LUCAS 17
17
Juchapi urmachinaca, jatun llaquimi
(Mat. 18:6-7,21-22; Mar. 9:42)
1Jesusca, paipaj yachajujcunatami cashna nirca: “Nitijachijshna pandachinaca tiyangapachami. Ashtahuangarin, maijan pandachijca, ¡aij imachari tucunga! 2Maijandapash cai huahuagushna Ñucata crijcunata pandachijcunataca, jatun molino rumita cungapi huatashpa, mama cuchapi shitashpachari ashtahuan ali canman. 3Cangunallatami aliguta yarina canguichi. Maijan crijpash, canda fiñashpa juchata rurajpica, shinllita rimangui. Pai ninanda llaquirijpica, canda imata rurashcatapash cungashpa ama fiñanguichu. 4Shuj punllallata canchiscaman canda na alita rurashpa llaquichishpa, shinallata: ‘Ninandami llaquiripani’ ningapa canchiscaman shamujpica, perdonanguilla” nircami.
“Ali crishpa catina ushaita ashtahuan carahuai” nishcamanda
5Apostolcunaca Apunchi Jesustaca, cashnami ninajurca:
“Ali crishpa catina ushaita ashtahuan carahuai” ninajurcami.
6Shina nijpimi Apunchi Jesusca, cashna nirca:
“Mostaza muyu canagutallapash crishpaca, cai sicómoro shuti quiruta: ‘Sapindi llujshishpa, mama cuchapi shayaringapa ri’ nijpica, rinmanllami.
Mandaj runapajta ruraj imatalla ruranamanda
7Cangunami, yapushpa causaj, huagracunata michishpa causaj shuj runaguta charinguichiman. Pambamanda pai tigramujpica, ¿maijanda: ‘Shamupai, micungapa caigupi tiyaripai’ ninguichiman? 8¿Nacha ashtahuangarin: ‘Micunata ucha yanushpa, ñuca micuchun ufiachun carahuai, chai jipaca, cambash micungui, ufianguillami’ ninguichiman? 9¿Tucui mandashcata rurajpipash, chai runagutaca, pashi ninmanllu? Na chashna ninmanllu yanimi. 10Shinamandami cangunapash, imata rurachun mandashcata tucuita pactachishpapash: ‘Ñucanchica, imata ashtahuan ruraitapash na ushajcunami canchi. Imata rurana cashcatallami rurarcanchi’ ninami canguichi” nircami.
Lepra ungüihuan huañunajuj chunga runacunata alichishcamanda
11Jerusalenman Jesús rijushpaca, Samaria llactahuan, Galilea llactahuan chaupitami yalijurca. 12Shuj uchilla llactaman Jesús yaicujujpimi, lepra ungüihuan huañunajuj, chungapura runacuna tuparimurca. Paicunaca, carupillami shayarinajurca. 13Paicunaca:
¡Yachachij Jesús, ñucanchita llaquihuayari! nishpami caparinajurca.
14Shina caparijpi, Jesús ricushpaca:
“Sacerdotecunaman ricuchingapa richi” nircami.
Shina nijpi rinajushpallatami, ñapash ali tucushca carca. 15Shinamandami, ali tucushcapuramanda shuj tigramushpaca, Taita Diosta ninanda alicachishpandi Jesuspajman chayamurca. 16Paica, Jesuspaj ñaupajpi cungurishpami, alpaman chayajta cumurishpa, pashi nijurca. Chai runaguca, Samaria llactamandami carca. 17Chaimi Jesusca, cashna nirca:
“Lepra ungüimanda ali tucushcacunaca, ¿nachu chungapura carcanguichi? ¿Maipita iscunpuracunaca? 18Taita Diosta: ‘Aligumari cangui’ ningapaca, ¿nachu maijambash tigramuna carca? ¿Shuj llactamanda cai runagullachu tigramuna carca?” nircami.
19Paitaca cashnami nirca:
“Jatarishpa rilla, canga, Ñucata crishcamandami quishpirishcangui” nircami.
Dios shamushpa mandanamanda
(Mat. 24:23-28,36-41)
20“Taita Dios mandajpi causanaca, ¿ima punllata chayamunga?” nishpa, huaquin fariseocuna tapujpimi Jesusca, cashna nirca:
“‘Taita Dios mandajpi causanaca, imatapash ricuchishpami shamunga’ yanguichiman. 21‘Caipimi, chaipimi mandajun’ nishpaca pipash na villangachu. Ricuichi, Taita Dios mandajpi causanaca ñami cangunahuan” nircami.
22Shina nishpallami, Paipaj yachajujcunataca cashna nirca:
“Runa Aichayuj tucushca Ñucataca: ‘Shuj punllagullatapash cangunata mandajujta ricunayachina punllacunami chayamunga. Ashtahuangarin, na ricushpami causanguichi’. 23Cangunataca: ‘Caipimi, chaipimi mandajun’ ninajungami, chashna nijpipash, na catishpa rinallachu canguichi. 24Ashtahuangarin, Runa Aichayuj tucushca Ñuca tigramuna punllapica, tucui cai pacha muyundita rayu punchapamba shitamunshnami tucuicuna ricujta shamusha. 25Ashtahuangarin pundaca, cunan cai viñaicuna ninanda na ricunayachishpa llaquichijpi, llaquita apanarami cani. 26Runa Aichayuj tucushca Ñuca shamui punllacunapica, ñaupa taita Noé causajui punllacunapi tucushcashnami tucunga. 27Chai punllacunapica, jatun huambuna huasiman Noé yaicungacamanmi, gentecunaca micushpa, ufiashpa, cazarashpa, cazarachishpa causanajurca. Shina causanajujpimi, Taita Diosca yacuhuan tucuilla tucuchirca. 28Shinallatami, Lotpaj punllacunapipash, micunajurca, ufianajurca, randinajurca, jatunajurca, tarpunajurca, huasichinajurcami. 29Ashtahuangarin Sodoma pueblomanda Lot llujshijui punllapica, jahua pachamandami ninahuan, azufrehuan tamiamushpa tucuillata tucuchirca. 30Chashnallatami, Runa Aichayuj tucushca Ñuca tigramui punllapipash tucunga. 31Chai punllapica, huasi jahuapi cashpaca, huasi ucumanda imatapash apangapa, ama uriajuchun ninimi. Pambapi purijushpapash, huasiman ama tigrachun ninimi. 32Lotpaj huarmi ima tucushcatapash yarinami canguichi. 33Maijambash paipaj causaita quishpichingapa munashpaca, chingaitami chingagringa. Ashtahuangarin, paipaj causaita na llaquishpa huañushpaca, quishpiringami. 34Chai tutapica, ishcaipurami shujlla camapi puñunajunga. Paicunataca shujtallami apanga, shujtaca saquingami. 35Shinallata ishcai huarmicunami cutanajunga. Paicunatapash shujtallami apanga, shujtaca saquingami. 36Ishcaipurami, pambapi purinajunga. Paicunatapash shujtallami apanga, shujtaca saquingami” nircami.
37Shina nijpimi, ¿maipita chashna tucunga, Apunchi Jesús? nishpa tapunajurca.
Shina tapujpimi Jesusca cashna nirca:
“Huañushcacuna maipi sirijpipash, chaipimi angacuna jundanga” nircami.
လက်ရှိရွေးချယ်ထားမှု
LUCAS 17: QVI16
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.