Luk 10
10
Zisɔs atɛma vɛnʉl vɛ oyeghe nɔnʉn ati ataalɛ nɛ likwoŋ nɛ ɔfaalɛ
1Wʉ yee imem vîyeli ye, Ɔkʉ acɔw vɛnʉl ati ataalɛ nɛ likwoŋ nɛ ɔfaalɛ kɛ imbule yɛ vɛnʉl vɛ oyeghe nɔnʉn yɔɔ. Atɛma vo ɔfaalɛ ɔfaalɛ, ala ɔza kɛ isi kɛ ɔn, kɛ ɛswaŋ nɛ kɛ ici imem iyɛ ɔn áza kini. 2Akaŋɛ navo ala, “Ɔyɛ ɔ̂gba ɔ̂daal wʉ vásɛnda, kpa vɛnʉl vɛ ɔtʉmʉ ɔ̂laf. Asɔ, fii nini Ɔkʉ wʉ alɛ nɛ ɛkʉŋʉ ɛna, nɛ átɛma vɛnʉl vɛ ɔtʉmʉ kini. 3Zaa nini, mɛtɛmā zaā anu kɛ ndalɛ ɔvɔnʉ-ɛkamɛnɛ kɛ atɛŋatɛŋɛ wʉ ïzowu. 4x-Naŋgiee onzuwu, ɛta akasɛ akɔwʉ ga. x-Natimbile ɛtɛfana ɔnʉl kɛ ɔwa ga.
5“Itimbe ɛmɔnɛmɔ iyɛ nányɔl, nɛ nɛ́mbaa nɛ́kaŋɛ nɛ vɛnʉl vɛ fɛ itimbe ɛnayɔɔ anu ala, ‘Makun ãlɛ nɛ anu.’ 6Ikil yɛ ɔnʉl wʉ makun álɛ fini, nɛ makun wunu álɛ kɛ nɔnʉn, ga nɛ ákiil kan nɛ anu. 7Ca nini kɛlɛ fɛ itimbe ɛnayɔɔ, nɛ nɛ́ya nɛ nɛ́ŋwa ɔmanɛmanɛ kɛɛ ɔna anu, kici yɛ ɔnʉl wʉ ɔtʉmʉ ɔmɔnɛmɔ âkɛma wʉ ákol azatʉmʉ ɔna. x-Nacaa zende wawa ga.
8“Ɔswaŋɛ ɔmɔnɛmɔ wʉ náza saŋ ɔ́gbaal anu, ya nini ɔmanɛmanɛ kɛɛ ɔna anu. 9Kʉs nini vɛnʉl vɛ awaŋgɛvɛ vɛ ɔlɛ fini, nɛ nɛ́vɔl vo anu ala, ‘Ɔtʉlʉ vɛ Ofilikpamɛ ɔ̂va kpʉmbɛlaŋ kan nɛ anu.’ 10Kpa ɔkambɛlɛ wʉ nɛbi kɛ ɔswaŋ, saŋ ɔmɔ agɔl anu ga, zendi nini kɛ ɔswaŋ ɔnawɔɔ, nɛ nɛ̃kaŋɛ nini vo gbaŋgaŋ anu ala, 11‘Masɛ ivinde iyɛ fan ɔswaŋ owunu kpaa, sɛpɛsa simi kɛ akasɛ ayasɛ ndalɛ acɛ kɛ nɛ anu. Masɛ asɔ kpaa, cil nini anu ala, Ɔtʉlʉ vɛ Ofilikpamɛ ɔ̂va kpʉmbɛlaŋ kan nɛ anu.’ 12Mɛvɔl anu mɛla, kɛ ife yɛ Ofilikpamɛ ótune vɛnʉl yɔɔ, nɛ kácɔ kɛ ɔswaŋ ɔnawɔɔ nɛ káfo vɛnʉl vɛ Sɔdɔm.
