Yeso‑ka yo‑yose mai tamine 27
27
Homa‑ya Baoro tokawahe
1Itariya‑ya oda tokabone, i‑di Yoriyo‑ya Baoro‑ya mai daana, mai one sokina‑ya mai daanineni, i‑di Yoriyo mai hiwakamabonehe Itariya‑kaya. Sesa Akosito‑ka sodado hidi i‑di Yoriyo tohane.
2Adaramitio‑ke maboro Asiya‑ka faha kabane‑ya tokebona‑ya oda foyineni. I‑di Aritako oda‑ya sawi, hika tabora bide oni Tesaronika toha, hika tabora webote oni Masedoni toha nineni.
3Mahi owa‑ya Sidoho‑ya oda kobona, Sidoho‑ya Yoriyo ati ene i‑di Baoro hini hika mai‑ya tokane, Baoro‑ya mai kasomabonehe. Yoriyo Baoro‑ya nofane, Baoro‑ya kasome ene Baoro ya‑yainebonane.
4Maboro‑ya oda foyama, oda towaka, Sibe yakari‑ya oda towaka, yama hakikini ihi oda towaki amosarani.
5Sirisiya‑ya oda fiyakana, Banafiriya‑ya oda fiyakanamake, Risiya‑ka tabora bide Mira‑ya oda kobokanineni.
6Mira‑ya maboro owa Aresadiriya‑ke tohe, Itariya‑ya tokebona, Sodado hidi ati ene oda foyawaha,
7Oda amoni dama, oda towaka, yama hakikini ihi oda to‑towakarabana, Sinido oda fiyakana, yama hakikini ihi Kereta‑kaya oda towaka, Kereta yakari‑ya oda towaka, Saromona oda fiyakanamakineni.
8Yama hakikini fawara, oda towakarabana, Boho Boto‑ya oda kobokawaha, Raseya yakari‑ya Boho Boto tohineni.
9Yama hakikini ihi Boho Boto‑ya oda kobokana, yama siriri koboni yanatoneni. Yama siriri‑kaya maboro tokaterene, mai bokarabonehe. Oda tafari‑ke mahi hibati‑ya fiyakaneya, mai‑ya Baoro hiyare,
10“Owati dai mitahi. Ai towakariyahi, ai tokiya, maboro aba, yamata aba, ai aba naba awineni.” Baoro ati ne.
11Sodado hidi Baoro ati‑ya nofare, maboro hidi ati‑ya nofabisane.
12Mai dama mai hiyara,
“Yama siri yanatona, abariko 4 tohamakiya, siriri fawanaboneni. Boho Boto‑ka faha kabane amosara‑ya ai winaraboneni. Kereta‑ka faha kabane one oni Fenisi toha, Fara‑ya ai tokabisiya, Fenisi‑ka faha kabane‑ya ai winiya, amosaboneni. Fenisi‑ka faha kabane‑ka adami dori kowe ihi wini amosateni.” Mai ati namaroni.
Yama hakikini kita, mai‑ya kobonawaha
13Mahi toki beheri‑kaya yama hakikini bide kake,
“Yama sibarineni.” Mai ati na,
Maboro ma‑maakana‑ka yama‑ya mai idimisa, maboro‑ya mai yananima, Kereta yakari‑ya oda towakabasa,
14Yama yakari‑ya oda wasike kabani‑kaya boni kita kake,
15Maboro‑ya boni kobona, boni hakikini ihi faha beheri‑kaya maboro oda‑ya towakawahene.
16Faha teberi oni Kaoda toha‑ya oda fiyakani yanatoniya, oda dama, oda‑ka yama anini kita, maboro webote bari‑ya maboro bidi‑ya oda ide, maboro bidi‑ya oda tonaforimisineni, maboro bidi bokarebonaha.
17Maboro abarebona, bai oda sokikana, faha kowira, siki‑ya oda koborabone, bora ibe waana‑ya mai nakisamineni. Yama hakikini kita ihi oda towakineni.
18Mahi owa‑ya yama hakikini kita ihi oda kabokarabone, maboro doro‑ka yama‑ya mai weretofineni.
19Mahi owa‑ya yama hakikikani fawara, maboro‑ka yama one mai weretofimakineni.
20Oda amoni dama mahi oda awarihi, amowa mai oda awarihi na, yama hakikini oda‑ya towaka,
“Ai abawahibaka amani.” Oda nafi ati namaroni.
21Oda amoni dama, yama yofina ihi oda tafara, mai bai‑ya Baoro waamise, mai‑ya hiyare,
“‘Kereta‑ya ai winahi.’ Ona.
