ႇတြႃးဢေႃႈ။ ၵေႃႉၼႆႉၸမ်ႉ၊ဢမ်ႇႁဵတ်းဢပျတ်ႈသေၸိူဝ်ႉသေပိူင်၊” ဝႃႈၼင်ႇၼႆသေယဝ်ႉ၊- 42သမ်ႉလဝ်ႈလၢတ်ႈတီႈၸဝ်ႈယေႇသု၊လႄႈဝႃႈ၊ “ၸဝ်ႈယေႇသု၊တီႈၶႃႈ၊ၼႂ်းမိူဝ်ႈဢၼ်ၸဝ်ႈႁဝ်းမႃးၼႂ်းမိူင်းၸဝ်ႈယူႇၼၼ်ႉၸိုင်၊ၶုၵ်းၸႂ်လႆႈၶႆႈၸႂ်ထူပ်းၵဝ်ၶႃႈသေၵမ်းတီႈၶႃႈ၊” ဝႃႈၼင်ႇၼႆဢေႃႈ။

43မၼ်းၸဝ်ႈၵေႃႈလၢတ်ႈတီႈမၼ်းလႄႈဝႃႈ၊ “ၵဝ်ဝႃႈတီႈၸိုဝ်ႈၸႂ်ႈမၼ်းတီႈမႂ်းၸမ်ႉ၊ဝၼ်းမိူဝ်ႈၼႆႉမႂ်းတၵ်းမီးယူႇလူၺ်ႈၵၼ်တင်းၵဝ်ၵႃႈၼႂ်းမိူင်းၶျၢမ်းသႃႇပုၼ်ႉဢေႃႈ၊” ဝႃႈၼင်ႇၼႆဢေႃႈ။

လွင်ႈတၢင်းတၢႆၸဝ်ႈယေႇသု

(တူၺ်း၊ မတ်ႈ 27:45-56။ မႃႇ 15:33-41။ ယူဝ်း 19:28-30)

44ၶိင်ႇယၢမ်းၼၼ်ႉပဵၼ်ၶိင်ႇသိပ်းသွင်မွင်းၸမ်ၸမ်လႄႈပဵၼ်ဢၼ်လပ်းသိင်ႇၽိတ်းၽိတ်းၵႂႃႇတင်းဝၢၼ်ႈတင်းမိူင်းတေႃႇထိုင်ႁွတ်ႈၶိင်ႇဝၢႆးဝၼ်းသၢမ်မွင်းဢေႃႈ။- 45ၽႃႈၵင်ႈဢၼ်ၽႅၼ်ၵႃႈၼႂ်းၵျွင်းပိၵ်ႈမၢၼ်ႇၸဝ်ႈၵေႃႈသိၵ်ႇၶၢတ်ႇပဵၼ်သွင်သိၵ်ႈၵႂႃႇဢေႃႈ။- 46ၸဝ်ႈယေႇသု၊ၵေႃႈႁွင်ႉသႅၼ်ႇတင်းသဵင်ဢၼ်ယႂ်ႇၼႃႇလႄႈဝႃႈ၊ “ဢူဝ်းပေႃႈ။ ၵဝ်ၶႃႈဢဝ်ၸႂ်ဝိၺိၺ်ႇၵဝ်ၶႃႈဢၢပ်ႈၼႂ်းမိုဝ်းၸဝ်ႈႁဝ်းတီႈၶႃႈဢေႃႈ၊” ဝႃႈၼင်ႇၼႆလႄႈထွတ်ႇၸႂ်မၼ်းၸဝ်ႈၵႂႃႇသေဢေႃႈ။

47ၶုၼ်သိုၵ်းလူင်ႁၼ်လွင်ႈတၢင်းဢၼ်ပဵၼ်မႃးၼၼ်ႉသေယဝ်ႉ၊ယွင်ႈယေႃးၽြႃးပဵၼ်ၸဝ်ႈလႄႈဝႃႈ၊ “ၸႂ်ႈတႄႉ။ ၵေႃႉၼႆႉပဵၼ်ၵူၼ်းသိုဝ်ႈတေႃႇတႄႉယဝ်ႉ၊” ဝႃႈၼင်ႇၼႆဢေႃႈ။

48ၵူၼ်းၸိူဝ်းဢၼ်ၸုၵ်းပႂ်ႉထႃႈတူၺ်းလွင်ႈတၢင်းၼၼ်ႉၸိူဝ်းၼၼ်ႉ၊မိူဝ်ႈဢၼ်ႁၼ်ၵႃႈဢၼ်ပဵၼ်မႃးယဝ်ႉၼၼ်ႉၸိုင်၊ဢွၼ်ၵၼ်တူပ်းႁူဝ်ဢူၵ်းၶဝ်သေလႄႈၶိုၼ်းမိူဝ်းၵႂႃႇလူၺ်ႈတင်းၸႂ်ဢၼ်လဵၵ်ႉၼႃႇဢေႃႈ။- 49ၶဝ်ၸိူဝ်းဢၼ်ႁုၸၵ်းမိုတ်ႈၵိုဝ်းၵၼ်တင်းၸဝ်ႈယေႇသု၊ဢိၵ်ႇတင်းမႄႈယိင်းၸိူဝ်းဢၼ်လုၵ်ႉသေၵႃႈတီႈမိူင်းၵႃႇလိလႄး၊ၸွမ်းမၼ်းၸဝ်ႈမႃးၼၼ်ႉ၊ၸုၵ်းယူႇတီႈဢၼ်ႁၢင်ႇၵႆသေလႄႈတူၺ်းယူႇဢေႃႈ။

