ယောဘ 28:12-28

သို့​ရာ​တွင်၊ ပ​ညာ​ကို​အ​ဘယ်​မှာ တွေ့​ရ​လိမ့်​မည်​နည်း။ ဉာဏ်​သည်​လည်း အ​ဘယ်​အ​ရပ်၌ နေ​သ​နည်း။ ဉာဏ်​ပ​ညာ​အ​ဖိုး​ကို လူ​မ​သိ​နိုင်။ အ​သက်​ရှင်​သော​သူ​တို့၏ နေ​ရာ၌ ရှာ၍​မ​တွေ့​နိုင်။ နက်​နဲ​သော​အ​ရပ်​က ငါ၌​မ​ရှိ။ ပင်​လယ်​က​လည်း၊ ငါ၌​မ​ရှိ​ဟု ဆို​တတ်၏။ ရွှေ​စင်​ကို​ပေး၍ ပ​ညာ​ကို​မ​ရ။ ငွေ​ကို​ချိန်၍ ပ​ညာ​အ​ဖိုး​ကို မ​မီ​နိုင်။ ဩ​ဖိ​ရ​ရွှေ၊ မြတ်​သော​ရှ​ဟံ​ကျောက်၊ နီ​လာ​ကျောက်​နှင့် ဝယ်​သော်​လည်း မ​ရ​နိုင်။ ရွှေ​ဖြစ်​စေ၊ ကျောက်​သ​လင်း​ဖြစ်​စေ မ​မီ​နိုင်။ ရွှေ​စင်​တန်​ဆာ​များ​နှင့် ဖ​လှယ်၍​မ​ရ​နိုင်။ သ​န္တာ​နှင့်​ပု​လဲ​ကို ပြော​စ​ရာ​မ​ရှိ။ ပ​ညာ​သည် ပ​တ္တ​မြား​ထက်​သာ၍ အ​ဖိုး​ကြီး၏။ ကု​ရှ​ဥဿ​ဖ​ရား​သည် မ​မီ​နိုင်။ အ​မြတ်​ဆုံး​သော​ရွှေ​နှင့် ဝယ်၍ မ​ရ​နိုင်။ သို့​ဖြစ်၍၊ ပ​ညာ​သည် အ​ဘယ်​က​လာ​သ​နည်း။ ဉာဏ်​သည် အ​ဘယ်​ဆီ​မှာ နေ​ရာ​ကျ​သ​နည်း။ အ​သက်​ရှင်​သော သ​တ္တ​ဝါ​တစ်​စုံ​တစ်​ယောက်​မျှ ကြည့်၍​မ​မြင်​နိုင်။ မိုး​ကောင်း​ကင်​ငှက်​တို့​သည် ရှာ၍​မ​တွေ့​နိုင်။ အ​ဗ​ဒ္ဒုန်​မင်း​နှင့် သေ​မင်း​တို့​က၊ ပ​ညာ၏​သ​တင်း​ကို နား​နှင့်​ကြား​ရုံ​မျှ​သာ​ရှိ​သည်​ဟု ဆို​တတ်​ကြ၏။ ဘု​ရား​သ​ခင်​သာ​လျှင် ပ​ညာ​လမ်း​ကို နား​လည်​တော်​မူ၏။ ပ​ညာ​နေ​ရာ​အ​ရပ်​ကို သိ​တော်​မူ၏။ လေ​ကို​ချိန်​လျက်၊ ရေ​ကို​လည်း​ခြင်​လျက်၊ မြေ​ကြီး​စွန်း​တိုင်​အောင် ကြည့်​ရှု၍၊ ကောင်း​ကင်​အောက်၌ ရှိ​သ​မျှ​တို့​ကို မြင်​တော်​မူ၏။ မိုး​ရွာ​မှု​ကို​စီ​ရင်၍၊ မိုး​ကြိုး​လျှပ်​စစ်​ပြက်​ရာ​လမ်း​ကို ဖန်​ဆင်း​သော​အ​ခါ၊ ပ​ညာ​ကို​မြင်၍ ဖော်​ပြ​တော်​မူ၏။ ပ​ညာ​တ​ရား​ကို​ထား၍ စုံ​စမ်း​တော်​မူ၏။ လူ​တို့​အား​လည်း ထာ​ဝ​ရ​ဘု​ရား​ကို ကြောက်​ရွံ့​ခြင်း​သည် ပ​ညာ​ဖြစ်​ကြောင်း​နှင့်၊ ဒု​စ​ရိုက်​ကို​ရှောင်​ခြင်း​သည် ဉာဏ်​ဖြစ်​ကြောင်း​ကို မိန့်​တော်​မူ​ပြီ​ဟု မြွက်​ဆို၏။