Lukas 23
23
Siri i Yisus Gotuvang di Gobonor Pilatus om iIrudis
(Mat. 27:11-14; Mar. 15:1-5; Yaya 18:28-38)
1Om ingkakatno kasangkat i tongokotua do tulun Joudi do nountun siri, om angataino dii i Yisus do pogotuvangon siri di Gobonor Pilatus do siasaton nong kivaro kasalaan ko auso. 2Om timpuunno iolo mangadaawa Disido do ka, “Isido nopo nga nadapatanja do mamalid do bansaja, om potingkod mamayar do sukai siri di Raja Tagajo i Koisar. Om minitangar nogi Isido do ka, ‘Iokuno i Koristus, i pinili do Kinoringan sumiliu do Raja,’ kaDisido,” kadi tongokotua do tulun Joudi.
3Om duatono dii di Pilatus i Yisus do ka, “Ikano naku i Raja do tulun Joudi?” ka.
Om, “Inongno dino tangarnu,” kadi Yisus.
4Om pitangarno dii i Pilatus di tongokotua do imam om i tulun kinoguuan do ka, “Auso oilaanku kasalaan do tulun diti,” ka.
5Nga makin nogi mangkas iolo mitangar do ka, “Itino tulun do monuduk di tongoraraat siri kinoguuan do tulun kototongkop siti Vonuvo Yudia, om mantadpo silo Vonuvo Golilia tinumimpuun Isido monuduk gosob do nokorikot siti Bandar Yorusalim,” kadiolo.
6Nga korongou dii i Pilatus di tangar di kotua do imam, om pongoduatno isido diolo do ka, “Oinomod bato do tulun Golilia i Yisus?” ka. 7Om koilaai nopo dii di Pilatus do oinomod tulun Golilia i Yisus om raayat di Raja Irudis Isido, om pootodono dii disido i Yisus pogotuvang di Raja Irudis do ontok diri silopo Bandar Yorusalim i Raja Irudis, do siasaton nong kivaro kasalaan ko auso. 8Nga aandaian dii iIrudis do nakasamung di Yisus do alaidno daa iIrudis do sisamung Disido, nga aui kasasamung do soumur mongou-rongou isido di abar pasal di Yisus om siontong marong isido nong potingkuro i Yisus mamaal do kosunduvan. 9Om oguu dii iduat diIrudis nga insan iiso ko kivaro nijawap di Yisus disido. 10Nga ingkakatno iri tongokotua do imam om iri tongotulun di monunuduk do Undang-undang Ugama siri soturimpa do mangadaawa di Yisus. 11Om timpuunno dii iIrudis om i tongosoujorjo do monginsasana di Yisus om au aakan tasu iri tinangaran diolo. Om sobungai dii diolo i Yisus diri sabung aandai songkilop-kilop,#23:11 songkilop-kilop: songkudidilop irad di sabung do raja, om pootodo nogi dii kavagu si di Pilatus. 12Om mantad tadau diri mikawan dii marong i Pilatus om iIrudis, maka di pogulupo au iolo kopiandai.
Pinutusan do Patajon i Yisus
(Mat. 27:15-26; Mar. 15:6-15; Yaya 18:38-19:16)
13Om loovono dii di Pilatus iri tongokotua do imam, om i tongokotua vokon do tulun Joudi om iri tongotulun toguu. 14Om pitangar isido diolo do ka, “Inovit muju siti dogo iti tulun diri natangar muju do tulun mamalid. Om nosiasatkuno marong Isido siti gotuvang muju, nga ausoi oilaanku kasalaan Disido do irad dino kapangadaawaan muju. 15Om i Raja Irudis nogi nga ausoi oilaanjo kasalaan Disido, sagai pinoguli disido kavagu siti daton.#23:15 daton: ditokou Om sabanar dii ausoi paantakan do patajon Isido. 16Nga gaampo do polobunanku#23:16 polobunan: Antangai Mat. 27:26 Isido, om polobusonku nogi,” kadi Pilatus. 17[Do ontok diri Tadau Tagajo do Paska tongotulun Joudi, misti do palabus i Pilatus iri iso tulun mantad siri jiil.]#Antangai Markus 15:6.
18Nga insan-insaani kasangkat iri tongotulun lumuvap mitangar do, “Patajo nopo Isido, om polobuso dagai i Badabas!” kadiolo. 19Ombo bala iti i Badabas nopo diri nga pinojiil do linumavan do porinta siri Bandar Yorusalim om nakapamatai do tulun.