Owati‑ya dai nofarani. Kereta‑ya ai wina‑mani, maboro‑ka yama abara neni.
22Dai ya‑yainahi. Ai abi awiraboneni. Maboro‑ta abebonane.
23Yama soki‑ya Deoso‑ka yo‑yose owa fowari‑kaya waane, fare Deoso‑ka ama·oni. Deoso okahiyarateni.
24Owa‑ya hiyare,
‘Baoro, tiwa habo si‑siiririyahi. Sesa‑ya tikaboneni. Tiwa‑ya mai sa‑sawi Deoso ene mai nafi hasinaboneni. Mai abi awiraboneni.’ Ati nemarine.
25Fara dai habo kitaharihi. Deoso ati onofa, Deoso ati‑nima yama naboneni.
26Faha teberi‑ya ai koboni hawa tohiya, maboro abebonane.” Baoro ati nemarine.
Maboro abawahe
27Oda amoni 14 kana yama hakikini ihi oda towakanasa namaroni. Adiri·atiko faha‑ya oda toha, yama soki bai‑ya wami yakari‑ya oda kobona, yama‑ya mai watowahani.
28Maboro yati‑ya koborebona, faha‑ya mai midikana, 36 metoro toha, hasini bide tohiya, mai midihikanamatasa, 27 metoro tohawahani.
29“Yati‑ya ai koboriyahi.” Mai ati na.
Maboro ma‑maakana‑ka yama 4 toha‑ya maboro yodi‑kaya mai weretofemaroni. Deoso‑ya mai hiyara, yama wahi‑ya mai nimanamaroni.
30Maboro‑ka mai one maboro bidi‑ya mai tokabone,
“Maboro ma‑maakana‑ka yama one oda weretofiba.” Mai ati nani, mai kananabonehe.
Maboro bidi‑ya mai nakisamineni.
31Baoro mai‑ya awe, sodado mai‑ka hidi, hika sodado mai na‑ya hiyare,
“Mai tokariyahi. Mai tokiya, dai nafi ababoneni.” Baoro ati nemarine.
32Baoro ati ene sodado maboro bidi‑ka mado‑ya mai tiikasa, maboro bidi bokane.
33Yama wahabisari‑ya Baoro mai‑ya hiyare,
“Dai tafahi. Ai amoni 14 toha, dai tafarani.
34Dai tafawahahi, dai kitibakaro. Dai tati kone ohare abi awiraboneni. Dai abaraboneni.” Baoro ati nemarine.
35Ati fawane, baho‑ya damakane, Deoso‑ya hiyare,
“Abi Deoso, tika yamata oda kayafawahini.” Ati ne.
Mai nafi hiwakatome, baho‑ya bakanakose, baho‑ya kabawahemarine.
36Mai ya‑yainawaha, yamata‑ya mai nafi kabawahani.
37Maboro‑ka oda dama, 276 oda tohamaroni.
38Mai tafi hawa toha, mai korimanama, yamata one‑ya mai weretofineni, mai‑ka maboro bokarebonaha.
39Yama wahabisari‑ya yama‑ya mai kiinamina, faha teberi bara toha, teberi‑ya mai watora. Faha bide batori‑ya mai awa,
“Faha bide‑ya ai towakamahi. Maboro tokeba awane.” Mai ati namaroni.
40Maboro ma‑maakana‑ka mado‑ya mai wisihina, faha‑ya towitakosa, teme mai hinakisama, hika bora ohare mai yadihinama namaroni, faha widi‑ya mai tokabonehe.
41Faha bide batori‑ya oda tokabone, maboro bono siki‑ya towe ene maakanemarine. Faha rike kita ihi yodi bakatonemarine.
42“Mai yaditona mai one faha‑ya diboni tokarabone, mai nafi ai nanahabahi.” Sodado mai ati na.
43Sodado mai‑ka hidi Baoro‑ya nofe, sodado mai‑ya ati barine,
“Mai dai nanahabariyahi. Faha diboni‑ya dai wata, dai diboni dai toha, faha widi‑ya dai kobonahi.
44Faha diboni‑ya dai watora, awa ibe‑ya dai one towaka, maboro ebe‑ya dai one towaka nahi, dai nafi.” Sodado mai‑ka hidi ati nemarine.
Fara faha widi‑ya mai koboneni, mai nafi.
လက်ရှိရွေးချယ်ထားမှု
Yeso‑ka yo‑yose mai tamine 27: jaaNT
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