JUAN 3
3
Nicodemohuan, Jesushuan parlashcamanda
1Fariseopuramanda Nicodemo shuti runami tiyarca. Paica, judiocunata mandajpuramandami carca. 2Chai runami, Jesuspajman tuta shamushpa, cashna nijurca:
“Rabí, Candaca, Taita Dios cachamujpi yachachij shamushcatami yachanchi. Taita Dios, na Paihuan cajpica, Can imata juyailla rurashpa ricuchishcashnaca, pipash na rurai ushanmanllu” nijurcami.
3Shina nijpimi Jesusca, cashna nirca:
“Napacha llullashpami, candaca cashna nini: Pipash mushujta na huacharishpaca, Taita Dios mandajuj llactataca napacha ricui ushangachu” nircami.
4Shina nijpimi Nicodemoca, cashna nirca:
“¿Imashnata shuj rucu runaca, cutin huacharita ushangayari? ¿Cutin huacharingapaca, mamapaj vijsaman cutin tigrashpa yaicui ushangallachu?” nircami.
5Shina nijpimi Jesusca, cashna nirca:
“Napacha llullashpami, cashna nini: ‘Yacumanda, Diospaj Espiritumanda maijambash na cutin huacharishpaca, Taita Dios mandajuj llactaman yaicuitaca napacha ushangachu’ ninimi. 6Aichamanda huacharishpaca, aichallatami. Shinallata, Diospaj Espiritumanda huacharishpaca, espiritullatami. 7‘Cutin huacharinapachami canguichi’ nishcamandaca, na manllarinachu cangui. 8Huairataca, maita munashcata huairamuntallami uyangui. Maimanda shamujujta, maiman yalijujtapash na yachanguichu. Huacashpa yalijujtallami uyangui. Diospaj Espiritumanda huacharijcunapash tucuilla shinallatami” nijurcami.
9Shina nijpimi, Nicodemoca:
“¿Imashnata chashnaca tucungayari?” nirca.
10Shina nijpimi Jesusca, cashna nirca:
“Canga, Israel llactapi yachachij cashpapash, ¿caitaca nachu yachangui? 11Napacha llullashpami, candaca cashna nini: Imatapash ricushpa yachashcatami, chashnapachami nishpa villanajunchi. Ashtahuangarin, ñucanchi villachishcataca, na uyangapa munashpami causanguichi. 12Cai pachapi tiyajcunamanda villajujpipash na crishpaca, jahua pachapi tiyajcunamanda villajpicarin, ¿imashnata cringuichiyari?
13Jahua pachamanga pipash na rishcachu. Ashtahuangarin, Runa Aichayuj tucushca Ñucallami, jahua pachamanda shamurcani. 14Jichushca pambapi, culebrata rurashpa Moisés huarcurcashnami, Runa Aichayuj tucushca Ñucapash, caspipi huarcui tucunapacha cani. 15Shina cashcamanda, pipash Ñucata crishpaca, na chingaita chingagringachu. Ashtahuangarin causaitami causagringa.
Taita Diosmi, cai pachapi causajcunataca ninanda juyajun
16Taita Diosca cai pachapi causajcunata ninanda juyashpami, Paipaj shujlla Churita caramurca. Pipash Paita crishpaca, na chingaita chingagringachu, ashtahuangarin causaitami causagringa. 17Taita Diosca, cai pachapi causajcunata ninan llaquiman cachangapaca na Paipaj Churitaca cachamurcachu. Ashtahuangarin, cai pachapi causajcunata quishpichingapami cachamurca.
18Maijambash Paita crishpaca, na llaquichi tucungachu. Ashtahuangarin, maijambash na crishpaca, llaquichi tucungapachami. Taita Diospaj Shujlla Churipaj shutita na crishcamandami, chashna llaquichi tucunga. 19Michami, cai pachaman shamurca. Gentecunaca, paicunapaj ruraicuna na ali cajpimi, michata juyangapa randica, yana yana tutapishna causanatara ashtahuan juyarca. Chashna cashcamandami llaquichi tucunata charin. 20Na alita rurashpa causajcunami, michata na ricunayachishpa, chai michataca na chasquishpa causanajun. Paicuna na alita ruranajujpi ama jarcashpa rimachunmi chashna causanajun. 21Ashtahuangarin na llullashpa villashcata pactachijcunami michaman chayamunajun. Taita Dios munashcashna ruranajujta ricuchunmi, chashna pactachinajun” nijurcami.
Bautizaj Juanmi, Jesusmanda cutin villajushca
22Chai jipami Jesusca, Paipaj yachajujcunandi, Judea llactaman rirca. Chai llactapi paicunandi cashpami bautizajurca. 23Juanga, ashtaca yacu tiyajpimi, Salim shuti puebloman chayanalla, Enón shuti pueblopi bautizajurca. Gentecuna paipajman chayamujpimi, paica bautizajurca. 24Juanga, nara prezu japi tucushcachu carca. 25Shuj punllami, Juanbaj yachajujcunahuan, judiocunahuan, Diospaj ñaupajpi mapa illaj canamanda ninanda rimarinajurca. 26Shinamandami, Juanbajman shamushpa cashna ninajurca:
“Rabí, Jordán yacu chimbapi Canhuan purijushca runami, paipajman tucui rijcunata bautizajun. Chai runamandami Canga villajurcangui” ninajurcami.
27Shina nijpimi Juanga, cashna nirca:
“Taita Dios ushaita carajpillami, maijan cashpapash imagutapash ruraita ushan. 28Cangunallatami, ñuca cashna nijushcataca yachanguichi: ‘Na Cristo canichu. Ñaupashpa villachun, cachamushcallami cani’ nijurcanimi. 29Cazarashca cusami huarmihuanga causan. Ashtahuangarin cusapaj cumbaca, paihuan chaipi cashpami, pai rimashcata uyashpa ninanda cushijun. Ñucapash, chai cusapaj cumbashna cashpami ninandapacha cushijuni. 30Paica, ashtahuan ashtahuan jatunyachi tucunatami charin. Ashtahuangarin ñucami, yangalla tucushpa catina cani.
Diospaj Churica, jahua pachamandami shamushca
31Jahua pachamanda shamujmi, tucuitapash yali ushaita charin. Cai pachapi causajca, alpapi tiyajmandallami parlan. Ashtahuangarin jahua pachamanda shamujmi, tucuicunata mandajun. 32Ricushcata uyashcatami, chashnapachami nishpa villajun. Ashtahuangarin, pai villachishcataca, pipash na chasquinllu. 33Pai villashcata chasquijllami, Taita Dios na llullashpa villajujta ricuchijun. 34Taita Dios cachamujpi shamushcami, Diospaj Shimita villajun. Taita Diosca, Paipaj Espiritutaca, na asha ashalla caranllu. 35Taita Diosca, Paipaj Churita ninanda juyashpami, tucui imatapash mandajuchun, Paipaj maquipi churarca. 36Diospaj Churita maijambash crishpaca causaita causanatami charin. Diospaj Churita na crishpaca, napacha causaita causangachu. Ashtahuangarin, Taita Dios ninanda fiñarishpa, llaquiman cachanatallami shuyajunga” nijurcami.
လက်ရှိရွေးချယ်ထားမှု
JUAN 3: QVI16
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
