Juan 5
5
O Jesus sastarel iekhe llene kai nasti phirela
1Mapalal e judiura eslavina e Devleke, ta o Jesus pale llelotar ando Jerusalem. 2Ando Jerusalem pasa o udar kai ikharena le o Udar e Bakrengo, si iek bunari kai ando ebreo ikhardol Betzata, gale si le panch udara. 3Kote chidiniaona but nasuale, korre, bange ta i nasuale kai nasti phirena kai sea inzarde pe phuv ta aduricharena te miskolpe o pai. 4Soke iek suecho nesave droma fuliela ando bunari, ta miskola o pai, ta o lleno kai mai anglal thovelape ando pai, sastola katar po nasualipe. 5Saia kote iek lleno kai cherela tranda ta ojto burs kai saia nasualo. 6Kana o Jesus dikhla le inzardo ta llangla kai cherela but kai saia nasualo, puchla le:
¿Mange te sasto?
7O nasualo phenda leke:
Inai man ko te thovel man ando bunari kana miskolpe o pai. Suako drom kana me llau, avel aver ta thovelpe mai anglal mandar.
8O Jesus phenda leke:
Uste, vazde chi postelia ta phir.
9Isto kote gua lleno sastilo, lia pi postelia ta phirda. A gua llive saia sabado, 10goleke e judiura phende gole lleneke kai sastiloia:#Nej 13.19; Jer 17.21.
Allive si sabado, nasti te inllare chi postelia.
11Gua lleno phenda lenge:
Gua kai sastarda man, isto vou phenda mange: ‘Le chi postelia ta phir.’
12Von puchle le:
¿Ko si gua kai phenda chuke: ‘Le chi postelia ta phir’?
13Gua lleno ni llanela ko sastardaia le, soke o Jesus llelotar maskar e llene kai sea kote. 14Mapalal o Jesus malada le ando cher e Devleko, ta phenda leke:
Dik, sastilan, na cher ios bilache ezgode, te na avel pe tute aver ezgoda ios mai bilachi.
15Gua lleno llelotar ta phenda e judionenge kai o Jesus saia gua kai sastarda le. 16Goleke e judiura murzina pe lete, soke cherela gala ezgode ando sabado. 17A o Jesus phenda lenge:
Mo Dad radil ollikana, ta i me radiu.
18Goleke e judiura ios mangena te mundaren le, soke ni kandela e alava katar o sabado ta i phenela kai leko dad saia o Del, ta cherelape sargo o Del.#Jn 10.30-38.
O gazdaripe katar o Chavo e Devleko
19O Jesus phenda lenge:
Chachimaia phenav tumenge o Chavo nasti cherel niso vou petar, o Chavo cherel prema so dikhel kai cherel leko Dad. Soke sogo cherel o Dad, isto gua cherel o Chavo. 20Soke o Dad volil pe Chave ta sikavel leke sa so cherel, ta mai bare ezgode galendar ka sikavel leke, te sai tumen chudin tumen. 21Soke isto gia sar o Dad llungavel e mulen ta del len zivoto, isto gia o Chavo del zivoto ka vou mangel. 22O Dad ni krisil nika, soke dia kai po Chavo te gazdaril pe kris, 23te blagosin saurre e Chave gia sar blagosin e Dade. Kogo ni blagosil e Chave ni blagosil e Dade kai bichalda le.
24Chachimaia phenav tumenge kai kogo asunel mo alav ta pachala ande gua kai bichalda man, si le zivoto ostade ta ni ka avel proketo, soke katar o meripe nakhlo kai o zivoto. 25Chachimaia phenav tumenge kai avel o llive ta akana si, kana e mule ka asunen o avazi katar e Devleko Chavo, ta gola kai ka asunen leko avazi, ka zivin. 26Soke gia sar o Dad si le zivoto isto ande pete, isto gia dia pe Chave te avel le zivoto ande pete, 27ta dia lete te gazdaril pe kris, soke vou si e manuseko Chavo. 28Na chudin tumen katar gava, soke ka avel o llive kana sa e mule ka asunen leko avazi, 29ta ka liken katar e limoria. Ta gola kai cherdea o lachipe ka usten katar o meripe te len o zivoto, a gola kai cherdea o bilachipe, ka usten katar o meripe te aven proketime.#Dn 12.2.
Niso nasti cherav me mandar
30Me niso nasti cherav me mandar. Me chinav e kris prema so o Dad phenel mange, a mi kris si chachi, soke ni rodau te cherav pe murno, so me cherav si e volia e Dadeki kai bichalda man. 31Te diema orba chachi isto me mandar, tumen phendena kai kojavav. 32A si Aver kai del orba chachi mandar, ta llanav kai so phenel mandar si chachipe. 33Tumen bichalden llenen kai o Juan, ta i vou phenda e chachi orba pala o chachipe.#Jn 1.19-27; 3.27-30. 34A ni trubul man e chachi orba nikaki. Phenav gava te sai aven tumen braduime. 35O Juan saia sargo iek lampara kai phabola ta kletosarela, a tumen mangena te veselin tumen nesavo vreme ande leko villelo. 36Me sai sikavav tumenge kai bichalda man o Dad pala sa e ezgode kai me cherav, ta ni o Juan nasti del orba mai lachi mandar, soke so me cherav si e ezgode kai o Dad phenda mange te cherav, ta achardol pe gola ezgode kai o Dad bichalda man. 37O Dad kai bichalda man phenel e chachi orba mandar, a tumen nikada ni asunden leko avazi ta nikada ni dikhlen le,#Mt 3.17; Mk 1.11; Lk 3.22. 38ta ni muklen leke alava te achen ande tumende soke ni pachan ande gua kai o dad bichalda. 39Tumen roden te sikon ando Pisipe, soke tumen mislin kai ando Pisipe si tumen zivoto ostade. Ta isto kote del orba chachi mandar, 40ta ni kamen te aven mande te avel tumen o zivoto.
41Man ni trubul niko te del orba lachi mandar. 42Soke me pinllarav tumen kai ni volin e Devle. 43Me avilem ando anav me Dadeko, ta ni pachan man. Te aviloa aver isto ando piro anav, gale pachaiena. 44¿A sar ka pachan kana tumenge si drago e llene te den orbe lache tumendar, a na o Del o edino? 45Na mislin tumen kai me ka dosarav tumen angla mo Dad. Si ko te dosarel tumen, o Moises, ande gua kai thoden tumari vera. 46Soke te pachaiena ando Moises, i ande mande pachaiena, soke vou pisisarda mandar. 47A te na pachan ande so pisisarda vou, ¿sar ka pachan ande me alava?
လက်ရှိရွေးချယ်ထားမှု
Juan 5: BACHRO
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Biblia ande chib Romani © Sociedad Bíblica Chilena, 2018.