20Om pitangarpo kavagu i Gobonor Pilatus diolo, do uvang daa isido palabus di Yisus. 21Nga pongoluvap dii iolo do jumawap di Pilatus do ka, “Posolibo nopo tulun dino! Posolibo nopo tulun dino!” ka.
22Om pitangarpo kavagu i Pilatus diolo do kumointolu, “Nokuro bato! Onu iri vinaal Disido di araat do iradon muju dino? Ausoi oilaanku kasalaan do kapamatajan Disido! Nga irad dino ipalabunku noopo Isido, om polobusonku nogi,” kadi Pilatus.
23-24Nga makin nogi do mangkas iolo lumuvap do mononsog monuu di Pilatus pasalib di Yisus. Nga sabap do irad diri vojoo nopo dii disido i tangar diolo. Om putusono dii di Pilatus irad diti sabap au kosisival diolo. 25Om polobuso nogi dii disido iri tulun pokionuon diolo, iri nakaasu si jiil do lumavan di porinta om nakapamatai do tulun. Om suuo dii di Pilatus i tongosoujor mongovit di Yisus do posolibon do pobobos di ginavo diolo, onu noopo kouvangan diolo.
Posolibon i Yisus
(Mat. 27:32-44; Mar. 15:21-32; Yaya 19:17-27)
26Om ontok di ovito di tongosoujor i Yisus mongoi si ponoliban, kosomungai dii diolo iri iso tulun mantad siri kodumaan. Ngaran nopo disido diri nga i Simun, tulun mantad siri Bandar Korini.#23:26 Bandar Korini nopo nga siri Vonuvo Libia. Om pajalo dii diolo i Simun monimban di salib di Yisus do sinumusuut di Yisus mampanau. 27Om okonko nokuyak-kuyak i tongotulun do minaja di Yisus, om kivaro nogi i tongotongondu do moginupus mogiad Disido. 28-29Nga kovilino dii i Yisus di tongotongondu om pitangarno do ka, “Oi tongotongondu do Yorusalim, ondomo mujuno, kivaropo kosusaan rumikot siti vonuvo do insan tadau, om ontok diri mitangar iri tulun do irad diti, ‘Gaampo dii i tongondu di au minaganak om iri au nosusuvan do tanak nga ososogit,’ kadino diolo. Jadi ada kouno pogiad Dogo, nga iadai mujuno ino kojuvan muju kondiri om i tangaanak muju. 30Om ontokno diri kosusaan do sikikiros iri tongotulun om tumimpuun iolo mitangar do ka,
‘Oou tongokulud tasavat, runtu kouno, onsitai ikoino.
Oou tongokulud tosuribak, olitai ikoino,’ kadino diolo.#Antangai Usia 10:8.
31Do nong mamatai iolo Dogo, i tulun di auso duso, irad di kaju do ovijaupo om sorobon, om ikovupo i tulun di kiduso, makin nogi do pasansarawon irad do kaju norujou?” kadi Yisus.
32Om kivaro nogi duvo tulun taraat natangkap do oviton diolo popiontokon di Yisus do mamatai. 33Om korikot diri iolo siri iso pantok i ponguranan do ‘Tulang do Tulu’, om sirino dii pinosaliban diolo di Yisus om i duvo tulun taraat diri siri ponong gibang om vanan di Yisus. 34Om sambayangno dii i Yisus do ka, “Ou Amo,#23:34 Amo: Apa ompunaino kasangkat iti tongotulun, do aui nokoilo iolo nong onuu i vaalonjo,” kadi Yisus. Om iri nopo tongopakaian di Yisus nga pinoibabaagi di tongosoujor do mamakai iolo do vatu do kitanda manandop nong isai kaanu diri pakaian Disido.
35Nga ontok nopo diri om oguu marong i tongotulun songingkakat siri do songontong-ontong di Yisus. Nga mitangar i tongokotua do tulun Joudi do monginsasana Disido do ka, “Kovijau Isido do kojuvan do tulun vokon, nga nong oinomod do Isidono i Koristus, i pinili do Kinoringan, nga antanganpo dino maino nong kovijau Isido do kojuvanJo kondiri,” kadiolo.
36Om i tongosoujor nogi nga mongintotori di Yisus, om potunui di vaig anggur diri opodi do nipososop daa Disido. 37Om mitangar iolo do, “Nong oinomod do RajaKo do tulun do Joudi om pisimvijauno kondiri!” kadiolo.
38Om kivaro tinulis siri salib si sungguvon tulu di Yisus do, “Itino i Raja do tulun Joudi,” ka.
