ယူဝ်း 12

ဢဝ်ၼမ်ႉမၼ်းႁွမ်လေႃႇတိၼ်ၸဝ်ႈယေႇသု

1ၸူဝ်ႈဢၼ်ဢမ်ႇပႆႇၽႅဝ်ဝၼ်းပွႆးပသၶႃႇ၊ႁူၵ်းဝၼ်းၼၼ်ႉၸိုင်၊ၸဝ်ႈယေႇသု၊ႁွတ်ႈၵႂႃႇၵႃႈတီႈဝၢၼ်ႈပေႇထၼိ၊ဝၢၼ်ႈဢၼ်လႃႇၸရု၊ယူႇ၊ၵေႃႉဢၼ်ၸဝ်ႈယေႇသု၊ႁႂ်ႈလုၵ်ႉသေၵႃႈတၢင်းတၢႆၶိုၼ်းလိပ်းမႃးၼၼ်ႉဢေႃႈ။- 2တီႈၼၼ်ႈၶဝ်ႁႅၼ်းၽိူၼ်ၶဝ်ႈၶမ်ႈပုၼ်ႈမၼ်းၸဝ်ႈဢေႃႈ။ မႃႇထႃႉ၊ႁဵတ်းလဵင်ႉႁဵတ်းလူပၼ်လႄႈလႃႇၸရု၊ၵေႃႈၼင်ႈပႃးၼႂ်းဝႅင်းၽိူၼ်ၶဝ်ႈၶဝ်လူၺ်ႈၵၼ်တင်းမၼ်းၸဝ်ႈဢေႃႈ။- 3မိူဝ်ႈၼၼ်ႉ၊မႃႇရိ၊ဢဝ်ၼမ်ႉမၼ်းႁွမ်ဢၼ်မီးၼမ်ႉၼၵ်းသၢမ်ၶၼ်၊ဢၼ်ပဵၼ်ၼမ်ႉမၼ်းၼၢမ်ႇသႃႇၸႅတ်ႈၸႅတ်ႈဢၼ်ထိူၵ်ႈၵႃႈၶၼ်ယႂ်ႇၼႃႇၼၼ်ႉလေႃႇသႂ်ႇတိၼ်ၸဝ်ႈယေႇသု၊သေယဝ်ႉ၊ဢဝ်ၶူၼ်ႁူဝ်မၼ်းၸဵတ်ႉပၼ်ဢေႃႈ။ ဢၢႆႁွမ်မၼ်းၼၼ်ႉၸွတ်ႇတူဝ်ႈၵႂႃႇတင်းႁိူၼ်းဢေႃႈ။- 4မိူဝ်ႈၼၼ်ႉ၊ၼႂ်းတပႄးၸဝ်ႈၸိူဝ်းၼၼ်ႉၵေႃႉၼိုင်ႈ၊ဢၼ်ပဵၼ်ယုတႃႉဢိသၵႃႇရေႇဢုတ်ႈ၊လုၵ်ႈၸၢႆးသိမုၼ်ႇ၊ၵေႃႉဢၼ်တၵ်းဢဝ်မၼ်းၸဝ်ႈဢၢပ်ႈၼႂ်းမိုဝ်းရၢၼ်ႇသူႇၼၼ်ႉၵေႃႈလၢတ်ႈလႄႈဝႃႈ၊- 5“ႁဵတ်းသင်လႄႈဢမ်ႇဢဝ်ၼမ်ႉမၼ်းႁွမ်ၼႆႉ၊ၶၢႆသေႁႂ်ႈလႆႈငိုၼ်းတေႇၼႃႇရီႇ#12:5 “ငိုၼ်းတေႇၼႃႇရီႇ” - ၼိုင်ႈတေႇၼႃႇရီႇမီးၵႃႈၶၼ်ပုၼ်ႈတႃႇၸၢင်ႈၵႃႈႁႅင်းၵူၼ်းၼိုင်ႈဝၼ်းသၢမ်ပၢၵ်ႇၶႅပ်းသေယဝ်ႉ၊ဢဝ်ၽေးၸွၼ်းပၼ်တီႈၵူၼ်းၽၢၼ်တင်းလၢႆၼၼ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။- 6မၼ်းဝႃႈၸိူဝ်ႉၼင်ႇၼၼ်ၵွပ်ႈပိူဝ်ႈမၼ်းမီးၸႂ်ၸေႇတၼႃႇၼိူဝ်ၵူၼ်းၽၢၼ်ဢမ်ႇၸႂ်ႈ။ ၵွပ်ႈပိူဝ်ႈမၼ်းပဵၼ်ၽူႈလၵ်ႉဢၼ်ပႃးထူင်ငိုၼ်းယူႇသေလႄႈၸၢင်ႈဢဝ်ၸူၵ်းဢဝ်ၸၢႆႇပုၼ်ႈတူဝ်ၸဝ်ႈၵဝ်ႇၵႃႈဢၼ်ၸွမ်ႇသႂ်ႇဝႆႉၵႃႈၼႂ်းထူင်ၼၼ်ႉလႄႈမၼ်းၸင်ႇဝႃႈၸိူဝ်ႉၼင်ႇၼႆဢေႃႈ။