13“Náya ɛcian, Kolazin. Náya ɛcian, Bet-saida, kici yɛ ãlɛ ndalɛ ɔtavɛ vɛ Ofilikpamɛ ote kan ɔtalɛ owunu vee, ɛnɛ ɔlɛ-te kɛ Taya nɛ Sidon, nɛ ɔ̃sɛɛlɛ ye ɛcɔcɔɔ tɛla-tɛla, nɛ ɔ̃wa akʉndʉ ayɛ ikuse, nɛ õkulu mɛtomu kɛ ayʉlʉ avo ndalɛsɛ káte ala, ɔ̂sɛɛl ɛcɔcɔɔ ivo. 14Kpa kácɔ kɛ nɛ anu nɛ áfo Taya nɛ Sidon kɛ ife yɛ Ofilikpamɛ ótune vɛnʉl. 15Anu vɛnʉl vɛ Kapanʉm, nɛtes anu ala, vácivili anu kɛ ɔtalɛ-atʉlʉ nɛ ófo vɛnʉl vɛ kɛ ɛtalɛ iyidi iyɔɔ imemi? Cioow, váta anu kɛ oci wʉ vɛnʉl vɛ okwo ye ɔyaa ɛcian.
16“Ɔnʉl ɔmɔnɛmɔ wʉ agɔl ɔtɛlɛ owunu, agɔl kɛlɛ mɛ. Ɔn wʉ atɛna anu, atɛna kɛlɛ mɛ. Ɔn wʉ atɛna mɛ, atɛna kɛlɛ ɔn wʉ atɛma mɛ.”
Vɛ ati ataalɛ nɛ likwoŋ nɛ ɔfaalɛ vɛ Zisɔs âtɛma okiil
17Ɔkambɛlɛ wʉ vɛnʉl vɛ Zisɔs âtɛma vɔɔ ôkiili nɛ ɛsɛghanavɛ, ɔkaŋɛ nɛ Zisɔs ala, “Ɔkʉ, mʉndʉ vacɔcɔ kpaa ɔ̂ŋgwa asu ɔkambɛlɛ wʉ sɛna vo obe kɛ ite iyuwu.”
18Akaŋɛ navo ala, “Mɛ̂yen ndalɛsɛ Satan âgba ndalɛ ɔvɛla wʉ ɔmiaŋgɛma kɛ ago. 19Mɛ̂na anu ɛyana iyɛ nányand ɛyɔŋʉ nɛ azooso, nɛ iyɛ náfo ɔtavɛ omwem vɛ ɔnʉl wʉ acɔna anu. Kpa nɛ ɔmanɛ áyel anu ga. 20Asɔ, x-nasɛgha anu ala mʉndʉ vacɔcɔ oyelē ɔmanɛ kɛɛ nɛkaŋɛ vo ga, kpa sɛgha nini kɛlɛ anu ala ɔ̂saŋgɛ ate ayunu kɛ ɔtalɛ-atʉlʉ.”
21Kɛ ɔkalaka ɔnawɔɔ, sɛ Mʉndʉ wʉ Ofilikpamɛ âyivi Zisɔs nɛ ɛsɛghanavɛ kɛ ɛsɛma, acivili Ofilikpamɛ cɛŋ ala, “Ɛziavɛ, Ɔkʉ wʉ alɛ nɛ ago nɛ ɛyaŋɛ, mɛ̂tɛfa we, ndalɛsɛ wʉyel vɛnalɛvɛ yee kɛ nɛ vɛnʉl vɛ otes ala vo avɛ nɛ ayʉmʉ, vo ocil kule; kpa wʉte yo kɛ nɛ vɛnʉl vɛ ɔka-cil ɔmanɛ ga. Aa, Ɛziavɛ, kici yɛ kɛlɛ ase ɛnɛ wʉlii wʉla kãlɛ.