Rinumorogo i Tulun Taraat
39Om iri nopo kotiso tulun taraat pinasalib nga maja-vaja do mangararaat di Yisus do ka, “Nong oinomod do i KoristusKo pinili do Kinoringan, pisimvijauno kondiri om vijauon ikoi!” ka.
40Nga tinogur dii di koduvo tulun taraat iri kotiso do ka, “Aupo rumosiko do irad diti niukum dato om au naku rumosiko do Kinoringan? 41Nga kito nopo diti om apatutno do ukuman irad diti do isuli diri karaatoto. Nga Isido nopo okonko kivaro kasalaan,” kadi koduvo tulun.
42Om pitangar dii isido do, “Yisus, ondomo okuno Dika ontok do monguasaKo!” kadisido.
43Om jawapno dii i Yisus disido do ka, “Mitangar Oku dika, tadaui maino do korunggumko Dogo soi Kabun Pirdaus soi vonuvo koduvo,” kadi Yisus.
Kinapatajan di Yisus
(Mat. 27:45-56; Mar. 15:33-41; Yaya 19:28-30)
44Om ontok nopo diri nga pukul duabalas tanga tadau kama iri, om tigogi do tinumuvong pointongkop-tongkop di vonuvo gosob do pukul tiga minsosodop, 45do au sinumidang i tadau. Om ontok diri nopiduvo do nokinis kondiri i tabir di akapal iri si pintangaan di Valai Sasambayangan Tagajo. 46Om luvapno dii i Yisus do opuod do ka, “Ou Amo,#23:46 Amo: Apa pataakonKuno Dika iti tatodKu!” ka, om katangar nopo dii Disido irad diri om noidu nogi dii iri ginavoJo.
47Om kaantangai nopo dii di kotua do soujor do irad diri, turus pangarajou isido di Kinoringan do ka, “Oinomodi bala do tulun diti abanar!” ka. 48Nga oguu dii i tongotulun minuntun siri do minongoi mongontong diri kinosoliban di Yisus. Om kaantangai nopo dii diolo do napataino i Yisus nga ulino dii iolo mivaja do muntung-duntung di kangkabjo do osusa ginavo do napataino i Yisus. 49Om kasangkat di tongotongondu diri minaja di Yisus mantad soi Vonuvo Golilia om i tongotulun vokon diri koubasan Disido nga songingkakat siri sodu om koontong kasangkat diri salaidpo di Yisus do poinsalib.
Linobong i Kojuvan di Yisus
(Mat. 27:57-61; Mar. 15:42-47; Yaya 19:38-42)
50Om kivaro iso tulun, ngaranjo nopo nga i Jusip. Isido nopo nga isono tulun di Pinonguntunan di Tongokotua. Om isido nopo nga tulun do aandai om abanar. Kampung di Jusip nopo nga Bandar Romotia siri vonuvo do tulun Joudi. 51Om mindad-indad isido diri tadau do porintawon di Kinoringan i tongotulunJo. Nga ontok diri tomodon di pinonguntunan di Tongokotua do mamatai di Yisus, nga au minangakun i Jusip di koputusan diolo diri. 52Om ongoino dii samung isido di Gobonor Pilatus do mokilila mongongoi di kojuvan di Yisus. 53Om polintuunono dii disido i kojuvan di Yisus, lopotono dii di kain do opurak, om poosuono dii i kojuvan siri lobong di aupo insan labangai. Om lobong nopo diri nga saralom diri vatu linuvangan.
54-55Om iri nopo i tongotongondu diri minaja di Yisus mantad soi Vonuvo Golilia di pogulu om minaja nogi di Jusip do minongontong diri lobong di Yisus. Om antangai nogi dii diolo nong potingkukuro i Jusip papaatag diri kojuvan di Yisus. Om tadau nopo diri nga Ari Lima iri nokoontok do Kinosiapan di Tulun Joudi do Balanja diri tadau tagajo diolo, om sodop diri nga kotimpuunan di Tadau Koingkajadan. 56Om kouli nopo diri i tongotongondu om pongorukutno dii iolo di tongorampa-rampa om lana di aangod i tavau do ponuntug di kojuvan di Yisus. Om minindadano dii iolo salaid diri Tadau Koingkajadan do maja diri Undang-undang Ugama do Joudi.
လက်ရှိရွေးချယ်ထားမှု
Lukas 23: LabukPKV
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 1995, Wycliffe Bible Translators, Inc. All rights reserved.