7 ၸဝ်ႈယေႇသု၊တွပ်ႇၶိုၼ်းယုတႃႉ၊လႄႈဝႃႈ၊ “ယႃႇမၼ်းတႃႉ။ ပွႆႇႁႂ်ႈမၼ်းႁဵတ်းလွင်ႈတၢင်းၼႆႉပုၼ်ႈဝၼ်းဢၼ်တၵ်းသၢင်းၵျူဝ်ႇတူဝ်တၢႆၵဝ်ၼၼ်ႉတႃႉ။- 8ၵူၼ်းၽၢၼ်ၸိုင်၊မီးယူႇတီႈသူတႃႇသေႇဢေႃႈ။ ၵဝ်ၸမ်ႉ၊မီးယူႇတီႈသူတႃႇသေႇဢမ်ႇၸႂ်ႈ၊” ဝႃႈၼင်ႇၼႆဢေႃႈ။

ပိူၼ်ႈၵျၢမ်ႇဢဝ်လႃႇၸရုတၢႆ

9မိူဝ်ႈဢၼ်ၵူၼ်းမဵဝ်းၵျူး၊ၼမ်ၼႃႇႁုလွင်ႈဢၼ်မၼ်းၸဝ်ႈမီးယူႇၵႃႈတီႈဝၢၼ်ႈပေႇထၼိ၊ၼၼ်ႉၸိုင်၊ၶဝ်ဢွၼ်ၵၼ်ၵႂႃႇၵႃႈတီႈၼၼ်ႈ ၵွပ်ႈပိူဝ်ႈလွင်ႈၸဝ်ႈယေႇသု၊လွင်ႈလဵဝ်ၵူၺ်းဢမ်ႇၸႂ်ႈ။ လႃႇၸရု၊ဢၼ်ၸဝ်ႈယေႇသု၊ႁႂ်ႈလုၵ်ႉၶိုၼ်းလိပ်းမႃးၼၼ်ႉၵေႃႈ၊ၶဝ်ၶႂ်ႈထူပ်းႁၼ်ဢေႃႈ။- 10ပိူဝ်ႈၼႆလႄႈၼင်ႇႁိုဝ်တေလႆႈဢဝ်လႃႇၸရု၊တၢႆပႅတ်ႈၼၼ်ႉၵေႃႈ၊ယဵၸ်ႈပရေႃးႁဵၵ်ႈ#12:10 “ယဵၸ်ႈပရေႃးႁဵၵ်ႈ” - ၽူႈတၢင်တူဝ်ႁဵတ်းဝၢတ်ႈသၢၵ်ႈၵၢပ်ႈတၢင်းလူႇတီႈၽြႃးပဵၼ်ၸဝ်ႈလူင်တင်းလၢႆဢုပ်ႇၵုမ်တိူင်ႇပၢင်ႇၵၼ်ယူႇဢေႃႈ။- 11ၵွပ်ႈပိူဝ်ႈလွင်ႈမၼ်းၼၼ်ႉလႄႈၵူၼ်းမဵဝ်းၵျူး၊ၼမ်ၼႃႇဢွၵ်ႇၵႂႃႇလႄႈယုမ်ႇမၢတ်ႈၸဝ်ႈယေႇသု၊ၼၼ်ႉဢေႃႈ။

ၸဝ်ႈယေႇသုၶဝ်ႈၵႂႃႇၵႃႈၼႂ်းဝဵင်းယေႇရုသလႅမ်ႇ

(တူၺ်း၊ မတ်ႈ 21:1-11။ မႃႇ 11:1-11။ လု 19:28-40)

