Luk 11
11
Zisɔs atee vɛnʉl sɛ vávele
1Ife ɛmɔ, Zisɔs alɛ kɛ ivelena kɛ oci ɔmɔ. Wʉ âveli kule, ɔnʉl wʉ ayeghe nɔnʉn ɔmɔ ava-kaŋɛ nɔnʉn ala, “Ɔkʉ, te asu kpaa sɛ sávele, ndalɛsɛ Zɔnɛ âte vɛnʉl vɛ oyeghe nɔnʉn.”
2Zisɔs akaŋɛ navo ala, “Ikil yɛ nɛlɛ wʉ náveli, nɛ nɛ́kaŋɛ nini anu ala,
“‘Ɛziavɛ,
vɛnʉl õcivili ite iyuwu,
nɛ õcili we ndalɛ Mɛfʉwa wʉboona.
3Naa zaa asu ɔyɛ wʉ ɔkɛma asu ife ɛmɔnɛmɔ.
4Gife asu ɛcɔcɔɔ ɛyasɛ,
ndalɛsɛ asu kpaa sɛgife vɛnʉl vɛ oyel asu ɛcɔcɔɔ.
x-Wagɔla nɛ sɛ́gba kɛ mɛsol ga.’”
5Saŋ akaŋɛ navo ala, “Tɛŋɛ nini anu ala, ɔnʉl wunu ɔmɔ awʉ nɛ ɔciam, ɛnɛ aza kɛ itimbe ɛna kɛ atɛŋatɛŋɛ wʉ nɛ ife, ɛnɛ akaŋɛ nɔnʉn ala, ‘Ɔciam wamɛ, mɛkɔl uno, pɔlʉ mɛ ɛkandɛvɛ ɛtaalɛ. 6Kici yɛ ɔciam wamɛ wudi âva mɛ ozindi, kpa mawʉ nɛ ɔyɛ wʉ áya ga.’ 7Nɛ ɔciam ɔna wʉ alɛ kɛ itimbe wɔɔ akaŋɛ ala, ‘x-Wazaa mɛ ɛyʉl ga, mɛ̂zɛma ye ɔfɛla, ɛmɛ nɛ ɔvɔnʉ vambɛvɛ sɛ̂yavɛ ye, mama-mʉwa ɛsɛla nɛ mɛ́na we ɔmanɛmanɛ ga.’ 8Kpa mɛvɔlā anu mɛla, masɛ ámʉwa ɛsɛla ana ɔn kici yɛ awʉ ɔciam ɔna ga, kpa nɛ ána ɔn kici yɛ ɔciam ɔna aza isi ɛzaana ɔn ɛyʉl, nɛ ndalɛsɛ aliye wʉ ɔn ácɔ ite ɛna ga, nɛ ána ɔn cɛŋ ndalɛsɛ alii.
9“Kici yɛ asɔ mɛvɔlā anu mɛla, fii nini kɛ nɛ Ofilikpamɛ, nɛ ɔ́na anu; lii nini, nɛ nɛ́sʉla; kɛma nini, nɛ Ofilikpamɛ óvuu anu ɔfɛla. 10Kici yɛ ɔnʉl ɔmɔnɛmɔ wʉ afii, nákol ɔmanɛ kɛɛ afiye; ɔnʉl wʉ aliye, nɛ ásʉla, ɔnʉl wʉ akɛma, nɛ Ofilikpamɛ óvuu kɛ nɔnʉn.
11“Ɔnda wunu vɛziavɛ, ɛnɛ wanɛ afii ɛcɛmbɛ, nɛ ána ɔn kɛlɛ ɛyɔŋ yɛ ɛyɛma? 12Aka ikil yɛ afii ɛzɛŋɛ, nɛ ána ɔn kɛlɛ izooso? 13Masɛ anu, vɛ nɛlɛ vɛnʉl vacɔcɔ, kpa nɛcil ɛnaana vɛnalɛvɛ yɛsɛvanavɛ kɛ nɛ ɔvɔnʉ vunuvu. Asɔ káyel naa sɛnɛ Ɛziavɛ wunu wʉ alɛ kɛ ɔtalɛ-atʉlʉ, ána Mʉndʉ ɔna kɛ nɛ vɛnʉl vɛ ofii ɔn ga?”
