UBWANDILO 37
37
Yosefu na bamyabo
1Yakobu alinkwitugala nkisu kya Kanani muno ugwise itugalaga. 2Isi syo nongwa sya bandu bankikolo kya Yakobu. Yosefu bo afikilepo pa fyinja kalongo na fihano pamwanya fibili (17), alinkwanda ukutima ing'osi palikimo na bamyabo aba bali bana ba Biliha na Zilipa, abakasi ba gwise Yakobu. Bwila Yosefu ampangilaga ugwise imbibi isi abamyabo babombaga. 3Umwene Israeli yo alinganile fiyo Yosefu ukukinda bosa abanake abangi; popapo Yakobu alinkunsonela Yosefu nunselekesye unkololanie, unnunu fiyo, ugwa maboko amatali. 4Lelo bo abamyabo basiketile ukuti ugwisabo anganile Yosefu ukubakinda abene, balinkwenda nukumbenga fiyo, balinkusita nukuyobesania nagwe mbununu.
5Ilisiku limo Yosefu agogilwe injosi, lelo bo abapangile abamyabo injosi syake, po abene balinkukindilila ukumbenga. 6Alinkubabula alinkuti, “Amupilike injosi isi ngogilwe, 7keta, twapinyaga ingose sya ngano mu ngunda, popapo ingose yangu yilinkusumuka yilinkwima itolo swaa, loli ngose syinu syo syalimile ukuyisyungutila ingose yangu, silinkuyilambila.” 8Popapo abamyabo balinkundalusya Yosefu balinkuti, “Ngimba naloli kwinogona ukuti uswe twisakukulambilaga ugwe? Pamo ngimba naloli kwinogona ukuti ugwe kwisakuyaga gwakutulagila uswe?” Bunobuno lelo balinkwenda nukukindilila ukumbenga panongwa ya njosi syake na masyu gake. 9Panyuma Yosefu alinkugogwa injosi isingi, syope alinkubabula abamyabo alinkuti, “Keta, ngogilwe injosi isingi. Munjosi syangu ndikuketa, ndikulibona ilisuba numwesi nindondwa kalongo na lumo (11), fyo filinkundambila une.” 10Po lelo alinkumbula ugwise na bamyabo injosi isi, umwene ugwise alinkunkemela alinkuti, “Ngimba syo njosingi isi ugogilwe? Ngimba naloli une nu nyoko na bamyinu twise tukulambilege ugwe?” 11Popapo abamyabo balinkuya nubufi kumyake, loli ugwise yo alinkugabika mu ndumbula amasyu gagaga.
Yosefu ikulisigwa ku kisu kya Egiputi
12Pa kabalilo aka abamyabo balinkwakutima untimo gwa ng'osi sya gwisabo ku buyo bwa Shekemu. 13Popapo Israeli alinkumbula Yosefu alinkuti, “Abamyinu babukile nkutima ing'osi ku buyo bwa Shekemu. Isaga, ngutume ubuke ukabakete.” 14Umwene Yosefu alinkumwamula alinkuti, “Ena, nsumwike tata.” Popapo ugwise alinkumbula, alinkuti, “Buka mwanangu, ukabakete abamyinu linga bagonile, bakafu pamopene nuntimo: ukagomoke gwise umbangile.” Bunobuno lelo alinkuntuma Yosefu ukufuma nkikoga kya Hebroni. Umwene Yosefu alinkwakufika nkaya ka Shekemu. 15Umundu yumo alinkumbona Yosefu bo ikwenda ndukubo alinkundalusya alinkuti, “Kulonda fiki?” 16Umwene Yosefu alinkumwamula alinkuti, “Nikubalonda abamyitu, nikusuma ukuti umbule linga ubabwene kuno bikutima ing'osi.” 17Umundu yula alinkumwamula alinkuti, “Basokilepo apa, mbilike bo bikuyoba bikuti, ‘Tubukege ku ntebela gwa Dotani.’ ” Popapo lelo Yosefu alinkubakonga abamyabo alinkwakubaga mu ntebela gwa Dotani. 18Abene balinkumbona kubutali, lelo bo akali nukufika apa balipo, balinkwitikana ukumbombela imbibi, isya kuti bangoge. 19Balinkuyobesania balinkuti, “Keta, yula ikwisa kula ungogwanjosi; 20oko, tungoge tuntage mbwina, tukwakuyoba ukuti ikinyamana kindile; po lelo twise tukete kuno sisakulabilaga injosi syake.” 21Umwene Rubeni, umwana gwa Yakobu gwakipanda bo asipilike sisisi, alinkwenda nukumpoka kuba myabo alinkubabula, alinkuti, “Tuleke ukungoga. 22Komma ukona ilopa, loli muntage itolo mbwina ubu buli ndukubo, muno ukungoga komma.” Namanga umwene inogonaga ukuti ise ansosyemo panyuma, ukuti angomolele ku gwise. 23Lelo bo Yosefu afikile pa bamyabo, abene balinkumwalukila itolo balinkumfula unselekesye gwake unkololanie gula ugwa maboko amatali, ugu afwele. 24Balinkunkola nukuntaga mbwina ubu gakalimo amisi.