12ထႅင်ႈဝၼ်းၼိုင်ႈမူႇၵူၼ်းဢၼ်ၼမ်ၼႃႇၸိူဝ်းဢၼ်မႃးၶဝ်ႈပွႆးပသၶႃႇ၊ၼၼ်ႉ၊လႆႈငိၼ်းလွင်ႈဢၼ်ၸဝ်ႈယေႇသု၊မႃးၵႃႈတီႈဝဵင်းယေႇရုသလႅမ်ႇ၊ယူႇၼၼ်ႉဢေႃႈ။- 13ၶဝ်ၸင်ႇၽၼ်းဢဝ်ၵိင်ႇမႆႉၸုၼ်ႇပလုၼ်ႇ၊#12:13 “ၸုၼ်ႇပလုၼ်ႇ” - ၵႂၢမ်းတႆးၵမ်ႈၽွင်ႈဝႃႈ၊တူၼ်ႈမၢၵ်ႇသႅင်ႈ ႁႂ်ႈလႆႈဢွၵ်ႇၵႂႃႇႁပ်ႉႁူဝ်တၢင်းမၼ်းၸဝ်ႈလႄႈႁွင်ႉသႅၼ်ႇဝႃႈ၊ “ႁူဝ်းသၼ်ႇၼႃႉ#12:13 “ႁူဝ်းသၼ်ႇၼႃႉ” - ပွင်ႇဝႃႈ၊ “ယွင်ႈယေႃးၽြႃးပဵၼ်ၸဝ်ႈ” ဢေႃႈၶုၼ်ႁေႃၶမ်းဢၼ်ပႃးတင်းတၼ်းၶူဝ်းထႃႇဝရႃႉၽြႃးမႃးၼၼ်ႉ ႁႂ်ႈမီးမၢင်ႇၵလႃႇသေၵမ်းလူၺ်ႈ၊” ဝႃႈၼင်ႇၼႆဢေႃႈ။

14 ၸဝ်ႈယေႇသု၊ထူပ်းမႃႉလီႈဢွၼ်ႇလႄႈၶိုၼ်ႈၶီႇဢေႃႈ။ မၼ်းမႅၼ်ႈၸွမ်းၼင်ႇဢၼ်ၵျၢမ်းလိၵ်ႈတႅမ်ႈဝႆႉဝႃႈ။

15“လုၵ်ႈယိင်းဝဵင်းၸိဢုၼ်ႇ၊႟။ ယႃႇပေမႆႈၸႂ်။

တူၺ်းလူး။ ၶုၼ်ႁေႃၶမ်းမႂ်းၼၼ်ႉ၊

ၶီႇမႃႉလီႈဢွၼ်ႇလႄႈမႃးယူႇဢေႃႈ၊” ဝႃႈၼင်ႇၼႆၼၼ်ႉဢေႃႈ။ #တူၺ်း၊ ၸႃႇ 9:9

16မိူဝ်ႈၶိင်ႇၼၼ်ႉ၊တပႄးၸဝ်ႈတင်းလၢႆယင်းဢမ်ႇပႆႇပွင်ႇၸႂ် လူၺ်ႈလွင်ႈတၢင်းၼၼ်ႉလူးၵွၼ်ႇဢေႃႈ။ ဝၢႆးသေမုၼ်ၽုင်းမၼ်းၸဝ်ႈထၢင်ႇသႃးမႃးယဝ်ႉၸင်ႇ၊ၶဝ်ၶုၵ်းၸႂ်လႆႈလွင်ႈဢၼ်ၵႂၢမ်းၵျၢမ်းလိၵ်ႈတႅမ်ႈဝႆႉပုၼ်ႈလွင်ႈမၼ်းၸဝ်ႈ၊ဢိၵ်ႇတင်းၵူၼ်းတင်းလၢႆလႆႈႁဵတ်းလွင်ႈတၢင်းၸိူဝ်းၼၼ်ႉ တီႈမၼ်းၸဝ်ႈၼၼ်ႉဢေႃႈ။

17မူႇၵူၼ်းၸိူဝ်းဢၼ်ၶဝ်ႈပႃးလူၺ်ႈၵၼ်တင်းမၼ်းၸဝ်ႈ၊ၼႂ်းမိူဝ်ႈဢၼ်မၼ်းၸဝ်ႈႁွင်ႉဢဝ်လႃႇၸရု၊သေၵႃႈၼႂ်းထမ်ႈပႃႇႁဵဝ်ႈႁႂ်ႈလုၵ်ႉသေၵႃႈတၢင်းတၢႆၶိုၼ်းလိပ်းမႃးၼၼ်ႉၸိူဝ်းၼၼ်ႉ ၶၢမ်ႇသၢၵ်ႈသေႇလွင်ႈဢၼ်ပဵၼ်မႃးၸိူဝ်းၼၼ်ႉဢေႃႈ။- 18ၵွပ်ႈပိူဝ်ႈၵူၼ်းတင်းလၢႆလႆႈငိၼ်းၶၢဝ်ႇလွင်ႈဢၼ်မၼ်းၸဝ်ႈႁဵတ်းၼႄၼိမိၵ်ႈလၢၵ်ႈၶၼႃႇၼၼ်ႉၸင်ႇ၊ၶဝ်ဢွၵ်ႇၵႂႃႇႁပ်ႉႁူဝ်တၢင်းမၼ်းၸဝ်ႈဢေႃႈ။- 19မိူဝ်ႈၼၼ်ႉ၊ၵူၼ်းၵိူင်းၽႃႇရိသႄး၊ၶဝ်ၼင်ႇၵၼ်လၢတ်ႈၸႃၵၼ်လႄႈဝႃႈ၊ “တူၺ်းလူး။ ႁဝ်းဢမ်ႇတၢတ်ႈၼိူင်ႇလႆႈလႃးလႃးယဝ်ႉ။ ၵူၼ်းလေႃးၵႃႉၼႆႉၸွမ်းၵေႃႉၼၼ်ႉၵႂႃႇသဵင်ႈယဝ်ႉ၊” ဝႃႈၼင်ႇၼႆဢေႃႈ။