22“Ɛziavɛ wamɛ âna vɛnalɛvɛ imem kɛ ikovo ɛyamɛ. Ɔmɔ acil ɔnʉl wʉ Wanɛ alɛ ŋgɛghɛghɛ ga, Ɛziavɛ cas ɛnɛ acil. Asɔ kpaa, ɛnɛ ɔmɔ acil ɔnʉl wʉ Ɛziavɛ alɛ ŋgɛghɛghɛ ga, Wanɛ cas nɛ vɛnʉl vɛ kasɛva Wanɛ ala ɔn atagh vo ɔnʉl wʉ Ɛziavɛ alɛ, ɛnɛ ocil.”
23Saŋ afiil kɛ nɛ vɛnʉl vɛ oyeghe nɔnʉn, avɔl navo oconuvu ala, “Ofilikpamɛ ocowu anu, asɔ ɛnɛ nɛbɛ nɛyen vɛnalɛvɛ yɛ nɛyene yee vimem. 24Cil nini anu ala, vɛnʉl cɛŋ vɛ ɔtɔwa kici yɛ Ofilikpamɛ, nɛ vɛmɛfʉwa kpaa, ɔlɛ-liye wʉ vátii ɔmanɛ kɛɛ nɛtiye ɛnya kiyee, kpa ɔmɔ atii ga, nɛ wʉ váŋgwa ɔmanɛ kɛɛ nɛŋgwa, kpa ɔmɔ vo abɛ ɔŋgwa ga.”
Ɛkan yɛ ɔnʉl wʉsɛɛ wʉ Samalia
25Kalɛ-lɛ ife ɛmɔ wʉ Zisɔs âtee, ɔnʉl ɔmɔ wʉ atee obe, amʉwa ɛsɛla wʉ asol Zisɔs. Afii ɔn ala, “Ɔkʉnʉl, ini máyel saŋ nɛ mɛ́kol ɛyɛma iyɛ íkule ga?”
26Zisɔs agɔl nɔnʉn ala, “Ini ɔsaŋgɛ kɛ oŋgwe wʉ obe? Ini ɛnɛ wʉyegh fini?”
27Ɔnʉl ɔnawɔɔ akaŋɛ nɛ Zisɔs ala, “Teŋgi Ɔkʉ Ofilikpamɛ owuwu nɛ ɛsɛma iyuwu imem, nɛ mʉndʉ wuwu omwem, nɛ ɔtavɛ vumbuvu omwem, nɛ mates wuwu omwem, saŋ nɛ wʉ̃teŋgi olindi wuwu ndalɛ ɔmɛnɛ owuwu.”
28Zisɔs agɔl nɔnʉn ala, “Wʉkaŋɛ gel-gel. Yeli asɔ, nɛ wʉ́kol ɛyɛma iyɛ ɛ́ka-kule ga.”
29Kpa ɔnʉl wʉ acil obe wɔɔ, aliye ɔn áte vɛnʉl ala ɔtɔɔmba ɔna awʉ kɛ gel-gel. Asɔ afii Zisɔs ala, “Ɔnda ɛnɛ alɛ olindi wamɛ?”
