LUCAS 21

Sapalla mamagu Diosman carashcamanda

(Mar. 12:41-44)

1Jesusca, Diosman ofrendata churana cajonbi, charij runacuna carashpa culquita churanajujtami ricujurca. 2Shinallata, ninan huajcha shuj sapalla mamagupash, ishcai uchilla culquiguta churajujtami ricurca. 3Shina ricushpami cashna nirca:

“Na llullashpami cangunataca cashna nini: Cai sapalla mamaguca, ninan huajcha cashpapash, tucuicunata yalimi cararca. 4Tucui chai gentecunaca, puchutallami Taita Diosman churanajurca. Ashtahuangarin paica, ninan huajcha cashpapash, micunaguta randingapa charijushcatami, tucuillata churarca” nircami.

Diospaj huasita urmachishpa tucuchinata Jesús villashcamanda

(Mat. 24:1-2; Mar. 13:1-2)

5Diospaj huasitaca, juyailla rumicunahuan rurashcata, Diosman imatapash carashpa juyailla alichishcatami, huaquingunaca parlanajurca. Paicunatami Jesusca cashna nirca:

6“Canguna ricunajuj chaicunaca, chai llaquichina punlla chayajpica, shuj rumillapash shuj rumi jahuapi na saquiringachu. Tucuillami tucuchi tucunga” nircami.

Tucurimui punlla nara chayamujpillatami ninan llaquicunaca tiyanga

(Mat. 24:3-28; Mar. 13:3-23)

7Chai jipami cashna nishpa tapurca:

“Yachachij, ¿ima punllata caicunaca pactanga? ¿Imata ricushpata, Can villashcacuna ña pactamujushcataca yachana canchi?” ninajurcami.

8Shina nijpimi Jesusca cashna nirca:

“Ricuichi, na umachi tucunachu canguichi. Ashtacacunami: ‘Ñucami, Cristo cani’ nij tucushpami, Ñuca shutipi shamunajunga. Paicunami: ‘Cunanga, chai punllacunaca ñami chayamujun’ ninajunga. Ashtahuangarin paicunataca, na catinallachu canguichi. 9‘Ninan macanajuicunata, llactapi causajpurallatami macanajunajun’ nijta uyashpapash, na manllarinachu canguichi. Chai llaquicunaca, punda pactanapachami. Chashna cashpapash, tucurimui punllacunaca nara chayamungachu” nircami.

10Shinallata, cashnatapashmi nirca:

“Shuj llactahuan, caishuj llactahuanmi macanajunga. Mama llactapurapashmi macanajunga. 11Alpa mama ninanda chujchushpa tucuchijuipash, ninan yarjaipash, millai ungüicunapash, shuj shuj llactacunapimi tiyanga. Shinallata, jahua pachamandaca, jatun manllanayai imapash na ricushcacunami ricurimunga. 12Chashna llaquicunaca nara tiyajpillatami, cangunataca japishpa, catiriyashpa llaquichinajunga. Shina rurashpami, sinagogacunapi, prezuna huasicunapipash cangunataca churagringa. Ñucata catinajushcamandami, jatun mandajcunapajman, llactata mandajcunapajmambash apai tucunguichi. 13Chaipimi, paicunamambash Ñucamanda villai ushanguichi. 14Cangunata apajpica: ‘Ñucanchita cacharichun ¿imatashi nishun?’ yashpaca, na chaitara punda yarinachu canguichi. 15Ñucami, canguna imata rimanatapash, ali yachaitapash carasha. Shinamandami, cangunata fiñajcunaca na chashnachu nishpa upallayachitaca na ushanga. 16Cangunataca, cangunapaj taitacunallata, huauquicunallata, ayllucunallata, cangunapaj cumbacunallata, huañuchijcunaman japichijpimi, huaquingunataca huañuchinga. 17Ñuca shutipi catinajujpimi cangunataca, tucui gentecuna na ricunayachinga. 18Ashtahuangarin cangunapaj umamandaca, shuj ajchallapash na chingangachu. 19Chai llaquicuna shamujpipash, shinlli catishpallami quishpiri ushanguichi.