Zisɔs nɛ ɔkʉ wʉ mʉndʉ vacɔcɔ
14Zisɔs asime mʉndʉ wʉcɔcɔ kɛ ɔnʉl ɔmɔ wʉ âyeli ɔnʉl wɔɔ alɛ ɛmama. Ikil yɛ mʉndʉ ɔnawɔɔ âsime, ɔnʉl ɔnawɔɔ ahee ɛtɔwana. Asɔ imbule yɛ ɛnʉlʉ yɛ ɛlɛ fini ɛyaaŋɛ. 15Kpa vɛnʉl vedivi ɔvɔl ala, “Kɛlɛ kɛ ɔtavɛ vɛ Bezebul, ɔkʉ wʉ mʉndʉ vacɔcɔ, ɛnɛ Zisɔs asime mʉndʉ vacɔcɔ.” 16Vɛnʉl vedivi sɛ ôliye wʉ vásol ɔn, ɔkaŋɛ ala, nɛ áte vo ɛkɛv kɛ ɔtalɛ-atʉlʉ.
17Kpa Zisɔs, sɛ âcili ye mates ovo, akaŋɛ navo ala, “Ɔswaŋɛ ɔmɔnɛmɔ wʉ ɔlɛ nɛ mɛkafɛ kɛ ɔmɛnɛ ɔna, nɛ ɔ́saŋ ovolu. Masɛ itumu ɛnɛ ɛlɛ nɛ mɛkafɛ kɛ ɔmɛnɛ ɔna, nɛ ícoolu ga. 18Ikil yɛ Satan alɛ nɛ mɛkafɛ kɛ ɔmɛnɛ ɔna ɛŋga, nɛ ɔtʉlʉ ɔnavɛ óyel kɛ naa sɛnɛ ócoolu? Mɛfiyē asɔ kici yɛ nɛkaŋā nini anu ala, mɛsimē mʉndʉ vacɔcɔ kɛlɛ kɛ ɔtavɛ vɛ Bezebul. 19Aŋgiee, ikil yɛ mɛsime mʉndʉ vacɔcɔ kɛlɛ kɛ ɔtavɛ vɛ Bezebul, kɛ ɔtavɛ vɛ ɔnda ɛnɛ owunu ɔlʉŋgʉ osime vo? Asɔ kɛlɛ ɔlʉŋgʉ owunu ɛnɛ otune anu. 20Kpa ikil yɛ mɛsime vo kɛlɛ kɛ ɔtavɛ vɛ Ofilikpamɛ, asɔ Ɔtʉlʉ vɛ Ofilikpamɛ ôbi kan nɛ anu.
21“Ɔkambɛlɛ wʉ ɔnʉl wʉ ɔtavɛ, wʉ aliŋgi ɔmɛnɛ ɔna nɛ vitumuvu yɛ ɛta, awand ɔswaŋɛ ɔna, nɛ ɔmɔ ápel ɔwaŋgɛ ɔna ga. 22Kpa ikil yɛ ɔnʉl wudi wʉ atav afo ɔn, nɛ áva-nyɔl ɛtavɛ saŋ nɛ áfo ɔn, nɛ áfolu vitumuvu yɛ apɛma ɛsɛma kayo, nɛ ákie ɔwaŋgɛ ɔna.
23“Ɔmɔnɛmɔ wʉ aka-lɛ kɛ ɛfanɛ ɛyamɛ ga, awʉ ɛcɔnʉ namɛ. Ɔmɔnɛmɔ wʉ aka-tuŋune namɛ ga, atasā atas.