တၢင်းဢၼ်သၢင်းၵျူဝ်ႇတူဝ်တၢႆၸဝ်ႈယေႇသု

(တူၺ်း၊ မတ်ႈ 27:57-61။ မႃႇ 15:42-47။ ယူဝ်း 19:38-42)

50မိူဝ်ႈၼၼ်ႉ၊မီးၵူၼ်းမိူင်းယုတႃႉ၊ဝဵင်းဢရိမသႄး၊ဢၼ်ၸိုဝ်ႈမၼ်းႁွင်ႉဝႃႈယူဝ်းသႅပ်ႈ၊ၼၼ်ႉၵေႃႉၼိုင်ႈၼၼ်ႉ၊မၼ်းပဵၼ်ၵူၼ်းလီၵူၼ်းသိုဝ်ႈတေႃႇဢၼ်ထိူၵ်ႈရူဝ်ႇသေႇၵူဝ်ယမ်လႄႈ ပဵၼ်ၵေႃႉဢၼ်မုင်ႈထႃႈမွင်းထႃႈမိူင်းၽြႃးပဵၼ်ၸဝ်ႈယူႇၼၼ်ႉဢေႃႈ။- 51ပိၵ်ႉသမ်ႉမၼ်းပဵၼ်ၶုၼ်တီႈလုမ်းၵေႃႉၼိုင်ႈသေၵေႃႈ၊မၼ်းဢမ်ႇၽွမ်ႉလွင်ႈတၢင်းဢၼ်ၶဝ်ၼၼ်ႉၸီႇယၢင်ႇတႅပ်းတတ်းလႄႈႁဵတ်းၵႂႃႇၸိူဝ်းၼၼ်ႉ။- 52မၼ်းၸင်ႇၶဝ်ႈၸူးၵႃႈတီႈၶုၼ်ပိလတ်ႉ၊သေလႄႈယွၼ်းဢဝ်တူဝ်တၢႆၸဝ်ႈယေႇသု၊ဢေႃႈ။- 53လိုၼ်းၼၼ်ႉ၊မၼ်းၶျႃးတူဝ်တၢႆၸဝ်ႈလူင်းယဝ်ႉၸင်ႇ၊ဢဝ်ၽႃႈပၢၼ်ႇၶျေႃးၶဵၼ်းႁေႃႇသေယဝ်ႉ၊ဢဝ်သႂၢင်းသႂ်ႇၵႃႈၼႂ်းပိုင်ႈပႃႇႁဵဝ်ႈမႂ်ႇဢၼ်ၶုတ်းမူင်ႇၽႃႁိၼ်လႄႈယင်းဢမ်ႇပႆႇတွၼ်ႉသၢင်းၵျူဝ်ႇၽူႈလႂ်သေပွၵ်ႈၼၼ်ႉဢေႃႈ။- 54ဝၼ်းၼၼ်ႉ၊ပဵၼ်ဝၼ်းသွၵ်ႈၵျႃႇဝၼ်းၽိတ်ႈလႄႈၸမ်ၶိင်ႇဝၼ်းၵမ်သိၼ်ဢေႃႈ။

55မႄႈယိင်းၸိူဝ်းဢၼ်လုၵ်ႉသေၵႃႈတီႈမိူင်းၵႃႇလိလႄး၊မႃးလူၺ်ႈၵၼ်တင်းၸဝ်ႈယေႇသု၊ၼၼ်ႉ၊ၸွမ်းယူဝ်းသႅပ်ႈ၊ၵႂႃႇလူတူၺ်းပိုင်ႈပႃႇႁဵဝ်ႈမၼ်းၸဝ်ႈ၊ဢိၵ်ႇတင်းတူဝ်တၢႆမၼ်းၸဝ်ႈဝၢင်းဝႆႉၸိူဝ်ႉၼင်ႇႁိုဝ်ၼၼ်ႉဢေႃႈ။- 56ၶဝ်ၶိုၼ်းမိူဝ်းၵႂႃႇလႄႈမႄးႁႅၼ်းၼမ်ႉမၼ်းႁွမ်၊ဢိၵ်ႇတင်းၼၢမ်ႇသႃႇဢၼ်တၵ်းတႃးတူဝ်တၢႆမၼ်းၸဝ်ႈၼၼ်ႉဢေႃႈ။

ၼႂ်းဝၼ်းၵမ်သိၼ်ၼၼ်ႉ၊ၶဝ်လိုဝ်ႈသဝ်းယူႇၸွမ်းၼင်ႇဢၼ်ပိင်းၺၢပ်ႈတြႃးမီးဝႆႉၼၼ်ႉဢေႃႈ။

अहिले सेलेक्ट गरिएको:

လု 23: SHNCL

हाइलाइट

शेयर गर्नुहोस्

कपी गर्नुहोस्