UBWANDILO 35
35
Kyala ikunsaya Yakobu na Beteli
1 #
Bwa 28.11-17
Popapo Kyala alinkumbula Yakobu alinkuti, “Ufyukege ku buyo bwa Beteli ko ukayenge; kulakula ko ukanjengele nikigemo kya kwikemekesyapo pa buyo bula nakusetukile ugwe bo kumbopa unkulu gwako Esau.” 2Bunobuno Yakobu alinkubabula aba nnyumba yake na bosa aba ali nabo alinkuti, “Amubatage abakyala abahesya aba muli nabo, mwiyelusyege kangi mufwale imyenda iminunu. 3Tukuya pakusama, tusumwike ku Beteli, ukuti ko nganjengelege Kyala ikigemo kyakwikemekesyapo, buno apilike ukwiputa kwangu apa nali mbutolwe, Kyala uyu ali nanine mosa muno nendaga.” 4Bunobuno balinkumpa Yakobu abakyala bosa abahesya aba bali nabo, nindandati isi bafwele mumbulukutu; umwene Yakobu alinkufifisa musi mu mpiki gwa mpandapanda pabupipi na kaya ka Shekemu.
5Lelo bo basumwike bikwenda, popapo ulutende ulu atumile Kyala lulinkubagwila abenekisu aba ntwaya utu twansyungutile Yakobu ukuyenga, balinkusita nukumbopela munyuma Yakobu pamopene na banake. 6Yakobu pamopene na bandu bosa aba ali nabo balinkwakufika nkaya ka Luzi (uyu yo Beteli), nkisu kya Kanani. 7Kulakula ko alinkuyenga ikigemo kyakwikemekesyapo, alinkubupa ubuyo bula ingamu ya Eli-beteli, papo ko kuno Kyala alinsetukile lula ambopege unkulu gwake. 8Popapo Debora untuli gwa Rebeka alinkufwa, balinkunsyila musi mu mpandapanda kwitongo kwa buyo bwa Beteli; bunobuno ubuyo bulabula balinkubupa ingamu ya Aloni-bakuti.
9Umwene Kyala alinkunsetukila kangi Yakobu bo afumile nkisu kya Padani-aramu, popapo alinkunsaya. 10#Bwa 32.28Kyala alinkumbula alinkuti, “Ingamu yako yo ugwe Yakobu; loli lilino utikubilikigwaga kangi ingamu ya Yakobu, kuyaga gwe Israeli. Bunobuno alinkubilikiligwa iya Israeli.” 11#Bwa 17.4-8Popapo Kyala alinkumbula Yakobu alinkuti, “Yo une Kyala Umwenemaka gosa. Goloke fiyo, ikikolo kya bandu ikilundilo itolo kise kifumege mmyako ugwe, kangi bope na banyafyale bise bafumege mmyako yuyugwe. 12Ikisu iki nalimpele Abrahamu na Isaka, kyo nikukupa ugwe, kangi na ba nduyungu lwako aba bikwisa panyuma pamyako.” 13Popapo Kyala alinkufyuka kumwanya ukufuma pa buyo bula ayobaga na Yakobu. 14#Bwa 28.18-19Popapo Yakobu alinkukumbilapo ilibwe lyakukumbukilapo pa buyo bulabula kangi alinkupungulilapo ilikemo lya fyakunwa na mafuta. 15Yakobu alinkubupa ubuyo bula ingamu ya Beteli.
Ifwa ya Rakeli
16Popapo balinkusokapo na buyo bwa Beteli; lelo bo kasyelepo akatambo kapimba itolo ukufika ku kaya ka Efrati, ikifuba kilinkunsambukila Rakeli, alinkutamigwa fiyo nikifuba kila. 17Bo ali mbufumbwe ubukulumba, unnyago uyu antulaga alinkumbula alinkuti, “Komma ukutetema, buno lululu itolo kuyaga nu mwana uyungi undumyana.” 18Lelo bo ikusililika (namanga afwile), popapo alinkumpa umwana yula ingamu ya Benoni, loli ugwise alinkumpa ingamu ya Benjamini.
19Bunobuno Rakeli alinkufwa, balinkunsyila pa njila iyi yikulabila nkaya ka Efrati yo yu Betelehemu. 20Umwene Yakobu alinkubikapo ikyakukumbukilapo pipumba lya Rakeli kyo kikumbusyo kya ipumba lya Rakeli iki kilipo ukwisa kufika na ku lilino kuno. 21Yakobu alinkwendelela ninjila yake alinkukoma ilisasa nkyeni mu ngasya ya Migidala-ederi.
Abana ba Yakobu
(1 Syambu 2.1-2)
22 #
Bwa 49.4
Bo Israeli ikwitugala nkisu kila, Rubeni umwanake alinkwenda nukulogwa na Biliha unkasi gwa gwise ugwa mbutitu; yope Israeli alinkusipilika, alinkukalala fiyo.
23Abana ba Yakobu bali kalongo na babili. Abene aba bapapigwe mwa Leya bo aba: Rubeni yo gwakipanda gwa Yakobu, Simeoni, Levi, Yuda, Isakara, na Zebuloni. 24Aba bo bapapigwe mwa Rakeli bo aba: Yosefu na Benjamini. 25Aba bapapigwe mwa Biliha umbombi gwa Rakeli unkikulu bo aba: Dani na Nafutali. 26Aba bapapigwe mwa Zilipa, umbombi gwa Leya unkikulu bo aba: Gadi na Asheri. Bababa bo bana aba Yakobu apapile bo ali nkisu kya Padani-Aramu.
Ifwa ya Isaka
27 #
Bwa 13.18
Popapo Yakobu alikufika kuno ugwise Isaka aliko pa buyo bwa Mamure pabupipi na kaya ka Kiriati-araba yo yu Hebroni kuno Abrahamu na Isaka bayengile iyolo. 28Isaka ali nifyinja mia yumo na malongo mahano namatatu (180). 29Popapo alinkwenda nukufwa, alinkubakonga abakamu bake bo akangele fiyo; abanake babili bala Esau na Yakobu bo balinkunsyila.
လက်ရှိရွေးချယ်ထားမှု
UBWANDILO 35: NNBII
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
BAIBULO INONGWA INUNU © Bible Society of Malawi, 2017.