30Zisɔs agɔl nɔnʉn ala, “Ɔnʉl ɔmɔ alɛ-sime kɛ Zelusalem, asene zaa kɛ Zeliko. Vayivi ɔva vɛ ɔ̂lɛ nɛ vitumuvu yɛ onoŋgu, ɔkʉnda ɔn. Ofond ɔn akʉndʉ kɛ ɛyʉl amemi, ɔnyɛmbɛlɛ ɔn gbaŋ, anɔŋga kɛlɛ oku, saŋ ɔsɛɛl ɔn fini, ɔmʉwa. 31Sɛ akaŋɛ ayele, ɔnʉl wʉ asala Ofilikpamɛ asene zaa fɛ ɔwa ɔnawɔɔ. Ɔkambɛlɛ wʉ âbi fɛ oci ɔnawɔɔ, ayen ɔnʉl wɔɔ, awo ɔwaa iyikɔ, amʉwa. 32Ɔnʉl ɔmɔ wʉ asime kɛ ikul yɛ Levi#10:32 Ikul yɛ Levi îyele ɔtʉmʉ kɛ Ɛca iyɛ Ofilikpamɛ. kpaa ava kɛ ɔwa ɔnawɔɔ. Ɔkambɛlɛ wʉ âyeni ɔn, ɔn kpaa awo ɔwaa iyikɔ, amʉwa. 33Kpa ɔnʉl wʉ Samalia ɔmɔ, azaa ozindi, abi fɛsɛ ɔnʉl wɔɔ alɛ. Ɔkambɛlɛ wʉ âyeni ɔn, isonu ɛkɔl ɔn kaka. 34Akalɛ za kɛ nɔnʉn, awʉʉ ɔn avavɛ nɛ mɛkulemi nɛ mɛsɔlʉmʉ, akɔnd, aŋgiee ɔn kɛ ɛziakas ɛna, aza nɔnʉn kɛ itimbe iyɛ vɛnʉl vɛ ozindivi ɔcaa, awand ɔn. 35Wʉ ɔsʉ ɔ̂wʉʉ, asimi vagbʉnd vɛ ɔyɛla ala danali ɔfaalɛ,#10:35 Danali kɛlɛ ɛŋgɔl yɛ ɔtʉmʉ wʉ ife ɛmɔɔ. ana ɔnʉl wʉ awanda itimbe iyɛ vɛnʉl vɛ ozindivi ɔca wɔɔ. Akaŋɛ nɔnʉn ala, ‘Wanda ɔn, saŋ ɔkambɛlɛ wʉ mɛ́kiil va, nɛ mɛ́kɔl we ɔmanɛmanɛ kɛɛ ape.’”
36Saŋ Zisɔs akule ɛkan ɛna nɛ ɔtɔɔmba wee, “Ɔnda kɛ vataalɛ vee ɛnɛ wʉtes wʉla awʉ olindi kɛ nɛ ɔnʉl wʉ vayivi ɔkɔl ɔn wee?”
37Ɔnʉl wʉ atee obe wɔɔ agɔl nɔnʉn ala, “Wʉ akɔl isonu kɛ ɔn wɔɔ.”
Zisɔs akaŋɛ nɔnʉn ala, “Owe kpaa, za, nɛ wʉ́yel asɔ.”
Zisɔs aza Mata nɛ Malia ozindi
38Ndalɛsɛ Zisɔs nɛ vɛnʉl vɛ oyeghe nɔnʉn ɔ̂zaa ozindi ovo, abi fɛ ɔswaŋ ɔmɔ. Okeyi wʉ âgɔla ite ala Mata agbaal Zisɔs kɛ itimbe ɛna. 39Alɛ nɛ wanɛŋgwan wʉ okeyi wʉ âgɔla ite ala Malia. Malia âcaalɛ fɛ nɛ Ɔkʉ, aŋgwaa ɔmanɛ kɛɛ ate. 40Kpa Mata atesē ɛnalɛvɛ cɛŋ yɛ áwʉʉsʉ. Asɔ ava-fii Zisɔs ala, “Ɔkʉ, wʉ̂wa ɛkʉ ndalɛsɛ wanɛŋgwan wamɛ asɛɛl mɛ nɛ ɔtʉmʉ omwem ga? Kpɛnɛ-vɔlʉ ɔn, nɛ áva-kpend mɛ.”
41Ɔkʉ Zisɔs akaŋɛ nɔnʉn ala, “Mata, Mata, ɛsɛma ɛzaā we ɛyʉl kɛ ɛnalɛ cɛŋ. 42Kpa kɛlɛ ɔmanɛ kamɔɔ cas ɛnɛ kalɛ nɛ ɔnʉl alii. Kɛlɛ ko titi ɛnɛ Malia acɔw, asɔ ɔmɔ ágbaal ko kɛ nɔnʉn ga.”
လက်ရှိရွေးချယ်ထားမှု
Luk 10: Iceve-Maci
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
©️2024 Luke Initiative for Scripture Translation