ၵူၼ်းၵရိၵ်ႉသွၵ်ႈႁႃၸဝ်ႈယေႇသု

20ၼႂ်းၶဝ်ၸိူဝ်းဢၼ်ႁွတ်ႈမႃးၶဝ်ႈပွႆးႁႂ်ႈလႆႈၵူဝ်းၵႂၢႆႇၼၼ်ႉ၊ပႃးၵူၼ်းမဵဝ်းၵရိၵ်ႉ၊ၵမ်ႈၽွင်ႈဢေႃႈ။- 21ၶဝ်ၼၼ်ႉမႃးၸူးၽိလိပ်ႉပု၊ၵူၼ်းဝဵင်းပႅတ်ႉၸေးတႃႉ၊မိူင်းၵႃႇလိလႄး၊ၼၼ်ႉလႄႈ ယွၼ်းဢၶႂၢင်ႉလႄႈဝႃႈ၊ “ႁဝ်းၶႃႈၶႂ်ႈႁၼ်ၸဝ်ႈယေႇသု၊ဢေႃႈ၊” ဝႃႈၼင်ႇၼႆဢေႃႈ။- 22ၽိလိပ်ႉပု၊ၵေႃႈၵႂႃႇမွၵ်ႇလၢတ်ႈဢၼ်ႇတရေႇ၊လႄႈ ၶဝ်လဝ်ႈလၢတ်ႈတီႈၸဝ်ႈယေႇသု၊ဢေႃႈ။

23 ၸဝ်ႈယေႇသု၊ၶိုၼ်းလၢတ်ႈတီႈၶဝ်လႄႈဝႃႈ၊ “ၶိင်ႇယၢမ်းဢၼ်မုၼ်ၽုင်းလုၵ်ႈၵူၼ်း၊တၵ်းထၢင်ႇသႃးမႃးၼၼ်ႉႁွတ်ႈထိုင်ယဝ်ႉ။- 24ၵဝ်ဝႃႈတီႈၸိုဝ်ႈတီႈၸႂ်ႈမၼ်းတီႈသူၸမ်ႉ၊မဵတ်ႉၶဝ်ႈပိူၵ်ႇၼၼ်ႉပေႃးယင်းဢမ်ႇတူၵ်းၶဝ်ႈၼႂ်းလိၼ်လႄႈလုလႅဝ်ၸိုင်၊ပဵၼ်မဵတ်ႉလဵဝ်ယူႇၵူၺ်းမၼ်းဢေႃႈ။ ပေႃးလုလႅဝ်ၸင်ႇၸၢင်ႈၽႄၵိုၼ်းမႃးလႄႈမီးမဵတ်ႉၼမ်ၼႃႇဢေႃႈ။- 25ၵေႃႉဢၼ်ႁၵ်ႉဢသၢၵ်ႈတူဝ်ၸဝ်ႈၵဝ်ႇၼၼ်ႉၸၢင်ႈသုမ်းဢသၢၵ်ႈလႄႈ၊ၵေႃႉဢၼ်ၸင်းဢသၢၵ်ႈတူဝ်ၸဝ်ႈၵဝ်ႇၼႂ်းလေႃးၵႃႉၼႆႉၼၼ်ႉၸမ်ႉ၊မၼ်းၸၢင်ႈသိမ်းပႅင်းဝႆႉပုၼ်ႈဢသၢၵ်ႈထႃႇဝရႃႉဢေႃႈ။- 26ၽူႈလႂ်သေဢမ်ႇဝႃႈ၊ပေႃးၶႂ်ႈႁဵတ်းၵူၼ်းၸႂ်ႉၵူၼ်းသွႆၵဝ်ၸိုင်၊မၼ်းတၵ်းလႆႈၸွမ်းၵဝ်ဢေႃႈ။ ၼင်ႇၼၼ်လႄႈတီႈဢၼ်ၵဝ်မီးၼၼ်ႉၵူၼ်းၸႂ်ႉၵူၼ်းသွႆၵဝ်ၼၼ်ႉၵေႃႈတၵ်းလႆႈယူႇၸွမ်းဢေႃႈ။ ၽူႈလႂ်သေဢမ်ႇဝႃႈ၊ၵေႃႉဢၼ်ႁဵတ်းၵူၼ်းၸႂ်ႉၵူၼ်းသွႆၵဝ်ၼၼ်ႉ ပေႃႈၸဝ်ႈၵဝ်တၵ်းယုၵ်ႉယွင်ႈမၼ်းဢေႃႈ။