Mɛkiil wʉ mʉndʉ wʉcɔcɔ kɛ ɛyʉlʉ iyɛ ɔnʉlʉ
24“Ikil yɛ mʉndʉ wʉcɔcɔ asime kɛ ɛyʉlʉ iyɛ ɔnʉlʉ, nɛ ázende kɛ oci wʉyɛmana, nɛ álii oci wʉyeŋena, nɛ ákol ga, nɛ ákaŋɛ ala, ‘Mákiil kɛ itimbe iyɛ mɛsime.’ 25Ɔkambɛlɛ wʉ akiil, nɛ ákol ndalɛsɛ owes itimbe iceeli, ɔmalɛ vɛnalɛvɛ ɔlɔl-ɔlɔl. 26Saŋ nɛ áza-bɛ mʉndʉ vedivi ɔtaŋɛnɔfaalɛ vɛ ɔcɔ ofo ɔn, nɛ ɔ́za-nyɔl kɛ ɛyʉlʉ iyɛ ɔnʉl wɔɔ. Asɔ nɛ aza-ɛyʉl ana ácɔ aŋgiee, nɛ áfo ndalɛsɛ âlɛ isi-isi.”
Vicowenavɛ yɛcɛb
27Ndalɛsɛ Zisɔs avɔla vɛnalɛvɛ yee, okeyi ɔmɔ kɛ ɛyɛŋgɛ iyɛ ɛnʉlʉ iyɔɔ akaŋɛ nɔnʉn ala, “Vicowenavɛ ɛ̃lɛ kɛ nɛ okeyi wʉ amal saŋ anyamb we!”
28Kpa Zisɔs agɔl nɔnʉn ala, “Vicowenavɛ ayɛ nɛ vɛnʉl vɛ ɔŋgwa ɛmʉ iyɛ Ofilikpamɛ saŋ oyele ɔmanɛ kɛɛ ɛkaŋɛ!”
Vɛnʉl ofii Zisɔs ala ãte vo ɛkɛv
29Ndalɛsɛ ɛyɛŋgɛ iyɛ ɛnʉlʉ iyɛ ɛ̂va kɛ nɛ Zisɔs îboo vaa, akaŋɛ ala, “Vɛnʉl vɛ aŋgiee avɛ kɛlɛ vɛnʉl vacɔcɔ. Ɔsaŋā ifiyena mɛ ɛkɛv, kpa ɔmɔ áyen ɛmɔ ga, cas ɛkɛv yɛ ɔmanɛ kɛɛ kalɛ-yeli nɛ Zona. 30Kɛlɛ ndalɛsɛ Zona alɛ-lɛ ɛkɛv kɛ nɛ vɛnʉl vɛ Ninive, asɔ kpaa ɛnɛ ɛmɛ Wanɛ wʉ Ɔnʉlʉ, málɛ kan nɛ vɛnʉl vɛ aŋgiee wee. 31Kɛ ife yɛ Ofilikpamɛ ótune vɛnʉl, nɛ oke-tʉl wʉ kɛ asen-asen, ávɔl ɛnalɛvɛ yɛ ɛpa ɛ́cɔ vɛnʉl vɛ aŋgiee. Kici yɛ alɛ-sime tɛla kɔ ɛlɛmb wʉ áva-ŋgwa vɛnalɛvɛ yɛ ayʉmʉ yɛ Solomun avɔla. Aŋgiee wee ɔnʉl wʉ afo Solomun awʉ fan, kpa nɛ̂tɛna wʉ náŋgwa amʉ ana. 32Kɛ ife yɛ Ofilikpamɛ ótune vɛnʉl yɔɔ, nɛ vɛnʉl vɛ Ninive kpaa vávɔl ɛnalɛvɛ yɛ ɛpa ɛ́cɔ vɛnʉl vɛ aŋgiee wee. Kici yɛ ɔlɛ-sɛɛlɛ ɛcɔcɔɔ ivo ikil yɛ ɔŋgwa ɔtɛlɛ wʉ Zona. Aŋgiee wee ɔnʉl wʉ afo Zona awʉ fan, kpa nɛ̂tɛna wʉ násɛɛl ɛcɔcɔɔ iyunu.