20Jerusalenda, ashtaca macanajuj runacuna, chaupipi churashcata ricushpami, chai llactata tucuchina ña chayashcata yachanguichi. 21Judea llactapi causajcunaca, urcucunapi pacajungapa richun. Jerusalenmandapash, tucuilla richun. Pambacunapi purinajujcunapash, chai puebloman cutinga ama tigrachun ninimi. 22Chai punllacunapica, quilcachishca Shimipi villajujshna, ninanda llaquichina punllacunami pactamunga. 23Chai punllacunapica, vijsayuj huarmicunapash, llullu huahuata viñachinajun huarmicunapash, ¡aij imachari tucunga! Cai llactapi causajcunata Dios ninanda fiñashpa llaquichijujpimi, ninan llaquicunata apanajunga. 24Paicunataca, espadahuanmi huañuchinga. Shinallata, tucui llactacunamanmi prezu apanajunga. Jerusalendaca, na Israelcunami sarushpa tucuchinajunga. Na Israelcunata llaquichina punllacuna pactangacamanmi cashna canga.

Runa Aichayuj tucushca Jesús tigramunamanda

(Mat. 24:29-35,42-44; Mar. 13:24-37)

25Chai jipami indipipash, lunapipash, luzerocunapipash imapash ñapash ricuringa. Cai pachapi causajcunaca, mama cucha ninanda huacashpa, caiman chaiman shitarijunda ricushpami ninanda manllarishpa imata ruraitapash na ushanajunga. 26Cai pachapica, manllanayai llaquicuna ashtahuan tiyanata yachashpami, gentecunaca ninanda manllarishpa ña huañugrijujshna tucunajunga. Shinallata, jahua pachapi ninan ushaihuan tiyajcunapash, ninandami cuyunga. 27Chai jipallami, Runa Aichayuj tucushca Ñucataca, fuyupi ninan ushaihuan, punchapamba shamujujta ricunajunga. 28Chashna llaquicuna ricuri callarijpica, cangunata quishpichina punlla chayamushcata yachashpami, ashtahuan shinlli tucushpa vichai ricuna canguichi” nircami.

29Cashnatapashmi yarichishpa yachachijurca:

“Higo yuratapash, shuj yuracunatapash ricuichi: 30Chai yuracunapi fangacuna jundajta ricushpaca, rupai punllacuna chayamuntami yachanguichi. 31Chashnallatami chai tucui llaquicunata ricushpaca, Taita Dios mandanaca ñapacha chayamujujta yachana canguichi. 32Na llullashpami cangunataca cashna nini: Cunan causajcuna nara huañujpillatami, Ñuca villajushca shimicunaca pactanga. 33Jahua pachapash, cai pachapash tucuringami, ashtahuangarin Ñuca rimashca shimicunaca napacha tucuringachu. 34Ricuichi, cangunaca aliguta yarishpami causana canguichi. Cangunaca, ninanda micushpa, machashpa, cai pachapajtalla rurana munaihuan, shungupi chai yuyaicunalla jundaca na canachu canguichi. Ñuca shamuna punllara cungashcapi, cangunata japin shamunman. 35Chai punllami, tucui cai pachapi causanajun gentecunataca, tuglla japijshna tucuillata japinga. 36Cangunaca na puñushpami, Diostaca mañariana canguichi. Shina causashpami, chai tucui llaquicuna japij shamunamanda quishpirishpa, Runa Aichayuj tucushca Ñucapaj ñaupajpi shayarimui ushanguichi” nircami.

37Punllacunaca, Jesusca Diospaj huasipimi yachachijurca. Tutayajpica, Olivo lomapimi pacaringapa rij carca. 38Diospaj huasipi Jesús yachachijujta uyangapaca, tucui gentecunami tutamandata tandanajunajun carca.

လက်ရှိရွေးချယ်ထားမှု

LUCAS 21: QVI16

အရောင်မှတ်ချက်

မျှဝေရန်

ကူးယူ