LUCAS 22
22
Jesusta japingapami pacalla rimarinajushca
(Mat. 26:1-5,14-16; Mar. 14:1-2,10-11; Juan 11:45-53)
1Levadura illaj tandata micuna pascua punllami, ña chayamujurca. 2Mandaj sacerdotecunapash, mandashca Shimita yachachijcunapash, gentecunata manllashpami, Jesusta imashna japishpa huañuchinata parlarinajurca. 3Shina cajpimi, Jesuspaj chunga ishcai yachajujpuramanda, Judas Iscariotepaj shunguman Satanasca yaicurca. 4Judasmi, mandaj sacerdotecunapajman, Diospaj huasita ricujcunata mandajcunapajman rishpa, Jesusta imashna paicunaman japichinata villajurca. 5Paicunaca ninanda cushijushpami culquita cungapa ari ninajurca. 6Shina ari nishpami, gentecunamanda huashalla, imashna Jesusta japichinata yariajlla, paica purijurca.
Apunchi Jesusca, Pai huañushcata yarishpa micuchunmi callarichishca
(Mat. 26:17-29; Mar. 14:12-25; Juan 13:21-30; 1 Cor. 11:23-26)
7Levadura illaj tandata micuna punlla chayajpimi, pascua punllata yarishpa llamaguta huañuchina carca. 8Jesusca Pedrotapash, Juandapash:
“Pascua punllapi micungapa alichigrichi” nishpami cacharca.
9Paicunaca:
“Pascua punllapi micungapaca, ¿maipita alichinajuchun munangui?” ninajurcami.
10Shina tapujpimi Jesusca cashna nirca:
“Jerusalén puebloman canguna chayanajujpica, yacu funduta aparishca shuj runagumi tuparingapa llujshinga. Paitaca huasiman yaicungacaman, catinguichilla. 11Chai huasiyuj taitataca, cashna ninguichi: Ñucanchita Yachachijmi, canda cashna nipan: ‘Pascua punllapi micunataca, ¿maijan ucupita Ñuca yachajujcunandi micuna capanchi?’ nipanmi. 12Shina nijpimi chai huasiyuj taitaca, jahuapi ña alichishcalla, shuj jatun ucuta ricuchinga. Chaipica, ñucanchi micungapa alichinguichilla” nishpami cacharca.
13Paicuna rishpaca, Jesús imashna nishcashnami tarigrirca. Chaipimi, pascua punllapi micungapa alichinajurca. 14Ña micuna chayajpica, Jesusca apostolcunandimi, micungapa tiyarirca. 15Chaipimi cashna nirca:
“¡Nara Ñuca llaquichi tucushpallata, cai pascua punllapi cangunahuan micungapaca, ninandapachami munarcani! 16Cangunataca cashnami nini: Taita Dios mandajuj llactapi micuna punlla chayangacaman, cutinga na micushachu” nircami.
17Jesusca copata japishpa, Diosta pashi nishca jipaca cashnami nirca:
“Cai copata japishpa, cangunapura asha ashagu ufiaichi. 18Cangunataca cashnami nini: Uva vinotaca, Taita Dios mandajpi causana punlla chayamungacaman, cutinga na ufiashachu” nircami.
19Jesusca, tandata japishpa, Diosta pashi nishpa chaupishpa, carashpami cashna nirca:
“Caica, cangunapaj ali cachun chaupirina Ñuca cuerpomi. Ñucata yarishpa, cashnata rurashpa catinguichilla” nircami.
20Shinallata, micushca jipa copata japishpaca, cashnami nirca:
“Cai vino copaca, cangunapaj ali cachun jicharina Ñuca yahuarmi. Caihuanmi Diosca, gentecunahuan shuj mushujta ari nishcata pactachigrin. 21Ashtahuangarin Ñucata japichigrijuj runaca, Ñucahuanmi caipi micushpa tiyajun. 22Runa Aichayuj tucushca Ñucataca, chashnapacha pactana cajpimi huañuchinajunga. Ashtahuangarin, Ñucata japichij runaca, ¡aij imachari tucunga!” nircami.
23Jesús chashna nijpimi:
“¿Maijanshi paitaca japichigrinchi?” nishpa, paicunapura nirinajurca.
Mandangapaca, shujcunapajta ruraj tucuna cashcamanda
24Shinallata paipurami:
“¿Maijanshi ñucanchimandaca ashtahuan jatunyachi tucushun?” nirinajurca. 25Ashtahuangarin Jesusca, paicunataca cashnami nirca:
“Llactacunata jatun mandajcunami, llactacunapi causajcunataca, ninanda mandashpa charin. Shina cashpapash paicunata mandajcunaca: ‘Ali mandajcunami’ nijpimi causanajun. 26Ashtahuangarin cangunaca, na chashna causanachu canguichi. Cangunapurapi maijambash punda cashpaca, jipa huambrashnalla cachun ninimi. Mandaj cashpapash, shujpajta ruraj runashnalla cachun ninimi. 27Shina cashpaca ¿micungapa tiyarinllu jatun canga? Na cashpaca, ¿micunata yalichijujchu jatun canga? ¿Nachu micungapa tiyarij jatun canga? Ashtahuangarin Ñucami, cangunapurapica shujpajta ruraj runashna cani. 28Ashtahuangarin, cangunami ima llaquicuna japijpipash Ñucahuan pacta purishcanguichi. 29Ñucami cangunaman shuj mandanata cuni. Ñuca Taita, Ñucaman cushcashnallatami cuni. 30Ñuca mandajuj llactapi Ñucahuan tiyarishpa micugrichun, ufiagrichunmi chashna carani. Mandangapa tiyarinapi tiyarishpami, chunga ishcai Israel ayllucunataca alita na alita rurashcatapash ricuchinguichi” nircami.