Ɔmanɛ kɛɛ anaa ɛyʉlʉ ɔmʉsʉ
33“Ɔmɔ amaŋgā ɔtʉlʉka, nɛ áyel vɛl ɔn kɛ oci wʉ ɔlɛ oyelena akasɛ nɛ acile ɔn kɛ akpɛkpa ga. Kpa nɛ ɔ́pɛma ɔn kɛlɛ fɛ oci ɔna, ndalɛsɛ vɛ ɔnyɔla vaa nɛ óyen ɔmʉsʉ. 34Asi ayuwu ɛnɛ alɛ ndalɛ ɔtʉlʉka wʉ kɛ ɛyʉlʉ iyuwu. Ikil yɛ asi ayuwu alɛ sɛva-sɛva, nɛ ɛyʉlʉ iyuwu imem kpaa nɛ íyiv nɛ ɔmʉsʉ. Kpa ikil yɛ asi ayuwu acɔ, nɛ ɛyʉlʉ iyuwu kpaa íyiv nɛ oyindenavɛ. 35Asɔ, yeli ndalɛsɛ ɔmʉsʉ wʉ kɛ ɛyʉlʉ iyuwu ókiil oyindenavɛ ga. 36Asɔ, ikil yɛ ɛyʉlʉ iyuwu imem iyiv nɛ ɔmʉsʉ, saŋ iziŋgil ɔmɔnɛmɔ aka-yinde ga, asɔ wʉyiv ndalɛ ɔmʉsʉ wʉ ɔtʉlʉka ɔyama kawe.”
Zisɔs atagh otu ɔnʉlʉ wʉ vɛ Falasi nɛ vɛnʉl vɛ otee obe ɔlɛ
37Ikil yɛ Zisɔs âtɔwʉ kule, ɔnʉl ɔmɔ wʉ Falasi abɛ ɔn ala, ãza-ya ɔyɛ kɛ itimbe ɛna. Asɔ aza kini, aza-caal kɛ oci wʉ ɔyaa ɔyɛ. 38Kpa ɔnʉl wʉ Falasi wɔɔ ayaaŋɛ cɛŋ, ikil yɛ Zisɔs awʉʉ avo bem-bem ɛnɛ ahee ɛyaana ɔyɛ ga.
39Ɛnɛ Ɔkʉ Zisɔs akaŋɛ nɔnʉn ala, “Anu vɛ Falasi, nɛwʉʉ ɛkɔɔ iyunu nɛ vakpɛkpa kɛlɛ kan ɛyʉl, kpa kɛ atɛŋ nɛ̂yiv nɛ imbus kɛ asɛma, nɛliyē anu ala, ɔmanɛmanɛ nɛ akɛ kɛlɛ kunughu. 40Anu viziŋ vɛ ɛnʉlʉ! Ofilikpamɛ wʉ oyel kan ɛyʉl, kɛlɛ ɔnʉ ɛnɛ oyel kpaa kɛ atɛŋ ga? 41Kpa aŋgiee, na nini kɛ nɛ vɛnʉl vɛ ɛcianɛvɛ nɛ ɛsɛma yɛsɛɛ, saŋ nɛ asɛma nɛ ayʉlʉ ayunu álɛ aceelena.
42“Anu vɛ Falasi, náya ɛcian, kici yɛ nɛnaā iziŋgil ɔmɔɔ kɛ aziŋgili likwoŋ ayɛ ayaŋa nɛ ɛtɛna nɛ ɛkaŋɛ ofolu iyunu ɛmɔnɛmɔ. Kpa nɛwaā ɛkʉ iyelena ɔmanɛ kɛɛ alɛ gel-gel nɛ iteŋgena Ofilikpamɛ ga. Ãlɛ nɛ nɛyelē vɛnalɛvɛ yee vimem ndalɛsɛ nɛyelē vɛnalɛvɛ yedivi yɔɔ.
43“Anu vɛ Falasi, náya ɛcian, kici yɛ kasɛvā anu ɛcaalana kɛ ici iyɛ ɛsɛva ifo kɛ aca, nɛ ikil yɛ vɛnʉl ɔtɛfa anu kɛ ise ndalɛ mɛkwavɛ.
