Yeso‑ka yo‑yose mai tamine 28
28
Maota‑ya Baoro wine
1Faha widi‑ya oda kobona, tabora oni oda mitawaha, oni Maota tohamaroni.
2Maota‑ya mai wi‑wina mai ati soma, oda‑ya mai kasoma, faha bofe‑ya yifo‑ya mai afokanamaroni, yifo oda hiwanabonehe. Yama siri kitamaroni.
3Oda‑ka yifo‑bone‑ya Baoro sibane, yifo‑ya wasi, yifo‑ya kakame, yifo‑ya wisamaki, yifo hodi‑ya maka foya, Baoro yehe‑ya wainamaroni.
4Baoro yehe‑ya maka waina, fai yehe‑ya wina‑ya Maota‑ka mai awa, mai ibi hiyara,
“Ai owa mai‑ya nanahabano tohe awane, faha‑ya abare, hasirebona, maka ihi aba kanibote nebonane.” Mai ati namaroni.
5Yifo hirini‑ya maka‑ya Baoro korotonamaki, maka komi awiramoneni.
6“Yehe waraneba awane. Hiniya abeba awane.” Mai atibodi ati na,
Mai hiwakatome, mai nimahikani yabo, Baoro‑ka yama komi awira‑ya mai awa,
“Mai‑ka deoso tohe awane.” Mai ati nawahani.
7Ahiyata‑ya mai‑ka hidi i‑di Bobiro tabaro tohe, Bobiro oda‑ya kasome, oda‑ya himane, tabaro‑ya oda winawaha, fara‑ya oda amoni fama, oda amoni oharimaki namaroni.
8I‑di Bobiro badi kiyane, kawine, yama kome ihi kawine, kowayaka hikanarime, kawine‑ya Baoro tokomaki, Bobiro badi‑ya yehe foriya, Deoso‑ya hiyare, ati ene Deoso hinakitamawahemarine.
9Bobiro badi kitami tamine‑ya mai mita, mai kiyana Baoro‑ya mai kama, mai nafi kitamamaroni.
10Oda‑ya mai kasomi dama, makobote maboro owa‑ya oda foyamabone, oda‑ka yama‑bone‑ya mai daanamakemaroni.
Homa‑ya Baoro kobonawahe
11Maota‑ya oda wina abariko 3 tohe, makobote maboro owa‑ya oda foyawaha, Aresadiriya‑ka maboro owa Maota‑ya ite, yama siriri fawanabone‑ya mai nimana, maboro oni ‘deoso wadi famane’, deoso oni Kasito owa toha, Borosi owa toha nane.
12Sirakosa‑ya oda kobokana, Sirakosa‑ya oda amoni fama one oharimaki namaroni.
13Oda towakatasa, Hekiyo‑ya oda kobokana, yama hakikini amosa ihi oda amoni ohare, Boteori‑ya oda kobokanamaroni.
14Boteori‑ya Yeso ati‑ya mai no‑nofa mai one wina, oda‑ya mai himanani, mai tabori‑ya oda winabonehe. Mai tabori‑ya oda amoni 7 kana, makobote Homa‑ya oda tokawahamaroni.
15Homa‑ya Yeso‑ka mai wi‑wina oda tamine‑ya mai mita, Abio Foro‑ya mai one kama, Tafena 3 kana toha‑ya mai one kama, oda‑ya mai kobona, mai‑ya Baoro awe, Deoso‑ya kahiyare, atibodi kitawahemarine.
16Homa‑ya oda kobona, sodado eyehe yobe‑ya Baoro wine, kadeya‑ya foyi awiremarine.
Homa‑ya mai wi‑wina, mai‑ya Baoro hiyarane
17Homa‑ya amoni fama, amoni oharimaki ne‑ya Yodeo mai‑ka hidi‑ya Baoro haane, mai kamake, mai‑ya hiyare,
“Owati dai mitahi. Dai owa ama·oni. Ai‑ka idi mai ati‑ya onofa, ai‑ka mai one okakoterani, mai‑ya wee·orihi oteni. Hiniya owa‑ya mai kako kofina, Yerosare‑ya owa‑ya mai daanineni, homano mai‑ya.