25Lelo bo bitugele pasi bikulya ifindu, balinkwenda nukukibona ikilundilo kya banya Ishimaeli, kilongosenie, kyafumile nkisu kya Gileyadi. Abene bali ningamila syabo si nyingi, syapimbile ifyakufukisya nimikota gyakupaka kangi nu lubani, babukaga nafyo nkisu kya Egiputi. 26Popapo Yuda alinkuyoba ku binake alinkuti, “Ngimba tukukabaga fiki linga tungogile umwinitu, nukufisa ilopa lyake? 27Oko, tumulisye itolo ku banya Ishimaeli aba, tuleke ukungoga, buno mwinitu, kangi gwa mwilopa lyitu.” Popapo abamyabo bosa balinkwenda nukwitika. 28Abulisi bamo abakikolo kya ba Midiani balinkukinda papo. Popapo abamyabo ba Yosefu balinkumfyula Yosefu mbwina, balinkumulisya ku banya Ishimaeli indalama sya siliva amalongo mabili (20). Abene abanya Ishimaeli balinkumwega Yosefu balinkubuka nagwe nkisu kya Egiputi.
29Bo Rubeni ikugomokelako ku bwina kula alinkunyomoka ukuti Yosefu akayamo mbwina, 30popapo alinkunyafulania imyenda gyake alinkugomokela ku bamyabo alinkuti, 31“Umwanike akayamo mbwina, kali ngwakuyobaga lya fiki!” Loli abamyabo ba Yosefu balinkwega imbene balinkugoga, po lelo balinkwega unselekesye gwa Yosefu, balinkuguyubika mwilopa lya mbene yila. 32Balinkubuka nago ku gwisabo, balinkuyoba balinkuti, “Tusalile unselekesye ugu, twatigi ugumanye, kali gwa mwanako pamo mma?” 33Umwene Yakobu alinkugumanya unselekesye gula, alinkuyoba alinkuti, “Go gu nselekesya gwa mwanangu naloli! Itata! Ikinyamana kindile, naloli kyo kinyamana kinnyafulenie Yosefu!” 34Popapo Yakobu alinkunyafulania imyenda gyake alinkufwala amakiba, alinkundilila umwanake Yosefu amasiku ga mingi. 35Abanake bosa abanyambala na bakikulu balinkwisa kukunsangalusya; loli umwene alinkusita nukusangalusigwa nu mundu, alinkuti, “Mma, ngundilaga umwanangu ngwakufikaga apa nisakwaganilaga nagwe mbusyuka.” Momuno Yakobu alinkundilila ifwa umwanake Yosefu. 36Pa kabalilo kala, abulisi bala aba kikolo kya Midiani balinkwakumulisya Yosefu nkisu kya Egiputi, kwa Potifari undongosi unkulumba mbulagili gwa Farao; umwene Potifari yo ali gwa pamwanya pa bosa nkati mbalindilili ba Farao.
လက်ရှိရွေးချယ်ထားမှု
UBWANDILO 37: NNBII
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
BAIBULO INONGWA INUNU © Bible Society of Malawi, 2017.