ၸဝ်ႈယေႇသုလၢတ်ႈလွင်ႈမၼ်းၸဝ်ႈတၵ်းလႆႈတၢႆ

27“တေႃႈလဵဝ်ၼႆႉ၊ႁူဝ်ၸႂ်ၵဝ်မီးတၢင်းဢၼ်ယၢပ်ႇၸႂ်မႆႈၸႂ်လႄႈၵဝ်တၵ်းလႆႈလဝ်ႈလၢတ်ႈၸိူဝ်ႉၼင်ႇႁိုဝ်။ ၸွင်ႇတၵ်းဝႃႈလႆႈ၊ ‘ၵႃႈတီႈၶိင်ႇယၢမ်းၼၼ်ႉၶႅၼ်းတေႃႈၵႄႇၶျွတ်ႈဢဝ်ၶႃႈၸဝ်ႈသေၵမ်းတီႈၶႃႈပေႃႈ၊’ ဝႃႈၼႆႁိုဝ်း။ ဢမ်ႇဝႃႈၸိူဝ်ႉၼင်ႇၼၼ်လႆႈ။ လွင်ႈမၼ်းၸမ်ႉ၊ပုၼ်ႈလွင်ႈၼႆႉၵူၺ်းၵဝ်ႁွတ်ႈထိုင်ၶိင်ႇယၢမ်းဢၼ်ၶၢမ်ႇဝူၺ်ႇတၼႃႇၼႆႉဢေႃႈ။- 28ဢူဝ်းပေႃႈ၊ၶႅၼ်းတေႃႈယုၵ်ႉယွင်ႈယွင်ႈယေႃးၼႃႇမႃႉၸိုဝ်ႈသဵင်ၸဝ်ႈႁဝ်းသေၵမ်းတီႈၶႃႈ၊” ဝႃႈၼင်ႇၼႆဢေႃႈ။

မိူဝ်ႈၼၼ်ႉ၊သဵင်ၵႂၢမ်းပဵၼ်မႃးၵႃႈတီႈၽႃႉၵၢင်ႁၢဝ်လႄႈဝႃႈ၊ “ၵဝ်ယုၵ်ႉယွင်ႈယွင်ႈယေႃးယဝ်ႉယဝ်ႉ။ ၵဝ်သမ်ႉတၵ်းယုၵ်ႉယွင်ႈယွင်ႈယေႃးထႅင်ႈလူးၵွၼ်ႇဢေႃႈ၊” ဝႃႈၼင်ႇၼႆဢေႃႈ။

29မူႇၵူၼ်းဢၼ်မီးယူႇၵႃႈတီႈၼၼ်ႈၼၼ်ႉလႆႈငိၼ်းသဵင်ၼၼ်ႉလႄႈၵမ်ႈၽွင်ႈဝႃႈ၊ “ပဵၼ်သဵင်ၽႃႉလင်ဢေႃႈ၊” ဝႃႈၼႆလႄႈ၊မၢင်ၵေႃႉသမ်ႉဝႃႈ၊ “တမၢၼ်ႇၵၢင်ႁၢဝ်လၢတ်ႈတေႃႇၵၼ်တင်းမၼ်းၸဝ်ႈဢေႃႈ၊” ဝႃႈၼင်ႇၼႆဢေႃႈ။

30 ၸဝ်ႈယေႇသု၊ၵေႃႈၶိုၼ်းလၢတ်ႈလႄႈဝႃႈ၊ “သဵင်ဢၼ်လၢတ်ႈမႃးၼႆႉပဵၼ်ပုၼ်ႈၵဝ်ဢမ်ႇၸႂ်ႈ။ ပဵၼ်ပုၼ်ႈသူဢေႃႈ။- 31ၶိင်ႇမိူဝ်ႈလဵဝ်ၼႆႉ၊ပဵၼ်ၶိင်ႇဢၼ်ၸီႇယၢင်ႇလေႃးၵႃႉၼႆႉလႄႈ၊ၶုၼ်ဢၼ်ဢုပ်ႉပိူင်ႇလေႃးၵႃႉၼႆႉတၵ်းလႆႈၶၢမ်ႇတၢင်းဢၼ်ဢီးလူင်းႁၢင်ႈလူင်းႁေႃဢေႃႈ။- 32ၵဝ်ၵေႃႈ၊ပေႃးလႆႈၶၢမ်ႇတၢင်းဢၼ်ယူၵ်ႉဝႆႉလႄႈၽၢတ်ႇယၢၼ်ၵၼ်တင်းလိၼ်မိူင်းၸိုင်၊ၵဝ်တၵ်းတိုတ်ႉၸၼ်ဢဝ်ၵူၼ်းတင်းသဵင်ႈတင်းလူင်မႃးတီႈၵဝ်ဢေႃႈ၊” ဝႃႈၼင်ႇၼႆဢေႃႈ။- 33မၼ်းၸဝ်ႈလၢတ်ႈဝႃႈၸိူဝ်ႉၼင်ႇၼႆ ႁႂ်ႈလႆႈၼႄပျႃးလွင်ႈဢၼ်မၼ်းၸဝ်ႈတၵ်းလႆႈၶၢမ်ႇတၢႆၸိူဝ်ႉၼင်ႇႁိုဝ်ၼၼ်ႉဢေႃႈ။