44“Náya ɛcian kici yɛ navɛ ndalɛ akundu ayɛ alɛ nɛ ɛkɛv ga, ayɛ vɛnʉl owo kan ago, wʉ ɔmɔ acil ga.#11:44 Kɛ iyeli yɛ vɛ Zu, ikil yɛ wʉnyand ikundu aka wʉpel ɛkʉmʉ, nɛ wʉ́ma-lɛ oceelena kɛ isi kɛɛ Ofilikpamɛ ga.”
45Saŋ ɔnʉl ɔmɔ kɛ vɛnʉl vɛ otee obe, agɔl nɔnʉn ala, “Ɔkʉnʉl, wʉcwaā asu kpaa, ɔkambɛlɛ wʉ wʉtɔwa kɛ mɛfɔ wee.”
46Kpa Zisɔs agɔl nɔnʉn ala, “Náya ɛcian, anu vɛ nɛtee obe kpaa, kici yɛ nɛmbɛlā nini vɛnʉl vedivi nɛ ɛtɛŋɛ iyɛ ɛyɛfa ifo vo, kpa anu ɛŋga nɛbɛ nɛtɛŋɛ masɛ ɔnʉmʉ-avo wʉpeena vo ga.
47“Náya ɛcian, kici yɛ nɛmaā akundu ayɛ vɛnʉl vɛ ɔtɔwa kici yɛ Ofilikpamɛ, wʉ kɛlɛ vɛziavɛ vunuvu ɛnɛ ɔlɛ-yɛva vo. 48Asɔ anu kpaa nɛgɔl keneŋ, anu ala ɔmanɛ kɛɛ vɛziavɛ vunuvu oyel akɛ gel-gel. Ɔ̂yɛva vɛnʉl vɛ ɔtɔwa kici yɛ Ofilikpamɛ; anu nɛmaā akundu avo. 49Kici yɛ asɔ, Ofilikpamɛ ɔkaŋɛ kɛ ayʉmʉ ana ala, ‘Mátɛma anu vɛnʉl vɛ ɔtɔwa kici ɛyamɛ nɛ vɛnʉl vɛ mɛcɔw. Váyɛva vedivi, nɛ vána vedivi ɛcian.’ 50Asɔ Ofilikpamɛ ɔ́na vɛnʉl vɛ aŋgiee wee ɛcian. Óyel asɔ, kici yɛ agɔmbʉ ayɛ vɛnʉl vɛ ɔtɔwa kici ɛna. Vɛnʉl ɔlɛ-yɛva vo tɛla kɛ ife yɛ ɔtalɛ wee ɔlɛ-hee. 51Kahee kɛ oku wʉ Abel, kaza-bi kɛ oku wʉ Sakalia wʉ ɔlɛ-yɛva kɛ atɛŋatɛŋɛ wʉ oci wʉ ɔnaa ɛsalanavɛ kɛ nɛ Ofilikpamɛ nɛ oci wʉ ɔcia ɛyʉlʉ. Mɛkaŋɛ anu kacɛb mɛla, vɛnʉl vɛ ɔlɛ ɔyɛmavɛ aŋgiee vee, ɛnɛ Ofilikpamɛ ɔ́kɔl vo kɛ oku wʉ vɛnʉl vee omwem.
52“Náya ɛcian, anu vɛ nɛtee obe, kici yɛ nɛkʉndā vɛnʉl ɔwaa wʉ vácil Ofilikpamɛ. Anu ɛŋga, nɛlʉŋwā ɔwaa wɔɔ ga, nɛ nɛkʉndā kpaa vɛnʉl vɛ oliye válʉŋwa ɔnʉ.”
53Ikil yɛ Zisɔs âsime kɛ itimbe, vɛ Falasi nɛ vɛnʉl vɛ otee obe, ohee ɛkpɛlana nɔnʉn gbaŋ-gbaŋ, nɛ ifiyena ɔn vɛtɔɔmba cɛŋ. 54Ɔ̂lɛ kɛ ɛkʉlana ndalɛsɛ vákɔl ɔn kɛ ɔmanɛ kacɔcɔ kɛɛ ávɔl.
လက်ရှိရွေးချယ်ထားမှု
Luk 11: Iceve-Maci
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
©️2024 Luke Initiative for Scripture Translation
