Lukas 24
24
Kinovijaan di Yisus Kavagu
(Mat. 28:1-10; Mar. 16:1-8; Yaya 20:1-10)
1Nga asasarappo dii di Tadau Minggu, irino tadau koiso saralom sominggu, om ongoino dii i tongotongondu si lobong do minongovit di tongorampa-rampa, iri sinodia diolo laid. 10aNgaran nopo di tongotongondu diri nga i Moria, i tulun mantad si Bandar Madala, om i Juana, om i Moria, iinojo di Yakub, om i tongondu vokon do nakavaja diolo. 2Nga kaantangai dii diolo iri vatu nga noluvidno siri sampaping, iri nisompon diri lobong. 3Om asuno dii iolo siri saralom diri lobong om aantangai diolo, ausono dii kojuvan di Tuhan Yisus siri. 4Om ontok di poingkakat iolo siri, do nokotigog iolo om osurau dii i ginavo diolo, tigogi dii do naantangan diolo iri duvo kusai poingkakat siri somok diolo do maang-vaang iri sabung diolo. 5Nga rinumosi marong iri tongotongondu, om tungub dii si tana. Om pitangarno dii diolo iri duvo kojuvan, “Nokuro do iumon muju iri tulun novijau siti pialatan di tulun napatai? 6Novijauno i Yisus kavagu om ausono siti! Ondomo mujuno iri tangar Disido dikovu diri silopo Isido Vonuvo Golilia 7do minitangar do ka, ‘Iokuno i Sinumiliu do Tulun, om misti do pataakon Oku siri tulun do kiduso, om posolibon Oku nogi dino gosob do apatai Oku om mijau Oku kavagu diri tadau kotolu,’ kaDisido,” kadiri duvo kojuvan.
8Nga kaandamaino dii di tongotongondu i tangar di Yisus, 9om pouliaino dii diolo mantad siri lobong om abarai nogi dii diolo i tongotulun di Yisus diri opulu om iso, om kasangkat di tulun vokon. 10b-11Nga andasanpo daa di susuuon nong tangar noopo toomod di tongondu om au dii aparsaya iolo. 12Nga ingkakatno i Pitrus, om panangkusno#24:12 panangkus: pogundak mongoi siri lobong. Om korikot dii isido siri, om tijongkudno dii isido do mongontong siri saralom diri lobong, nga ausoi nunuu do naantanganjo, nga iri noo kain iri nilopot diri kojuvan miliu-iliu siri. Om pouliaino dii di Pitrus om oiranan marong dii isido do irad diri naantangan disido.
Minintalang i Yisus si di Kolupas om i Koruangjo
(Mar. 16:12-13)
13Om tadau nogi diri minampanau i duvo tulun di Yisus do mongoi siri iso kampung ponguranan do Amaus. Om kosoduo nopo di Amaus mantad Bandar Yorusalim nga kivaro kama do turu nabatu.#24:13 Turu nabatu nopo nga lobi opulu om iso kilumitor. 14Di manau-panaupo iolo, mituturan pasal di kinapatajan di Yisus om iri tuturan di tongotongotondu mantad lobong di Yisus. 15Om ontok diri mituturan om miupakat iolo, rikotno dii i Yisus si diolo om vajano dii diolo mampanau. 16Nga ontok diri taau nokuro do au nokotutun iolo di Yisus nong isai.
17Om pongoduatno dii i Yisus diolo do ka, “Onu kai pituturan muju siti ralan?” kadi Yisus.
Indadano dii iolo do osusa ginavo, 18om jawap kadi iso tulun ponguranan do i Kolupas do ka, “SosoisoKo naku do au nokoilo diri kinoiranan silo Yorusalim do maino diti?” kadisido.
19Om, “Potingkuro batoi iri?” kadi Yisus.
Nga jawapaino dii diolo, “Pasalno bo di Yisus oo, i tulun mantad do Bandar Nasarit. Isido nopo nga nabi i kivaro kuasa diri tinangaranJo om obuli mamaal do onuu nopo kosunduvan siri gotuvang do Kinoringan om siri gotuvang kasangkat do tulun. 20Nga inovit gia Isido di tongokotua dagai di imam om i tongokotua dagai vokon do pataakon si di kotua do porinta do Ruum supaya inukuman do patajon, om posolibono dii diolo Isido. 21Ombo bala iti di pogulu mangaarap ikoi daa do Isidono i rinumikot do mongolukat daton tulun do Israil mantad do pomorintaan do Ruum. Om kotoluno dii tadau maino mantad pinasalib Isido. 22Nga kivaro piipiro tongondu songkoruanganja do minangaabar dagai di abar do otitigog. Om iri nopo nga di kosuvabonpo minongoi iolo siri lobong di Yisus, 23om au diolo naantangan i kojuvan di Yisus. Om pouliai dii diolo diri om pangaabar dagai do ka, ‘Nipoontong si dagai piipiro moloikat do minitangar dagai do, “Novijauno kavagu i Yisus,” kadi tongomoloikat,’ kadi tongotongondu. 24Om kivaro nogi piipiro tulun vokon songkoruanganjai, do minongoi siri lobong, nga inong om inong di tinangar di tongondu i naantangan diolo, nga aui nokoontong iolo di Yisus,” kadisido.
25Om pitangarno dii i Yisus diolo do ka, “Atukpo dii kobubudu muju o, alaid kou marong om aparsaya kou nogi diri tinangar di tongonabi! 26Mimang apatut i Koristus pasansarawon, kon, supaya koongoi Isido siri pantok do poinggojoon i ngaranJo?” kadi Yisus. 27Om patarangono dii di Yisus iri duvo tulun pasalJo kondiri, onuu nopo iri nokotulis siri Kitab, do tinumimpuunpo mantad diri tongobuuk nitulis di Musa gosob diri tongobuuk di nitulis di tongonabi vokon, i popolombus di tinangaran do Kinoringan.