Jesusca, Pedrotaca: “Na rijsinichu nihuanguimi” nishcami
(Mat. 26:31-35; Mar. 14:27-31; Juan 13:36-38)
31Apunchi Jesusca cashnatapashmi nirca:
“Simón, Simón, Satanasca cangunataca, trigotashna chafsingapami ña mañagrishca. 32Ashtahuangarin, Ñucata crishpa aliguta catichunmi, canmandaca Diosta ninanda mañarcani. Ñucata aliguta crishpa cutin tigrarishpaca, cambaj huauquicuna Ñucata shinllipacha crishpa catichun yachachipangui” nircami.
33Shina nijpimi paica, cashna nirca:
“Apunchi Jesús, na prezuna huasimanlla Canhuan ripashachu. Ashtahuangarin, huañungapapash Canhuan ripashallami” nircami.
34Shina nijpimi Jesusca cashna nirca:
“Pedro, canga cunan tuta nara gallo candajpillatami, Ñucataca quimsacaman ‘na rijsinichu’ nigrihuangui” nircami.
“Cucabita, culquita, espadata apaichi” nishcami
35Paipaj yachajujcunataca cashnami nirca:
“Cangunataca, cucabi muchilatapash, culqui muchilatapash, chaquipi churajunatapash ama apashpa richunmi mandarcani. Shina cachajpica, ¿imagupash illajchu purircanguichi?” nishpami tapurca.
Shina tapujpica:
“Imapash na illaparcachu” ninajurcami.
36Shina nijpimi, paicunata cashna nirca:
“Ashtahuangarin cunanga, cucabi muchilatapash, culqui muchilatapash apanguichilla. Espadata maijambash na charishpaca, jahualla churajunata jatushpa randinguichi. 37Cangunataca, cashnami nini: Dios quilcachishcapica: ‘Na alita rurajcunahuanmi tandachishca canga’ nijunmi. Chaica Ñucapi pactanarami. Ñucamanda imata villashpa quilcashcapash, pactanapachami” nircami.
38Shina nijpimi, Paipaj yachajujcunaca:
“Ishcai espadata ñami charinchi, Apunchi Jesús” ninajurca.
Shina nijpimi, Jesusca:
“¡Shinalla saquichi!” nirca.
Jesusca Getsemaní lomapimi Diosta mañajushca
(Mat. 26:31-35; Mar. 14:27-31; Juan 13:36-38)
39Jesús chaimanda llujshishpaca, Olivo lomaman rishpa purij cashpami, chaiman rirca. Paipaj yachajujcunapashmi catishpa rinajurca. 40Chaiman chayashpaca:
“Cangunata ama na ali yuyaicuna japichun, Diosta mañaichi” nircami.
41Shina nishpallami, paicunapaj ñaupajmanda rishpaca, rumita shitajpi urmanacamajshna rishpa, Diosta mañangapa Jesusca cungurirca. 42Paica cashna nishpami mañajurca:
“Ñuca Taitalla, Can munashpaca cai jayajta ufiajshna llaquita apanataca anchuchipai. Ashtahuangarin, ama Ñuca munashcataca rurapaichu, Cambaj munashcata pactachipangui” nircami.
43Shina mañajujpimi, jahua pachamanda shuj ángel ricurishpa shinllichirca. 44Paica, ninandapacha llaquirishpami, Diostaca ashtahuan mañajurca. Shina mañajpimi, jumbipash yahuarshnalla alpaman shutujurca. 45Shina mañajushpa jatarishpaca, Paipaj yachajujcunapajman shamushpami, llaquihuan puñushpa yalishcata japij shamurca. 46Paicunataca, cashnami nirca:
“¿Imashpata puñunajunguichi? Cangunata ama na ali yuyaicuna japichun, jatarishpa Diosta mañaichi” nircami.
Jesusta prezu apangapa japishcamanda
(Mat. 26:47-56; Mar. 14:43-50; Juan 18:2-11)
47Jesús chashna nijujpillatami, chunga ishcaipuramanda, Judasca ashtaca gentecunapaj ñaupapi shamujurca. Paimi Jesusta, muchangapa quimirirca. 48Shina rurajpimi Jesusca cashna nirca:
“Judas, ¿Runa Aichayuj tucushca Ñucataca, muchashpachu japichihuangui?” nirca.