34မူႇၵူၼ်းၸိူဝ်းၼၼ်ႉၵေႃႈၶိုၼ်းလၢတ်ႈလႄႈဝႃႈ၊ “ႁဝ်းလႆႈသွၼ်ဢဝ်ၼႂ်းပိင်းၺၢပ်ႈတြႃး လွင်ႈဢၼ်ၸဝ်ႈၶရိၸ်ႈ၊တႄႇယူႇတႃႇသေႇဢမ်ႇထၢတ်ႇဢေႃႈ။ လုၵ်ႈၸဝ်ႈတၵ်းလႆႈၶၢမ်ႇတၢင်းဢၼ်ယုၵ်ႉဝႆႉဝႃႈၼင်ႇၼႆႁဵတ်းႁိုဝ်လႄႈမႂ်းဝႃႈလႆႈၸိူဝ်ႉၼင်ႇႁိုဝ်။ လုၵ်ႈၸဝ်ႈၼၼ်ႉပဵၼ်ၽူႈလႂ်၊” ဝႃႈၼင်ႇၼႆဢေႃႈ။

35 ၸဝ်ႈယေႇသု၊ၸင်ႇၶိုၼ်းလၢတ်ႈလႄႈဝႃႈ၊ “ဢၼ်လႅင်းတၵ်းတေမီးလူၺ်ႈၵၼ်တင်းသူၸူဝ်ႈၶၢဝ်းဢွၼ်ႇၼိုင်ႈၵူၺ်းဢေႃႈ။ ၵႂႃႇမႃးၼႂ်းၸူဝ်ႈဢၼ်ဢၼ်လႅင်းယင်းတိုၵ်ႉမီးယူႇၼႆႉတႃႉ။ ပေႃးဢမ်ႇၼၼ်ၸိုင်၊ဢၼ်လပ်းသိင်ႇတၵ်းႁူမ်ႇသုမ်ႇသူဢေႃႈ။ ၵေႃႉဢၼ်ၵႂႃႇမႃးၼႂ်းဢၼ်လပ်းသိင်ႇၼၼ်ႉဢမ်ႇႁုလွင်ႈဢၼ်တူဝ်ၸဝ်ႈၵဝ်ႇၵႂႃႇတီႈလႂ်ယူႇၼၼ်ႉ။- 36ၸူဝ်ႈဢၼ်၊ဢၼ်လႅင်းယင်းတိုၵ်ႉမီးယူႇလူၺ်ႈၵၼ်တင်းသူၼႆႉယုမ်ႇမၢတ်ႈဢၼ်လႅင်းႁႂ်ႈလႆႈပဵၼ်လုၵ်ႈဢၼ်လႅင်းတႃႉ၊” ဝႃႈၼင်ႇၼႆဢေႃႈ။

ၵူၼ်းတင်းလၢႆဢမ်ႇယုမ်ႇမၢတ်ႈ

ဝၢႆးသေၸဝ်ႈယေႇသု၊လၢတ်ႈၸိူဝ်ႉၼင်ႇၼၼ်ယဝ်ႉၸိုင်၊မၼ်းၸဝ်ႈဢွၵ်ႇၵႂႃႇလႄႈတဵတ်ႇမႅပ်းတူဝ်ၸဝ်ႈၵဝ်ႇသေၵႃႈတီႈၶဝ်ဢေႃႈ။- 37ပိၵ်ႉသမ်ႉမၼ်းၸဝ်ႈႁဵတ်းၼႄၼိမိၵ်ႈလၢၵ်ႈၶၼႃႇၼမ်ၼႃႇထၢၼ်ႇၼၼ်ႉသိုဝ်ႈၼႃႈတႂ်ႈတႃၶဝ်သေၵေႃႈ၊ၶဝ်ယင်းဢမ်ႇယုမ်ႇမၢတ်ႈမၼ်းၸဝ်ႈ။- 38မၼ်းပဵၼ်မႃးၸိူဝ်ႉၼင်ႇၼၼ်ၼင်ႇႁိုဝ်တၵ်းမႅၼ်ႈၸွမ်းၵႂၢမ်းပရေႃးၽႅတ်ႈ#12:38 “ၵႂၢမ်းပရေႃးၽႅတ်ႈ” - ၽူႈႁေႃးလၢတ်ႈၵႂၢမ်းၽြႃးပဵၼ်ၸဝ်ႈလွင်ႈတၢင်းဢၼ်တၵ်းပဵၼ်မႃးတေႃႈလဵဝ်လႄႈဝၼ်းမိူဝ်းၼႃႈဢိသႃႇယႃႉ၊ဢၼ်ႁေႃးဝႆႉလႄႈဝႃႈ၊