18Owati‑ya homano mai mita, owa ene sibara, owa‑ya mai nanahabarabone, owa‑ya mai seekanabone mai ati na.
19Owa‑ya mai seekanabone, Yodeo owa‑ya mai ati barina, mai ati ihi i‑di Sesa‑ya haa·ona, ai‑ka mai okakora, owa‑ya mai kako kofineni.
20Fara dai haa·ona, dai oawaboneni, owati dai mitabonehe. Isara·eo‑ka nodi ai nimane, tamine ohiyare ene koheti‑ya owa‑ya mai yaditoneni.” Baoro ati ne.
21Ati‑ya Yodeo‑ka hidi mai mita, mai ati yanana,
“Tiwa tamine‑ya mai kanahanoterani. Yodeya‑ya ai‑ka mai kamake, tiwa tamine towe‑ya mai hiyaraterani.
22Tiwati oda mitawahaboneni. Yeso ati‑ya dai no‑nofa, towe dai‑mone mai ati teni. Oda dami tiwati‑ya oda mitawahaboneni, yama oda watowahabonehe.” Mai ati namaroni.
23Mai kamatasi‑bone‑ka mahi tamine‑ya Baoro‑ya mai kamineni. Mai ati kami‑ke mahi kobone, mai one mai‑ya sawe, Baoro wini‑kaya mai kobona, yama wahabisari‑ya Baoro mai‑ya hiyari yanakane, Deoso tabaro tamine‑ya hiyare, Yeso tamine i‑di Mose hikanahanomata‑ya mai‑ya yofikana, Deoso ati‑ya mai mi‑mita‑mete Yeso tamine mai hikanahanomata‑ya mai‑ya yofikana nane. Mahi toke‑ya ati fawanemarine.
24Mai one Baoro ati‑ya nofa, mai one Baoro ati‑ya nofarihi namaroni.
25Baoro hiyari hawa tohi yanatoneya, mai ibi weena, mai‑ya hiyaramatase,
“Hibati‑ya Deoso‑ka Doni dai‑ka idi mai tamine‑ya kamine, ati‑ya Deoso ati‑ya mi‑mita‑mata i‑di Isa·iya kanahanomatane. Fare ati‑nima yama na,
26‘Mai‑ya tikama, mai tihiyariyahi. —Yama tamine‑ya dai mita, dai wato awiraboneni, dai kakatomiya, dai watorihi dai naboneni.—
27Mai habi si‑siirina, yama‑ya mai wato awiraboneni. Mai narabi hawi awira, yama tamine‑ya mai miti awira. Mai noki‑ya mai barina, yama‑ya mai awi awirabonehe. Owa‑ya mai haaniya, mai‑ya okasomabone ona, mai atibodi kita, owa‑ya mai haani awirani.’ Deoso ati nene.” Isa·iya‑ka yama hani ati nineni.
28“Owati dai mitahi. Bara mai‑ya Deoso ati tokawahebona, Deoso ati‑ya mai nofabisaboneni, Deoso mai‑ya kasomebonane.” Baoro ati nemarine.
29Baoro ati fawaneya, Yodeo mai tokoma, mai ibi weenamoneni.
30Faha fowe fami‑ya Homa mai‑ka yobe‑ya Baoro wine, yobe hidi‑ya manakone‑ya daanemarine. Mai kamake, mai‑ya hiyare,
31Deoso tabaro tamine‑ya hiyara, Yeso Kirisito ai‑ka hidi tamine‑ya hiyara nemarine. Baoro habo kite, mai ati barihiterene.
လက်ရှိရွေးချယ်ထားမှု
Yeso‑ka yo‑yose mai tamine 28: jaaNT
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