49Chaipi paihuan pacta shayanajushpami, Jesusta imata ña ruragrinajujta ricushpaca:
“¿Caicunataca, espadahuan chugrichishunllachu Apunchi Jesús?” ninajurca.
50Shina nishpallami, paicunapuramanda shuj runaca, mandaj sacerdotepajta ruraj runataca, ali maquiman rinrita fitirca. 51Shinamandami Jesusca cashna nirca:
“¡Ña shinalla saquichi!” nishpami, chai runapaj rinripi tacarishpa alichirca.
52Jesusta prezu apangapaca, mandaj sacerdotecunapash, Diospaj huasita ricujcunata mandajcunapash, mandaj ancianocunapashmi shamushca carca. Paicunatami Jesusca cashna nirca:
“¿Shuhuata japingapashnachu espadacunahuan, caspicunahuan shamunguichi? 53Cangunahuan punllandi Diospaj huasipi cajpipash, na japishpami cunanra Ñucata fiñashpa japij shamushcanguichi. Ashtahuangarin, yana tutapi mandajuj yarichijpimi cunanga cashna shamushcanguichi” nircami.
Pedroca: “Jesusta na rijsinichu” nishcami
(Mat. 26:57-58,69-75; Mar. 14:53-54,66-72; Juan 18:12-18,25-27)
54Jesusta japishpaca, mandaj sacerdotepaj huasimanmi apanajurca. Ashtahuangarin Pedroca, caru carullami catishpa rijurca. 55Chai huasi chaupi patiopi ninata japichishpa muyundi tiyarinajujpimi, Pedropash paicunahuan tiyarirca. 56Chai nina ñaupapi tiyajujpimi, shuj huarmi Pedrota ali ricushpa, cashna nirca:
“Cai runapashmi, chai runahuan purijurca” nirca.
57Ashtahuangarin paica:
“Jala, chai runataca rijsitapash na rijsinica” nishpami llullarca.
58Chai jipallami, shuj runapash Pedrota ricushpaca:
“Cambashmi, chai runata catijpurallata cangui” nirca.
Shina nijpimi Pedroca:
“Jala, ñucaca na canichu” nirca.
59Chai jipallami, shuj runapash shinllitapacha cashna nirca:
“Cai runatapashmi, chai runahuan purijujta ricurcani. Paipash Galilea llactamandami” nircami.
60Shina nijpimi, chai runataca Pedroca:
“¿Cangarin, imatachari nijunguipash? na yachanichu” nirca.
Chashna nijujpillatami, galloca ñapash candarca. 61Shina candajhuanmi Apunchi Jesusca, Pedrota tigrarishpa ricurca. Shina ricujpimi, Apunchi Jesús villashca shimicunata yarirca. Jesusca, cashnami nishca carca: “Narapash gallo candajpillatami, canga Ñucataca quimsacaman, ‘na rijsinichu’ nigrihuangui” nishcami carca. 62Shina yarishpami, Pedroca canllaman llujshishpa, ninandapacha llaquirishpa huacajurca.
Jesustaca na alicachishpami astinajushca
(Mat. 26:67-68; Mar. 14:65)
63Jesusta prezu charinajuj runacunaca, pujllashpa asishpami huajtanajurca. 64Paicunaca, Jesuspaj ñavita huatashpami:
“Ñavipi huajtashpaca ¿Pita huajtarcanchi? villayari” ninajurca.
65Jesustaca, ashtahuan na alicachishpami, shimi llujshishcata rimanajurca.
Mandajpuralla tandanajushcapaj ñaupajmanmi, Jesustaca apashca
(Mat. 26:59-66; Mar. 14:55-64; Juan 18:19-24)
66Ña punllayajpimi, Israelcunata mandaj ancianocunapash, mandaj sacerdotecunapash, mandashca shimita yachachijcunapash tandanajurca. Paicunami, mandajpuralla tandanajushcapaj ñaupajman apanajurca. Chaipimi cashna ninajurca:
67“¿Canllu, Cristo cangui? villayari” ninajurca.
Shina nijpimi, paicunata cashna nirca:
“‘Ari chaimi cani’ nijpipash, cangunaca na cringuichimanllu. 68Cangunata Ñuca tapujpipash, upallami canguichiman. Ñucataca na cacharinguichichu. 69Ashtahuangarin Runa Aichayuj tucushca Ñucami, ninan ushaita charij Taita Diospaj ali maquiman cunanmandapacha tiyajusha” nircami.
70Shina nijpimi:
“Shinaca, ¿Canga Taita Diospaj Churipachachu cangui?” nishpa, tucuicuna tapunajurca.
Shina tapujpimi Jesusca:
“Ñuca chaipacha cajtaca, cangunallatami ninajunguichi” nirca.
71Shina nijpimi, paicunapura cashna ninajurca:
“¿Imatapash ashtahuan yachangapa munanchirachu? Paipaj shimihuanllata chashna nijujtaca, ñami uyarcanchi” ninajurcami.
လက်ရှိရွေးချယ်ထားမှု
LUCAS 22: QVI16
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