28Om minsosomokno dii iolo di Kampung Amaus, iri rikoton diolo, lumombus daa dii i Yisus mampanau, 29nga inovudani marong diolo do ka, “Adapo lumombus maino, moidududun tokoupo do sumodopno ilo tadau,” kadiolo. Nga apiti dii i Yisus si rinikoton diolo.
Om koindakod nopo dii siri valai, 30om poiuurukno dii iolo mangakan. Paganuno dii i Yisus di kuui, om sambayangno dii Isido do mangarajou#24:30 mangarajou: mongompod di Kinoringan, om pikokib-kokiboJo nogi dii iri kuui om poiboboogijoJono dii diolo. 31Ontok diri ampa kotutunai dii diolo do Isidono i Yisus. Nga tigogi dii do linumijot Isido mantad si pialatan diolo. 32Om kadii diolo mitatangar, “Osusuduan okuno marong ontok do kumituturan i Yisus silo ralan, do potuduk dato di tangar si Kitab,” kadiolo.
33Om ingkakat dii iolo diri mongiduvo om poguliai dii kavagu silo Yorusalim do minongoi si pantok inuntunon di opulu om iso tulun di Yisus mivaja di tongosongkoruangan diolo vokon. 34Om santangar-tangar nopo dii iri tongotulun siri rinikoton diolo do ka, “Oinomodno bala do novijau kavagu i Tuhan om naantanganpo di Simun Pitrus!” kaano diolo.
35Om ponuturanno dii iri duvo kojuvan do nakasamung iolo di Yisus siri ralan om notutunan dii diolo Isido ontok do minangakib Isido di kuui.
Minintalang i Yisus si di TongotulunJo
(Mar. 16:14-18; Yaya 20:19-23)
36Om ontokpo di duvo tulun monuturan di tongotulun di Yisus, om tigogi dii do kaantangai dii diolo i Yisus kondiri do poingkakat siri lintanga diolo om sumalam diolo do ka, “Asasanang kovi?” ka.
37Nga turus do nokotigog om nokorosi marong iolo, do oondospo diolo om tatod taraat. 38Nga pongoduatno dii i Yisus diolo, “Nokuro do opiduvo ino ginavo muju do nokotigog kou? 39Antangai mujupo iti Dogo palad om lukap, Iokuno bo i Yisus. Kuutai Okuno dikovu om antangai, do tatod taraat nopo nga auso tonsi om auso tulang, nga Ioku nopo om kitonsi om kitulang,” kadi Yisus.
40Nga di mangar-tangarpo i Yisus do irad diri, poontongo dii Disido iri damat si palad om si lukapJo si diolo. 41Ontok di aupo aparsaya iolo do aandaiani osumboijani iolo, nga pitangarno dii i Yisus do ka, “Kivaropo dii akanon muju siti?” ka. 42Om onuaino diolo Isido sontotok iri sada do sinalau, 43om onuo dii Disido om akano siri gotuvang diolo.
44Om pitangarno dii i Yisus diolo do ka, “Itino komoionKu dikovu di tinangarKu laaid, ontok di munggum-runggum Okupo dikovu, do mimang onuu nopo iri nokotulis siri Kitab pasal Dogo nga misti do orikot kasangkat i komoion, irino onuu nopo i tinulis di Musa siri saralom buuk do Undang-undang Ugama om siri tongobuuk tinulis di tongonabi vokon om iri Buuk do Sinding, i roitan do Masmur,” kadi Yisus.
45Nga porotiono dii Disido marong i tongotulunJo di tinangaran siri Kitab. 46Om pitangar i Yisus diolo do ka, “Kivaro nokotulis siri Kitab do i Koristus nopo nga misti do asansara om apatai om kotolu tadau povijauon kavagu mantad si pialatan di tulun napatai. 47Om kivaro nogi nokotulis do misti abaran saralom ngaranKu siri kasangkat do tongobansa iri abar pasal di tongotulun rumorogo do duso, om abar pasal koompunan di duso. Om nimpuunon potongkop abar diri nga siti Bandar Yorusalim. 48Om ikovu nopo nga sumaksi kasangkat di tongoabar diri. 49Om porikotonKu dikovu iri Tatod do Kinoringan i nijanji diAmoKu.#24:49 diAmo: diApa Nga indadon muju siti Yorusalim gosob do oponuan kou do kuasa di Tatod do Kinoringan mantad soi suruga,” kadi Yisus.
Pinoinsavat Yisus silo Suruga
(Mar. 16:19-20; Susuuon 1:9-11)
50Om angataino dii di Yisus iolo mampanau mantad siri bandar do mongoi siri somok Kampung Boitani, om kakatono dii Disido i longonJo do minamarakat diolo. 51Om ontok do minamarakat Isido diolo, om rijangno dii Isido diolo do pinoinsavat di Kinoringan silo suruga. 52Tukuno dii iolo do sumamba Disido, om uli nogi dii iolo silo Yorusalim mivaja do aandaian marong iri ginavo diolo. 53Om soumur dii iolo muntun siri natad do Valai Sasambayangan Tagajo do mangarajou#24:53 mangarajou: mongompod iolo do Kinoringan.
လက်ရှိရွေးချယ်ထားမှု
Lukas 24: LabukPKV
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 1995, Wycliffe Bible Translators, Inc. All rights reserved.