“ထႃႇဝရႃႉၽြႃးတီႈၶႃႈ၊ၽူႈလႂ်ယုမ်ႇမၢတ်ႈၶၢဝ်ႇတြႃးဢၼ်ႁဝ်းႁေႃးလၢတ်ႈၼၼ်ႉယဝ်ႉၶႃႈ။

ၶႅၼ်မိုဝ်းထႃႇဝရႃႉၽြႃးၼၼ်ႉၸိုင်၊ထၢင်ႇသႃးၵႃႈတီႈၽူႈလႂ်ယဝ်ႉၶႃႈ၊” ဝႃႈၼင်ႇၼႆၼၼ်ႉလႄႈ။ #တူၺ်း၊ ဢိ 53:1

39ၶဝ်ဢမ်ႇၸၢင်ႈယုမ်ႇမၢတ်ႈဢေႃႈ။ လွင်ႈမၼ်းၸမ်ႉ၊ပရေႃးၽႅတ်ႈဢိသႃႇယႃႉ၊သမ်ႉလၢတ်ႈဝႆႉထႅင်ႈလႄႈဝႃႈ။

40“ထႃႇဝရႃႉၽြႃးႁဵတ်းႁႂ်ႈတႃၶဝ်မွတ်ႇ၊

ႁႂ်ႈႁူဝ်ၸႂ်ၶဝ်ၵႅၼ်ႇၶႅင်၊

ပုၼ်ႈလွင်ႈၼင်ႇႁိုဝ်တႃၶဝ်တေဢမ်ႇႁၼ်၊

ႁူဝ်ၸႂ်ၶဝ်တေဢမ်ႇၸၢင်ႈႁုၸၢင်ႈပွင်ႇ၊

တေဢမ်ႇဝၢႆႇႁူဝ်မႃးၸူးၵဝ်၊

ႁႂ်ႈၵဝ်လႆႈႁဵတ်းႁႂ်ႈတၢင်းၶႆႈတၢင်းပဵၼ်ၶဝ်ႁၢႆၼၼ်ႉဢေႃႈ၊” ဝႃႈၼင်ႇၼႆဢေႃႈ။ #တူၺ်း၊ ဢိ 6:10

41ပရေႃးၽႅတ်ႈဢိသႃႇယႃႉ၊ႁေႃးလၢတ်ႈၵႂၢမ်းၼၼ်ႉ၊ၵွပ်ႈပိူဝ်ႈမၼ်းလႆႈႁၼ်မုၼ်ၽုင်းဢႃႇၼုၽေႃႇၸဝ်ႈလႄႈသမ်ႉလၢတ်ႈလွင်ႈမၼ်းတၢင်းမၼ်းဢေႃႈ။

42ၼႂ်းဝႃႈၼၼ်သေၵေႃႈၶုၼ်ဢႃႇၼႃႇၵူၼ်းမဵဝ်းၵျူး၊ၶဝ်ယုမ်ႇမၢတ်ႈမၼ်းၸဝ်ႈမႃးၼမ်ၼႃႇဢေႃႈ။ ၵူၺ်းၵႃႈ၊ပိူဝ်ႈဢၼ်ၶဝ်ၵူဝ်ၵူၼ်းၵိူင်းၽႃႇသႄး၊တင်းလၢႆတၵ်းႁေႃႈဢွၵ်ႇပႅတ်ႈသေၵႃႈၼႂ်းၸရွပ်ႈႁေႃးတြႃးလႄႈၶဝ်ဢမ်ႇႁပ်ႉတုင်းဢဝ်ထၢင်ႇထၢင်ႇသႃးသႃး။- 43လွင်ႈမၼ်းၸမ်ႉ၊ၶဝ်ၵျိူၵ်ႈႁၵ်ႉသရေႇၼႃႈတႃဢၼ်လႆႈၵႃႈတီႈၵူၼ်းၼၼ်ႉ ယဵင်ႈၶႅၼ်းၼႃႇသေသရေႇၼႃႈတႃဢၼ်လႆႈၵႃႈတီႈၽြႃးပဵၼ်ၸဝ်ႈၼၼ်ႉဢေႃႈ။

ၸီႇယၢင်ႇၸွမ်းၵႂၢမ်းၸဝ်ႈယေႇသု

44 ၸဝ်ႈယေႇသု၊ဢဝ်တင်းသဵင်ဢၼ်ယႂ်ႇၼႃႇလႄႈလၢတ်ႈဝႃႈ၊ “ၵေႃႉဢၼ်ယုမ်ႇမၢတ်ႈၵဝ်ၼၼ်ႉယုမ်ႇမၢတ်ႈၵဝ်ၵူၺ်းဢမ်ႇၵႃး၊ယုမ်ႇမၢတ်ႈပႃးတင်းၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉဢေႃႈ။- 45ၵေႃႉဢၼ်တူၺ်းႁၼ်ၵဝ်ၼၼ်ႉတူၺ်းႁၼ်ၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉဢေႃႈ။- 46ၵဝ်ပဵၼ်ၸိူဝ်ႉၼင်ႇဢၼ်လႅင်းသေလႄႈမႃးၼႂ်းလေႃးၵႃႉၼႆႉပုၼ်ႈလွင်ႈၼင်ႇႁိုဝ်ၶဝ်ၸိူဝ်းဢၼ်ယုမ်ႇမၢတ်ႈၵဝ်ၵူႈၵေႃႉၵူႈၵူၼ်း၊တၵ်းတေဢမ်ႇလႆႈမီးယူႇၼႂ်းတီႈဢၼ်လပ်းသိင်ႇဢေႃႈ။- 47ပေႃးသေၵေႃႉသေၵူၼ်းငိၼ်းၶၢဝ်ႇတြႃးၵဝ်လႄႈဢမ်ႇႁဵတ်းၸွမ်းၼၼ်ႉၸိုင်၊ၵဝ်ဢမ်ႇၸီႇယၢင်ႇဢပျတ်ႈမၼ်း။ ၵဝ်မႃးႁႂ်ႈလႆႈၸီႇယၢင်ႇဢပျတ်ႈလေႃးၵႃႉၼႆႉဢမ်ႇၸႂ်ႈ။ မႃးႁႂ်ႈလႆႈၵႄႇၶျွတ်ႈဢဝ်ၵူၼ်းလေႃးၵႃႉဢေႃႈ။- 48ၽူႈလႂ်သေဢမ်ႇဝႃႈ၊ၵေႃႉဢၼ်ထဵင်ပႅတ်ႈၵဝ်လႄႈဢမ်ႇထွမ်ႇဢဝ်ၶၢဝ်ႇတြႃးၵဝ်ၼၼ်ႉ၊မီးၸဝ်ႈဢၼ်ၸီႇယၢင်ႇဢပျတ်ႈမၼ်းၼၼ်ႉထႅင်ႈပႃးၼိုင်ႈလူးၵွၼ်ႇဢေႃႈ။ ၵႂၢမ်းဢၼ်ၵဝ်ႁေႃးလၢတ်ႈၼႆႉတၵ်းပဵၼ်ၸဝ်ႈဢၼ်ၸီႇယၢင်ႇဢပျတ်ႈမၼ်းၼႂ်းဝၼ်းၵမ်းလိုၼ်းသုတ်းပုၼ်ႉဢေႃႈ။- 49လွင်ႈမၼ်းၸမ်ႉ၊ၵဝ်ႁေႃးလၢတ်ႈၸွမ်းၼင်ႇဢၶႂၢင်ႉဢႃႇၼႃႇတူဝ်ၸဝ်ႈၵဝ်ႇဢမ်ႇၸႂ်ႈ။ ပေႃႈၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉတူဝ်မၼ်းၸဝ်ႈပိင်းၺၢပ်ႈဝႆႉ၊ႁႂ်ႈၵဝ်ဝႃႈၸိူဝ်ႉၼင်ႇႁိုဝ်၊ႁႂ်ႈႁေႃးလၢတ်ႈၸိူဝ်ႉၼင်ႇႁိုဝ်ၼၼ်ႉဢေႃႈ။- 50ၼင်ႇၼၼ်လႄႈၵဝ်ႁုဝႃႈပိင်းၺၢပ်ႈၸဝ်ႈၼၼ်ႉပဵၼ်ဢသၢၵ်ႈထႃႇဝရႃႉဢေႃႈ။ ၵႃႈဢၼ်ၵဝ်ႁေႃးလၢတ်ႈၸိူဝ်းၼႆႉၵေႃႈၵဝ်ႁေႃးလၢတ်ႈၸွမ်းၼင်ႇဢၼ်ပေႃႈၸဝ်ႈသင်ႇလၢတ်ႈဝႆႉၼၼ်ႉဢေႃႈ၊” ဝႃႈၼင်ႇၼႆဢေႃႈ။

अहिले सेलेक्ट गरिएको:

ယူဝ်း 12: SHNCL

हाइलाइट

शेयर गर्नुहोस्

कपी गर्नुहोस्